MWAHA ONITHOKORERIWA 15
NSIPO 30 Muluku Aka, Moopoli Aka, ni Tiithi Aka
Hiyo ‘Onisivela Omwaattamela Muluku’!
“Miyo okisivela omwaattamela Muluku”. — ESAL. 73:28.
ELE NINROWA AHU WIIXUTTA
Mwaha ola, nnoorowa wiixutta moota nikhanle ahu oomwaattamela Yehova ni mareeliho nimphwanya ahu mwaha woopaka eyo.
1-2. a) Nihaana opaka exeeni wiira nikhalane ompatthani woolipa ni mutthu? b) Mwaha ola, ninrowa othokorerya exeeni?
NIIREKE mookhalana mpatthani eekeekhai? Mwaawenrye sai okhala mpatthani awe? Woonasa wene, woovira okathi mweettaka ni yena, nwehaka itthu saamwiiraneela mookumini mwawe ni munnisuwela itthu sinimusivela ni sihinimusivela. Nave, nyuwo mooweha mikhalelo sawe sooloka, seiyo mwaaphavela anyu omutakiha. Nto nyuwo mwaahipacerya omphenta vanceene mpatthani anyu owo.
2 Wiira mukhalane ompatthani woolipa ni mutthu, onipirisari okathi ni wiimananiha. Nave nihaana opaka etthu emosa-ru, naaphavelaka okhalana ompatthani woolipa ni Yehova Muluku. Mwaha ola, nnooweha etthu nikhanle ahu oopaka wiira nimwaattamele Muluku ni mareeliho ninrowa ahu ophwanya mwaha woopaka eyo. Wanipacerya, nrowe niwehe xeeni varya aya vooloka omwaattamela Mpatthani ahu muulupalexa, Yehova.
3. Xeeni vari aya vooreera, wuupuwela mireerelo nimphwanya ahu mwaha woomwaattamela Yehova? Mutthokiherye.
3 Moohaanyiherya, nyuwo munnikupali wiira omwaattamela Yehova etthu yooloka. Masi wuupuwela ooreera waya omwaattamela Yehova, pooti oniiriha ohihiya omwaattamela. (Esal. 63:6-8) Mwaha wa xeeni? Hiyo pooti otthokiherya mwa enamuna ela: Atthu anceene annisuwela wiira ti vooreera olya eyoolya yooloka, opaka esersiisiyu, orupa iwoora sinceene ni owurya maasi manceene khula nihiku. Masi atthu anceene khanipaka itthu iyo, tivonto khanikhalana okumi wooloka ntoko yaaphavela aya. Masi atthu anuupuwela ni anipaka itthu iyo mahiku manceene, annikhalana okumi wooloka. Mwa enamuna emosa-ru, ninnisuwela wiira ti vooloka omwaattamela Yehova. Masi okathi nnuupuwela ahu itthu sinniiriha omwaattamela Yehova, eyo enninikhaliherya ohihiya ni otepaka omwaattamela Yehova. — Esal. 119:27-30.
4. Ntoko enihimya aya Esaalimu 73:28, muupuwelo xeeni nasaalimu aarina awe?
4 Musome Esaalimu 73:28. Mulipa-oolepa Esaalimu 73, aari mulevi aathanliwe wiira iipeke isipo mutemplo mwa Yehova. Woonasa wene, saahivira iyaakha sinceene omukokhorelaka Yehova moororomeleya. Masi owo aanisuwela wiira ti va faita wuupuwela wiira “omwaattamela Muluku” waamumphwanyiha mureerelo, nave aaphavela wiira atthu akina, yuupuweleke siiso. Mireerelo xeeni nimphwanya ahu mwaha woomwaattamela Muluku?
‘OMWAATTAMELA MULUKU’ ONNIPHWANYIHA OHAKALALA WEEKEEKHAI
5. a) Xeeni omwaattamela Yehova onniphwanyiha aya ohakalala? b) Moota xeeni miruku Yehova onnivaha awe, sinnikhaliherya aya ni onikhapelela? (Miruku 2:6-16)
5 Vaavo ninrowa ahu otepaka omwaattamela Yehova, nnootepaka ohakalala. (Esal. 65:4) Tthiri sookhala itthu sinooniherya wiira nnoohakalalaka. Mwa ntakiheryo, okathi ninsoma ahu ele Yehova onnileela awe mbiibiliyani ni weettela, ninnikhala atthu ankhili. Itthu Yehova onniixuttiha awe, sinninikhapelela ni sinninikhaliherya ohipaka itthu sootakhala. (Musome Miruku 2:6-16.) Biibiliya onihimya so: “Oohakalala mutthu yoole onaaphwanya ankhili, ni mutthu yoole oniphwanya miruku”. — Mir. 3:13.
