“Ekhotto ti ya Yehova”

Mwaakha wa 1999, kuvernu a oFrança aahimmye wiira efiliyaali ahu yaahaana oliva mpoosito mwaha wa ikontiripuwisawu anna yaavahale aya okhuma mwaakha wa 1993 mpakha 1996. Nuumala orooha mwaha ole etripunaale ya oFrança, eyo khiyaanivahale erasau. Naaheererya wiira ophukiwe-tho mwaha ole, masi awo yaanaakhunle etthu emosa-ru. Nuumala-vo, kuvernu aahirowa opanko okuxa musurukhu wa mutthenkeso, etthu yoowiiraka imilyau 4.500 sa euro. Tivo, wiira niwerye ottikiheriwa musurukhu ole, naahaana orooha mwaha ahu Corte Europeia dos Direitos Humanos. Masi, ohinatthi ophukiwa mwaha ole, Corte Europeia dos Direitos Humanos yaahithukumana ni maativokaatu a oFrança vamosa ni mareperesentanti a Corte Europeia. Awo yaaphavela woona, vakhala wiira naamwiiwanana ni ekuvernu ya oFrança, nihinatthi oroiha mwaha ole opuro mukina.

Naahoona wiira mareperesentanti yaarowa onivekela musurukhu para onvaha kuvernu a oFrança. Masi naahisuwela wiira hata oliva 1 euro, yaamuhonona ele Yesu aahimmye awe eri Matheyo 22:21. Anna ni arokora yaahikontiripuwiri wiira akhaliherye Omwene, nto musurukhu ole, khahiyo waari wa kuvernu. Hata vari siiso, naahirowa muthukumano ole, wiira nitthare malamulo a Corte Europeia.

Waahipakiwa muthukumano ole, esaala yooreera ya Corte Europeia. Muthukumano ole, khiwaapacenrye saana. Moohipisa, reperesentanti a Corte Europeia aahihimya wiira Anamoona a Yehova, yaahaana oliva musurukhu vakhaani-vakhaani ekuvernu ya oFrança yaavekela aya. Niinaano-ru naahimukoha muthiyana ole aareperesentari Corte Europeia wiira: “Masi niireke mwaanisuwela wiira kuvernu ookuxa musurukhu imilyau 4.500 sa euro ekontha ahu ya opanko?”

Muthiyana ole aahinyoonyiheya. Okathi ekurupu ya kuvernu yeemerenrye aya wiira yaahikuxa musurukhu, itthu saahiturukeya. Muthiyana ole aahinanariwa ni aahimaliha muthukumano ole. Kaahoona wiira Yehova aahinikhaliherya. Itthu saahiturukeya mwa enamuna nahaalipelela ahu wiira nikanyari mwaha ole. Naahihakalala vanceene okathi naakhuma ahu muthukumano ole ni khinaakupali itthu siiraneyale.

Nihiku 30 a Junho a 2011, Corte Europeia dos Direitos Humanos aahinivaha erasau. Nto Corte Europeia dos Direitos Humanos aahaanulari etaaxa ele ni yaahimuruma kuvernu ottikiha musurukhu yaakunxe aya ni wuncererya mukina. Yoothanla ele yaapakiwe, nlelo ennaakhapelela Anamoona a Yehova a oFrança. Nikoho nne, nahaalipelela ahu wiira nampaka naalikana ntoko nluku naamwiivale Goliyati. Nikoho nne naahikhaliherya ophuka mwaha ole. Xeeni nihalaka okanyari mwaha ole? Okhala wiira, ntoko Davidi aamuhimenrye awe Goliyati, “ekhotto ti ya Yehova”. — 1Sam. 17:​45-47.

Khahiyo yaari ekwaha yeela paahi naakanyanri ahu milattu otripunaale. Nnaamwi akhanle ene anamalamulela oowerya ni itiini sinninyokha, hiyo nookanyari milattu soowiiraka 1.225, ilapo soowiiraka 70 ni itripunaale internasionaale. Milattu iyo nikanyanri ahu soonikhaliherya vanceene, maana nookhalana etireitu yoosuweliwa ni kuvernu ntoko etiini, olaleerya mootaphuwa, okhootta wiirela mpantta ifesta sinivuwiha elapo ni okhootta oheleliwa ephome.

