MUTAKIHEKE WAAMINI WAYA | YOSEFE

“Kiniwerya Sai Wira Etthu Yotepexa Otakhala?”

YOSEFE onniittha iphumu mooxankiheya, owehaka ifilori ni miri sikina sinimora maasi. Owo okuxiwe ni anamarotta, yaawo vano anilapuwa mapuro oowaataleya a muro muulupale wa oNilo. Nkahaya muupuwelele mwaawehaka alopwana awenle ene ikamelo saya yeettaka ephiro eri maasi arowaka epooma ya wEjiitu, okathi mukina awehaka mootikinihiwa ovava wa ipalame siniitthaniwa kottokottho wala napiphi. Yosefe onnuupuwelela-tho elapo awe ya omiyakoni ikiloomo imiya sene; masi vano owo ori elapo ekina.

Mulikanyihe wira owo onaaweha akhole etupha-tuphaka ni anyakulaka mmwirini mwa korooro ni ifiguera. Woonasa wene Yosefe aanimananiha owiriyana khula nuulumo naalavuliwa elapo ele wira oxutte nttaava nlo. Okhala wira elapo awe yaari ottaiwene, waaniheryasa uupuwela wira khaarowa otthikela-tho waaweha amusi awe.

Yosefe khahiyo aari mmiravo paahi a iyaakha 17 wala 18. Masi owo aahikumana mixankiho seiyo saarowa waaxankiha alopwana anci. Axuulupale awe yaanimukhalela nrima mwaha woowi aaniphentiwa vanci ni tiithi awe, nto yaaniphavela omwiiva. Masi, awo yaahimutumiha munnaya owo. (Maphattuwelo 37:2, 5, 18-28) Nuuvira isumana yeettaka, anamarotta ale yaanitepa ohakalala vaavo yaattamela aya epooma yuulupale weiwo yaaphavela aya omutumiha Yosefe vamosa ni itthu sikina sa faita. Niireke Yosefe aahitteettheya mwaha wa oriipiwa murima ni oxankiheya? Nto ninrowa oxintta sai mixankiho sikhanle oohonona waamini wahu? Ninniixutta etthu voohimya sa Yosefe.

‘YEHOVA AANIKHALA NI YOSEFE’

“Yosefe ahirowaniwa wEjitu; vano Potifari, murumeyi mulupale a mwené, ahimuthuma Yosefe owo, atumiheriwaka n’aIximayeli yawo yamuroihale weiwo”. (Maphattuwelo 39:1) Ni moolumo ala vakhaani, Biibiliya onninikhaliherya wuupuwela mixankiho saamukhumelenle mmiravo owo nuumala otumihiwa vasya. Owo aari ntoko etthu yoothummwa! Nkahaya nimuupuwele Yosefe amuttharaka pwiyawe a niinano yoowo ori murumeyi muulupale a mwene, eettaka iphiro sa epooma ele yoosareya atthu ni imerkaado saamukhaani orowaka owannyawe pwiyawe ole.

Khiivo etthu ekina yaamusivela Yosefe ohikhanle paahi otthikela elapo awe. Owo aahuuwale emusi ya atthu yaamakela othaama yaawo yaakhala muheemani ni yaakhapelela ipwittipwitthi saya. Masi Potifari aakhala inupa sooreera ni sowaarya ntoko atthu a wEjiitu oothaaciri. Alipa anthipa mapuro yaakhaliwa khalai, anihimya wira atthu a wEjiitu wa khalai, yaanikhalana ipa sooreera, ejardim yootekeleliwa ni ixiri memmo saakhanle miri, matthiya yaarina miri sa epapiro, ifilori siniihaniwa lótus, ni miri sikina sininnuwa mmaasini. Inupa sikina saahikhalana ijardim sa vameekhaaya, niphiryo wira mutthu ophwanyeke epheyo, ijanela suulupale, ni ikwartu sinci, ohela muhina esaala yuulupale ya jantari ni opuro waakhala arumeyi.

Niireke Yosefe aahikuxeya murima ni mihakhu iyo? Waaniheryasa nnaari. Khiivo etthu ekina yaamusivela maana waahimphwanya omeekha. WeJiitu naalavuliwa nttaava noovirikana ni elapo awe, ikuwo, moota woowara ni inamuna sookokhorela. Awo yanaakokhorela amuluku anceene, opaka maxitta, owoova alipa-ookhwa ni okupali wira wookhala okumi nuumala mutthu okhwa. Masi ehaavo etthu yaamukhaliherya Yosefe wira oxintte omeekha. Biibiliya oni: “Apwiya yahikhala ni Yosefe”. (Maphattuwelo 39:2) Moohaaniherya, owo aaninvekela Muluku wira omukhaliherye. Biibiliya onnihimya-tho wira “Apwiya anniwattamela othene ale anavekela”. (Esalimo 145:18) Yosefe aawenrye sai omwaattamela Muluku awe?

