Itthu Mpacenrye Anyu Wiixutta Mbiibiliyani Nlelo Sinnookhaliheryani?

1. Soowiixuttiha soopacerya sa Biibiliya, sookhalihenryeni sai okathi mwiixutta anyu ekeekhai?

ITTHU siixuntte ahu okathi naamusoma ahu Biibiliya, soonikhaliherya opaka marukunuxo mookumini mwahu. Mwa ntakiheryo, okathi niixuntte ahu wiira nsina na Muluku ti Yehova, hiyo naahipacerya okhala mpatthani awe. (Yes. 42:8) Okathi niixuntte ahu etthu eniiraneya nuumala mutthu okhwa, naahihiya oxanka nuupuwelaka wiira amusi ahu akhwiiye, anoohaawa. (Mus. 9:10) Nave, okathi niixuntte ahu wiira Muluku onimwiiriha elapo okhala eparayiisu, naahihiya oxanka nuupuwelaka etthu enrowa wiiraneya muhoolo. Hiyo naanikupali wiira khaninrowa okhalaka okathi vakhaani, ntoko iyaakha 70 aahiiso 80, masi ninrowa okhalaka mahiku ootheene. — Esal. 37:29; 90:10.

2. 2 Pedru 1:​12, 13, onooniherya sai wiira hata makristau arina waamini woolipa, annittottela mureerelo soowiixuttiha soopacerya sa mbiibiliyani?

² Nihikhala-khale niliyalaka efaita erina aya itthu naapacenrye ahu wiixutta mbiibiliyani. Epaphelo awe ya nenli, murummwa Pedru aahaalepela makristau, yaawo yaari ‘oolipa ene mwekeekhaini’. (Mmusome 2 Pedru 1:​12, 13.) Masi okathi ole, yaahikhala mmulokoni atthu ootakhala murima, yaawo yaaphavela waahapuxa anna ni arokora wiira ahiye weettela ekeekhai. (2Ped. 2:​1-3) Pedru aaphavela waalipiha anna ni arokora, wiira yiikhapelele mwaha wa itthu soowoothiwa, atthu awo yiixuttiha aya. Tivonto, Pedru aahiwuupuxerya anna ale itthu yiixuttale aya mbiibiliyani. Itthu iyo yiixuntte aya, saamwaakhaliherya ohihiya okhala oororomeleya mpakha wanikisa.

3. Xeeni makristau ootheene anireerela aya wuupuwelela itthu soopacerya yiixuttale aya mbiibiliyani? Nvahe ntakiheryo.

³ Hata nipacenrye ene khalai omurumeela Yehova, hiyo nnoowerya ottottela mureerelo soowiixuttiha soopacerya sa mbiibiliyani. Mwa ntakiheryo, kosinyeryo onisuwela waapeya ni mutthu ohinisuwela waapeya, pooti orumeela itthu simosa-ru wiira yaapeye yoolya. Masi vaavo okathi onivira aya, kosinyeryo onisuwela waapeya, onnisuwela moota woorumeela itthu simosa-ru mwa inamuna soovirikana, wiira aapeye yoolya yoosiva. Moolikanasa, ale apacenrye omurumeela Yehova okhuma khalai, ahiixutta itthu soovirikana arumeelaka soolepa simosa-ru, seiyo yiixuttale aya okathi yaapacenrye aya omusoma Biibiliya. Moota xeeni? Mikhalelo sahu ni itthu nimpaka ahu mmutthenkesoni mwa Yehova, sooturukeya okhuma okathi yoole nipatisiwe ahu. Okathi nnuupuwela ahu itthu niixuntte ahu mbiibiliyani khalai, ninniweha moota inamuna isya sikhanle aya oonikhaliherya olelo-va. Nrowe niwehe etthu aniixutta aya ale apacenrye khalai omurumeela Yehova, ni itthu tthaaru apacenrye aya wiixutta mbiibiliyani.

