Itthu Iya “Mwalèle Atthu Òroromeleya”

1, 2. Atthu anceene anoonela sai muteko aya?

ATTHU anceene anoona wira kharina efaita mwaha wa muteko anivara aya. Ilapo sikina, okathi atthu asuwelanne anikumana aya annikohana so: “Muteko xeeni onivara anyu?”

² Ikwaha sikina, Biibiliya onnaaromola atthu ni miteko saavara aya. Mwa ntakiheryo, onnimuromola “Matheyo, ari mulipa-òliviha mpósito”, “Simoni nasapala” ni Luka okhala meediku oophentiwa. (Matheyo 10:3; Miteko 10:6; aKolosi 4:14) Okathi mukina, Biibiliya onnihimya miteko atthu akina yaanvarela aya Yehova. Nkahaya nwuupuwele atthu ntoko: Mwene Davidi, profeta Eliya ni murummwa Paulo. Alopwana ala yaanivaha efaita miteko yaavahiwe aya ni Yehova. Vamosaru, hiyo nave nihaana ovaha efaita miritti nrina ahu mmutekoni mwa Yehova.

3. Xeeni vanitthuneya aya atthu oowuuluvala owiixuttiha amiravo? (Nwehe elatarato yoopacerya.)

³ Hiyo ninnisiveliwa omurumeela Yehova ni ninnivaha efaita muteko ahu. Anamunceene a hiyo ninnisiveliwa vanceene muteko onivara ahu ni ninrowa ovikanihaka mpakha vaniwerya ahu. Masi, mooriipiha murima vaavo atthu anuuluvala aya awo khaniwerya ovara muteko aya ntoko yaaryaaya amiravo. (Musuweli 1:4) Nto eyo ennaakumiherya mixankiho atthu a Yehova. Olelo-va muteko woolaleerya onninnuwa, nto mutthenkeso wa Yehova onnirumeela etekonologia ya naanano wira ihapari sooreera saaphwanye atthu anci. Masi okathi mukina, vannaavila atthu oowuuluvala wiixutta inamuna isya sa ovara muteko. (Luka 5:39) Nave-tho, okathi mutthu onuuluvala awe ikuru sawe sinnivukuwa. (Miruku 20:29) Tivonto, ti vooloka atthu oowuuluvala owiixuttiha amiravo wira akhalaneke miritti mmutthenkesoni mwa Yehova.​—Musome Esalimo 71:18.

4. Exeeni eniwiiriha atthu akina ohivaha miritti? (Nwehe ekaaxa eni: “Itthu Siniwiiriha Akina Waavila Ovaha Miritti”.)

⁴ Tthiri khivankhweya ale arina miritti waavaha miteko sikina amiravo. Anna akina pooti oriipiwa murima mwaha woopweteiwa muritti waasivela vanceene. Nave pooti waawereya okathi anuupuwela aya ohiya muritti wa vameekhaaya waasivela. Aahiiso pooti oxanka yuupuwelaka wira yaahikhale vaavo, muteko owo khonrowa ovariwa saana. Woonasa wene anoona wira kharina okathi wa owiixuttiha atthu akina. Nave-tho, amiravo ahaana opixa murima okathi ahinivahiwa aya miritti sinceene.

5. Makoho xeeni ninrowa ahu othokorerya mwaha ola?

⁵ Xeeni varyaaya vootthuneya anna oowuuluvala waakhaliherya amiravo waakhela miritti suulupale mmulokoni? Nto anrowa waakhaliherya sai? (2 Timótheyo 2:2) Nave xeeni amiravo anitthuneya aya wiixutta okhalana moonelo wooloka okathi anivara aya vamosa ni anna oowuuluvala, arina sookumanana sinceene? Wanipacerya, nrowe niwehe moota Mwene Davidi aamukhalihenrya awe mwanawe wira ovare muteko wootthuneya.

