Niireke ‘Muhiixutta Esiiri’ ya Okhala Oohakalala?

1. Ohakalala onitaphulela xeeni ni ohinitaphulela exeeni?

NIIREKE nyuwo mwa mutthu oohakalala? Mutthu oohakalala, onnitteeliwa murima ni onnikhalana murettele mwaha woowi oniwehexexa itthu orina awe vano. Nto mutthu owo khoninyoonyiheya aahiiso onanariwa mwaha wa itthu ohirina awe. Masi hata nihakalalaka ni makhalelo ahu, eyo khentaphulela wiira khanimpirisari okhapelela okumi ahu. Mwa ntakiheryo, etthu yooreera ootheene ahu wiimananiha wiira nincererye muteko nninvarela ahu Yehova. (aRom. 12:1; 1Tim. 3:1) Masi, nakhala atthu oohakalala, hata nihivahiwaka eparakha naaphavela ahu, khaninrowa ohiya otteeliwa murima.

2. Etthu xeeni ekhanle ookhumelela akhala wiira khaninhakalala ni itthu nirina ahu?

² Vakhala wiira khannihakalala ni itthu nirina ahu, hiyo pooti opacerya opaka soothanla soohiloka. Mwa ntakiheryo, atthu yaale ahinihakalala ni itthu arina aya, awo pooti ovara muteko iwoora sinceene wiira athume itthu ahinipirisari aya. Mooriipiha murima, makristau makina aatoko wiiya musurukhu ni itthu sikina yaaphavela aya. Woonasa wene, awo yuupuwela so: ‘Miyo, kinniphwanela etthu ela’, ‘woovira okathi munceene kiphavelaka ela’ aahiiso ‘kinooliveryaka musurukhu owo, okathi mukina’. Hata vari siiso, khula enamuna ya wiiya ennimunanara ni kheninvuwiha Yehova. (Mir. 30:9) Atthu akina aanyoonyiheya mwaha woowi khavahiwe iparakha yaaphavela aya mmutthenkesoni mwa Yehova. Nto eyo, yoowiiriha ohiya omurumeela Yehova. (aKal. 6:9) Etthu xeeni ekhanle oomwiiriha murumeyi a Yehova oopatisiwa opaka eyo? Woonasa wene, mutthu owo ohiyale ohakalala ni itthu orina awe.

3. Yoolepa ya aFilipi 4:​11, 12, enniixuttiha exeeni?

³ Ootheene ahu, nnoowerya okhala atthu oohakalala. Murummwa Paulo, aahihimya wiira “kihiixutta ohakalala ni makhalelo aka”. (Mmusome aFilipi 4:​11, 12.) Owo aahilepa moolumo ala otthukweliwe ene mukhatteya. Hata vari siiso, owo khaahiyale okhala mutthu oohakalala. Paulo ‘aahiixutta esiiri’ yookhala mutthu oohakalala. Vakhala wiira vanninivila okhala mutthu oohakalala, moolumo ni miteko sa murummwa Paulo sinoonikhaliherya okhala atthu oohakalala moovarihana ni makhalelo ahu. Muhiliyale wiira khivanikhweya ohakalala moovarihana ni makhalelo ahu. Tivonto, nihaana wiimananiha wiixutta okhala atthu oohakalala. Moota xeeni? Nrowe niwehe mikhalelo sinrowa onikhaliherya wiixutta esiiri ya okhala atthu oohakalala.

MUXUKHURELEKE ITTHU MURINA ANYU

4. Okhala atthu ooxukhuru onnikhaliherya sai ohakalala? (1 aTesaloonika 5:18)

⁴ Oxukhuru onninikhaliherya okhala atthu oohakalala. (Mmusome 1 aTesaloonika 5:18.) Mwa ntakiheryo, vakhala wiira ninnixukhurela itthu nirina ahu ni nimpirisari ahu, woonasa wene, khaninrowa otepaka oxanka nuupuwelaka itthu nimphavela ahu, masi nihirina ahu. Nave, vakhala wiira ninnixukhurela iparakha nirina ahu mmutthenkesoni mwa Yehova niinaano-va, eyo enoonikhaliherya wiimananiha ovara miteko nivahiwe ahu, ohiya omakela wuupuwelela soothanleliwa naaphavela ahu okhalana. Tivonto, Biibiliya onnitumererya awe omuxukhurela Yehova okathi nninvekela ahu! Okhala mutthu ooxukhuru, onoonikhaliherya okhalana “murettele wa Muluku, yoowo onvikana osuwela wotheene wa apinaatamu”. — aFil. 4:​6, 7.

