Muhihiye Weettela Waamini

1. Xeeni Paulo ahaareere awe ohakalala ni moota aarumenle awe okumi awe?

MURUMMWA Paulo, aanisuwela wiira moohipisa aamwiiviwa. Masi owo aanihakalala vanceene vaavo uupuwelela awe itthu sooreera aapanke awe mookumini mwawe. Owo aahimmye so: “Kootthimaka mpakha ophiya oponta, kootthara waamini”. (2 Tim. 4:​6-8) Paulo aanisuwela wiira aahihakalaliha murima wa Yehova, okhala wiira ntoko mukristau owo aahipaka soothanla sooloka mookumini mwawe. Nave-tho hiyo, nihaana opaka soothanla sooloka wiira nimuhakalalihe Yehova. Nto ninrowa opaka sai eyo?

2. Weettihiwa ni waamini, onitaphulela exeeni?

² Aihimyaka mwaneene ni makristau makina oororomeleya, Paulo aahimmye so: “Hiyo nneettihiwa ni waamini, ohiya ni itthu sinoona ahu”. (2 aKor. 5:7) Moolumo ala a Paulo, antaphulela exeeni? Mbiibiliyani, nuulumo noowi ‘weetta’, ikwaha sikina nintaphulela mweettelo mutthu onithanla awe mookumi mwawe. Mutthu ohinimwaamini Yehova, onnipaka soothanla ottharaka ele oniweha awe, oniiwa awe ni moonelo awe. Moovikana ni vo, mutthu oneettihiwa ni waamini, onnipaka soothanla ottharaka moonelo wa Yehova. Miteko onivara awe, sinnooniherya wiira onnikupali wiira Yehova onrowa omureeliha. Nave owo onnikupali wiira atthara miruku sa Yehova siri mbiibiliyani, onookhalana okumi woohakalaliha. — Esal. 119:66; aHeeb. 11:6.

3. Weettihiwa ni waamini, onrowa onimphwanyiha mureerelo xeeni? (2 aKorinto 4:18)

³ Ekeekhai wiira ootheene ahu, ninnipaka soothanla nttharaka ele nnoona ahu, nniiwa ahu ni moonelo ahu. Masi, akhala wiira okathi nimpaka ahu soothanla suulupale ninroromela paahi itthu nniiwa ahu ni nnoona ahu, woonasa wene nnookhalana mixankiho. Mwaha wa xeeni? Mwaha woowi, khahiyo khula okathi itthu nniiwa ahu aahiiso nnoona ahu ti soororomeleya. Vakhala wiira nimpaka soothanla niwehaka itthu nniiwa ahu ni moonelo ahu paahi, nimmalela opaka yoothanla ehinrowa omusivela Yehova. (Mus. 11:9; Math. 24:​37-39) Masi vakhala wiira nneettihiwa ni waamini, nnoopaka soothanla “sinaasivela Apwiya”. (aEef. 5:10) Ohiya-vo, otthara miruku sa Muluku, sinooniphwanyiha murettele wa mmupuweleloni ni ohakalala weekeekhai. (Esal. 16:​8, 9; Yes. 48:​17, 18) Nave, naahihiye weettihiwa ni waamini, nnoophwanya okumi woohimala. — Mmusome 2 aKorinto 4:18.

4. Ninsuwela sai vakhala wiira mutthu oneettihiwa ni waamini aahiiso ni itthu oniweha awe?

⁴ Ninrowa osuwela sai vakhala wiira nneettihiwa ni waamini aahiiso ni itthu nnoona ahu? Wiira nisuwele, nihaana wiikoha so: ‘Kinuupuwela exeeni vaavo kinipaka aka soothanla? Kiireke kinuupuwela paahi itthu kinwerya aka oweha? Aahiiso kinipaka soothanla kittharaka moonelo wa Yehova?’ Mwaha ola, nnooweha moota nikhanle ahu oohihiya weettihiwa ni waamini ni iponto iya tthaaru sinttharelana: 1) Okathi ninthanla ahu muteko, 2) vaavo nnimuthanla ahu ole ninrowa ahu othelana ni 3) vaavo nnaakhela ahu malakiheryo mmutthenkesoni mwa Yehova. Nto khula eponto, nnooweha itthu sinrowa onikhaliherya opaka soothanla sooloka.

