Ekhotto ya Armagedoni Exeeni?

Waakhuliwa wa mBiibiliyani

Ekhotto ya Harmagedoni, ekhotto yookiserya Muluku onrowa awe owana ni ikuvernu sa apinaatamu. Olelo-va ikuvernu iyo ni anamakhaliherya aya anninyokha Omwene wa Muluku ni khaniphavela wiiwelela itthu onaaruma aya. (Esalimo 2:2) Ekhotto ya Harmagedoni enoomaliha ikuvernu sootheene sa apinaatamu. — Daniyeli 2:44.

Nuulumo noowi Armagedoni nimphwanyaneya nipuro nimosa paahi mBiibiliyani, yoolepa ya Wiisuupulula 16:16. Elavulaka sintoko eprofesia, eliivuru ya Wiisuupulula enniromola, “nipuro nniihaniwa Harmagedoni, ni nttaava na eheeberi”, nenlo “mamwene a mulaponi motheene” anrowa aya othukumanyiwa “wira yawane ekhotto ya nihiku nuulupale na Muluku Oowerya Sotheene”. — Wiisuupulula 16:14.

Tani anrowa owana okathi wa Harmagedoni? Yesu Kristu onrowa okhala muhooleli a anakhotto a wiirimu, nave onoowana ni awanani a Muluku ni onimwaaxintta. (Wiisuupulula 19:11-16, 19-21) Awanani a Muluku anihela muhina atthu yaale anikhootta okhulupale awe ni aninveeha. — Ezekiyeli 39:7.

Niireke Harmagedoni enrowa okhala ekhotto enrowa owaniwa oMédio Oriente? Nnaari. Ekhotto eyo khahiyo enrowa owaniwa paahi muttetthe wala elapo emosa, masi enrowa owaniwa elapo yootheene. — Yeremiya 25:32-34; Ezekiyeli 39:17-20.

Nuulumo noowi Harmagedoni ikwaha sikina nintaphuleliwa ntoko “Har-Magedon” (Eheeberi, Har Meghiddóhn), nintaphulela “mwaako wa òMegido”. Megido yaari esidade waaphwanyaneya muttetthe wa wIsarayeli wa khalai. Iliivuru sa mulaponi sinniromola ikhotto suulupale saawaniwe muttetthe ole, ikhotto sikina sinniromoliwa mBiibiliyani. (Makhulupale 5:19, 20; 2 Mamwene 9:27; 23:29) Nto khivaniweryaneya Harmagedoni ohimmwaka paahi muttetthe waaphwanyaneya oMegido. Elapo ele khokhanle mwaako muulupale, nave hata muttetthe wootheene woowaataleya oYezireyeli, yoowo waattamenle elapo ele nave khorina mwaako yaakhanle oowaniwa ekhotto ni atthu awo ootheene anrowa owana ni Muluku. Ela ennooniherya wiira Harmagedoni enihimmwa etthu enrowa wiiraneya elapo yotheene ya vathi, makhulupale a epoliitika anrowa aya othukumana, mukwaha wookiserya wiira ewane ni ekuvernu ya Muluku.

Enrowa okhala sai ekhotto ya Harmagedoni? Khaninsuwela moota Muluku onrowa awe orumeela owerya wawe, masi ensuwela ahu ti yoowi yena ookhalana ikapwitthi sinceene aarumenle awe khalai, ntoko: Maralala, itetere, otothowa wa maasi, mooro ni enxoofere, itari ni iretta. (Yoobi 38:22, 23; Ezekiyeli 38:19, 22; Habakuki 3:10, 11; Zakariya 14:12) Awanani akina a Muluku anootuthuwa vanceene ni anoopacerya wiivana yaaworu, masi nuumala-vo ootheene aya onooweha wiira Muluku tonwana naawo. — Ezekiyeli 38:21, 23; Zakariya 14:13.

Niireke nuumala okhumelela Harmagedoni elapo enoomala? Naari, olumwenku khonrowa omala, maana elapo Muluku ohaavaha apinaatamu wiira ekhaleke-mo mwa mahiku ootheene. (Esalimo 37:29; 96:10; Musuweli 1:4) Nave Harmagedoni khahiyo opwetexiwa wa apinaatamu. Ohimya ekeekhai, ekhotto eyo enooruuha woopoliwa waya, maana “muttitthi muulupale” wa arumeyi a Muluku onimoopowa. — Wiisuupulula 7:9, 14; Esalimo 37:34.

Nnaamwi Biibiliya orumeelaka nuulumo noowi “olumwenku” ohimyaka elapo ya vathi, nave onnirumeela nuulumo nla ikwaha sikina aahimyaka atthu ootakhala murima ahinimphavela Muluku. (1 Yohani 2:15-17) Nto vaahimmwaka wiira ekhotto ya Harmagedoni ‘enoomaliha olumwenku’, khahiyo enihimmwa elapo, masi anihimmwa atthu awo oohiiwelela ni ootakhala. — Matheyo 24:3.

Harmagedoni onrowa orwa silini? Okathi Yesu aalavula awe sa “maxakha maalupale” anrowa okumiherya ekhotto ya Harmagedoni, aahimmye so: “Vano, nihiku nene ni ewoora ene khuuvo onisuwela, nnakhala malaikha a wiirimu hata Mwaana a Muluku, masi Tiithi paahi tonisuwela”. (Matheyo 24:21, 36) Nto Biibiliya onooniherya wiira ekhotto ya Harmagedoni enrowa owaniwa okathi wa olamulelo ohinooneya wa Yesu, yoowo opacenrye mwaakha wa 1914. — Matheyo 24:37-39.