Muhipiseryeke Waakhaliherya Atthu Anisiveliwa Ihapari Sooreera

1. Atthu akina anoonela sai okathi nnaalaleerya ahu? (Miteko 13:​47, 48; 16:​14, 15)

OKATHI wa arummwa, atthu anceene yaaneemererya ihapari sooreera moowaakuveya, nuumala olaleeriwa. (Musome Miteko 13:​47, 48; 16:​14, 15.) Mwa enamuna emosa-ru, atthu anceene olelo-va annihakalala nuumala wiiwa ihapari sooreera ekwaha yoopacerya. Masi atthu akina, wanipacerya khansiveliwa, masi nuuvira okathi anniphavela wiixutta ni omurumeela Muluku. Exeeni nikhanle ahu oopaka okathi nnaaphwanya ahu atthu arina “murima wooloka” naalaleeryaka?

2. Mwa enamuna xeeni muteko wa waapaka awiixutti, onilikana aya ni muteko woolima?

² Muteko woolaleerya, onoolikana ni muteko woolima. Mulimi oona wiira ipyo sawe soottokottha, owo onnihepha moowaakuveya. Masi owo khonihiya olima ni okhapelela ipyo sikina, seiyo nlelo sihittokontthe. Mwa enamuna emosa-ru, okathi nnimphwanya ahu mutthu onisiveliwa ihapari ninlaleya ahu, nihaana omukhaliherya moowaakuveya wiira okhale mwiixutti a Kristu. Nave, khannihiya waakhaliherya ale anipirisari okathi, wiira yoone efaita erina aya muhupi ninlaleya ahu. (Yoh. 4:​35, 36) Okathi nnoona ahu wiira atthu awo annisiveliwa aahiiso khansiveliwa muhupi nnaalaleerya ahu, vannikhweya ophwanya inamuna sa waakhaliherya. Mwaha ola, nnimwiixutta etthu nikhanle ahu oopaka wiira naakhaliherye ale anisiveliwa ihapari sooreera ekwaha yoopacerya nnaalaleerya ahu. Nave, nnooweha moota nikhanle ahu oowaakhaliherya atthu awo wiira ahihiye okelela ohoolo.

MOOTA WOOWAAKHALIHERYA ATTHU ANISIVELIWA IHAPARI SOOREERA

3. Nipakeke exeeni okathi nnimphwanya ahu mutthu onisiveliwa ekeekhai naalaleeryaka? (1 aKorinto 9:26)

³ Okathi ninlaleerya ahu, namphwanya mutthu onisiveliwa ekeekhai, nihaana omukhaliherya moowaakuveya wiira omusuwele Yehova ni opacerye weetta ephiro eniphwanyiha okumi woohimala. Tivonto, ekwaha yoopacerya ninvaanela ahu ni mutthu onisiveliwa ekeekhai, nihooveleleke onvaha yoosoma ya Biibiliya ni omulattula mithukumano. — Mmusome 1 aKorinto 9:26.

4. Muhimye yoowiiraneya ya mutthu eemerenrye omusoma Biibiliya moowaakuveya.

⁴ Munvahe yoosoma ya Biibiliya. Atthu akina ninlavulana ahu, anneemererya opaceriha yoosoma ya Biibiliya okathi ene yoowo. Mwa ntakiheryo, Namaxexe omosa, mwali a oCanadá, aahaattamela opuro yaari ekarinyu, okuxa ebroxuura eni: Okumi Woohimala!. Murokora aalaleerya ni ekarinyu eyo, aahimuleela wiira vanniweryaneya opaceriha yoosoma ya Biibiliya orumeelaka ebroxuura eyo, ohilinve etthu. Mwali ole, aahisiveliwa vanceene nto yaahivahana mammeru a telefoni. Nuuvira okathi, nihiku nene nenle, mwali ole aahimwinviyarela mensaaxe murokora ole, omukohaka voohimya sa yoosoma ya Biibiliya. Okathi murokora ole aamukohale awe wiira pooti okumana wuumalani wa esumana, mwali ole aakhunle wiira: “Xeeni ohikhalaka meelo? Miyo kinoorowa okhalana okathi”. Murokora ole, aahipaceriha omusomiha Biibiliya, Namathanu. Nave mwali ole aahipacerya oweha mithukumano, wanikisa wa esumana ene yeele ni khaahiyale okela vahoolo.