Xeeni kihalaka wiirela mpantta ophuka myaha wEuropa, variki kaarumeela Eseedi Mundiale ya Anamoona a Yehova, wEstados Unidos?

ANAMUYARI AKA YAARI MAMISIONAARIO

Anamuyari aka George ni Lucille akaratuwanri eturma 12 ya oGileyati. Okathi kaayaariwaka mwaakha wa 1956, awo yaarumeela wEtiópia. Awo yaahikivaha nsina na Filipe, nenno naari na namalaleya a nthiti a okathi wa arummwa. (Mit. 21:8) Mwaakha waattharelana, kuvernu aahinikhoottiherya omurumeela Yehova mootaphuwa. Nnaamwi kaayevale, kinnuupuwela saana emusi aka emukokhorelaka Muluku voohisuweliwa ni atthu. Okhala wiira kaahiyeva, koona wiira yaari etthu yooreera! Mooriipiha murima, mwaakha wa 1960, kuvernu aahinoomola elapo ele.

Anamuyari aka yaahirowa okhala Wichita, Kansas, wEstados Unidos. Masi awo khiyaahiyale okhalela nthiti muteko woolaleerya ntoko yiira aya ari ene mamisionaario. Awo aakiixuttiha miyo, murokoraka Judy ni muhima aka Leslie omphenta Yehova ni murima ahu wootheene. Nave axihima aka awo ayariwe wEtiópia. Miyo kipatisiwe kirina ene iyaakha 13. Nuuvira iyaakha tthaaru, emusi aka yaahithaamela mapuro oothowa anamalaleerya, wArequipa, oPerú.

Mwaakha wa 1974, kirina ene iyaakha 18, efiliyaali ya oPerú yaahikithanla miyo ni anna axexe wiira narumeeleke ntoko mapioneero a vameekhaaya. Naahirowa olaleerya mapuro ahitonko olaleeriwa, miyaako sa Central dos Andes. Nto hiyo naahaana waalaleerya atthu anlavula eQuechua ni Aymara. Neetta ni ekalawa yaarina mutooro, yeeyo yaari ntoko ekaaxa. Kinnihakalala kuupuwelaka okathi kaamurumeela aka Biibiliya kilavulaka ni atthu wiira moohipisa Yehova onoomaliha ohaawa, iretta ni okhwa. (Wis. 21:​3, 4) Atthu anceene yaaheemererya ihapari sa Omwene.

KAAHITHANLIWA OROWA OVARA OSEEDI MUNDIALE

Mwaakha wa 1977 okathi Albert Schroeder aaxukurya awe oPerú, yoowo aari munna a Nikhuuru Noolamulela na Anamoona a Yehova, aahikitumererya olepa eformulaario, wiira karumeeleke oBeteli ya oseedi Mundiale. Nto kaahilepa eformulaario ele. Moohipisa, 17 a Junho a 1977, kaahipacerya orumeela oBeteli ya oBrooklyn. Koorumeela eTepartamento ya Limpesa ni Manutensau, iyaakha sinivikana 4.

Junho a 1978, kaahimusuwela Elizabeth Avallone konkeresu internacional, aapakiwe oNova Orleans, oLouisiana. Owo aahuuwale ni anamuyari yaalikana ni anamuyari aka, yaawo yaamurumeela Yehova ni murima wootheene. Okathi kaamusuwenle aka Elizabeth, iira orumeelaka ntoko pioneera ookilaatheya mwa iyaakha 4 ni aaniphavela ovara muteko wa Muluku wa okathi wootheene, okumi awe wootheene. Okhuma vaavale naanivaanela. Ohivinre okathi munceene, naahipacerya onamorari. Naathelanne 20 a Outubro a 1979 ni naahipacerya orumeela oBeteli.

Anna a muloko ahu woopacerya naalavuliwa nttaava Espanhol oBrooklyn, yaaniniphenta vanceene. Naahirumeela miloko 3, nto anna ni arokora awo, yaahinitumererya ohihiya muteko ahu oBeteli. Ninnaaxukhurela vanceene anna ni arokora ale, apatthani ni amusi yaanikhalihenrye waakhapelela anamuyari ahu oowuuluvala.