YEHOVA TOPATTUNXE ITTHU SOOTHEENE

4. Wiixutta wiira Yehova topattunxe itthu sootheene, onikhalihenrye sai?

⁴ Ninnisuwela wiira elapo ni itthu sootheene siri mulaponi, sipakiwe ni Mpattuxa orina ankhili ni oowerya. Biibiliya onihimya wiira: “Muluku topattunxe itthu sotheene”. (aHep. 3:4) Masi moolumo ari yoolepa ela anniniixuttiha itthu sinceene. Okhala wiira Yehova tonipattunxe, owo onninisuwela oratteene. Nave-tho, Muluku onninikhapelela ni onnisuwela itthu sinniphwanyiha mureerelo. Tivonto, osuwela wiira Yehova tori Mpattuxa, woonikhaliherya opaka marukunuxo mookumini mwahu mwa inamuna sinceene ni okhalana okumi wooloka.

5. Etthu xeeni enrowa onikhaliherya okhala atthu oowiiyeviha? (Yesaya 45:​9-12)

⁵ Osuwela wiira Yehova topattunxe itthu sootheene, onninikhaliherya okhala atthu oowiiyeviha. Mwa ntakiheryo, waahikhala okathi Yoobi aarina awe moonelo woohiloka voohimya sa Yehova. Nave, Yoobi aahiliyala etthu yaarina efaita yinceene. Tivo, aahipacerya wiisuupuwela mmensawe ni aaheererya wooniherya wiira aahikhalana erasau. Masi Yehova aahimuupuxerya Yoobi wiira Yehova tori Mpattuxa Oowerya Sootheene. (Yoobi 38:​1-4) Eyo yaahimukhaliherya Yoobi woona wiira itthu sootheene Yehova onipaka awe, ti sookhalela. Nto uupuwelaka eyo, profeta Yesaya aalempe so: “Oloko onowerya omukoha mulipa-òwùpa, wiraka: ‘Mukùpenle-ni sisa?’” — Mmusome Yesaya 45:​9-12.

6. Okathi xeeni onireerela aya owuupuwela ankhili ni owerya orina awe Mpattuxa ahu? (Nwehe ifootu.)

⁶ Mukristau opacenrye khalai omurumeela Yehova, pooti opaceryaka ororomela muupuwelo awe, ohiya ororomela malakiheryo a Yehova ni Nuulumo nawe. (Yoobi 37:​23, 24) Niireke omuupuwela Yehova, owuupuwela ankhili awe ni owerya wawe, onoomukhaliherya? (Yes. 40:22; 55:​8, 9) Osuwela ekeekhai ela, enoomukhaliherya okhala oowiiyeviha ni woona wiira moota Yehova onuupuwela awe, torina efaita yuulupalexa.

7. Etthu xeeni Rahela aapanke awe wiira eemererye marukunuxo yaapakiwe?

⁷ Wuupuwela wiira Yehova topattunxe itthu sootheene, waahimukhaliherya Rahela, yoowo onikhala wEslovênia, weemererya marukunuxo anipakiwa mmutthenkesoni. Rahela onihimya so: “Ikwaha sikina, khivaakhweya para miyo weemererya marukunuxo anipakiwa ni anna annihoolela. Mwa ntakiheryo, okathi kaawehale aka Erelatoorio N.° 8 ya Nikhuuru Noolamulela ya 2023, miyo kaahinyoonyiwa onweha ekwaha yoopacerya munna aalavula mwaha orina ene ereru. Tivonto, miyo kaahinvekela Yehova wiira okikhaliherye weemererya marukunuxo ala”. Rahela aahoona wiira, okhala wiira Yehova topattunxe itthu sootheene, owo onnisuwela enamuna yooloka ya weettiha mutthenkeso awe. Akhala wiira vannoovilani weemererya marukunuxo anipakiwa, xeeni moowiiyeviha muhinuupuwelela anyu wiira Mpattuxa ahu ookhalana ankhili ni owerya wuulupale? — aRom. 11:​33-36.