5. Ikwaha sikina, nihaana opaka exeeni wiira nivahe yoosoma ya Biibiliya? (Nwehe ifootu.)

⁵ Masi khahiyo wiira atthu ootheene anrowa weemereryaka yoosoma ya Biibiliya moowaakuveya, ntoko iirale awe mwali nimulavunle ahu ettima evinre. Ikwaha sikina pooti opirisariki ovira okathi nimukhaliheryaka mutthu owo wiira eemererye yoosoma ya Biibiliya. Nnoowerya opaka eyo, nilavulaka itthu saarowa omusivela mutthu owo. Akhala wiira nnookhalana moonelo wooloka ni wooniherya wiira ninnaathokorerya atthu, pooti wiira moohipisa nnoopaceriha yoosoma ya Biibiliya. Nilavuleke exeeni okathi nninvaha ahu mutthu yoosoma ya Biibiliya? Nrowe niwehe etthu aahimyale aya anna ni arokora alimalenle opaceriha soosoma sa Biibiliya.

6. Nihaana orumeela moolumo xeeni wiira nihihiye ovaanela ni mutthu owo?

⁶ Anna awo ahimmye wiira, mapuro makina okathi nnaavaha ahu atthu yoosoma ya Biibiliya, nihaana osyaka olavula moolumo ntoko: “Yoosoma”, “kursu a Biibiliya” aahiiso “kimphavela woosomihani”. Awo anihimya wiira nihaana orumeela moolumo ntoko: “Ovaanela myaha sa mbiibiliyani”, “othokorerya myaha sa mbiibiliyani” ni “omwiiwexexa Biibiliya”. Mwaaphavelaka ohihiya ovaanela ni mutthu owo, nyuwo pooti olavula so: “Etthu yooreera oweha moota Biibiliya onaakhula awe makoho annixankiha”, aahiiso “mwaanisuwela wiira Biibiliya khonaakhaliherya paahi atthu aneettela etiini, masi onninikhaliherya ootheene ahu?” Nave pooti ohimya so: “Khonipirisari okathi munceene, minuutu 10 aahiiso 15, pooti omukhaliherya mutthu wiixutta etthu yooreera mbiibiliyani”. Nto wiira mutthu owo ohoove, vaamuloka osyaka orumeela moolumo oowi: “Noovarihana-vo” aahiiso “nnoosomaka khula esumana”.

7. Okathi xeeni atthu akina aniixutta aya ekeekhai? (1 aKorinto 14:​23-25)

⁷ Mmulattuleke wiira orowele mithukumano. Okathi wa murummwa Paulo, atthu anceene yaaniixutta ekeekhai, okathi yaarowela aya mithukumano. (Mmusome 1 aKorinto 14:​23-25.) Olelo-va, enniiraneya etthu emosa-ru. Atthu anceene annikela vahoolo moowaakuveya, okathi anipacerya aya orowela mithukumano. Nto okathi xeeni wooreerela para omulattula mutthu mithukumano? Yoosoma 10 ya eliivuru Okumi Woohimala!, ole onimusoma Biibiliya onnilattuliwa orowela mithukumano. Masi khivanipirisari olipelela mpakha ophiya yoosoma eyo 10 wiira nimulattule mutthu orowela mithukumano. Ekwaha yoopacerya munilavula anyu ni mutthu, nyuwo pooti omulattula wiira orowele mithukumano sa wuumalani wa esumana. Pooti omuleela muru wa mwaha onrowa olavuliwa, aahiiso eponto emosa munoona anyu wiira enoomusivela eri erevista Owehaweha enrowa othokoreriwa.

