“Mmuthanle Onimutthunanyu Omurumela”

1. Etthu xeeni ninreerela ahu opaka naaphavelaka ophwanya ohakalala weekeekhai, ni mwaha wa xeeni? (Yesaya 48:17, 18)

TIITHI AHU a wiirimu, onniniphenta vanceene. Nave oniphavela wiira nipuheke okumi niinaano-va ni muhoolo. (Mus. 3:12, 13) Owo onipattunxe wiira niweryeke opaka itthu sooloka. Masi owo khaapattunxe apinaatamu wiira alamulelaneke yaawo-ru, nnakhala ohimya ele eri yooloka aahiiso yoohiloka. (Mus. 8:9; Yer. 10:23) Owo onnisuwela wiira naaphavelaka ophwanya ohakalala weekeekhai, nihaana omurumeela ni wiiwelela malamulo awe. — Mmusome Yesaya 48:17, 18.

2. a) Satana oniphavela onikupaliha exeeni? b) Etthu xeeni Yehova opanke awe?

² Satana oniphavela onikupaliha wiira nnoophwanya ohakalala weekeekhai, nihikhaliheriwaka ni Yehova ni wiira apinaatamu anookhumela saana yiilamulelaka. (Maph. 3:4, 5) Ophavelaka wooniherya wiira Satana nawoothe, Yehova ooweemererya apinaatamu wiira yiilamuleleke mwa okathi vakhaani. Itthu sooriipiha murima siniiraneya, vannooneya oratteene wiira apinaatamu, khaniwerya wiilamulela. Masi Biibiliya, onnaaromola alopwana ni athiyana anceene yaawo yaaphwannye ohakalala weekeekhai, mwaha woothanla omurumeela Yehova. Mmosa a yaawo, aari Yesu Kristu. Mwaha ola, nnoorowa wiixutta xeeni Yesu aathanlale awe omurumeela Yehova. Moottharelana, nnooweha xeeni Yehova oniphwanela awe okokhoreliwa. Nuumala-vo, nnimuupuwela itthu siniirihale othanla omurumeela Yehova.

XEENI YESU AATHANLALE AWE OMURUMEELA YEHOVA?

3. Satana anvahale exeeni Yesu, nto Yesu aathanlale opaka exeeni?

³ Okathi aari awe valaponi, Yesu aahaana omuthanla ole aarowa awe omurumeelaka. Moohipisa nuumala Yesu opatisiwa, Satana aahimuleela Yesu wiira aamunvaha omwene wootheene wa mulaponi ni ovuwa waya, vakhala wiira ammukokhorela ekwaha emosa paahi. Vano Yesu, aahimwaakhula wiira: “Khuma-va, Satana! Maana voolempwa wira: ‘Mmukokhoreleke Yehova Muluku anyu, ni mmurumeeleke yoowo paahi’”. (Math. 4:8-10) Xeeni Yesu aathanlale awe opake eyo? Nrowe nthokorerye itthu saamwiiriha opaka eyo.

4-5. Itthu xeeni saamwiirihale Yesu othanla omurumeela Yehova?

⁴ Etthu yoopacerya ni yuulupale yaamwiiriha Yesu othanla omurumeela Yehova, ti ophenta. Tthiri Yesu annimphenta vanceene Tiithi awe. (Yoh. 14:31) Yesu aahithanla omurumeela Yehova, okhala wiira yaari yoothanla yooloka aakhanle awe oopaka. (Yoh. 8:28, 29; Wiis. 4:11) Nave Yesu aanisuwela wiira Yehova tori maphattuwelo a okumi, oororomeleya ni oovaha. (Esal. 33:4; 36:9; Yak. 1:17) Okathi wootheene, Yehova aanimuleela ekeekhai nave itthu sootheene Yesu aarina awe, saakhuma wa Yehova. (Yoh. 1:14) Masi Satana toovirikana vanceene ni Yehova, okhala wiira Satana ohaakumiherya atthu etampi ni okhwa. Nave Satana nawoothe, nanrima ni oniphavela mureerelo awe. (Yoh. 8:44) Okhuma khalai, Yesu aanimusuwela saana Yehova ni aanimusuwela Satana. Tthiri Yesu khaaphavela omutakiha Satana, ohiyaka omwiiwelela Yehova. — aFil. 2:5-8.

⁵ Etthu ekina yaamwiiriha Yesu othanla omurumeela Yehova, okhala wiira owo aaniwehexexa itthu sooloka saarowa okhumelela, mwaha wa ororomeleya wawe. (aHeeb. 12:2) Owo aanisuwela wiira ororomeleya wawe, aamwiiriha otteeliha nsina na Tiithi awe ni vanweryaneya omaliha etampi ni okhwa, yeeyo ekumiheriwe ni Diabo.

XEENI YEHOVA ONIPHWANELA AWE OKOKHORELIWA?