OKATHI MUNITHANLA ANYU MUTEKO

5. Exeeni ninreerela ahu wuupuwela okathi ninthanla ahu muteko?

⁵ Ootheene ahu, ninnipaka ele eniwerya ahu, wiira nikhalaneke yoolya ni okhapelela emusi ahu. (Mus. 7:12; 1 Tim. 5:8) Masi sookhala miteko siniliviwa musurukhu munceene ovikana sikina. Miteko iyo, vanniweryaneya namuteko okhapelela emusi awe ni opweha musurukhu para muhoolo. Nto miteko sikina, namuteko oniphwanya musurukhu paahi para okhapelela emusi awe. Ekeekhai wiira vaavo ninthanla ahu muteko, nnimuupuwela musurukhu ninrowa ahu waakhelaka. Masi vakhala wiira nnuupuwelela paahi musurukhu ninrowa ahu waakhelaka, eyo enooniherya wiira khanneettihiwa ni waamini.

6. Ninrowa weettihiwa sai ni waamini okathi ninthanla ahu muteko woovara? (aHeeberi 13:5)

⁶ Mutthu oneettihiwa ni waamini, onnuupuwela vakhala wiira muteko onrowa awe ovaraka khonrowa waafetari ompatthani awe ni Yehova. Owo ohaana wiikoha so: ‘Kireke muteko ola khonirowa okiiriha opaka etthu Yehova oninyokha awe?’ (Mir. 6:​16-19) ‘Kiireke muteko ola, onookiiriha ocompela mithukumano aahiiso ohikhalana okathi woolaleerya ni omusoma Biibiliya? Kiireke muteko ola onookiiriha oviriha okathi munceene kittaivelanne ene ni emusi aka?’ (aFil. 1:10) Vakhala wiira nookhala nikoho munaakhula anyu wiira aayo, vaamukhala va miruku oheemererya muteko owo, hata moonaka wiira vanooxankiha ophwanya muteko mukina. Okhala wiira nneettihiwa ni waamini, ninnipaka soothanla sinooniherya wiira ninniroromela wiira Yehova onoonivaha itthu nimpirisari ahu. — Math. 6:33; mmusome aHeeberi 13:5.

7-8. Munna mmosa a wAmérica do Sul, eettenle sai waamini? (Nwehe efootu.)

⁷ Olavulaka sa efaita erina aya weettihiwa ni waamini, munna mmosa oniitthaniwa Javier,a yoowo onikhala wAmérica do Sul, onihimya so: “Kaahiphwanya muteko yoowo kaaphavelexa aka, kaarowaka oliviwaka musurukhu munceene ovikana muteko kaavara aka khalai”. Nave-tho Javier, aaniphavela vanceene okhala pioneero. Owo onnincererya oriki: “Kaahileeliwa nihiku kaarowa aka winterevistariwa, masi nihinatthi ophiya nihiku nne, miyo kaahinvekela Yehova wiira okikhaliherye. Kaahipaka eyo, okhala wiira kaanikupali wiira Yehova aanisuwela etthu eri yooloka para miyo. Kaaphavela muteko wooloka ni oniliviwa musurukhu munceene, masi wahaarowa okikhoottiherya wuncererya muteko kininvarela aka Yehova”.

⁸ Javier onihimya so: “Mulipa aakinterevistari, aahikileela wiira kaahaana ovaraka muteko mahiku manceene ni iwoora sinceene. Mwa nttittimiho, miyo kaahimutthokiherya wiira nkaawerya opaka eyo, okhala wiira nkaarowa okhalanaka okathi woomukokhorela Muluku”. Nto Javier aahilakela oheemererya muteko ole. Nuuvira isumana piili owo aahikhala pioneero. Nave nuuvira okathi mwaakha ene yoowo, owo aahiphwanya muteko yoowo aavara awe mahiku vakhaani. Owo onihimya so: “Yehova ohiiwa mavekelo aka ni ookikhaliherya ophwanya muteko, onikeemererya okhala pioneero. Miyo kinnihakalala vanceene, okhala wiira muteko kinivara aka, onnikivaha okathi woomurumeela Yehova ni waakhaliherya anna ni arokora”.