OKHALIHERYA ETEPARTAMENTO XURIITIKU

Kaahitikinihiwa, okathi Janeiro a 1982 kaathanliwe aka wiira karumeeleke eTepartamento Xuriitiku oBeteli. Nuuvira iyaakha 3, kaahivekeliwa orowa osoma wuniversidade wiira kikhale ativokaatu. Kaahihakalala ni otikinihiwa, okathi kaasoma aka, woona wiira atthu a wEstados Unidos ni a ilapo sikina, annitaphuwa wiira apake itthu sikina, mwaha wa milattu sikanyariwe ni Anamoona a Yehova. Milattu sinceene sa faita saakanyariwe ni Anamoona a Yehova, naanisoma musaala.

Mwaakha wa 1986 kirina ene iyaakha 30, kaahithanliwa wiira kikhale muhooleli a eTepartamento Xuriitiku. Kaahihakalala, osuwela wiira anna a oBeteli yaanikiroromela nnaamwi kaari mmiravo. Kaahixanka okhala wiira nkaasuwela itthu sinceene ni kaahoona wiira khivaarowa okhweya ovara muteko ole.

Mwaakha wa 1988, kaahikhala ativokaatu. Masi nkaasuwela wiira osoma wuniversidade waahihonona mikhalelo saka ni waataana waka ni Yehova. Osoma wuniversidade, pooti omwiiriha mutthu wuupuwela wiira ookhalana efaita yinceene waavikana atthu ahisomme wuniversidade. Elizabeth aanikikhaliherya vanceene. Elizabeth aahikikhaliherya otthikela muteko kaavara aka kihinatthi orowa osoma wuniversidade wiira kilipihe waataana waka ni Yehova. Nuuvira okathi, kaahoona wiira waataana waka ni Yehova waahilipa. Kaahoona wiira osoma paahi, khahiyo ti etthu erina efaita yinceene mookumini mwahu. Masi etthu erina efaita mookumini, okhalana waataana woolipa ni Yehova, omphenta Yehova ni waaphenta atthu.

ORUMEELA NLAMULO WIIRA NIWERYEKE OLALEYA IHAPARI SOOREERA

Nuumala okhala ativokaatu, kaaniimananiha okhaliherya eTepartamento ahu, okhapelela myaha sa oBeteli, myaha sinivarihana ni mutthenkeso wa Yehova ni itireitu sahu sa olaleerya Ihapari Sooreera. Muteko aka wa oBeteli waari woohakalaliha, masi kaahikhalana mixankiho, mwaha woowi itthu mmutthenkesoni mwa Yehova waakuva oturukeya. Mwa ntakiheryo, hiyo naanivekela musurukhu okathi naavaha ahu iliivuru. Masi okhuma mwaakha wa 1991, eTepartamento ahu Xuriitiku yaahivekeliwa ovaha malakiheryo, a moota woohiya ovekela musurukhu. Vaahiweryaneya Anamoona a Yehova ovaha iliivuru ahivekelaka musurukhu. Eyo yaahikhaliherya miteko sinivariwa oBeteli, muteko woolaleerya ni osyaka oliva mipoosito sikina vahipirisariki. Marukunuxo ala, yaahiwiiriha atthu akina wuupuwela wiira, khinaarowa okhalanaka musurukhu oniphiyerya wiira sikumiheriwe iliivuru para atthu aniphavela wiixutta, nto eyo yanwiiriha atthu vakhaani paahi omusuwela Yehova. Masi eyo khiyiiraneyale. Nummeru na atthu animurumeela Yehova okhuma mwaakha wa 1990, ninnincerereya. Nave olelo-va, atthu annivahiwa iliivuru sinimutthokiherya Biibiliya voohiliva etthu. Kihoona wiira marukunuxo manceene anipakiwa mmutthenkesoni mwahu anneetta saana, okhala wiira Yehova onninikhaliherya ni onnivaha malakiheryo murumeyi oororomeleya ni ankhili. — Okhu. 15:2; Math. 24:45.