5. Itthu xeeni saarowa owiiriha aisarayeli okhala atthu ooxukhuru? (Nwehe eteseenyu.)

⁵ Nwehe etthu yaawiiranenle aisarayeli. Ikwaha sinceene, awo yaaniixinliha ohoolo wa Yehova ahimyaka wiira yaahinkheliwa eyoolya yaarina aya wExiitu. (Mmr. 11:​4-6) Ekeekhai wiira khahiyo yaari etthu yookhweya okhala moothakoni. Masi etthu xeeni yaarowa waakhaliherya okhala atthu oohakalala? Yaahaana wuupuwela ni oxukhurela itthu sootheene Yehova aapanke awe owiirelaka yaawo. Awo, yaahaana wuupuwela wiira yaari ipottha ni yaanihaaxiwa vanceene wExiitu. Nave yaahaana wuupuwela wiira Yehova aahaakumiherya atthu a wExiitu ihukhumu 10 ni aahiwoopola aisarayeli. Okathi aisarayeli yaakhuma aya, “yahavekela atthu a wEjitu” itthu sa eparatha, eweero ni ikuwo. (Okhu. 12:​35, 36) Okathi aisarayeli yaattiyeleliwe aya, okhala wiira mpantta mukina yaari anakhotto a Farawo ni mpantta mukina yaari Ephareya Yooxeerya, Yehova aahihula maasi a ephareya ele wiira awerye olapuwela ekhopela ekina. Okathi yeetta aya moothakoni, khula nihiku Yehova aanaavaha eyoolya, yeeyo yaihaniwa emana. Vano, xeeni aisarayeli yanla aya mwaha wa yoolya? Etthu yaawiiriha aisarayeli ohihakalala, khahiyo waari mwaha woohikhalana eyoolya yaapirisari aya, masi mwaha woowi khiyaaxukhurela itthu yaarina aya.

6. Iponto xeeni 3 sinrowa onikhaliherya okhala atthu ooxukhuru?

⁶ Munrowa okhala sai mutthu ooxukhuru? Yoopacerya: Mwaavyeke okathi wiira muupuwelele itthu sinoosivelani. Nyuwo pooti olepa itthu piili aahiiso tthaaru munixukhurela anyu. (Wikh. 3:​22, 23) Ya nenli: Mooniheryeke oxukhurela wanyu. Muhiliyaleke waaxukhurela atthu akina mwaha wa itthu aniwiirelaayani. Nave, khula nihiku mmuxukhureleke Yehova. (Esal. 75:1) Ya neeraru: Mwaathanleke apatthani anooniherya oxukhurela. Vakhala wiira apatthani ahu tooxukhurela aahiiso toowiixinliha, hiyo-tho ninrowa okhalaka ntoko apatthani ahu awo. (Otum. 1:​26-28; 2Tim. 3:​1, 2, 5) Vakhala wiira ninnaavya inamuna sa waaxukhurela atthu akina, nnoovukula onyoonyiheya mwaha wa mixankiho sahu ni itthu nimphavela ahu, masi nihirina ahu.

7. Etthu xeeni yaamukhalihenrye Aci okhala mutthu ooxukhuru ni etthu xeeni yaakhumelenle?

⁷ Nwehe etthu yaamwiiraneelale Aci, yoowo onikhala wIndonésia. Owo onihimya so: “Okathi wa koronaviiru, kaahipacerya olikanyiha makhalelo aka ni makhalelo a anna ni arokora akina. Nto eyo, yaahikiiriha ohihakalala”. (aKal. 6:4) Etthu xeeni yaamukhalihenrye oturuka moota uupuwela awe? Aci onihimya so: “Kaahipacerya oweha itthu sooloka Yehova aakivaha awe khula nihiku. Nave kaanuupuwela itthu sootheene kaarina aka mwaha wa wiirela mpantta mutthenkeso wa Yehova. Nto kaanimuxukhurela Yehova mwaha wa itthu sootheene aakivaha awe. Opaka eyo yaahikikhaliherya ohakalala ni murima wootheene”. Akhala wiira khamunihakalala ni makhalelo anyu, niireke munoowerya opaka etthu emosa-ru aapanke awe Aci, mukhalaka mutthu ooxukhuru?