6. Exeeni yaamwiirihale nasaalimu oriipiwa murima?
6 Ekeekhai wiira okathi mukina apatthani a Yehova anniriipiwa murima. Mulipa-oolepa Esaalimu 73 aahiriipiwa murima, nuumala opacerya okhalana miyoonelo soohiloka. Owo aahipacerya wuupuwela wiira atthu ootakhala, yaahikhalana makhalelo ooloka hata yahaaphavela omusuwela Muluku nnakhala omwiiwelela, nto eyo yaahimwiiriha nasaalimu onanariwa ni opacerya waakhalela nrima. Nasaalimu aahipacerya wuupuwela wiira atthu ootakhala ni oowiixinnuwiha, yaari atthu oothaaciri, yaahikhalana okumi wooloka ni khiivo etthu yaaxankiha. (Esal. 73:3-7, 12) Nasaalimu aahixankiheya vanceene mpakha onapacerya wuupuwela wiira omurumeela Yehova, khiwamphwanyiha etthu. Oriipiwe ene murima, owo aahimmye so: “Mweekeekhai, miyo kirenre murima mahala ene, nave kinyanwe mahala ene, kooniheryaka wiira nkitthenke”. — Esal. 73:13.
7. Okathi ninriipiwa ahu murima, etthu xeeni ninreerela ahu opaka? (Nwehe eteseenyu ya vakaapani.)
7 Hata nasaalimu ahaareere oriipiwa murima, owo aahipaka etthu wiira oturuke moonelo woohiloka aarina awe. Owo ‘aahikela nipuro noowaarya na empa ya Muluku’, nto Yehova aahimukhaliherya olokiherya muupuwelo awe. (Esal. 73:17-19) Okathi ninriipiwa ahu murima, Yehova yoowo ori Mpatthani ahu muulupalexa onnisuwela eyo. Okathi ninriipiwa ahu murima, ninvekeleke Yehova wiira onikhaliherye osuwela etthu yoopaka. Miruku sinnivaha awe siri mbiibiliyani ni okhaliheriwa ni anna ni arokora, onoonikhaliherya ohihiya omurumeela hata niriipiwe ene murima. Okathi ninxanka ahu vanceene, Yehova onoonilipiha ni onimaaliha. — Esal. 94:19.a
Mulevi olempe Esaalimu 73, eemenle ene “nipuro noowaarya na empa ya Muluku” (Nwehe ettima 7)
‘OMWAATTAMELA MULUKU’, ONOONIKHALIHERYA OKHALANA OKUMI WOOLOKA NIINAANO-VA NI NLIPELELO NA MUHOOLO
8. Mwa inamuna xeeni piili vari aya vooloka omwaattamela Muluku?
8 Ti vooloka omwaattamela Muluku okhala wiira onniniphwanyiha mureerelo mwa inamuna sikina piili. Yoopacerya, nnoowerya okhalana okumi wooloka ni okhalana waataana wooloka ni Muluku. Ya nenli, enninikhaliherya okupali wiira itthu sinilipelela ahu muhoolo sinimwiiraneya. (Yer. 29:11) Vano nrowe nthokorerye oratteene mareeliho awo.
9. Moota xeeni omwaattamela Yehova onrowa aya oniphwanyiha ohakalala?
9 Omwaattamela Muluku, onoonikhaliherya okhalana okumi wooloka niinaano-va ni nlipelelo nooloka na muhoolo. Atthu anceene olelo-va, anihimya wiira Muluku khokhanle. Nave awo khanisuwela yoolakela ya okumi ni anikupali wiira apinaatamu muhoolo anoomala-mala valaponi. Masi okathi nimmusoma ahu Biibiliya, ninnikupali wiira Muluku ookhala ni wiira owo “onnaatthuvela ale animwaavya ni murima aya wotheene”. (aHeeb. 11:6) Nto okhala wiira Yehova onipattunxe wiira nimurumeeleke yena, vaavo nimpaka ahu eyo, hiyo ninniphwanya ohakalala. — Otum. 10:12, 13.
