MWAHA WOOPACERYA | NIIREKE MULUKU ONNIWOONANI OKHALA A FAITA?

Niireke Muluku Onniwoonelani Vatthu?

‘Miyo kiri mutthu òpuheriwa ni òhawa, nto Yahvéh onnikithokorerya’.a​—DAVIDI A WISARAYELI, ESEEKULU 11 AEC.

Niireke vaahireerela wira Davidi olipelele othokoreriwa ni Muluku? Niireke Muluku onniwoonelani vatthu? Anamunceene khanikupali wira Muluku onnaathokorerya. Mwaha wa xeeni?

Nthowa noopacerya, mwaha woowi Muluku ti muulupalexa waavikana apinaatamu. Tthiri, “atthu othene a mulaponi anlikana ni nttoittoi na màsi nikhumaka mmwapuni. Olemela waya onlikana n’ulemela wa muhava mmosá”. (Yesaya 40:15) Jornalista mmosa ohinimukupali Muluku aahimyale so: “Khivanireerela okupali wira ohaavo Muluku onoothokoreryani ni onisiveliwa itthu sooreera munipaka anyu”.

Nthowa na nenli, mwaha woowi atthu akina anuupuwela wira mweettelo aya onniwiiriha ohooneliwa vatthu ni Muluku. Mwa ntakiheryo, mulopwana oniitthaniwa Jim onihimya so: “Miyo kaamakela ovekela wira kikhale mutthu a murettele ni oowiihiiha. Masi, nuuvira okathi miyo kaanitthikela oviruwa. Nto kaahipacerya wuupuwelaka wira kaari mutthu ootakhalexa ni khivaaweryaneya okhaliheriwa ni Muluku”.

Niireke Muluku ori ottaiwene wa hiyo vahiniwerya awe oniweha? Nto owo onoonela sai soopattuxiwa sawe soohimalela? Khuuvo mutthu oniwerya olavula sa Muluku ni waakhula makoho awo ohikhaliherihe ni yena. Masi Muluku ohaavaha atthu Biibiliya. Nto eyo enooniherya wira owo khokhanle ottaiwene vahiniwerya awe oniweha. Biibiliya onihimya so: “Tthiri Muluku khankhala ottaiwene ni hiyo”. (Miteko 17:27) Wa myaha mixexe sinittharelana, ninrowa oweha ele enooniherya wira Muluku onnimuthokorerya khula mutthu, ni moota aathokorerye awe atthu ntoko nyuwo.

[Enoota]

MWAHA WOOPACERYA | NIIREKE MULUKU ONNIWOONANI OKHALA A FAITA?

Muluku Onniwoonani

Muluku “onniweha mwettelo w’atthu: onnalikela mavalo aya othene”.​—YOBI 34:21.

XEENI ATTHU AKINA ANIHOVERYA AYA? Moovarihana ni yootokosa ya naanano, egalaxia ahu paahi yookhalana iplaneta sowiiraka ibilyau 100. Yuupuwelelaka wunnuwa wa erimu eyo, atthu anci anikoha so: ‘Vaniweryaneya sai Mpattuxa oweha itthu sinivariwa ni atthu ari valapani?’

ELE BIIBILIYA ONIIXUTTIHA AWE: Nnaamwi Muluku onivanhe ene Biibiliya, masi nlelo khoniliyanle. Yehova onihimya so: “Miyo kinimovahani miruku, kinimothonyeryani ephiro yorera”.​—Esalimo 32:8.

Moone ntakiheryo na Hagari, muthiyana a wEjiitu aakhanle iyaakha sowiiraka 1900. Owo khaamuttittimiha muhano awe Sarai; vano Sarai aahipacerya omuhaaxa, nto Hagari khitthyawela moothakoni. Niireke Muluku aahihiya omukhapelela Hagari maana aahivonya? Biibiliya onaakhula so: “Nlaikha n’Apwiya nahimphwanya” Hagari. Nlaikha nlo naahimulipiherya wira: ‘Yehova ohìwa okhuwela wanyu’. Nto Hagari aahilavula sa Yehova iiraka: Nyuwo mwa “Muluku onòna”.​—Maphattuwelo 16:4-13.

Nto “Muluku onòna”, onnoowehani nyuwo. Wira nilikanyihe: Maama oophenta onninweha saana mwanawe mwaamukhaani, okhala wira owo onnitthuneya okhaliheriwa vanci ni anamuyari awe. Moolikanasa, Muluku onniniweha okathi onixankiheya ahu ni otteettheya. Yehova onihimya so: “Miyo kinnikhala nipuro norekama ni nowaryexa, nto kinnikhala-tho n’atthu òpuheriwa ni òwìyeviha, wira kavahe ekumi atthu awo òwiyeviha, ni wira kalipihe atthu awo òhaxiwa”.​—Yesaya 57:15.