MUUPUWELELEKE NI MUKHALEKE OOWIIYEVIHA

8. Etthu xeeni yaamwiiranenle Barukhi?

⁸ Waahikhala okathi, Barukhi, yoowo aari sekretaario a profeta Yeremiya aahaahakalala awe ni makhalelo awe. Barukhi aahivahiwa muteko wooxankiha, maana aahaana omukhaliherya Yeremiya waaleela aisarayeli oohixukhuru, etthu yaarowa owiiraneela mwaha wa ohimwiiwelela Yehova. Waahiphiya okathi Barukhi aahaavara awe ni nthiti muteko aavahiwe awe. Ohiya wiimananihaka ovara muteko aathanleliwe awe ni Yehova, Barukhi aahipacerya wiisuupuwela mmansawe ni itthu aaphavela awe. Omurumaka Yeremiya, Yehova aahimuleela Barukhi wiira: “Vano nyuwo mumphavelela-ní [itthu suulupale]? Muhiphaveleké-tho”. (Yer. 45:​3-5) Ni moolumo makina, Yehova aamuleela Barukhi wiira: “Muhakalaleke ni makhalelo anyu”. Barukhi, aaheettela miruku aavahiwe awe ni khaahiyale okhala mpatthani a Yehova.

9. 1 aKorinto 4:​6, 7, onnikhaliherya sai okhalana moonelo wooloka voohimya sa iparakha? (Nwehe ifootu.)

⁹ Okathi mukina, murumeyi a Yehova pooti wuupuwelaka wiira onniphwanela ovahiwa eparakha aaphavela awe mmutthenkesoni mwa Yehova. Owo pooti wuupuwela siiso, mwaha woowi onnisuwela itthu sinceene, onnikhalela nthiti ovara muteko ni opacenrye khalai omurumeela Yehova. Masi atthu akina pooti ovahiwa eparakha yena aaphavela awe vanceene. Etthu xeeni yaarowa omukhaliherya ohinyoonyiheya? Akhala wiira aamuupuwelela moolumo murummwa Paulo olempe awe ari 1 aKorinto 4:​6, 7. (Mmusome.) Khula eparakha ninvahiwa ahu ni itthu sootheene ninsuwela ahu, sinikhuma wa Yehova. Musuweleke wiira Yehova khonnivaha iparakha, mwaha woowi nookhalana efaita yinceene waavikana atthu akina. Maana iparakha sootheene sinooniherya oreera murima wuulupale wa Yehova. — aRom. 12:​3, 6; aEef. 2:​8, 9.

10. Etthu xeeni enrowa onikhaliherya okhala atthu oowiiyeviha?

¹⁰ Wuupuwela oratteene ntakiheryo Yesu onivanhe awe, nnoonikhaliherya okhala atthu oowiiyeviha. Nkahaya muupuwele itthu siiraneyale ohiyu yoole Yesu aarapihale awe inawu sa arummwa awe. Murummwa Yohani olempe so: “Vano Yesu aanisuwela wira [1] Tiithi aahinvaha itthu sotheene mmatatani mwawe. Aanisuwela-tho wira [2] aakhuma wa Muluku ni [3] aamutthikela wa Muluku . . . Onapacerya orapiha inawu sa awiixutti awe”. (Yoh. 13:​3-5) Pooti wiira Yesu aamuupuwela wiira arummwa awe, yaahaana orapiha inawu sawe. Masi Yesu khotonko wuupuwela so: Okhala wiira aari Mwaana a Muluku, aahaana okhalana empa yooloka, musurukhu munceene aahiiso okumi woohikhalana mixankiho. (Luka 9:58) Yesu aari mutthu oowiiyeviha ni oohakalala. Owo oonivaha ntakiheryo nooloka wiira nitthareke. — Yoh. 13:15.

