Moota Yehova Onnikhaliherya Awe Ovilela

1. Xeeni vahinikhweya aya ovilela mpakha wanikisa ni etthu xeeni enrowa onikhaliherya ovilela? (1 Pedru 5:10)

OOTHEENE ahu, sinniniphwanya mixankiho. Nto okathi mukina, pooti woonaka ovila ohihiya ovilela mpakha olumwenku ola omala. Anna ni arokora akina, aakhalana oretta ohinivoniwa. Akina, annoona owereya mwaha wookhweliwa mutthu yamphenta aya vanceene. Nave akina, annilupatthiwa ni amusi aya aahiiso ni kuvernu. (Math. 10:​18, 36, 37) Moohicikha muxankiho muniwanana anyu, mukupaliki wiira Yehova onimoovahani ikuru sinrowa wookhaliheryani ovilela mpakha olumwenku ola omala. — Mmusome 1 Pedru 5:10.

2. Etthu xeeni enaakhaliherya makristau ovilela?

² Ovilela, onitaphulela ohihiya ororomeleya wa Yehova hata nirina ene mixankiho, nilupatthiwaka aahiiso neehereriwaka opaka etampi. Nave, nnoowerya ovilela vakhala wiira nnookupali wiira muhoolo itthu sinooloka. Makristau, khaniwerya ovilela mwaha wa ikuru saya, masi anniwerya ovilela mwaha wa Yehova, yoowo onaavaha “owerya onivikana wa mutthu”. (2aKor. 4:7) Mwaha ola, ninrowa othokorerya itthu 4 Yehova onivahale awe, seiyo sinrowa onikhaliherya ovilela. Nave nnimwiixutta etthu nikhanle ahu oopaka, wiira sinikhaliherye itthu iyo Yehova onivahale awe.

OVEKELA

3. Xeeni ohimyaka wiira ovekela mwiiriirya muulupale?

³ Yehova oonivaha etthu yootepa oreera, yeeyo enrowa onikhaliherya ovilela. Hata niyariwe ene nirina ene etampi, Yehova ooneemererya wiira nilavuleke ni yena ni onniniwiriyana. (aHep. 4:16) Nkahaya muupuwele ela: Hiyo pooti onvekela Yehova khula okathi ni omuleela khula etthu nimphavela ahu. Nave, Yehova onniwiriyana mattaava ootheene, onniniwiriyana hata niri ene mekhihu aahiiso niri ene mukhatteya. (Yona 2:​1, 2; Mit. 16:​25, 26) Okathi ninxanka ahu vanceene, nihinoona etthu yoohimya, Yehova onnisuwela etthu naaphavela ahu ohimya. (aRom. 8:​26, 27) Tthiri, ovekela mwiiriirya muulupale onnikhaliherya olavula ni Yehova.

4. Xeeni ninhimya ahu wiira onvekela Yehova wiira onikhaliherye ovilela onnivarihana ni ele oniphavela awe?

⁴ Biibiliya, onninikupaliha wiira Yehova “onooniwiriyana wa khula etthu eninvekela ahu, enivarihana ni ele oniphavela awe”. (1Yoh. 5:14) Niireke vannikhalela onvekela Yehova wiira onikhaliherye ovilela? Aayo, vannikhalela! Tthiri eyo, ti etthu Yehova oniphavela awe. Xeeni ohimyaka siiso? Okathi ninvilela ahu mixankiho, eyo ennimwiiriha Yehova omwaakhula ole oninvirikanya, eyo piiyo, Satana Diabo. (Mir. 27:11) Ohiya-vo, Biibiliya onnihimya wiira Yehova onniphavela vanceene ‘owooniherya owerya wawe aakhaliheryaka ale aniroromeleya wa yena ni murima aya wootheene’. (2Wah. 16:9) Tivonto, nikupaliki wiira Yehova ookhalana owerya ni onniphavela onikhaliherya wiira niweryeke ovilela. — Yes. 30:18; 41:10; Luka 11:13.