8. Nimuleeleke exeeni mutthu nimmulattula ahu orowela mithukumano sahu? (Yesaya 54:13)

⁸ Okathi munimulattula anyu mutthu mithukumano, mmutthokiheryeke wiira mithukumano sahu soovirikana ni itthu iiwa awe itiini sikina. Okathi naskola mmosa a Biibiliya aarowenle awe mithukumano ekwaha yoopacerya, owiriyana yoosoma ya Owehaweha, aahimukoha murokora aamusomiha Biibiliya wiira: “Niireke ole onihoolela yoosoma onnisuwela masina a atthu ootheene?” Murokora ole, aahimutthokiherya wiira ninniimananiha osuwela masina a anna ni arokora, ntoko siisaale ninsuwela ahu masina a amusi ahu. Naskola ole, aahihimya wiira okerexa wawe, atthu anceene khanisuwela masina a atthu akina. Nave, hiyo pooti omuleela wiira enamuna nimpaka ahu mithukumano sahu, yoovirikana ni ikerexa sikina. (Mmusome Yesaya 54:13.) Hiyo ninnithukumana wiira nimukokhorele Yehova, wiixuttihiwa ni Yehova ni olipihana mukina ni mukhwaawe. (aHep. 2:12; 10:​24, 25) Tivonto, mithukumano sahu ti sootthokiheya, sinninikhaliherya wiixutta ni khasinihela muhina soolema sa atthu. Nave Ipa sa Omwene, khisaattiheriwe itthu ni sinninikhaliherya wiixutta. Okhala wiira khanniirela mpantta myaha sa elapo, hiyo khaninlavula itthu sa epoliitika. Nave, khaninlavula miyoonelo sa atthu. Etthu ekina enikhaliherya, ori omooniherya naskola vahinatthi, eviidiyu eni: Exeeni Eniiraneya mMithukumano sa Empa ya Omwene? Eyo enoomukhaliherya osuwela moota nimpaka ahu mithukumano sahu.

9-10. Nimuleeleke exeeni mutthu yoole onoovelela orowela mithukumano? (Nwehe efootu.)

⁹ Atthu akina annoovelela orowela mithukumano sahu, maana anuupuwela wiira yarowela vale, “anookhala Namoona a Yehova”. Tivonto, mmuleeleke mutthu owo wiira hiyo onisivela owaakhela ale annixukurya, nave khinnaakhanyererya ohimya aahiiso opaka etthu okathi wa mithukumano. Nave-tho, khinnaakhanyererya okhala Namoona a Yehova. Atthu ootheene annaakheliwa, waahela muhina atthu aalupale, anamwane, amiravo, athiyana ni alopwana. Mithukumano sahu, anamwane ankilaathi hoothe ni atthu aalupale. Nto eyo, ennaakhaliherya anamuyari osuwela etthu anaaya aniixutta aya. (Otum. 31:12) Khaninviriha ephace nivekelaka musurukhu. Hiyo nintthara miruku sa Yesu, seiyo sini: “Nyuwo nvahiwe mahala, nto nvaheke mahala”. (Math. 10:8) Nave-tho, muhaana omuleela mutthu owo wiira khonipirisari owara ikuwo sa musurukhu munceene wiira orowele mithukumano sahu. Muhiliyale wiira, Muluku khoniweha makhalelo a ota, masi oniweha murima. — 1Sam. 16:7.

¹⁰ Akhala wiira mutthu owo onoorowela mithukumano, mmwaakhele ni murima wootheene, mwaasuweliheke axitokweene ni anna ni arokora. Aweha wiira atthu toopatthaneya ni annimuthokorerya saana, woonasa wene, onoophavela orweela mithukumano sikina. Nave, akhala wiira mutthu owo khorina Biibiliya okathi wa mithukumano, mmooniheryeke soolepa sinisommwa mmurumeelaka Biibiliya anyu.