9. Yoowiiraneya ya Trésor, eniwiixuttihani exeeni?

⁹ Ankhi vakhala wiira muteko ninvara ahu niinaano-va, onninikhoottiherya weettela waamini? Nrowe nthokorerye yoowiiraneya ya munna mmosa onikhala oCongo, oniitthaniwa Trésor. Owo onihimya so: “Miyo kaahiphwanya muteko yoowo kaaphavelexa aka. Kaaniliviwa musurukhu munceenexa ovikana muteko kaavara aka khalai, ni kaanittittimihiwa ni atthu”. Ikwaha sikina, Trésor aanicompela mithukumano okhala wiira aanivara muteko iwoora sinceene. Nave-tho, owo aanikhanyereriwa waawoka makiliyenti. Trésor aaniphavela ohiya muteko ole, masi aamoova ohiphwanya muteko mukina. Exeeni yaamukhalihenrye? Owo ohimmye so: “Eliivuru ya Habakuki 3:​17-19, yookikhaliherya woona wiira khula okathi Yehova onookikhapelelaka, hata kaarowa ohiya muteko ole ni ophwanyaka musurukhu vakhaani. Nto kaahivekela ohiya muteko ole”. Owo onitthokiherya so: “Mapatarau vanceene, anuupuwela wiira vakhala wiira animwaaliva musurukhu munceene anamuteko aya, awo anoopaka khula etthu aniwerya aya, avirihaka okathi avaraka muteko, ohela muhina okathi yaarowa aya ovirihaka ni emusi ni amukokhorelaka Muluku. Miyo kinnihakalala osuwela wiira kookhapelela waataana waka ni Yehova vamosa ni emusi aka. Nuumala eyaakha emosa, Yehova aahikikhaliherya ophwanya muteko yoowo kiniliviwa aka musurukhu onikikhaliherya miyo ni emusi aka, ni onikeemererya okhalana okathi woovara miteko sa Yehova. Okathi nimmuhela ahu Yehova nipuro noopacerya, hiyo pooti oniphwanya mixankiho ntoko othoiwa musurukhu. Masi khula okathi Yehova onoonikhapelelaka!” Vakhala wiira nnootthara miruku sa Yehova ni ororomela sooleiherya sawe, nnoopakaka soothanla sinooniherya wiira nneettihiwa ni waamini nave owo onoonireeliha.

VAAVO NIMMUTHANLA AHU OLE NINROWA AHU OTHELANA

10. Mutthu onrowa wooniherya sai wiira oneettihiwa ni itthu onoona awe, vaavo onimuthanla awe ole onrowa awe othelana?

¹⁰ Ekasamento yoovaha enikhuma wa Yehova, nave mutthu pooti othanla othela aahiiso otheliwa. Mwa ntakiheryo, vaavo murokora onimwaavya awe ole onrowa awe othelana, owo pooti owehaka itthu ntoko mikhalelo sawe, moota ori awe, mweettelo awe, moota onikhapelela awe musurukhu awe, enamuna onaakhapelela awe amusi awe ni vakhala wiira owo onoomukhaliherya okhala oohakalala.b Khahiyo ti vootthekeya oweha itthu iya sootheene. Masi vakhala wiira oniwehexexa paahi itthu sene seiya, owo onrowa weettihiwaka ni itthu onoona awe.

11. Nipakeke exeeni enooniherya wiira ninneettela waamini okathi nimmuthanla ahu ole ninrowa ahu othelana? (1 aKorinto 7:39)

¹¹ Yehova onnihakalala vanceene aawehaka anna ni arokora, attharaka miruku sawe okathi animuthanla aya ole anrowa aya othelana! Mwa ntakiheryo, awo anniiwelela miruku sa olipelela mpakha ‘ovira iyaakha sa omiravo’ ahinatthi opacerya onamorari. (1 aKor. 7:36) Ohiya-vo, awo annoona wiira mutthu anrowa aya othelana ookhala mikhalelo sooloka seiyo Yehova onivekela awe. (Mir. 31:​10-13, 26-28; aEef. 5:33; 1 Tim. 5:8) Nave awo khaninamorari ni mutthu ohikhanle Namoona a Yehova. Awo annitthara miruku sinihimya wiira ahaana othela aahiiso otheliwa “mwa Apwiya paahi”, siri 1 aKorinto 7:39. (Mmusome.) Awo khanihiya weettihiwa ni waamini aroromelaka wiira Yehova okathi wootheene, onimwaakhaliherya okhalana muupuwelo wooloka. — Esal. 55:22.