5. Ovekela onnikhaliherya sai okhalana murettele? (Yesaya 26:3)

⁵ Biibiliya onihimya wiira okathi nninvekela ahu Yehova nimuleelaka itthu sootheene sinnixankiha, ‘murettele wa Muluku, yoowo onvikana osuwela wotheene wa apinaatamu, onoosuka mirima sahu ni miyuupuwelo sahu’. (aFil. 4:7) Mweekeekhai, eyo enniniiriha omuxukhurela vanceene. Nave atthu ahinimurumeela Yehova, sinnaaphwanya mixankiho. Nto eyo, enniwiiriha weererya inamuna soovirikana wiira akhale oomaaleleya aahiiso oliyala mixankiho saya. Mwa ntakiheryo, atthu akina anniimamaniha oliyala itthu sootheene anuupuwela aya, wiira akhalane murettele wa mmuupuweloni. Mutthu onipaka eyo, khoniwerya okontorolari muupuwelo awe, nto pooti weettihiwaka ni malaikha ootakhala. Opaka eyo, etthu yootakhala. (Mulikanyihe ni Matheyo 12:​43-45) Ohiya-vo, murettele Yehova onnivaha awe okathi nninvekela ahu, ti muulupale ovikana murettele mutthu oniphwanya awe mwaha woorumeela inamuna iyo sa oliyala mixankiho sawe. Okathi nninvekela ahu Yehova, ninnimooniherya wiira ninnimuroromela moomalela ni onoonivaha “murettele” ohinimala. (Mmusome Yesaya 26:3.) Yehova onninivaha murettele, okathi onnikhaliherya awe wuupuwela soolepa sinnimaaliha. Soolepa iyo, sinninuupuxerya wiira Yehova onniniphenta vanceene ni oniphavela onikhaliherya. Nto eyo enninikhaliherya okhala atthu oomaaleleya. — Esal. 62:​1, 2.

6. Itthu xeeni munireerela anyu opaka okathi munivekela anyu? (Nwehe efootu.)

⁶ Etthu munireerela anyu opaka. Okathi munikhalana anyu mixankiho, mmuleeleke Yehova muxankiho anyu. “Mmurihele Yehova muritti anyu woolemela” ni munvekeleke wiira oovaheeni murettele. (Esal. 55:22) Nave-tho, munvekeleke Yehova ankhili wiira musuweleke etthu yoopaka ni muxankiho anyu. (Mir. 2:​10, 11) Ohiya omuxonttela paahi wiira onikhaliherye ovilela, masi-tho nihaana omuxukhurela. (aFil. 4:6) Muupuweleke moota Yehova onookhaliheryaaweni ovilela khula nihiku ni mmuxukhureleke mwaha wa wookhaliheryani. Nave mmuxukhureleke mwaha wa itthu sooreera onoovahaaweni. Nnaamwi muhaawaka mwaha wa mixankiho, muhiliyale itthu sinceene sooreera Yehova onookhaliheryaaweni. — Esal. 16:​5, 6.

NUULUMO NA MULUKU

7. Omusoma Biibiliya onnikhaliherya sai ovilela?

⁷ Yehova oonivaha Nuulumo nawe, eyo piiyo, Biibiliya wiira onikhaliheryeke ovilela. Mbiibiliyani, sookhala iversiikulu sinceene sinooniherya wiira Yehova onninikhaliherya. Nrowe niwehe ntakiheryo nimosa. Matheyo 6:​8, onihimya so: “Tiithi inyu, onnisuwela sinoothowani, hata muhinatthi onvekela”. Yesu taalavunle moolumo awo ni onnimusuwela oratteene Yehova waavikana atthu akina. Tivonto, nikupaliki wiira okathi nnihaawa ahu, Yehova onnisuwela itthu nimpirisari ahu, ni onrowa onikhaliherya. Mbiibiliyani, aakhala anatiri a Yehova aniwerya onilipiha wiira niwerye ovilela mixankiho. — Esal. 94:19.

8. a) Miruku xeeni Biibiliya onnivaha awe sinrowa onikhaliherya ovilela? b) Etthu xeeni enrowa onikhaliherya wuupuwela malakiheryo a mbiibiliyani okathi nimpirisari ahu?