NINROWA OMUKHALIHERYA SAI MUTTHU OPACENRYE OMUSOMA BIIBILIYA?

11. Munrowa wooniherya sai wiira munnitthara ele nvarihanne anyu ni mwaneene etthoko?

¹¹ Etthu xeeni ninreerela ahu ohiliyala, okathi nimmusomiha ahu mutthu Biibiliya? Mphiyeke nihiku ni okathi mulaihanne anyu ni mutthu owo. Mwa ntakiheryo, mphiyeke okathi nvarihanne anyu, hata atthu a muttetthe owo arina ene yoolema ya waatarasari. Ohiya-vo, ti vooloka yoosoma yoopacerya ohiviriha okathi munceene. Anamalaleerya akina alimalenle, anihimya wiira ti vooloka ohipisa, hata mutthu owo ophavelaka wiixutta itthu sikina. Nave, muhaatteke itthu soolavula. Munvaheke okathi mwaneene etthoko wiira olavuleke. — Mir. 10:19.

12. Okhuma okathi nimpacerya ahu omusomiha mutthu Biibiliya, tiivi eri yoolakela ahu?

¹² Okathi nimpacerya ahu omusomiha mutthu Biibiliya, yoolakela ahu okhaleke omukhaliherya mutthu owo omusuwela ni ophenta Yehova ni Yesu. Nnoowerya opaka eyo, vakhala wiira okathi wootheene nnimwaaleelaka ele Biibiliya onihimya awe, ohiya olavula moonelo ahu aahiiso itthu ninsuwela ahu. (Mit. 10:​25, 26) Murummwa Paulo, oonivaha ntakiheryo nooloka. Okathi aawiixuttiha awe atthu, owo aahilavula sa Yesu Kristu, yoowo aarummwale ni Yehova wiira onikhaliherye omusuwela ni ophenta, Yehova. (1aKor. 2:​1, 2) Ohiya-vo, Paulo aahaakhaliherya atthu akina, woona oreera waya waakhaliherya anaskola a Biibiliya okhalana mikhalelo sooloka, seiyo sinilikanyihiwa ni eweero, eparatha ni maluku oowaarya. (1aKor. 3:​11-15) Mikhalelo iyo sinihela muhina waamini, osuwela, ankhili ni omoova Muluku. (Esal. 19:​9, 10; Mir. 3:​13-15; 1Ped. 1:7) Mutakiheke inamuna Paulo aarumeela awe, wiira mwaakhaliherye ale munaasomiha anyu Biibiliya, okhalana waamini woolipa ni waataana wooloka ni Tiithi ahu a wiirimu. — 2aKor. 1:24.

13. Ninrowa wooniherya sai ooreera murima ni oopixa murima, okathi nnaasomiha ahu anaskola a Biibiliya? (2 aKorinto 10:​4, 5) (Nwehe efootu.)

¹³ Okathi nnaasomiha ahu atthu Biibiliya, nitthareke ntakiheryo na Yesu, nikhalaka oopixa murima ni ooreera murima. Musyakeke opaka makoho anrowa omwiiriha mutthu owo oxanka. Vakhala wiira wookhala mwaha naskola anyu ohineemererya awe, mmusomiheke myaha sikina, nuuvira okathi mutthikeleke mwaha owo. Ohiya omukhanyererya etthu ohineemererya awe, munvaheke okathi wiira ekeekhai ekele vamurimani vawe. (Yoh. 16:12; aKol. 2:​6, 7) Biibiliya onnilikanyiha soowiixuttiha soowoothiwa ni itthu soolipexa seiyo nneererya ahu opwexa. (Mmusome 2 aKorinto 10:​4, 5.) Nto nihinatthi omukhaliherya naskola ahu ohiya sookupali sawe, nihaana toko omukhaliherya okhalana sookupali isya, eyo piiyo, omuroromela Yehova ni ompaka okhala ntthyawelo nawe. — Esal. 91:9.