12. Exeeni mwiixuntte anyu ni ntakiheryo na Rosa?

¹² Nwehe etthu emosa yaamwiiranenle pioneera mmosa onikhala oColômbia, oniihaniwa Rosa. Mwaha wa muteko awe, owo aanipaseyari ikwaha sinceene ni mulopwana mmosa ahaakhanle Namoona a Yehova ni aasiveliwe ni yena. Nave Rosa aahipacerya osiveliwa ni mulopwana ole. Rosa onitthokiherya so: “Owo aakhala mwa mulopwana ooreera murima. Aanisiveliwa waakhaliherya atthu akina nave okumi awe waari woohaattiheriwa itthu. Ohiya-vo, owo aanikithokorerya oratteene. Aahikhalana mikhalelo sootheene mulopwana oothela onireerela awe okhalana, masi khahiyo aari Namoona a Yehova. Okathi ole, kaaniixoona okhala mekhaka. Miyo kaaniphavela otheliwa, masi nkamphwanhe munna mmulokoni. Tthiri vaari voovila omuleela wiira nkaaphavela onamorari ni yena, okhala wiira kaaniphavela otheliwa”. Hata vari siiso, eyo khiyaamwiirinhe Rosa opaka etthu ele yoohiloka, okhala wiira kheettihiwa ni itthu oona awe. Owo aahuupuwela etthu yaarowa wiiraneya ni waataana wawe ni Yehova, vakhala wiira aamweemererya onamorari ni mulopwana ole. Nto Rosa aahilakela ohiya ovaanela ni mulopwana ole ni aanikhalela nthiti ovara miteko sa Yehova. Muhoolo mwaya, owo aahilattuliwa orowela Eskola ya Anamalaleerya a Omwene ni olelo-va, onirumeela ntoko pioneera a vameekha aya. Owo onihimya so: “Miyo kinnihakalala vanceene mwaha wa mareeliho Yehova okivahale awe”. Ikwaha sikina, khivanikweya weettela waamini, otepexa wene, okathi nimphavela ahu etthu ennisivela. Masi vaavo nneettihiwa ahu ni muupuwelo wa Yehova, okathi wootheene ninniphwanya mareeliho.

VAAVO NNAAKHELA AHU MALAKIHERYO MMUTHENKESONI MWA YEHOVA

13. Etthu xeeni yaakela oniiriha weettihiwa ni itthu ninweha ahu, vaavo ninvahiwa ahu malakiheryo mmutthenkesoni mwa Yehova?

¹³ Ikwaha sinceene, ninnaakhela malakiheryo mmutthenkesoni yaawo annikhaliherya omurumeela Yehova mwa enamuna yooloka. Hiyo pooti ovahiwaka malakiheryo awo, ni axitokweene a muloko ahu, axitokweene a esirkwiitu, anna a oBeteli ni anna a Nikhuuru Noolamulela. Ankhi vakhala wiira khinniiwexexa oratteene malakiheryo awo ninvahiwa ahu? Woonasa wene, pooti opacerya ohoverya vakhala wiira malakiheryo awo annivareleya muteko para hiyo. Nave pooti opacerya owehexexaka ifaalya sa anna awo annivaha malakiheryo.

14. Etthu xeeni enrowa onikhaliherya wiiwelela malakiheryo a mmutthenkesoni mwa Yehova? (aHeeberi 13:17)

¹⁴ Vakhala wiira nnimweettela waamini, nnookupaliki wiira Yehova tonnivaha malakiheryo awo ni wiira owo onnisuwela oratteene makhalelo a khula mmosa a hiyo. Nto eyo, ti etthu enniiriha wiiwelela malakiheryo nnaakhela ahu ni moonelo wooloka. (Mmusome aHeeberi 13:17.) Ninnisuwela wiira wiiwelela, onnikumiherya wiiraana mmulokoni. (aEef. 4:​2, 3) Hata anna awo annivaha malakiheryo ari ene oottheka, hiyo ninnikupali wiira Yehova onoonireeliha vakhala wiira nnoowiiwelela. (1 Sam. 15:22) Masi vakhala wiira vannireerela opakiwa marukunuxo mmutthenkesoni mwa Yehova, owo onoopaka eyo okathi wooreerela. — Mik. 7:7.