⁸ Biibiliya, onninivaha miruku sinnikhaliherya ovilela mixankiho. Miruku iyo, sinninivaha ankhili annikhaliherya opaka soothanla sooloka. (Mir. 2:​6, 7) Mwa ntakiheryo, Biibiliya onnileela wiira nihixankeke ni nihiku na meelo. Ohiya opaka eyo, nihaana omuroromela Yehova khula nihiku. (Math. 6:34) Akhala wiira nnoomusomaka Biibiliya khula nihiku ni wuupuwelela itthu nisomme ahu, vanookhweyaka wuupuwela miruku sa mbiibiliyani okathi nimpaka ahu yoothanla aahiiso osuwela moota woovilela muxankiho.

9. Itthu ninsoma ahu mbiibiliyani, sinnikhaliherya sai okupali wiira Yehova onoonikhaliherya?

⁹ Mbiibiliyani, hiyo ninnisoma soowiiraneya sa atthu yaamuroromenle Yehova ni yaakhaliheriwe ni yena. (aHep. 11:​32-34; Yak. 5:17) Okathi nnaamini ahu wiira Yehova aahaakhaliherya atthu awo, ninnilipiha okupali wahu wiira Yehova onoonikhaliheryaka. Nave ninnikupali wiira Yehova ti ‘ntthyawelo nahu ni ikuru sahu, [yoowo] onnikhaliherya voowaakuveya, okathi wa mixankiho’. (Esal. 46:1) Okathi nnuupuwela ahu moota arumeyi a Yehova yoonihenrye aya omwaamini ni yahaahiyale aya omurumeela Yehova hata okathi wa mixankiho, eyo enninivaha ikuru wiira nitthare ntakiheryo naya. — Yak. 5:​10, 11.

10. Muhaana opaka exeeni wiira Biibiliya ookhaliheryeni?

¹⁰ Etthu munireerela anyu opaka. Mmusomeke Biibiliya khula nihiku, ni mulepeke iversiikulu munoona anyu wiira sinnitepa wookhaliheryani. Voosiisu, atthu akina annisoma yoolepa ni ekomentaario enikhuma elivirinyu Ovarerya Soolempwa Khuta Nihiku. Opaka eyo, ennaakhaliherya wuupuwelela nihiku nootheene etthu esomme aya. Eyo ti etthu yaamukhalihenrye murokora Mariea okathi aakhapelela awe anamuyari awe mahiku ookiserya a okumi aya. Paapa awe ni maama awe, okathi omosa-ru yaahikhalana oretta wa kanser. Marie onitthokiherya so: “Khula voosiisu, miyo kaanisoma yoolepa enikhuma elivirinyu Ovarerya Soolempwa Khuta Nihiku ni kaanuupuwelela itthu kaasomme aka. Eyo yaanikikhaliherya khula nihiku omuupuwela Yehova, ni wuupuwela itthu sooreera onniixuttiha awe mbiibiliyani, ohiya paahi omakela wuupuwela mixankiho saka”. — Esal. 61:2.

ANNA NI AROKORA

11. Xeeni vari aya voolipiha osuwela wiira mixankiho khasinniphwanya mekhihu?

¹¹ Yehova onninivaha anna ni arokora wiira onikhaliheryeke ovilela. Mwaha woosuwela wiira ‘anninhu a olumwenku wotheene annihaawa ntoko hiyo’, eyo enninikupaliha wiira khanikhanle mekhihu. (1Ped. 5:9) Eyo enooniherya wiira anna ni arokora sinnaaphwanya mixankiho sinniphwanya ni khanihiya ovilela. Tivonto, hiyo-tho nnoowerya ovilela! — Mit. 14:22.