DAVIDI AAHIMUKHALIHERYA SALOMONI

6. Exeeni Mwene Davidi aaphavela awe opaka? Masi Yehova aamuleelale exeeni?

⁶ Mwa iyaakha sinceene, Davidi aanilupatthiwa, nto eyo yaahimwiiriha otthyawela mapuro oovirikana. Nuumala okhala mwene, owo aakhala empa yooloka. Nto aahimuleela profeta Natani wira: “Mone: miyo kinkhala empa yorera, etekiwe ni miri sorika: masi nivuku no watàna w’Apwiya niyathiwe muhemani”. Davidi aaphavela omutekela empa yooreera Yehova. Natani aahimuleela wira: “Mwire ntoko sintthuna murim’anyu, okhala wira Apwiya ari ni nyuwo”. Masi eyo khahiyo yaari yoophavela ya Yehova. Nto Yehova aahimuruma Natani orowa omuleela Davidi wira: “Khahiyó nyuwo munrowa okitekela empa, wira kikhaleke-mo”. Nnaamwi Yehova aamuleihenrye Davidi wira khula okathi aarowa okhalaka ni yena, Davidi aahisuwela wira mwanawe mmosa taarowa oteka empa ya Muluku. Nto Davidi oonenle sai?​—1 Wahala 17:1-4, 8, 11, 12; 29:1.

7. Davidi oonenle sai malakiheryo a Yehova?

⁷ Nnaamwi Davidi aaphavela oteka empa ya Yehova, masi nuumala oleeliwa wira khaarowa oteka owo aahinyoonyiheya. Hata vari siiso, owo aahikhaliherya muteko ole waarowa ovariwa ni mwanawe. Davidi aahikhaliherya muteko ole, aahaaphavela anamuteko, aahithukumanya iyuuma, ekoobri, eparatha, eweero ni ithaapwa. Davidi khaaxankale uupuwelaka tani aarowa ovuwihiwa mwaha wooteka empa ele, yeeyo muhoolo mwaya yaasuweliwe okhala etemplo ya Salomoni. Ohiya-vo, Davidi aahimulipiha Salomoni oriki: “Vano, mwan’aka, Apwiya ekhale ni nyuwo, wira muhojele oteka empa y’Apwiya Muluku anyu, ntoko awo solaihenryayani”.​—1 Wahala 22:11, 14-16.

8. Exeeni yaamwiiriha Davidi wuupuwelaka wira Salomoni khaawerya oteka empa ya Muluku? Masi Davidi aapanke exeeni?

⁸ Mmusome 1 Wahala 22:5. Woonasa wene, Davidi uupuwela wira Salomoni khaarowa owerya oteka empa ya Muluku. Empa ele yaari “yulupalexa ni yorerexa”, ni Salomoni aari “mmiravo ni òhiratta”. Masi Davidi aanisuwela wira Yehova aammukhaliherya Salomoni ovara muteko ole wa vameekhaaya. Tivonto Davidi aahimukhaliherya Salomoni ni murima awe wotheene wira ovare saana muteko ole.

MUSIVELIWEKE OWIIXUTTIHA AKINA

9. Anna oowuuluvala yooneleke sai waavaha miritti atthu akina? Nvahe ntakiheryo.

⁹ Anna oowuuluvala ahikhulumuweke okathi anoona aya wira ahaana waavaha miritti sikina amiravo. Otheene ahu nihaana osuwela wira etthu yootepa otthuneya olelo-va muteko wa Yehova. Owiixuttiha amiravo okhapelela saana miritti saya, onookhaliherya muteko owo weetta saana. Nkahaya muupuwele ela: Okathi mwaarya anyu mmiravo, woonasa wene mwaanimoona paapa anyu eettihaka ekaaro. Nuumala wunnuwa, owo aanootthokiheryani moota woweettiha. Nuuvira okathi, mwaahirowa oxikola wira mukhalane ekarta anyu. Hata vari siiso, paapa anyu aanivikaniha woolakiheryani. Ikwaha sikina mwaaniranttelana ni paapa anyu weettiha ekaaro. Masi vaavo uuluvala awe, nyuwo mwaaneettiha ikwaha sinceene. Niireke paapa anyu aaninyoonyiwa? Nnaari, woonasa wene aanihakalala woowehani mweettihaka. Moolikanasa, anna oowuuluvala annihakalala waaweha amiravo awiixuttinhe aya yeettihaka miteko sinceene mmutthenkesoni mwa Yehova.