XEENI MULUKU ONAAHIYA AWE ATTHU AHAAWAKA?

8. Osuwela etthu enimwiiriha Yehova waahiya atthu ahaawaka, yookhalihenryeni sai?

⁸ Xeeni Muluku onaahiya awe atthu ahaawaka? Atthu akina ahiwenrye ophwanya waakhuliwa wa nikoho nla, aananariwa ni Muluku aahiiso anuupuwela wiira Muluku owo khokhanle! (Mir. 19:3) Masi nyuwo muhiixutta wiira atthu annihaawa ni annookhwa, okhala wiira ayariwe arina ene etampi, ohiya mwaha woowi Yehova opanke etthu yoohiloka. Nave-tho, nyuwo muhiixutta wiira opixa murima wa Yehova, ohaakhaliherya atthu imilyau sinceene omusuwela ni woona mmansaya moota Yehova onrowa awe omaliha ohaawa. (2Ped. 3:​9, 15) Osuwela etthu enimwiiriha Yehova waahiya atthu ahaawaka, ehoolipihani ni yoowiirihani omwaattamela.

9. Okathi xeeni ninreerela ahu oweha itthu sinimwiiriha Yehova waahiya atthu ahaawaka?

⁹ Okathi ninwehererya ahu wiira Yehova omalihe ohaawa, nihaana opixa murima. Masi, okathi mutthu onimphenta ahu onikhwa awe aahiiso hiyo wala amusi ahu sinaaphwanya aya mixankiho, pooti onyoonyiheyaka nnoona wiira Yehova onnipisa omaliha ohaawa. (Hab. 1:​2, 3) Okathi ninkhalana ahu moonelo owo, ti vooreera oweha mathowa animwiiriha Yehova waahiya atthu ahaawaka.a (Esal. 34:19) Nave-tho, nihaana wuupuwela wiira Yehova oniphavela omaliha ohaawa wootheene.

10. Etthu xeeni enimukhaliherya Anne ovilela okhweliwa maama awe?

¹⁰ Osuwela etthu enimwiiriha Yehova waahiya atthu ahaawaka, pooti onikhaliherya ovilela. Anne, yoowo onikhala eyiilya ya oMayotte, wooseano Índico, onihimya so: “Iyaakha vakhaani sivinre kookhweliwa amaama. Nto eyo khiyaareere okiriipiha murima. Masi kinniimananiha wuupuwela wiira khahiyo ti Yehova onikumiherya mixankiho iyo. Tthiri, Yehova onniphavela vanceene omaliha mixankiho sinnihaaxa ni waahihimuxa ale nnaaphenta ahu. Okathi kinuupuwelela aka ikeekhai iyo, sinnikilipiha ni okiphwanyiha murettele”.

11. Moota xeeni osuwela etthu enimwiiriha Yehova waahiya atthu ahaawaka, ennikhaliherya aya ohihiya olaleerya?

¹¹ Osuwela mathowa animwiiriha Muluku waahiya atthu ahaawaka, enninikhaliherya ohihiya olaleerya. Nuumala osuwela wiira Yehova onnipixa murima wiira atthu attharuwe itampi saya ni wiira yoopowe, Pedru aalempe so: “Muthokoreryeke mweettelo anyu, ni etthu munireerela anyu opaka. Mukhaleke atthu anivara miteko sooloka ni mpakeke itthu sinooniherya wira munniroromeleya wa Muluku”. (2Ped. 3:11) “Miteko sooloka”, sinihela muhina olaleerya. Nimutakihaka Tiithi ahu Yehova, hiyo ninnaaphenta atthu, nave nimphavela wiira yakhaleke mahiku ootheene elapo esya. Nlelo Yehova onnaavaha eparakha atthu a muttetthe anyu wiira amukokhoreleke. Tivonto, mookhalana eparakha ya ovara muteko vamosa ni Muluku ni waakhaliherya atthu anceene wiira amusuwele, olumwenku ola ohinatthi omala! — 1aKor. 3:9.