10. Yehova aaleihenrye exeeni ale animuroromela? (Esaalimu 37:29)
10 Atthu anceene kharina nlipelelo nooloka na muhoolo. Awo aniimananiha paahi wiira avareke muteko, othelana, waayara anamwane ni wiilokiherya wiira akhalane etthu enrowa waakhaliherya muhoolo. Awo khanisuwela etthu Muluku oleihenrye awe opaka muhoolo. Moovirikana ni atthu awo, arumeyi a Yehova annilipelela etthu muhoolo. (Esal. 25:3-5; 1 Tim. 6:17) Hiyo ninnimuroromela Muluku ahu, nave ninnisuwela wiira owo onoopaka ele oleihenrye awe. Tthiri nookhalana itthu sooreera ninlipelela ahu, ohela muhina omukokhorela Yehova Muluku ahu mahiku ootheene mParayiisu. — Musome Esaalimu 37:29.
11. Mareeliho xeeni ninrowa ahu ophwanya, mwaha woothanla okhala apatthani a Muluku, ni owo onoonela sai?
11 Omwaattamela Muluku, onniniphwanyiha mureerelo mwa inamuna sikina. Mwa ntakiheryo, Yehova ooleiherya wiira ononlevelela soottheka sahu vakhala wiira nnoottharuwa. (Yes. 1:18) Mwaha waivaavo, hiyo khanintepa oriipiwa murima mwaha wa soottheka nipanke ahu khalai. (Esal. 32:1-5) Nave ninnimuhakalaliha Yehova. (Mir. 23:15) Moohaanyiherya, nyuwo munnuupuwela mareeliho makina anikhumelela mwaha wookhala mpatthani a Yehova. Exeeni nikhanle ahu oopaka wiira nihihiye omwaattamela Muluku?
MOOTA WOOHIHIYA ‘OMWAATTAMELA MULUKU’
12. Marukunuxo xeeni mpanke anyu wiira mmwaattamele Muluku?
12 Muhinatthi opatisiwa wiira mukhale Namoona a Yehova, mwaahipaka marukunuxo manceene wiira mukhale mpatthani a Yehova. Nyuwo mwaahiixutta ikeekhai sinceene voohimya sa Yehova ni Yesu Kristu, mwaahittharuwa itampi sanyu, mwaahimwaamini Muluku ni mwaaniimananiha omwiiwelela ni murima anyu wootheene. Nto wiira nihihiye omwaattamela Muluku, nihaana ovikaniha opaka itthu iya. — aKol. 2:6.
13. Itthu xeeni tthaaru sinrowa onikhaliherya ohihiya omwaattamela Yehova?
13 Exeeni enrowa onikhaliherya ohihiya omwaattamela Yehova? 1) Nihaana ohihiya omuleeri ni omusoma Biibiliya. Okathi nimmusoma ahu Biibiliya, khahiyo wiira nnoomuleeri paahi, masi nimphavela wiixutta itthu voohimya sa Muluku ahu. Nihaana wiimananiha wiira nisuwele moota Yehova onuupuwela awe ni weettela ele omphavela awe. (aEef. 5:15-17) 2) Nihaana olipiha waamini wahu, nuupuwelelaka itthu sinooniherya wiira Yehova onniniphenta. 3) Nihaana ovikaniha osyaka itthu Yehova oninyokha awe ni oheettana atthu anipaka itthu iyo. — Esal. 1:1; 101:3.
14. Itthu xeeni nikhanle ahu oopaka khula nihiku wiira nimuhakalalihe Yehova? (1 aKorinto 10:31) (Nwehe ifootu.)
14 Mmusome 1 aKorinto 10:31. Ti voohakalaliha osuwela wiira ti vooloka opaka itthu sinimusivela Yehova. Masi nihaana opaka itthu sikina ohiya paahi olaleerya ni orowela mithukumano. Itthu sootheene nimpaka ahu khula nihiku, sihaana omuhakalaliha Yehova. Mwa ntakiheryo, vaavo ninkhala ahu oororomeleya mwa itthu sootheene ni waavaha atthu akina itthu nirina ahu, ninnimuhakalaliha Yehova. (2 aKor. 8:21; 9:7) Nave Yehova oniphavela wiira nimuxukhureleke mwaha wa okumi onivahale awe. Tivonto, ninnithanlela itthu ninlya ahu, ninwurya ahu nave ninnipaka itthu sikina sinnikhaliherya okhalana okumi wooloka. Khula etthu nimpaka ahu wiira nimuhakalalihe Yehova hata ekhalaka yaamukhaani, eyo ennimwiiriha oniphenta vanceene. — Luka 16:10.