Masi, nyuwo pooti wiikohaka so: ‘Muluku onikiweha sai? Niireke oniweha mukhalelo aka wa werutthuni, wala oniweha murima aka nto khiyaphavela okikhaliherya?’

MWAHA WOOPACERYA | NIIREKE MULUKU ONNIWOONANI OKHALA A FAITA?

Muluku Onnisuwela Ele Eri Vamurimani Vanyu

“Apwiya! [Yehova] Nyuwo motokosa murim’aka, mokisuwela”.​—ESALIMO 139:1.

XEENI ATTHU AKINA ANIHOVERYA AYA? Anamunceene anuupuwela wira Muluku oniwoona atthu ntoko anamattheka paahi, atthu oohiloka ni ahiniphwanela othokoreriwa. Muthiyana oniitthaniwa Kendra, aaniriipiwa murima uupuwelaka wira khaawerya opaka etthu yooloka moovarihana ni malamulo a Muluku. Nto mwaha wa yeeyo, owo ‘aahihiya ovekela’.

ELE BIIBILIYA ONIIXUTTIHA AWE: Yehova khoniweha ohimalela wanyu. Masi oniweha ele eri vamurimani vanyu. Biibiliya onihimya so: ‘Owo onnisuwela orattene mùpeliwo ahu: onnisuwela wira hiyo ná ntthupi pahi’. Nto Muluku khonicalela “itampi sahu”, masi oninlevelela okathi ninttharuwa ahu.​—Esalimo 103:10, 14.

Moone ntakiheryo na mwene Davidi, oromoliwe mmwaha woopacerya. Onvekelaka Muluku, aahimmye so: “Maitho anyu yahikòna kihinatthi oyariwa. Mahiku othene yarowaka ovira yahilempwa mulivuruni mwanyu . . . Muluku! Mutokose murim’aka, musuwele”. (Esalimo 139:16, 23) Davidi aanisuwela wira hata aatthenke vanceene, Yehova aarowa oweha murima awe woottharuwa.

Yehova onnoosuwelani saana ovikana ele apinaatamu anipaka aya. Biibiliya oni: “Atthu anona erutthu, masi Apwiya aniweha murima”. (1 Samuweli 16:7) Muluku onnisuwela mukhalelo anyu, eyo piiyo, mayareliwo, moota munnunwe anyu, miyuupuwelo sanyu, ni omutthu anyu wotheene. Owo onniweha ni ovaha efaita wiimananiha wanyu wira mukhalane mweettelo wooloka, nnaamwi nvonyaka okathi mukina.

Nto, moota xeeni Muluku onirumeela awe osuwela wawe wuulupale wa ‘omutthu anyu’ wira ookhaliheryeni?

MWAHA WOOPACERYA | NIIREKE MULUKU ONNIWOONANI OKHALA A FAITA?

Muluku Onnoovahani Efaita

‘Muluku, yowo onahakalaliha atthu òripiwa murima, tonnihakalaliha’.​—2 AKORINTO 7:6.

XEENI ATTHU AKINA ANIHOVERYA AYA? Nnaamwi yoonaka wira annitthuneya okhaliheriwa, akina anuupuwela wira khahiyo wookhalela onvekela Muluku wira aakhaliherye okathi wa mixankiho. Raquel onihimya so: “Vaavo kinaawehaka atthu anci ehaawaka vanceene, kinnuupuwela wira mixankiho saka khahiyo etthu. Nto eyo ennikiiriha ohoverya onvekela Muluku wira okikhaliherye”.

ELE BIIBILIYA ONIIXUTTIHA AWE: Muluku oopaka etthu wira aakhaliherye atthu ni waahakalaliha. Olelo-va, atthu otheene aarava yoottheka eniwiiriha okhala ottaiwene wa malamulo oomalela a Muluku. Masi, Muluku ‘ooniphenta hiyo, khumuruma Mwan’awe, Yesu Kristu, ntoko mukuttho w’olivela itampi sahu’. (1 Yohani 4:10) Orweela wa mukuttho wa Yesu, Muluku ohiriha wira vaweryaneye oleveleliwa itampi sahu, okhalana yoowupuxerya ya murima yooloka, ni nlipelelo na ekumi yoohimala elapo esya ya murettele.a Masi niireke mukuttho owo orookumiheriwa paahi, wala onooniherya wira Muluku onnoovahani efaita?