MOOTA WOOWAAKHALIHERYA ATTHU ANIPACERYA ORWEELA MITHUKUMANO

14. Naathokoreryeke sai ale anipacerya orweela mithukumano sahu?

¹⁴ Yehova oniphavela wiira naathokoreryeke saana atthu ootheene. Nto nihiweheke opuro onikhuma aya, ekultuura aya, yaari athaaciri aahiiso yahaakhanle athaaciri. (Yak. 2:​1-4, 9) Ninrowa wooniherya sai wiira ninnaaphenta ale anipacerya orweela mithukumano sahu?

15-16. Ninrowa waakhaliherya sai atthu anipacerya orweela mithukumano sahu wiira ahixanke?

¹⁵ Atthu akina, annirweela mithukumano sahu, mwaha woowi aniphavela woona etthu eniiraneya aahiiso mwaha woowi mutthu onikhala opuro mukina, taalattunle wiira arweele mithukumano. Okathi nninweha ahu mutthu a niinaano orweelaka mithukumano, nihooveleleke orowa omulavuliha. Nwaakheleke saana ni musyakeke olavula itthu saarowa waanyoonyiha. Pooti waalattula wiira mukilaathi hoothe. Mmusomeke hoothe Biibiliya anyu aahiiso eliivuru anyu, wala mwaavaheke Biibiliya ni eliivuru enithokoreriwa. Nave muupuweleke moota woowaakhaliherya wiira ahixanke. Mulopwana mmosa aatonko oxukurya Empa ya Omwene, aahimuleela munna wiira aahixanka okhala wiira khaawanre ntoko atthu akina yaawanre aya. Munna ole, aahimutthokiherya wiira nnaamwi niwaraka saana okathi wa mithukumano, hiyo Anamoona a Yehova nnoolikana ni atthu akina. Mulopwana ole, muhoolo mwaya aahipatisiwa. Masi khonaliyale moota munna ole aamukhalihenrye awe ovukula oxanka wawe. Okathi ninvaanela ahu ni ale anipacerya orweela mithukumano sahu, nihaana okhalana ephoole wiira nihaakoheke itthu sikhanle oowaaxankiha. — 1Ped. 4:15.

¹⁶ Yookhala enamuna ekina, nikhanle ahu oowiiriha ale annixukurya ohixanka. Mwa ntakiheryo, nihaana waattittimiha atthu awo okathi ninvaanelana ahu, ninvaha ahu ikomentaario ni okathi nimpaka ahu mipantta sinaalavula ale ahikhanle Anamoona a Yehova aahiiso sinilavula sookupali saya. Nihaana orumeela moolumo aahiiso ohimya itthu sihinrowa waaveeha ale a niinaano wala owiiriha ohiphavela orweela mithukumano sikina. (Tito 2:8; 3:2) Mwa ntakiheryo, khinaarowa olavula sookupali saya mwa enamuna ehinooniherya nttittimiho. (2aKor. 6:3) Mwaha waivaavo, anna anilavula myaha ahaana ovaha ephoole mwaha ola. Nave ahaana otthokiherya moolumo ahinisuweliwa ni atthu anceene, okhala wiira mmithukumanoni annoorwa atthu ahikhanle Anamoona a Yehova.

17. Nipakeke exeeni okathi nnaaphwanya ahu atthu ‘arina murima wooloka’ naalaleeryaka?

¹⁷ Khula nihiku ninvira, okathi onootepa omala. Nto muhihiye waaphavela atthu yaawo arina “murima wooloka wira yaakhele okumi woohimala”. (Mit. 13:48) Okathi nnaaphwanya ahu atthu awo, nihooveleleke waavaha yoosoma ya Biibiliya aahiiso waalattula orowela mithukumano sahu. Akhala wiira nnoopaka eyo, nnimwaakhaliherya opacerya weetta ‘estaraata . . . yeekumi’. — Math. 7:14.