12. Anna ni arokora annikhaliherya sai ni hiyo ninrowa waakhaliherya sai? (2 aKorinto 1:​3, 4)

¹² Anna ni arokora anoowerya onikhaliherya ovilela ni moolumo aya ni itthu anipaka aya. Anna ni arokora akina yaahimukhaliherya murummwa Paulo. Ipaphelo aalempe awe, murummwa Paulo onniromola masina a anna ni arokora yaamukhalihenrye okathi ahaawerya awe okhuma vate. Nto ipaphelo iyo, owo aahaaxukhurela. Anna awo yaahilavula moolumo yaamulipihale ni yaahinvaha itthu saamuthowa. (aFil. 2:​25, 29, 30; aKol. 4:​10, 11) Olelo-va, anna ni arokora annipirisari okhaliheriwa okathi wa mixankiho. Hiyo nave, nnoopirisariki okhaliheriwa okathi sinniphwanya aya mixankiho. — Mmusome 2 aKorinto 1:​3, 4.

13. Etthu xeeni yaamukhalihenrye murokora Maya ovilela?

¹³ Mwaakha wa 2020, mapoolisiya a oRússia yaahikela mootutuxerya empa ya murokora oniihaniwa Maya ni yaahivaskulyari empa awe. Nuumala-vo, aahaana waakiherya waamini wawe otribunaali, olavulaka itthu aakupali awe siri mbiibiliyani. Maya onihimya wiira anna ni arokora yaahimukhaliherya vanceene okathi ole wa mixankiho. Murokora Maya onihimya-tho so: “Okathi ole kaaxankale aka vanceene, anna ni arokora yaahikilikarela, okilepela mensaaxe ni yaanihimya wiira annikiphenta. Miyo kaanisuwela wiira anna ni arokora annikiphenta ni awo amusi aka. Masi mwaakha wa 2020, okathi anna ni arokora yaakilenle aya wiira annikiphenta, eyo yaahikilipiha vanceene”.

14. Nipakeke exeeni wiira anna ni arokora anikhaliherye? (Nwehe efootu.)

¹⁴ Etthu munireerela anyu opaka. Okathi munikhalana anyu muxankiho, ti vooloka waaleela anna ni arokora muxankiho anyu ni oviriha okathi muri ene naawo. Muhooveleleke waavekela nikhaliheryo axitokweene. Awo pooti okhala ntthyawelo “okathi onòpaya epheyo yorirya, okathi onrupaya epula ya mwanamukhaya”. (Yes. 32:2) Muhiliyale wiira, anna ni arokora annivilela mixankiho. Tivonto, okathi munimukhaliherya anyu mutthu onipirisari okhaliheriwa, eyo enimookhaliheryani ophwanya ohakalala ni ovilela mixankiho sanyu. — Mit. 20:35.

NLIPELELO NAHU

15. Etthu Yesu aalipelela awe yaamukhalihenrye sai, nave hiyo enrowa onikhaliherya sai? (aHeeperi 12:2)

¹⁵ Yehova oonivaha nlipelelo, nenno ninnikhaliherya ovilela. (aRom. 15:13) Muhiliyale wiira mwaha wa itthu Yesu aalipelela awe, aahiwerya ovilela nihiku nootepexa oxankiha na okumi awe valaponi. (Mmusome aHeeperi 12:2.) Yesu aanisuwela wiira aahihiye-ru ororomeleya, aamukhaliherya woona wiira itthu sootheene Satana onimootherya awe Yehova, khahiyo seekeekhai. Nave aamwaakhaliherya atthu woona wiira Yehova onnireerela ottittimihiwa. Nave-tho, Yesu aanuupuwela okathi aarowa awe otthikela okhala ni Tiithi awe wiirimu ni okathi aarowa awe okhala Mwene olamulelaka vamosa ni makristau oothanliwa 144.000. Mwa enamuna emosa-ru, olipelela wahu okhala mahiku ootheene elapo esya ya Muluku, enoonikhaliherya ovilela khula muxankiho onniphwanya elapo ela enilamuleliwa ni Satana.