Moone ntakiheryo na murummwa Paulo. Owo aahikuxeya murima ni mukuttho wa Yesu nto khulepa so: “Ekum’ila kirinaka . . . kokhalana mwaha w’omwamini Mwana a Muluku: Owo òkiphenta ni ohìvahererya wokhwani mwaha wa miyo”. (aGalasia 2:20) Ekeekhai wira Yesu aakhwiiye Paulo ohinatthi okhala muKristau. Masi, Paulo aanikupali wira mukuttho owo waari ntoko etthu aavahiwe awe ni Muluku.

Nto, Muluku ohoovahani mukuttho wowoopola wa Yesu. Yoovaha eyo ennooniherya wira munniphentiwa ni Muluku. Eyo enoowerya woovahani “eparakha y’ohakalalihiwa vohimala n’uroromela wulupale” ni ‘wolipihani wira mwetteleke sorera sothene, ni molumo ni miteko sanyu’.​—2 aTesalonika 2:16, 17.

Tthiri mwa iyaakha 2.000 sivinre, Yesu oovaha okumi awe ntoko mukuttho. Eyo enooniherya wira Muluku onniphavela wataana ni nyuwo olelo-va.

[Enoota]

MWAHA WOOPACERYA | NIIREKE MULUKU ONNIWOONANI OKHALA A FAITA?

Muluku Oniphavela Wira Mmusuwele

“Khavo onwerya okirwela miyo, ahithanliwe n’Atithi, akirumme”.​—YOHANI 6:44.

XEENI ATTHU AKINA ANIHOVERYA AYA? Anamunceene animukupali Muluku anuupuwela wira owo ori ottaiwene. Cristina a wIrlanda yoowo aarowa okerexa khuta esumana onihimya so: “Miyo kaanimuupuwela Muluku ntoko ole opattunxe itthu sotheene paahi. Masi nkaamusuwela saana. Nkitonko wuupuwela wira kaahimwaattamela”.

ELE BIIBILIYA ONIIXUTTIHA AWE: Okathi oniriipiwa ahu murima, Yehova khonnihiya. Yesu aahilikanyiha okhapelela wa Muluku oriki: “Mutthu akhalana ipwittipwitthi miloko mulokó, yathwelela emosá, khino khanihiya iye sikina miloko mithanu na mixexe ni thanu na xexe mmathalani, khíyarowa ophavela ethwelenle? Aphwanyá vale, kinohimeryani ekweli wira, onotteliwa murima mwaha w’emosá yeyo ovikana iye sikina sothene sahathwelenle. Siso-tho, Atith’inyu ari wirimu khantthuna wira arimele nnákhala mmosá àxikhani ala”.​—Matheyo 18:12-14.

Khula “mmosá àxikhani ala” ta faita wa Muluku. Moota xeeni Muluku ‘onaaphavelasa awe ale athwelenle’? Moovarihana ni yoolepa ela, Yehova oniphavela wira atthu amusuwele.

Moone moota Muluku aapacenrye awe waakhaliherya atthu a murima saana. Mwa eseekulu yoopacerya EC, Muluku aahimuruma mwiixutti eKristau Filipe wira akumane ni mukhulupale a wEthiyopia wira amutthokiherye yootaphulela ya eprofesia aasoma awe. (Miteko 8:26-39) Muhoolo mwaya, Muluku aahimuruma Pedru orowa owannya awe mukhulupale aanakhotto oRoma, Kornelio, yoowo anvekela Muluku ni aimananiha omukokhorela. (Miteko 10:1-48) Muluku aahimulakiherya murummwa Paulo ni apatthani awe orowa omuro wa epooma ya oFilipi. Awosa ‘yahimphwanya muthiyana iitthaniwa Lidia yowo amukokhorela Muluku; nto Yehova aahimutthukula murima wira aiwexexe itthu saahimyawe Paulo’.​—Miteko 16:9-15.

Mwa sowiiraneya iya, Yehova aahipaka mareheryo wira ale yamphavelasa Muluku akhalane eparakha yoomusuwela. Ti pani olelo-va anaaxukurya atthu mmawannyeya ni mapuro otheene ari atthu, wira yaaleele ihapari sa Muluku siri mBiibiliyani? Anamunceene pooti waakhula so: “Ti Anamoona a Yehova”. Mwiikoheke so: Niireke Muluku onnarumeela atthu awo wira aataane ni miyo? Nto munvekele Muluku wira ookhaliheryeni wiimananiha wanyu wira mmwaattamele.a

[Enoota]