Moota Xeeni Mukuttho wa Yesu Oniwoopola Aya Atthu Anceene?

Waakhuliwa wa mBiibiliyani

Orumeelaka mukuttho wa Yesu, Muluku onnaataphula, aahiiso owoopola, apinaatamu wiira ettharuwe okhala epottha ya etampi ni okhwa. Biibiliya onihimya wiira ephome emwaraxiwe ya Yesu, enlikana ni esisapo wala epereso enoopolaniwa etthu. (aEefeso 1:7; 1 Pedru 1:18, 19) Ti nthowa naya Yesu aaruuye awe valaponi wiira “ovahe okumi awe, wira owoopole atthu anceene”. — Matheyo 20:28.

Xeeni waatthuneya aya mukuttho “wira yoopoliwe atthu ootheene”?

Mulopwana oopacerya, Adamu, aapattuxiwe ohirina etampi. Anwerya okhala mwa mahiku ootheene valaponi, masi aahiyeleela eparakha eyo nuumala othanla ohimwiiwelela Muluku. (Maphattuwelo 3:17-19) Etampi enlikana ni eretta yooyaraniwa. Nuumala Adamu waayara anamwane, yaahaaraviha anaaya etampi ni okhwa. (aRoma 5:12) Ti nthowa naya Biibiliya onihimya wiira Adamu ni anaaya “ahiitumiha” ntoko epottha ya etampi ni okhwa. (aRoma 7:14) Khuuvo mwaana a Adamu aarowa owerya otthikiherya ele yaayeleeliwe, okhala wiira atthu ootheene aattheka. — Esalimo 49:8, 9.

Mwaha woopaka eyo, osuulu wa Adamu khiwaarina nlipelelo. Masi Muluku aahiwoonela othunku. (Yohani 3:16) Hata vari siiso, exariya ya Muluku khiyaamweemiherya olevelela osuulu wootheene wa Adamu ehikhanle mathowa. (Esalimo 89:15; aRoma 3:23-26) Muluku ohaaphenta vanceene apinaatamu, ti maana aya, opaka mareheryo a xariya wiira onilevelele ni ottipihe itampi sahu. (aRoma 5:6-8) Enamuna yooloka ni ya xariya nipakeliwe ahu ori ovahiwa mukuttho wa Yesu.

Yowoopola enivara sai muteko?

Mbiibiliyani, nuulumo noowi “mukuttho” enihela muhina itthu tthaaru:

1. Oliva etthu. — Moothakoni 3:46, 47.

2. Etthu eniruuha woopoliwa, aahiiso oleveleliwa. — Okhuma 21:30.

3. Esisapo aya enoolikana, eri ntoko, evalore enitthuneya wiira yoopoliwe wala eliveriwe etthua.

Nrowe niwehe moota itthu iya tthaaru sinivarihana aya ni mukuttho wa Yesu Kristu.

1. Oliva etthu. Biibiliya onihimya wiira makristau “aathummwa ni etthu erina efaita yuulupale”. (1 aKorinto 6:20; 7:23) Esisapo ene yaari ephome ya Yesu, yeeyo ‘omuthumenle awe Muluku atthu a mahimo otheene, ni a mattaava otheene, ni a makhuli otheene ni a maloko otheene’. — Wiisuupulula 5:8, 9.

2. Etthu eniruuha woopoliwa. Mukuttho wa Yesu ohiiriha oweryaneya apinaatamu “woopoliwa” wiira ahikhale-tho epottha ya etampi. — 1 aKorinto 1:30; aKolosi 1:14; aHeeberi 9:15.

3. Esisapo aya enoolikana. Mukuttho wa Yesu onoolikana ni okumi wooloka Adamu apweteiwale aya. (1 aKorinto 15:21, 22, 45, 46) Biibiliya onihimya so: “Mwaha wa ohiiwelela wa mulopwana mmosa [Adamu] atthu anceene yaahikhalihiwa anatampi, siiso-tho, mwaha wa wiiwelela wa mulopwana mmosa [Yesu Kristu], atthu anceene anookhalihiwa anaxariya”. (aRoma 5:19) Yoolepa ela ennitthokiherya moota okhwa wa mutthu mmosa olivenrye aya itampi sa anamattheka anceene. Veekeekhai, mukuttho wa Yesu tori yoolivenrya ‘eniphiyerya owoopola anatampi anceene’. Atthu ootheene aniimananiha opaka itthu sinivekeliwa anoottottela mureerelo mukuttho owo. — 1 Timootheyo 2:5, 6.