NINKHALA “MAHIKU OOKISERYA”

12. Osuwela wiira ninkhala “mahiku ookiserya” onnikhaliherya sai?

¹² Biibiliya onnihimya oratteene mikhalelo sa atthu a “mahiku ookiserya”. (2Tim. 3:​1-5) Oweha-ru paahi mikhalelo sa atthu a muttetthe ahu, ninnoona wiira eprofesia ela enniiraneya. Hiyo ninniweha wiira makhalelo ni mweettelo wa atthu, onootepa otakhala. Nto eyo enninikhaliherya okupali wiira Nuulumo na Muluku, ti neekeekhai. — 2Tim. 3:​13-15.

13. Nuupuwelaka nlikanyiho na Yesu niri Luka 12:​15-21, makoho xeeni ninreerela ahu wiikoha?

¹³ Osuwela wiira ninkhala mahiku ookiserya, onninikhaliherya orumeela saana okathi ahu. Nnoowerya oweha efaita erina aya opaka eyo, nithokoreryaka nlikanyiho na Yesu niri Luka 12:​15-21. (Mmusome.) Exeeni yaamwiirihale Yesu omuhimya mulopwana ole thaaciri okhala “mulolo”? Khahiyo mwaha wookhala mutthu oothaaciri, masi okhala wiira aahipweha nipuro noopacerya itthu soohikhalela. Owo ‘aahiithukumanyerya muhakhu, masi [khahiyo aari] thaaciri vamaithoni va Muluku’. Xeeni ele aapanke awe, yaari aya etthu yoohiloka? Mwaha woowi, Muluku aahimuleela mulopwana ole wiira: “Ohiyu yoola munimookhwa”. Nlikanyiho nna ninniixuttiha exeeni? Okathi ohanle wiira olumwenku ola omale, ori vakhaani. Tivonto, nihaana wiikoha so: ‘Kiireke soolukama saka, sinnooniherya wiira kinnirumeela saana okathi aka? Soolukama xeeni kinaatumererya aka anaaka okhalana? Kiireke kinnirumeela okathi aka, ikuru ni mireerelo saka wiira kiithukumanyerye mihakhu vathi vaava ohiya wiithukumanyerya mihakhu wiirimu?’

14. Yoowiiraneya ya Miki, ennikhaliherya sai woona oreera waya wuupuwela wiira ninkhala mahiku ookiserya?

¹⁴ Okathi nnuupuwelela ahu itthu sinooniherya wiira ninkhala mahiku ookiserya, eyo enninikhaliherya opaka soothanla sooloka mookumini mwahu. Nto eyo ti etthu yaamwiiranenle murokora mmosa oniihaniwa Miki. Owo onihimya so: “Nuumala omaliha osoma eskola sekundaaria, kaaphavela ophwanya muteko waarowa okivaha okathi wiira kisomeke inama. Nave-tho, kaaniphavela okhala pioneera rekulaari ni orumeela opuro woothowa anamalaleerya. Anna ni arokora a muloko aka, yaahikikhaliherya wuupuwela akhala wiira kanwerya ovara muteko ole ni okathi omosa-ru, okhala pioneera ni orumeela opuro woothowa anamalaleerya. Nave, awo yaahikuupuxerya wiira olumwenku ola, ohanle omala ni wiira elapo esya, kinrowa okhalaka mahiku manceene wiira kisome inama sootheene kiniphavela aka. Nto kaahithanla orowa wiixutta miteko sahaarowa ovira okathi munceene kiixuttaka. Eyo yaahikikhaliherya okhala pioneera rekulaari ni muhoolo mwaya, kaahithaamela muttetthe woothowa anamalaleerya, wEquador”. Olelo-va, iyawe Miki, mutokweene a esirkwiitu wEquador.

15. Ntakiheryo na Yakobo, ninnikhaliherya sai ohihiya waakhaliherya atthu, hata ahisiveliwaka ihapari sooreera? (Nwehe ifootu.)