6-7. a) Xeeni atthu anceene olelo-va ahinimurumeela aya Yehova? b) Xeeni Yehova oniphwanela awe okokhoreliwa?

⁶ Atthu anceene, khanimurumeela Yehova okhala wiira khanisuwela mikhalelo sooreera orina awe ni itthu sooreera onaapakela awe. Atthu awo anoolikana ni ale Paulo aalalenrye awe wAthena. Awo nave khiyaamusuwela Muluku. — Mit. 17:19, 20, 30, 34.

⁷ Paulo aahaaleela atthu a wAthena wiira Muluku “tonaavaha atthu iphumu, okumi ni itthu sotheene”. Ni aahincererya oriki: “Mwaha wa yoowo, hiyo nookhalana okumi, ninneetta, ni nookhala”. Muluku tori Mpattuxa, owo “ohaakumiherya atthu a maloko otheene, wira akhaleke elapo yotheene ya vathi”. Nto Yehova paahi, toniphwanela okokhoreliwa. — Mit. 17:25, 26, 28.

8. Etthu xeeni Yehova ohinikhala-khala awe opakaka? Mutthokiherye.

⁸ Okhala wiira Yehova tori Mpattuxa ni Mukhulupale a olumwenku wootheene, owo anwerya waakhanyererya atthu wiira amurumeeleke. Masi Yehova khonikhala-khala opakaka eyo. Ohiya-vo, owo oonivaha itthu sinceene sinooniherya wiira ookhala ni onnimphenta vanceene khula mmosa a hiyo. Owo oniphavela wiira atthu anceene akhale apatthani awe para mahiku ootheene. (1 Tim. 2:3, 4) Tivonto Yehova onniixuttiha awe moota woowaaleela atthu akina itthu sooreera ni itthu onrowa awe waapakela. (Math. 10:11-13; 28:19, 20) Owo oonivaha miloko wiira nimukokhoreleke ni okhaliheriwa ni axitokweene. — Mit. 20:28.

9. Itthu xeeni sinooniherya wiira Yehova onnaaphenta atthu ootheene?

⁹ Yehova onninooniherya ophenta wawe, onivahaka itthu sooreera ni aavahaka hata atthu yaale ahinikupali wiira owo ookhala. Muupuwele ela: Okhuma khalai, atthu anceene annithanla opaka ele anoona aya okhala yooloka ni yoohiloka, ohiya omwiiwelela Muluku. Hata vari siiso, Yehova onnaavaha itthu anipirisari aya wiira akhaleke akumi ni apuheke okumi owo. (Math. 5:44, 45; Mit. 14:16, 17) Yehova onnaavaha atthu awo apatthani, emusi enaaphenta, nave awo annaayara anamwane, annivara muteko ni annoolya ni opuha mwaha wa sooreera amphwanya aya. (Esal. 127:3; Mus. 2:24) Tthiri itthu iya ni itthu sikina, sinnooniherya wiira Tiithi ahu a wiirimu, onnaaphenta apinaatamu ootheene. (Okhum. 34:6) Vano, nrowe nuupuwelele itthu siniirihale othanla omurumeela Yehova ni mareeliho aniphwanya aya ale anithanla omurumeela.

ITTHU XEENI SINIIRIHALE OTHANLA OMURUMEELA YEHOVA?

10. a) Etthu xeeni yoopacerya ni yuulupale eniirihale othanla omurumeela Yehova? (Matheyo 22:37) b) Mwa enamuna xeeni Yehova oolevelenlaaweni? (Esaalimu 103:13, 14)

¹⁰ Nimutakihaka Yesu, etthu yuulupale enniiriha othanla omurumeela Yehova, okhala wiira ninniphenta vanceene. (Mmusome Matheyo 22:37.) Hiyo ninniwerya omwaattamela Yehova, okathi nniixutta ahu mikhalelo sawe. Mwa ntakiheryo, Yehova onninlevelela ni murima awe wootheene. Okathi aisarayeli yahaamwiiwelela aya Yehova, owo aanaaxonttela oriki: ‘Muttaruwe makhalelo anyu òtakhala’. (Yer. 18:11) Yehova khonliyala wiira hiyo na ntthupi. (Musome Esaalimu 103:13, 14.) Vaavo munuupuwela anyu moota Yehova oolevelenlaaweni, niireke eyo kheniwiirihani ohihiya omurumeela?

11. Itthu xeeni sikina sinniiriha othanla omurumeela Tiithi ahu a wiirimu?

¹¹ Ninnithanla omurumeela Yehova, okhala wiira eyo etthu yooloka ninreerela ahu opaka. (Math. 4:10) Nave ororomeleya wahu wa Yehova, onookumiherya itthu sooloka. Ororomeleya wahu, onnikhaliherya otteelihiwa nsina na Yehova, onnooniherya wiira Satana nawoothe ni onnihakalaliha murima wa Tiithi ahu a wiirimu. Vakhala wiira nnoothanla omurumeela Yehova olelo-va, waanyiheryasa, ninrowa omurumeelaka mahiku ootheene! — Yoh. 17:3.