Weettiha ekaaro moovareleleya, okhapelela okumi ahu nipakaka esersiisiyu, olya yoolya yooloka ni okhala oovaha, iyo inamuna sinimusivela Yehova (Nwehe ettima 14)
15. Yehova oniphavela wiira naathokoreryeke sai atthu akina?
15 Yehova onnaareerela murima atthu ootheene, akhale ale animurumeela hata ale ahinimurumeela. (Math. 5:45) Nave owo oniphavela wiira naareereleke murima atthu akina. Mwa ntakiheryo, hiyo khanikhanle ‘onveeha mutthu, onyakulihana, masi . . . nooniheryeke okhala oomaala ohoolo wa atthu ootheene’. (Tito 3:2) Hata atthu akina ahimukupaliki Yehova, hiyo khannooniherya wiira na atthu oolokexa waavikana atthu awo. (2 Tim. 2:23-25) Ninnimwaattamela Yehova, vaavo nnaareerela ahu murima ni waathokorerya atthu akina.
HATA OKATHI NINVONYA AHU, NNOOWERYA ‘OMWAATTAMELA MULUKU’
16. Moonelo xeeni aarina awe mulipa-oolepa Esaalimu 73 nuuvira okathi omurumeelaka Yehova?
16 Niireke okathi mukina, munoona wiira khamurina efaita mwaha wa itampi mpanke anyu khalai? Ntoko nithokorenrye ahu, eyo yaahimwiiraneela mulipa olempe Esaalimu 73. Owo aahiikhupanyerya oriki: “Miyo kaahanle vakhaani ohapuwa; kaahanle vakhaani otherekuwa”. (Esal. 73:2) Ntoko nasaalimu ohimmye awe, murima awe ‘waahimuriipa’, ni ‘aahipakeya mulolo’ ni aari ntoko ‘mwaamunama ohoolo wa Yehova’. (Esal. 73:21, 22) Niireke uupuwela wiira Yehova khamphenta ni khaarowa omulevelela, mwaha wa itthu soohiloka aapanke awe?
17. a) Okathi aakhulumunwe awe, nasaalimu aapanke exeeni? b) Yoowiiraneya ela ya nasaalimu, enniixuttiha exeeni? (Nwehe ifootu.)
17 Vakhala wiira nasaalimu uupuwela wiira Yehova aahimunyanyala, moonelo owo waahimala. Nnaamwi nasaalimu uupuwela wiira khorina efaita, owo aahisuwela wiira aahaana omwaattamela Yehova. Owo ohimmye so: “Okathi wootheene kiri ni nyuwo; moovarela ntata naka noolopwana. Munnikeettiha ni miruku sanyu, nave munrowa okireerela murima”. (Esal. 73:23, 24) Okathi nnoona ahu wiira waamini wahu onnivukuwa aahiiso nookhulumuwa mwaha wa soovonya sahu, nihaana onvekela Yehova wiira onlipihe. (Esal. 73:26; 94:18) Hata nipanke ene etampi yuulupale, nnoowerya ohokolowela wa Yehova nikupaliki wiira ‘ori oolikana ene wiira onilevelele’. (Esal. 86:5) Ti vooloka omwaattamela Muluku, okathi nnoona ahu wiira nookhulumuwa. — Esal. 103:13, 14.
Okathi waamini wahu onivukuwa aya, nihaana wiimananiha omwaattamela Yehova nivaraka miteko sawe (Nwehe ettima 17)
‘MMWAATTAMELEKE MULUKU’ MAHIKU OOTHEENE
18. Ninrowa ohihiya sai omwaattamela Yehova mahiku ootheene?
18 Hiyo nihaana omwaattamela Yehova mahiku ootheene. Nave khaninrowa ohiya wiixutta voohimya sa yena. Biibiliya onihimya wiira “khuuvo oniwerya osuwelexa” iphiro sa Yehova, ankhili awe ni osuwela wawe. — aRom. 11:33.
19. Nroromelo xeeni Isaalimu sinnivaha aya?
19 Esaalimu 79:13 ninsoma so: “Nto hiyo, eyo piiyo, atthu anyu ni nikoto nanyu, ninrowa wooxukhurelakani mahiku ootheene; ninrowa woottottopelakani mpakha maloko anrowa okhumelela ohoolo”. Vakhala wiira munoomwaattamela Yehova, mukupaliki wiira owo onimooreelihani nave munoowerya ohimya so: “Muluku tonlipiha murima aka, ni tonlipana aka mahiku ootheene”. — Esal. 73:26.
NSIPO 32 Rwaani wa Yehova!
a Ale aniviriha okathi munceene ariipiwaka murima ni axankaka, ahaana orowa ospitaali. Wiira nwehe itthu sikina sinivarihana ni mwaha owo, nwehe erevista A Sentinela N.º 1 2023.