¹⁵ Nihikhulumuwe akhala wiira wanipacerya atthu khaniphavela owiriyana ihapari sooreera. Atthu pooti oturuka muupuwelo aya. Nwehe ntakiheryo na Yakobo, munnawe Yesu. Moone wiira Yakobo aahinweha Yesu innuwaka, okhalaka Mesiya ni iixuttihaka waavikana atthu akina. Hata vari siiso, saahivira iyaakha sinceene Yakobo ohimutthanre Yesu. Vano Yakobo aahikhala mwiixutti aakhalela nthiti muteko woolaleerya, nuumala Yesu ohihimuxiwa!b (Yoh. 7:5; aKal. 2:9) Tivonto, nihihiye waalaleerya amusi ahu ni ale anikhala muttetthe ahu, nlelo ahiniphavela wiiwa ihapari sa Omwene. Muupuweleke wiira ninkhala mahiku ookiserya. Tivonto, nihaana okhalela nthiti muteko woolaleerya. Nto etthu munaaleela anyu olelo-va, pooti wiira animuupuwela muhoolo, woonasa wene, hata nuumala opacerya maxakha maalupale.c

NIXUKHURELEKE ITTHU YEHOVA ONNUUPUXERYA AWE

16. Itthu Yehova onnuupuxerya awe, sinnikhaliherya sai? (Nwehe ekaaxa eni: “Murumeeleke Ikeekhai sa Mbiibiliyani Wiira Mwaakhaliherye Akina”.)

¹⁶ Itthu sikina nniixuttihiwa ahu mbiibiliyani ni mmutthenkesoni mwa Yehova, sinipakiwa yuupuweliwaka atthu yaale anisuwela itthu vakhaani sa mbiibiliyani. Mwa ntakiheryo, myaha aniroiheliwa atthu ootheene, erevista ya atthu ootheene, iviidiyu ni myaha sikina siri esaiti jw.org, sinipakiwa yuupuweliwaka ale ahikhanle Anamoona a Yehova. Hata vari siiso, itthu iyo Yehova onnuupuxerya awe, sinninikhaliherya ootheene ahu. Nave, sinnilipiha omphenta wahu Yehova, omuroromela wahu Biibiliya ni sinninikhaliherya owiixuttiha atthu oratteene Nuulumo na Muluku. — Esal. 19:7.

17. Itthu xeeni sikhanle ooniiriha wuupuwelela itthu nipacenrye ahu wiixutta mbiibiliyani?

¹⁷ Hiyo Anamoona a Yehova, ninnihakalala okathi onilokiheriwa aya wiiwexexa wahu ikeekhai siri mbiibiliyani. Nave, ninnivaha efaita itthu soopacerya niixuntte ahu mbiibiliyani, seiyo sinikhalihenrye omwaattamela Yehova. Ntoko nithokorenrye ahu mwaha ola, itthu nipacenrye ahu wiixutta mbiibiliyani pooti onikhaliherya olelo-va. Okathi mutthenkeso wa Yehova onnivaha awe malakiheryo, nnoona wiira moota nimpaka ahu itthu ni moonelo ahu tori wooloka, nihaana wiiyeviha ni wuupuwela wiira Yehova, yoowo orina ankhili ni ori Mpattuxa oowerya, toneettiha mutthenkeso awe. Okathi hiyo aahiiso mutthu onimphenta ahu onimphwanya awe muxankiho, moopixa murima nihaana wuupuwela etthu enimwiiriha Yehova waahiya atthu ahaawaka. Vaavo ninrumeela ahu okathi ahu ni mireerelo sahu, nihiliyale wiira ninkhala mahiku ookiserya ni okathi ohanle, ori vakhaani. Vakhala wiira nnoopaka eyo, itthu Yehova onnuupuxerya awe khasinrowa ohiya onilipiha, onitumererya ni oniiriha okhalana ankhili.