10. Moise oonela sai ottittimihiwa ni okhulupale awe?

¹⁰ Nihaana wiikasoopa wira nihaakhaleleke nrima ale anivahiwa miritti mmulokoni. Moota Moise oonenle awe vaavo aIsarayeli akina yaapacenrye aya olavula ntoko maprofeta, onniniixuttiha etthu yuulupale. (Mmusome Mothakoni 11:24-29.) Yoxuwa aaphavela waamaliha, masi Moise aamuhimenrye so: “Munakhalela nrima mwaha wa miyo? Nto miyo kaniphavela wira atthu othene a nloko n’Apwiya ekhaleke maprofeta, ni wira Apwiya yakuruxele yawo” munepa aya. Moise aanisuwela wira Yehova teettiha muteko ole. Ohiya paahi wiivuwiha, Moise aaphavela wira arumeyi otheene a Yehova akhalaneke muteko aya. Ankhi hiyo? Niireke ninnihakalala okathi atthu akina anivahiwa aya muritti mmutekoni mwa Yehova?

11. Exeeni munna mmosa onihimya awe sa waavaha muritti atthu akina?

¹¹ Aakhala anna anceene aniimananiha ovara muteko wa Yehova mwa iyaakha sinceene ni aniwiixuttiha amiravo wira aphwanye miritti suulupale. Mwa ntakiheryo, nthokorerye yowiiraneya ya munna Peter. Mwa iyaakha 74 ovirinhe awe ovaraka muteko wa orummwa wa okathi wotheene, owo ooviriha iyaakha 35 orumeelaka eBetheli ya wEuropa. Peter aahiviriha iyaakha sinceene ohoolelaka eDepartamento ya Muteko. Nto muhoolo mwaya, muritti ole aahivahiwa Paul, mmiravo yoowo iixuttihiwe ni Peter. Niireke Peter aahinanariwa mwaha wa marukunuxo ale? Nnaari. Owo onihimya so: “Kinnihakalala osuwela wira aakhala anna yiixuttihiwe oratteene ni aneemererya miritti suulupale nave anavara saana muteko aya”.

MWAAVAHEKE EFAITA ANNA OOWUULUVALA

12. Exeeni eniixutta ahu ni ntakiheryo na Robowamu?

¹² Okathi Robowamu mwaana a Salomoni aakhalihiwa awe mwene, owo aahaavekela miruku mahumu a moota aarowa awe weettihaka omwene awe. Masi, muhoolo mwaya aahikhootta miruku saya! Ohiya otthara miruku sa mahumu ale, owo aatthara miruku sa amiravo eettana awe. Masi, eyo yaahimukumiherya maxakha. (2 Wahala 10:6-11, 19) Nto eyo enniixuttiha exeeni? Ti vamiruku waavekela malakiheryo anna oowuuluvala yaawo arina sookumanana sinceene ohiya wiiroromela. Amiravo ahooneke wira anookhanyereriwa ovikaniha opaka itthu ntoko saapakiwa aya khalai. Masi nnaamwi vari siiso, ahaana ottittimiha miruku sa anna oowuuluvala ni ahuupuweleke wira enamuna enipaka aya itthu khelonke.

13. Amiravo yaathokoreryeke sai anna oowuuluvala anivarana aya muteko?

¹³ Ikwaha sikina amiravo annivahiwa muritti muulupale waavikana anna arina sookumanana sinceene. Ti va miruku amiravo wiixutta ni anna awo oowuuluvala. Nkahaya muupuwele ntakiheryo na Peter ni Paul nilavunle ahu. Nuumala Paul omuranttela Peter okhala muhooleli a edepartamento ele, Paul onihimya so: “Waahivira okathi wira kitthare miruku sa Peter ni kaanaatumererya anna akina kaavarana aka muteko opaka etthu emosaru”.

