Ezekiyeli
27 Kaahisuwelihiwa-tho moolumo a Yehova yaahimya wiira: 2 “Nyuwo mwaana a mutthu, mmwiipele Tiiro nsipo na wiikhupanyerya.+ 3 Mmuhimeerye Tiiro wiira:
‘Nyuwo munikhala iphiro sa ophareya,
Nyuwo munaatumiherya itthu atthu a isisiro* sinceene,
Etthu onihimya awe Pwiya Muulupalexa Yehova, tiila:
“Nyuwo Tiiro, moohimya mmansinyu wiira ti mooreera voomalela.+
4 Mittetthe sanyu, siri eriyari ya ephareya,
Nave atthu yootenkeni, ahincererya oreera wanyu.
5 Awo ahoopakani ni ithaapwa sa miri sa xuniiperu sa oSeniri,+
Nave aakuxa miri sa eseeturu sa oLiibano, wiira apake nipotto na ekalawa anyu.
6 Awo aapaka ireemo* sanyu ni miri siniihaniwa karvaalyo sa oBaxani,
Nave aapaka epantte ya ohoolo ya pakiti anyu, arumeelaka mwiri oniihaniwa sipereste, avirihela maino a etthepo, anikhuma isisiro sa oKitimi.+
7 Yoorumeeliwa eliinyu yooreerexa ya wExiitu, wiira epakiwe ekuwo ya eveela anyu,*
Nave noorumeeliwa nliinya nooriipelela ni ekuwo ekoore violeeta ya esisiro* ya wElixa,+ wiira oreerihiwe muhina mwa pakiti anyu.
8 Atthu a oSiidoni ni a wAribadi,+ ti yeettiha ireemo* sanyu.
Nyuwo Tiiro, alopwana anyu oosuwelexa, ti yaamweettiha pakiti anyu.+
9 Alopwana anyu oosuwela* ni ooratta,+ ti yaareherya iphaka sa apakiti.+
Apakiti ootheene a ophareya ni anahota aya, yaanirwa wa nyuwo wiira amweetteke nakoso.
10 Alopwana a oPersia, a oLudi ni a oPuthi,+ yaari anakhotto anyu, yaawo yaarowa okhottoni.
Awo yaanithomeya vaxirini vanyu, makula aya oowiixaakihana* ni ikapaseeti saya, nave yaanoovuwihani.
11 Alopwana a wAribadi yaawo yaari anakhotto anyu, yaanirukurerya ixiri sanyu sootheene,
Nave alopwana oolipa murima, ti yaawehaweha ipa sanyu soorakamela osulu.
Ixiri sanyu sootheene, awo yaanithomeya makula aya oowiixaakihana,*
Nto yaahincererya oreera wanyu.
12 “‘“Taarisi+ aahimweetta nakoso ni nyuwo mwaha wa mireerelo sanyu soowaatta.+ Owo aahoovahani eparatha, eyuuma, estaanyu ni exumpu, oturukaka ni mireerelo sanyu.+ 13 Atthu a oYavani, a oTubali+ ni a oMexeki,+ yaahimweetta nakoso ni nyuwo, aruuhaka ipottha+ ni mireerelo sa ekoopiri, wiira aturuke ni mireerelo sanyu. 14 Atthu a etthoko ya Togarma,+ yaaniruuha ikhavalo saateexa miritti, ikhavalo sa ekhotto ni axinama aniihaniwa muula,* wiira aturuke ni mireerelo sanyu. 15 Atthu a oDedani,+ yaanimweetta nakoso ni nyuwo. Nyuwo mwaahikhalana alipa a nakoso isisiro sinceene. Awo yaanooruuhelani maino a etthepo+ ni matera a mwiri oniihaniwa eepano, wiira yooliveeni mpoosito. 16 Atthu a wEdomi yaahimweetta nakoso ni nyuwo mwaha wa mireerelo sanyu soowaatta. Awo yaanoovahani maluku aniihaniwa turkeesa, ekuwo ya ekoore violeeta, ikuwo sootthaviwa sooreerexa, ikuwo sa musurukhu munceene, maluku oowaarya vanceene ni maluku aniihaniwa rupi, wiira aturuke ni mireerelo sanyu.