Hiyo khahiyo wiira ninkanyari milattu otripunaale okhala wiira nirina maativokaatu oosuwela. Masi etthu eniwiiriha alipa oophuka ni mareperesentanti a kuvernu weemererya yooveka ahu, mwaha woowi annoona mweettelo wooloka wa atthu a Yehova. Miyo kooweha ela, mwaakha wa 1998. Mwaakha owo, anna a Nikhuuru Noolamulela vamosa ni axaaraya yaahirwa onweha konkeresu especial oCuba. Anna awo yaari ooreera murima ni anttittimiho, ni yaahiwiiriha mareperesentanti a kuvernu woona wiira khanniirela mpantta mwaha sa epoliitika. Tivo, okathi naathukumanne ahu, naahaatthokiherya itthu sootheene makhulupale ale.

Ikwaha sikina, ninniroiha milattu sahu otripunaale wiira ‘nirumeelaka nlamulo niweryeke olaleya ihapari sooreera’. (aFil. 1:7) Mwa ntakiheryo, mwa iyaakha sinceene, makhulupale a wEuropa ni a oCoreia do Sul, yaahikhootta etireitu ahu ya ovara miteko sikina ohiya orowa etoropa. Mwaha waivaavo, anna 18.000 a wEuropa ni 19.000 a Coreia do Sul, yaahitthukweliwa mwaha woowi yaahikhootta orowa etoropa.

Nto 7 a Julho a 2011, Corte Europeia dos Direitos Humanos aahipaka yoothanla ya mulattu Bayatyan v. Armenia, yeeyo yooniherya wiira ilapo sootheene sa wEuropa saahaana oweemererya atthu ovara miteko sikina, ohiya orowa etoropa mwaha wa sookupali saya sa etiini. Etthu emosa-ru yaahipakiwa 28 a Junho a 2018 ni etripunaale Constitucional ya oCoreia. Vaakhanle wiira amiravo vakhaani yaahihiya ororomeleya, khisaarowa opakiwa soothanla iyo suulupale.

Etepartamento Xuriitiku ya oseedi ni itepartamento sikina, sinniimananiha waakiherya etireitu ahu ya omukokhorela Yehova ni olaleya ihapari sa Omwene. Yookhalana eparakha ya owaakiherya anna anilupatthiwa ni kuvernu. Hata nikanyariki milattu aahiiso nnaari, ninnikhalana eparakha ya waalaleerya makuvernu, mamwene ni atthu akina. (Math. 10:18) Alipa oophuka, mareperesentanti a kuvernu, ikaruma sinilaleya ihapari ni atthu akina, anniwerya oweha soolepa seiyo sinihela ahu muhina itukumento siniroiha ahu otripunaale ni soolepa ninlavula ahu nihiku oniphukiwa awe mwaha owo. Ni atthu akina annoona wiira itthu Anamoona a Yehova anikupali aya sinikhuma mbiibiliyani. Akina aheemererya okhala Anamoona a Yehova.

KINNOOXUKHURELANI YEHOVA!

Mwa iyaakha 40, kookhalana eparakha ya ovara eTepartamento Xuriitiku ya olumwenku wootheene, orowa ophuka myaha itripunaale sinceene ni olavula ni mareperesentanti manceene a kuvernu. Kinnaaphenta ni waaxukhurela vanceene anna anivara eTepartamento Xuriitiku oseedi ya olumwenku wootheene ni itepartamento Xuriitiku sa olumwenku wootheene. Koophwanya mareeliho manceene mookumini mwaka ni kinnihakalala.

Elizabeth toophenta ni onnikikhaliherya moororomeleya iyaakha iya 45 nivirihale ahu niri ene hoothe, okhale okathi wooreera aahiiso okathi wa mixankiho. Owo oopaka eyo nnaamwi owereyasiwaka ni ohirina ikuru sinceene.

Nihoona wiira milattu nikanyanri ahu khahiyo mwaha wa ikuru sahu aahiiso osuwela wahu. Ntoko Davidi ohimmye awe, “Yehova tonaavaha ikuru arumeyi awe”. (Esal. 28:8) Mweekeekhai, “ekhotto ti ya Yehova”.