12-13. Yoowiiraneya ya Jane ni Pam, enniixuttiha exeeni?

¹² Hata niri ene amiravo, vakhala wiira nnimwiixutta omphenta vanceene Yehova, omphenta iwo onrowa otepaka olipa vaavo ninrowa ahu wunnuwaka. Nwehe ntakiheryo na aximwali anli ayariwe etthoko emosa. Mmosa oniitthaniwa Jane vano mukina, oniitthaniwa Pam.a Okathi yaapacenrye aya omusoma Biibiliya, Jane aarina iyaakha 11 vano Pam aarina iyaakha 10. Nnaamwi anamuyari aya yahaaphavela omusoma Biibiliya, awo yaahimweemererya Jane ni Pam osomihiwaka Biibiliya ni Anamoona a Yehova, akhala wiira yaamurowaka okerexa ni emusi aya wuumalani wa esumana. Pam onihimya so: “Itthu Anamoona a Yehova yaakiixuttiha aya seiyo saakhuma mbiibiliyani, saahikikhaliherya okhootta olya mirette soohapala ni orupihana woohiloka yaapaka aya anaskola akina”.

¹³ Nuuvira iyaakha vakhaani, aximwali ale oowanli yaahikhala anamalaleerya. Moottharelana, awo yaahiwerya okhala mapioneera nnaamwi yaakhapelela anamuyari aya oowuuluvala. Yuupuwelelaka yoowiiraneya aya, Jane ohimmye so: “Kihiixutta wiira Yehova onnaakhapelela oratteene apatthani awe ntoko onihimya awe 2 Timootheyo 2:19 oriki: ‘Yehova onnaasuwela atthu awe’”. Moohaanyiherya, okathi wootheene Yehova onnaakhapelela ale animphenta ni animurumeela!

14. Moolumo ahu ni miteko sahu, sinitteeliha sai nsina na Yehova? (Nwehe ifootu.)

¹⁴ Nimphavela waakhaliherya atthu osuwela wiira itthu sootheene onootheriwa awe Yehova, ti sa ethiru. Nkahaya muupuwele ntakiheryo nla: Nyuwo mookhalana mpatthani anyu muulupale, ooreera murima, oovaha ni oolevelela. Vano nihiku nimosa, munnimwiiwa mutthu mukina ohimyaka wiira mpatthani anyu tootakhala murima ni toohiroromeleya. Mwaarowa opaka exeeni? Woonasa wene, mwammwaakiha. Mwa enamuna emosa-ru, okathi Satana ni atthu akina animootherya aya Yehova itthu soohiloka, hiyo ninnimwaakiha naaleelaka atthu ikeekhai voohimya sa yena ni waakiherya nsina nawe noowaarya. (Esal. 34:1; Yes. 43:10) Hiyo ninnooniherya wiira noothanla omurumeela ni omphenta Yehova ni moolumo ni itthu nimpaka ahu.

15. Mareeliho xeeni murummwa Paulo aaphwannye awe mwaha woopaka marukunuxo mookumi mwawe? (aFilipi 3:7, 8)

¹⁵ Hiyo noolakela opaka marukunuxo mookumini mwahu wiira nimuhakalalihe Yehova ni wuncererya muteko nninvarela ahu. Mwa ntakiheryo, murummwa Paulo aahikhalana iparakha sinceene etiini ya eyuda, masi owo aahihiya etiini eyo wiira okhale mutthareli a Kristu ni omurumeela Yehova. (aGal. 1:14) Mwaha woopaka eyo, owo aahikhalana soowiiraneya soohakalaliha okathi aavara awe miteko sa Yehova ni ookhalana eparakha yoorowa olamulelaka ni Kristu wiirimu. Masi owo khaatonko othanana mwaha woothanla omurumeela Yehova. Nave vakhala wiira hiyo nnoothanla omurumeela Yehova, khaninrowa othanana. — Mmusome aFilipi 3:7, 8.