11. Wiiyeviha waamukhalihenrye sai Dennis okhala mutthu oohakalala?

¹¹ Munna oniihaniwa Dennis, yoowo onikhala elapo wa Holanda, aaheererya otthara ntakiheryo na Yesu na okhala mutthu oowiiyeviha, masi khivaakhweyale opaka eyo. Owo onihimya so: “Okathi mutthu mukina onivahiwa awe eparakha kiniphavela aka, ikwaha sikina kinninyoonyiheya mwaha woowi kinuupuwela wiira kaahaana ovahiwa miyo. Okathi eyo eniiraneya aya, kinnisoma myaha sinilavula sa wiiyeviha. Aplikatiivu JW Library^® wookhala opuro kipwehale aka soolepa sinilavula sa wiiyeviha. Tivonto, vannikikhweela ophwanya wiira kisomeke. Nave-tho, mutelefoonini mwaka koopaxari myaha sinilavula sa wiiyeviha. Nave okathi mukina kinniwiriyana.a Nave kihiixutta wiira miteko sootheene ninvara ahu, nimphavela onvuwiha Yehova ohiya wiivuwiha. Mooreerela murima, Yehova onninihiya wiira nikhaliheryeke muteko awe. Masi wiira muteko owo weette saana, Yehova tonikhaliherya”. Vakhala wiira moopacerya woona wiira khamunihakalala mwaha woohivahiwa eparakha mwaaphavela anyu, mwiimananiheke okhala mutthu oowiiyeviha. Eyo enimookhaliheryani olipiha ompatthani anyu ni Yehova ni okhala mutthu oohakalala. — Yak. 4:​6, 8.

MUUPUWELEKE ITTHU YEHOVA ONILEIHENRYE AWE

12. Itthu xeeni ninlipelela ahu muhoolo sinniiriha ohakalala? (Yesaya 65:​21-25)

¹² Wiira nincererye ohakalala wahu nihaana wuupuwelela itthu sooreera ninwehererya ahu muhoolo. Eliivuru ya Yesaya, Yehova onninleela wiira onnisuwela mixankiho sahu sootheene. Nave-tho, onnileiherya wiira onoomaliha mixankiho iyo sootheene. (Mmusome Yesaya 65:​21-25.) Ninrowa okhalaka moovareleleya ni nnookhalana ipa sooreera. Ninrowa ovaraka muteko onnisivela ni ninrowa olyaaka soolya sooloka ni soosiva. Khaninrowa-tho oxankaka mwaha wa itthu sinnoopiha hiyo ni aniihu. (Yes. 32:​17, 18; Ezek. 34:25) Nikupaliki wiira itthu sootheene ninleiheriwa ahu sinimwiiraneya tthiri.

13. Okathi xeeni ninreerela ahu otepa wuupuwelela itthu ninlipelela ahu muhoolo?

¹³ Olelo-va, ti vootepexa oreera wuupuwelela itthu ninlipelela ahu muhoolo. Mwaha wa xeeni? Mwaha woowi ootheene ahu ninkhala “mahiku ookiserya”, nave ninnikhalana mixankiho ‘soowoopiha’. (2Tim. 3:1) Khula nihiku, Yehova onninivaha miruku, ikuru ni onninikhaliherya ovilela mixankiho sahu. (Esal. 145:14) Nave, itthu ninlipelela ahu sinninikhaliherya ovilela mixankiho sahu sootheene. Pooti wiira vannooxankihani ophwanya yoolya, ikuwo ni opuro wookhala. Niireke eyo enitaphulela wiira munrowa ohaawaka okumi anyu wootheene? Khahiyo ti siiso! Yehova onnileiherya woovahani itthu sootheene munipirisari anyu, niire so, itthu sootheene sinoothowani, mparayiisu. (Esal. 9:18; 72:​12-14) Pooti wiira munnoona owereya khula nihiku, mooxanka ni mookhalana eretta yuulupale. Masi niireke munrowa ohaawaka siiso mahiku ootheene? Nnaari! Elapo esya Yehova onileiherya awe, khasinrowa okhala iretta nnakhala okhwa. (Wis. 21:​3, 4) Itthu iyo ninlipelela ahu sinninikhaliherya ohinyoonyiheya ni ohinanariwa mwaha wa mixankiho sinniphwanya niinaano-va. Hiyo ninnikhalana murettele ni ohakalala hata nihithokoreriwaka saana, nikhweliwaka mutthu namphenta ahu aahiiso siniphwanyaka itthu sikina soohiloka. Mwaha wa xeeni? Mwaha woowi, hata siniphwanyaka mixankiho olelo-va, hiyo ninnisuwela wiira ‘maxaka anniphwanya ta okathi vakhaani’ ni wiira elapo esya ehanle orwa enoomaliha mixankiho iyo moomalela. — 2aKor. 4:​17, 18.