16. Nlipelelo naamukhalihenrye sai murokora mmosa ovilela? Moolumo awe anniixuttiha exeeni?

¹⁶ Nwehe moota nlipelelo na okhala elapo esya naamukhalihenrye aya murokora mmosa a oRússia oniihaniwa Alla. Iyawe aahivariwa otthukweliwa mukhatteya, onalipelela ophukeliwa. Nuumala iyawe otthukweliwa, Alla aahimmye so: “Ikwaha sinceene kaaninvekela Yehova kilavulaka sa nlipelelo onikivaha awe ni kaanuupuwelela itthu iyo kinilipelela aka. Eyo yookikhaliherya ohitepa okhulumuwa. Kaahisuwela wiira mixankiho iya sinoovira, sirweeke itthu sooreera. Yehova onimwaaxintta awanani awe ni onoonitthuvela”.

17. Ninrowa wooniherya sai wiira ninnixukhurela itthu sooreera Yehova onileihenrye awe? (Nwehe efootu.)

¹⁷ Etthu munireerela anyu opaka. Mwaavyeke okathi wiira muupuwele oratteene itthu Yehova onrowa awe woovahani muhoolo. Nave, mwiimananiheke wuupuwela muri ene elapo esya muri ene ni amusi, apatthani ni ootheene anyu muhakalanle ene vanceene. Nto khula maxakha anrowa woophwanyakani, munrowa woonaka okhala “a okathi vakhaani ni ahikhanle etthu”. (2aKor. 4:17) Ohiya-vo, mwiimananiheke waaleela atthu akina itthu sooreera Yehova onrowa awe onivaha muhoolo. Nkahaya muupuwele mixankiho sinaaphwanya atthu ahinimurumeela Yehova. Nave awo sinnaaphwanya mixankiho sinniphwanya, masi khanisuwela itthu sooreera Yehova onrowa awe onivaha muhoolo. Hata mwaaleelaka itthu vakhaani paahi, woonasa wene, munimwaakhaliherya ophavela osuwela itthu sikina sa Omwene wa Yehova ni itthu onileihenrye awe.

18. Etthu xeeni enniiriha ororomelaka itthu Yehova onileihenrye awe?

¹⁸ Nuumala Yoobi ovilela mixankiho sootheene samphwannye ni ohihiya ororomeleya, owo aahimuleela Yehova wiira: “Vano koosuwela wiira munniwerya opaka itthu sootheene, ni wiira khiivo etthu munuupuwela anyu, muhiniwerya anyu opaka”. (Yoobi 42:2) Yoobi aahoona wiira khiivo etthu ekhanle oomukhoottiherya Yehova opaka itthu oleihenrye awe. Okathi nnuupuwelela ahu wiira Yehova onoopaka itthu oleihenrye awe ni omaliha mixankiho sahu, eyo enoonikhaliherya ovilela. Mwa ntakiheryo, nkahaya mmuupuwele muthiyana ovirihale iyaakha sinceene owereiwaka. Owo ookhulumuwa, mwaha woowi oorowa wa mameetiku manceene, masi khuuvo owenrye onvoniha oretta awe. Nuumala-vo, onamphwanya meetiku ooloka ni oniroromeliwa vanceene, yoowo onimuleela etthu ene enimwiiriha owereiwa ni moota onrowa awe omukhaliherya wiira ovone. Moohipisa, owo onnihakalala nnaamwi osuwelaka wiira onoovira okathi ohinatthi ovonihiwa oretta awe. Vano, muthiyana ole vanoomukhweela ovilela oretta awe, maana onnisuwela wiira moohipisa onrowa ovonihiwa oretta awe. Mwa enamuna emosa-ru, nnoowerya ohihiya ovilela mwaha woowi ninnikupali ni murima wootheene wiira eparayiisu Muluku oleihenrye awe, onooruuha.

19. Etthu xeeni ninreerela ahu opaka wiira nihihiye ovilela?

¹⁹ Ntoko niwehale ahu, Yehova onninikhaliherya ovilela mixankiho sahu orumeelaka eparakha ya ovekela, Nuulumo nawe, anna ni arokora ni nlipelelo nahu. Akhala wiira nnoorumeela oratteene itthu iya Yehova onivahale awe, owo onoonikhaliherya ovilela khula muxankiho onniphwanya. Nave khaninrowa ohiya ovilela mpakha ophiya okathi olumwenku wa Satana ni mixankiho sootheene sinrowa aya omalihiwa. — aFil. 4:13.