16. Yoowiiraneya ya Julia, enniixuttiha exeeni? (Nwehe ifootu.)

¹⁶ Vakhala wiira nnoohela nipuro noopacerya omurumeela Yehova, nnoophwanya mareeliho niinaano-va ni muhoolo. Nwehe etthu yaamwiiranenle murokora mmosa oniitthaniwa Julia. Ohinatthi opacerya omusoma Biibiliya, owo aaniipa isipo okerexa okhuma okathi aari awe mwaaruusi. Mutthu mmosa aasuwela wiipa saana, aahoona wiira Julia aanisuwela wiipa, nto aahimwiixuttiha wiira muteko awe okhaleke wiipa. Moohipisa, Julia aahikhala mutthu oovuwa ni aaniipa mapuro yiipa atthu oovuwa. Okathi aasoma awe eskola yuulupale ya muusika, naxikola mukhwaawe aahipacerya omutthokiherya myaha voohimya sa Muluku, ni aahimuleela wiira Muluku ookhalana nsina, oniitthaniwa Yehova. Ohinatthi ovira okathi munceene, Julia aahipacerya omusoma Biibiliya ikwaha piili vasumanani. Nto aahoona wiira aahaana orumeela okathi ni ikuru sawe wiira omurumeele Yehova, ohiya okhala mutthu muteko awe ori wiipa muusika. Khahiyo vaari vookhweya opaka yoothanla ele. Julia onihimya so: “Atthu anceene yaahimya wiira kamulolo, mwaha woohiya wiipa muusika kinamurumeela Yehova. Masi kiniphavela wiira okumi aka wootheene, kimurumeeleke Yehova”. Olelo-va, Julia onoonela sai mwaha wa yoothanla aapanke awe mwa iyaakha 30 sivinre? Owo onihimya so: “Kinnihakalala vanceene mwaha woothanla omurumeela Yehova, ni kinnisuwela wiira muhoolo owo onookivaha itthu sootheene kiniphavela aka”. — Esal. 145:16.

MUHIHIYE OMURUMEELA YEHOVA

17. Okhala wiira okathi ohanle omala, oniwaafetari sai ale athanlale omurumeela Yehova ni ale nlelo ahithanlale?

¹⁷ Ninkhala wanikisa wa olumwenku ola ohanle omala. Murummwa Paulo ohimmye so: “Siiso, ‘okathi vakhaanixa’, nto ‘ole onirwa onoophiya tthiri, ni khonrowa opisa’”. (aHeeb. 10:37) Eyo ennaafetari sai? Okathi ohanle wiira atthu athanle omurumeela Yehova, ori vakhaani. (1 aKor. 7:29) Okhala wiira noothanla omurumeela Muluku, ninnisuwela wiira hata nivilelaka mixankiho, ohanle “okathi vakhaanixa” wiira simale.

18. Yehova ni Yesu, aniphavela nitumererya wiira nipakeke exeeni?

¹⁸ Yesu aahaatumererya atthu wiira akhale atthareli awe ni ahihiye omutthara. (Math. 16:24) Akhala wiira nikhumme khalai omurumeela Yehova, nihaana olakela ohihiya omurumeela. Nihaana wiimananiha vanceene wiira nihihiye omurumeela Yehova. Ekeekhai wiira khivanikhweya, masi nnoophwanya ohakalala ni mareeliho manceene, mwaha woomurumeela Yehova okhuma nenna-va mpakha muhoolo! — Esal. 35:27.

19. Yoowiiraneya ya Gene, enniixuttiha exeeni?

¹⁹ Atthu akina anuupuwela wiira omurumeela Yehova, onnaakhoottiherya opuha. Vakhala wiira mwa mmiravo, niireke yookhala etthu munoona anyu wiira munooperteri mwaha woomurumeela Yehova? Munna mmosa mmiravo oniihaniwa Gene, ohimmye so: “Miyo kuupuwela wiira okhala Namoona a Yehova, waanikihasula ni waanikikhoottiherya opuha. Vaakhala ntoko wiira amiravo kannuwanne aka hoothe yaanipuha itthu ntoko, ifesta, onamorari, oweetta axooku ootakhala, variki miyo kaaviriha okathi munceene kirowelaka mithukumano ni olaleerya”. Moonelo ole, waahononne sai muupuwelo wa Gene? Owo ohimmye so: “Kaahipacerya opaka itthu soohiloka, seiyo amiravo akina yaapaka aya, mwa okathi vakhaani vaakhala ntoko kaanipuha. Masi eyo, khiyaakiphanyihale ohakalala weekeekhai. Kaahipacerya wuupuwelela mareeliho mutthu oniphwanya awe, mwaha woowiiwelela ele Biibiliya onihimya awe. Tivonto, kaahithanla omurumeela Yehova ni murima aka wootheene. Okhuma okathi ole, kaahoona wiira Yehova aanaakhula mavekelo aka”.

20. Exeeni nilakenle ahu opaka?

²⁰ Nasaalimu Davidi, aahimwiipela Yehova oriki: “Oohakalala ti yoole mmuthanlale anyu, munampixa vari anyu, wiira okhaleke vate vanyu”. (Esal. 65:4) Nto nihihiye omurumeela Yehova. Niira siiso, nimutakihaka Yooxuuwa nnoohimya wiira: “Miyo va n’amusi aka othene nintthuna warumelaka Apwiya!” — Yoox. 24:15.