14. Etthu xeeni enrowa onikhaliherya olipiha nlipelelo nahu?

¹⁴ Okhala wiira itthu ninlipelela ahu muhoolo sinninikhaliherya ohakalala, etthu xeeni enrowa onikhaliherya okupali wiira itthu Yehova oleihenrye awe sinimwiiraneya? Ntoko siisaale mutthu onipirisari awe owara ibinookulu wiira owehe itthu sirakamenle, nihaana opaka itthu sinireerela wiira nilipiherye itthu ninlipelela ahu ni wuupuwelela niri ene mparayiisu. Mwa ntakiheryo, okathi ninxanka ahu mwaha woohikhalana musurukhu oniphiyerya, nihaana wuupuwelela moota ninrowa ahu okhala mparayiisu okathi nihinrowa ahu opirisariki musurukhu ni ohinrowa awe okhala mutthu oohaawa. Vakhala wiira ninnixanka mwaha woohivahiwa eparakha naaphavela ahu, nihaana wuupuwelela moota eyo ehinrowa aya okhala etthu, okathi nihinrowa ahu okhalana itampi ni ninrowa ahu omurumeelaka Yehova iyaakha sinceene. (1Tim. 6:19) Pooti wiira vanoonixankihaka wuupuwelela itthu sa muhoolo ohiya oxanka mwaha wa itthu siniiraneya olelo-va. Masi vakhala wiira nnimuupuwelalaka itthu Yehova onnileiherya awe, nnimoona okhweya wuupuwela seiyo ohiya wuupuwela itthu sinnixankiha.

15. Yoowiiraneya ya Christa, ewiixuttihaleni exeeni?

¹⁵ Nrowe niwehe moota itthu ninlipelela ahu saamukhalihenrye aya Christa, yoowo otheliwe ni Dennis nimulavunle ahu mwaha ola. Owo onihimya so: “Kaahikhalana oretta wa mmakhuvani ni nkaawerya weetta. Nto kaahaana orumeela ekhatera ya maroota ni ikwaha sinceene kaahaana wummaathi. Khula nihiku kinnoona owereya. Okathi vakhaani ovinre, meetiku aka aahikileela wiira nkinrowa openuwa. Masi niinaano-ru, kaahuupuwela so: ‘Owo khoniweha itthu sa muhoolo ntoko kiniwehaka’. Kinniimananiha wuupuwelela itthu kinlipelela aka muhoolo, nto itthu iyo sinnikikhaliherya okhalana murettele wa mmuupuweloni. Olelo-va, kihaana ovilela oretta aka, masi muhoolo kinookhalana okumi wooloka elapo esya!”

“ALE ANIMOOVA, KHENAATHOWA ETTHU”

16. Xeeni Davidi aahimmye awe wiira ale animoova Yehova “khenaathowa etthu”?

¹⁶ Hata arumeyi a Yehova anihakalala, awo annikhalana mixankiho. Nkahaya mmuupuwele mwene Davidi, owo aahihaawa vanceene mwaha wa okhweliwa anaawe araru. Atthu akina yaahimootherya opaka itthu soohiloka, aahirukunuweliwa ni apatthani awe, mwene Sawuli aaphavela omwiiva ni ikwaha sinceene aahaana wiipitha mmakhukuni. Hata aarina mixankiho sinceene, Davidi aanihakalala. Omuhimyaka Yehova, Davidi aalempe so: “Ale animoova, khenaathowa etthu”. (Esal. 34:​9, 10) Xeeni ohalaka olepa siiso? Mwaha woowi owo aanikupali wiira hata Yehova aahaarowa okhoottiherya omukhumelela mixankiho, Yehova aamunvaha itthu aapirisari awe. (Esal. 145:16) Nimutakihaka Davidi, nihaana okupali ni murima wootheene wiira Yehova onoonikhaliherya ovilela mixankiho sahu sootheene. Nto eyo enoonikhaliherya okhala atthu oohakalala ni okhalana murettele wa mmuupuweloni.

17. Xeeni muniphavela anyu wiixutta esiiri ya okhala mutthu oohakalala?

¹⁷ Yehova oniphavela wiira muhakalaleke. (Esal. 131:​1, 2) Tivonto, mwiimananiheke wiixutta esiiri ya okhala mutthu oohakalala. Vakhala wiira munimwiimananiha okhala mutthu ooxukhuru, oowiyeviha ni olipiha waamini wanyu itthu ninlipelela ahu muhoolo, munoowerya ohimya ni murima wootheene wiira: “Aayo, kinnihakalala”. — Esal. 16:​5, 6.