14. Nniixutta exeeni sa moota Timootheyo ni murummwa Paulo yaavara aya vamosa?

¹⁴ Nnaamwi Paulo aari muulupale onvikana Timootheyo, owo aahivara muteko ni Paulo mwa iyaakha sinceene. (Mmusome aFilipi 2:20-22.) Paulo aahaaleela anna a oKorinto wira: “Kihovelelihani Timótheyo, ori mwan’aka onimphentaka ni òroromeleya mw’Apwiya. Owo onowupuxeryani ikano sinettelaka mwa Kristu, seiyo siniwixuttihaka aKristu othene mmuthukumanoni mothene”. (1 aKorinto 4:17) Masu ala anooniherya wira Paulo ni Timootheyo yaanivara saana hoothe ni yaanikhaliheryana. Waahivira okathi Paulo omwiixuttihaka Timootheyo ‘ikano settela awe mwa Kristu’, nto Timootheyo aahiixutta oratteene. Paulo aanimphenta Timootheyo ni aanikupali wira amwaakhapelela saana anna ni arokora a muloko wa oKorinto. Axitokweene ahaana omutakiha murummwa Paulo awiixuttihaka atthu akina wira ahooleleke mmulokoni.

OTHEENE AHU NOOKHALANA MUTEKO WOOTTHUNEYA

15. Moota xeeni aRoma 12:3-5 onnikhaliherya awe okathi wa marukunuxo?

¹⁵ Ninkhala okathi woohakalaliha. Mpantta wa valaponi wa mutthenkeso wa Yehova onninnuwa mwa inamuna sinceene. Eyo enitaphulela wira anoopakiwaka marukunuxo. Marukunuxo makina anninihela muhina ni khanikhweya weemererya. Etthu enrowa onikhaliherya ti wiiyeviha ni owehexexa itthu sooloka sinipakiwa ni Omwene, ohiya itthu siniphavela ahu. Okathi nimpaka ahu eyo, nnookhalaka oowuuraana. Paulo aahaalepela maKristau a oRoma wira: “Kinohimeryani nyuwo othene, mutthu ti mutthu wira: ahikhalé onìsona ovikana simphwanelawe”. Nuumala-vo, Paulo aahaatthokiherya wira ntoko khula mpantta wa erutthu orina aya muteko aya, khula mutthu a mmulokoni ookhalana muteko awe.—aRoma 12:3-5.

16. MuKristau ohaana opaka exeeni wira ovikanihe okhaliha murettele mmutthenkesoni mwa Yehova?

¹⁶ Arumeyi otheene a Yehova, anniphavela okhaliherya Omwene ni opaka khuta etthu anvekeliwa aya. Anna oowuuluvala ahaana owiixuttiha amiravo. Nave amiravo ahaana weemererya miritti sinceene moowiiyeviha ni mwa nttittimiho. Nave-tho anna othela annisiveliwa vaavo axaaraya anaakhaliherya aya nnaamwi mikhalelo saya siturukeyaka. Arokora ala annimutakiha Prisila, yoowo aavara moororomeleya ni iyawe Akila.—Miteko 18:2.

17. Yesu aawiixuttinhe ovara muteko xeeni awiixutti awe?

¹⁷ Yesu oovaha ntakiheryo nooloka na owiixuttiha atthu akina. Owo aanisuwela wira atthu akina yaarowa ovikaniha muteko aavara awe. Tthiri, Yesu aanisuwela wira awiixutti awe yaari oohimalela. Masi aanikupali wira arummwa ale yaamulaleya ihapari sooreera onvikana yena. (Yohani 14:12) Yesu aahiwiixuttiha saana ni awo yaahiwerya olaleya ihapari sooreera khula elapo yaarowa aya.​—aKolosi 1:23.

18. (a) Muteko xeeni ninrowa ahu okhalana muhoolo? (a) Olelo-va, muteko xeeni nrina ahu?

¹⁸ Nuumala Yesu okhwa, Yehova aahimuhihimuxa ni khunvaha muteko munceene ni owerya, “ovikana soruma sothene ni sowerya sothene n’ikuru sothene”. (aÉfeso 1:19-21) Akhala wira nnoororomeleya wa Yehova, hata nikhwaaka ehinatthi ekhotto ya Harmagedoni, nikupaliki wira nnoohihimuxiwa ni ninrowa ovahiwa muteko woohakalaliha elapo esya. Nave olelo-va, nookhalana muteko wootepa oreera, niire so, olaleya ihapari sooreera ni waapaka awiixutti. Hata nryeene amiravo aahiiso nuuluvanle ene, otheene ahu nihaana ovikaniha “okelela oholo mmutekoni mw’Apwiya”.​—1 aKorinto 15:58.