15-16. Etthu xeeni yaamukhalihenrye munna ole wiiwelela malakiheryo masya nnaamwi ahiiwexenxe? (Nwehe efootu.)

¹⁵ Nwehe ntakiheryo nnooniherya oreera waya weettihiwa ni waamini ni wiiwelela malakiheryo a mmutthenkesoni mwa Yehova. Atthu anceene a oPeru, anlavula Espanyola, masi akina anilavula mattaava makina a elapo ele. Nimosa na mattaava awo, eQuechua. Mwa iyaakha sinceene, anna yaanaalaleerya atthu yaalavula eQuechua. Masi, wiira yeettele malakiheryo a kuvernu, anna ale yaahipaka marukunuxo a moota yaakhanle aya oowaalaleerya atthu yaalavula nttaava nne. (aRom. 13:1) Mwaha woopaka eyo, anna akina yaahipacerya wiikoha vakhala wiira marukunuxo ale, khiyaarowa ohonona muteko woolaleerya para nttaava nne. Masi okathi anna ni arokora yaiwelenle aya malakiheryo ale, Yehova aahireeliha wiimananiha waya yaalaleeryaka atthu yaalavula nttaava na eQuechua.

¹⁶ Kevin, mutokweene mmosa onikhaliherya muloko onilavuliwa nttaava na eQuechua, aari mmosa a anna yaaxankale mwaha wa marukunuxo ale. Kevin onitthokiherya so: “Miyo kaaniikoha so: ‘Ninrowa waaphwanya woowi atthu anilavula nttaava na eQuechua?’” Exeeni Kevin aapanke awe? Owo onihimya so: “Miyo kaanuupuwelela moolumo ari Miruku 3:​5, ni ntakiheryo na Moise. Yehova aahinvaha malakiheryo Moise, yaakhala wiira khiyaavareleya muteko. Vaavo aisarayeli yaatthyawa aya wExiitu, Yehova aahimuleela Moise wiira aavirihe ephiro yaamalela Ephareya Yooxeerya. Vaakhala wiira otthara malakiheryo ale waamwaakumiherya mixankiho, eyo piiyo, vaamukweya ovariwa ni anakhotto a wExiitu. Hata vari siiso, Moise aahiiwelela. Nave Yehova aahaareeliha aisarayeli opakaka mwiiriirya wootikiniha wiira owoopole atthu awe”. (Okhum. 14:​1, 2, 9-11, 21, 22) Hata Keven aaxankale, owo aaniphavela orumeela inamuna sikina sa olaleerya. Exeeni yaakhumelenle? Owo onihimya so: “Vaari vootikiniha oweha moota Yehova onireelinhe awe. Khalai, naanilaleerya mittetthe sinceene niwaavyaka atthu yaalavula nttaava na eQuechua, masi namphwanya mutthu mmosa aahiiso atthu anli. Masi vano, ninlaleerya paahi mapuro yaale ahireere aya atthu anlavula nttaava nlo. Vano ninniwerya olavula ni atthu anceene, nave nookhalana irevisiita ni soosoma sa Biibiliya sinceene. Ohiya-vo, ahincerereya atthu anrweela mithukumano”. Moohaanyiherya, Yehova onoonireelihaka khula okathi naahihiye weettihiwa ni waamini.

17. Exeeni mwiixuntte anyu mwaha ola?

¹⁷ Mwaha ola, noothokorerya moota woohihiya weettihiwa ni waamini ni iponto tthaaru sirina efaita yuulupale. Masi, nihaana ohihiya weettihiwa ni waamini ni myaha sikina sa mookumini mwahu. Mwa ntakiheryo, nihaana weettihiwa ni waamini vaavo ninthanla ahu iviidiyu ninweha ahu, enamuna ninrumeela ahu okathi ahu, soothanla voohimya sa osoma iskola suulupale aahiiso kursu ni moota wowaahuwa anamwane. Khula yoothanla nimpaka ahu mookumini mwahu, nihaana weettihiwa ohiya paahi ni itthu ninweha ahu. Masi nihaana wuupuwela moota enrowa aya waafetari waataana wahu ni Yehova, nave nihiliyalaka wiira otthara miruku sa Yehova etthu yooloka ni khula okathi owo onoonikhapelelaka. Napaka eyo, “nnowettela Apwiya Muluku ahu mpakha mahiku othene”. — Mik. 4:5.