17 “‘“Atthu a oYuda ni a elapo ya wIsarayeli, yaahimweetta nakoso ni nyuwo, yoovahakani etiriku ya oMinithi,+ yoolya yoothanliwa saana, oravo,+ makhura ni baalsamu,+ wiira aturuke ni mireerelo sanyu.+
18 “‘“Atthu a oDamaasiko+ yaahimweetta nakoso ni nyuwo mwaha wa mireerelo sanyu soowaatta ni othaaciri wanyu wootheene. Awo yaahooruuhelani eviinyu ya oHeliboni ni ikuwo sa manri a ipwittipwitthi sa oZarahi. 19 Atthu a oVedani ni a oYavani, muttetthe wa Uzali, yaahoovahani eyuuma yooreerihiwa, kaasiya,* ni mutathi woowunkhela wiira aturuke ni mireerelo sanyu. 20 Atthu a oDedani+ yaahoovahani ikuwo sinipwehiwa vasulu wa inama wiira sikilaatheliwe, aturukaka ni mireerelo sanyu. 21 Atthu a wArabia ni makhulupale ootheene a oKedari,+ yaanoovarelani muteko. Awo yaanitumiha ipwittipwitthi soolopwana, ipwittipwitthi saamukhaani ni ipuri.+ 22 Alipa a nakoso a oXeeba ni a oRayema,+ yaanimweetta nakoso ni nyuwo. Awo yaanoovahani mithinto sootheene sa eperfuume yoowunkhela, maluku oowaarya ni eweero, wiira aturuke ni mireerelo sanyu.+ 23 Atthu a oHarani,+ oKane, wEedeni,+ alipa a nakoso a oXeeba,+ a wAsuri+ ni oKilimadi, yaanimweetta nakoso ni nyuwo. 24 Omerkaatu wanyu, awo yaanitumiha malaya ooreerexa, manta yaapakiwe ni ekuwo* ya ekoore yooriipelela ni yootthaveleliwa ni itapeti soowaatta ikoore. Itthu iyo sootheene, saahitthukiwa ni saahilipihiwa ni mikhoyi.
25 Apakiti a oTaarisi+ ti yaalovola mireerelo sanyu.
Tivonto, nyuwo mwaahikhalana mihakhu sinceene* mphareya.
26 Alipa-ooweettiha ireemo* sanyu, ahooroihani opuro ori mawimpi ootupa.
Epheyo enirwa mpantta onikhuma nsuwa, ehoohononani eriyari ya ephareya.
27 Mihakhu sanyu, mireerelo sanyu, marotta anyu, anahota anyu, alipa aneettiha ikalawa sanyu,
Ale anooreerihani, ale animweetta nakoso anyu,+ ni alopwana anyu ootheene aniwana ekhotto,+
Eyo piiyo, muttitthi* wootheene murina anyu,
Anrowa osama eriyari ya ephareya, nihiku munrowa anyu opwetexiwa.+
28 Okathi ale aniweettiha apakiti anyu anrowa aya wunla, ilapo sa ophareya sinoothukumela.
29 Ootheene ale aneettiha ireemo* sanyu, anahota anyu, alipa aneettiha ikalawa sanyu,
Animwaahiya apakiti aya, atthyaweleke ota wa ephareya.
30 Awo anookhuwela ni animunla vanceene mwaha wa nyuwo,+
Nave anootathela ntthupi vamuru vaya, ni annuupuruwa vattuurwani.
31 Awo anoometta mputu, nave anoowara isaakho;
Anoowunlelani vanceene, yiikhupanyeryaka vanceene.
32 Yiikhupanyeryaka siiso, anoowiipelani nsipo na wiikhupanyerya, yiiraka:
‘Ti pani onlikana ni Tiiro, yoowo vano omaalale eriyari ya ephareya?+
33 Okathi mireerelo sanyu saarwa aya sikhumaka ophareya, atthu anceene yaanivona.+
Mihakhu sanyu ni marotta anyu, yaaniwiiriha mamwene a mulaponi othaaciri.+
34 Vano nyuwo moosamihiwa mphareya eriyari, memmo ari maasi oowiixa,+
Nave namarotta anyu ootheene ni atthu anyu ootheene, aasama ni nyuwo.+
35 Atthu ootheene anikhala musisironi, animoowehani atikinihiwe ene.+
Mamwene aya anoothukumela mwaha wa woova.+ Nto owiitho waya onimooneyaka wiira annoova.
36 Ale animwiira nakoso eriyari ya maloko, anoowoopelani muturi atikinihiwe ene, mwaha wa etthu ewiiranenleni.
Emalelo anyu enrowa okhala yootutuxerya ni yoowoopiha,
Nave khamuntthikela-tho okhala’”’”.+