Mmiravo owo aahikhootta oxankiheya mootepana, ni aanivikaniha ovara muteko awe ntoko aawerya awe. Owo aanireelihiwa ni Yehova, tivonto moohipisa pwiyawe aanisiveliwa ni miteko sawe. Potifari aahoona wira mmiravo owo aanireelihiwa ni Yehova, Muluku a nloko na Yosefe, nto mareeliho awo yaanithaaciriha etthoko ya mukhulupale owo. Nuuvira okathi, Potifari aahinvaha Yosefe miritti suulupale ni aahinvahererya itthu sotheene sa vatthokoni vawe.​—Maphattuwelo 39:3-6.

Yosefe oovaha ntakiheryo nooloka wa amiravo ari arumeyi a Yehova. Mwa ntakiheryo, oxikola, amiravo pooti okumanaka ni amiravo akhwaaya arina mweettelo wa okhwiri, ni atthu ahirina nlipelelo ni nroromelo. Akhala wira onimoophwanyani muxankiho ntoko owo, muupuwele wira Yehova khoturuken’ye. (Yakobo 1:17) Owo onnaakhaliherya ale aniroromeleya, ni anivikaniha ovara muteko mooluttuweliwa wira envuwihe yena. Owo onnaareeliha amiravo awo, ni onirowa opaka emosaru wa nyuwo.

Soolepa sinnooniherya wira Yosefe aaninnuwa. Owo aahikhala mulopwana ‘oophwaneliwa ni ooreera’. Moolumo awo anooniherya wira Yosefe aahikhala oophwanya muxankiho, maana oreera wa erutthu pooti owiiriha atthu akina osiveliwa moohiloka ni mutthu owo.

“YOSEYE KHATTHUNNE”

Moovirikana ni mwaara a Potifari, Yosefe aanivaha efaita ororomeleya. Biibiliya onihimya so: “Mwara a mukhulupale ole ahivariwa murima n’urera wa Yosefe, khumwirela wira: ‘Murupé ni miyo’”. (Maphattuwelo 39:7) Niireke Yosefe aahinvaha muthiyana ole ahaamurumeela Muluku eekeekhai ele yaaveka awe? Biibiliya khonihimya wira Yosefe khaarina soophavela sinaaphwanya amiravo otheene, wala khonihimya wira muthiyana ola ootheliwa ni oothaaciri aari oohireera. Niireke Yosefe aahuupuwela wira pwiyawe khaarowa osuwela? Wala aahuupuwela weemya yoweeha eyo wira ovahiwe mihakhu sinceene?

Khaninsuwela ele Yosefe uupuwela awe. Masi hiyo pooti osuwela ele yaari vamurimani vawe. Yosefe aakhunle so: “Mosuwela wira apwiy’aka annikiroromela: awo khaneteteya n’itthu vatthokoni vaya, masi àkivahereya mihakhu saya sothene wira kettiheke. Owerya waka onlikana n’uwerya waya vatthokoni va. Apwiya yawo khenakikottiherye etthu, nyuwo pahi, okhala wira mwà amwar’aya. Weso, kiniwerya sai wira etthu yotepexa otakhala, kinvehaka Muluku?” (Maphattuwelo 39:8, 9) Nkahaya mmuupuwele mmiravo ola olavulaka moolipiherya. Yosefe khonisiveliwa ni ele muthiyana ole oniphavela awe. Mwaha wa xeeni?

Yosefe aahimyale wira aaniroromeliwa ni Potifari. Yosefe aahithanliwa ni Potifari wira eettiheke mihakhu sawe sotheene, masi aahimukhoottiherya amwaarawe. Niireke Yosefe aamuhonona ororomeleya wawe? Owo aahikhootta yoophavela eyo. Nto aanuupuwelela otthuneya waya wiimananiha wira ahimutthekele Muluku awe. Yosefe aahiixuttihiwa ni anamuyari awe moonelo wa Muluku voohimya sa othelana ni ororomeleya. Yehova aahaapattuxa anamathelana oopacerya, ni aahooniherya moota yaarowa aya okhalaka. Mulopwana ni muthiyana yaari ntoko “mutthu mmosaru pahi”. (Maphattuwelo 2:24) Ale yaamananiha ohiiwelela mareheryo awo, yaaniphwanya ehukhumu ya Muluku. Mwa ntakiheryo, alopwana yaaphavela orupa ni amwaarawe Abrahamu, yaawo yaari apiipi awe Yosefe, ni amwaarawe Isakhi yaawo-tho yaari apiipi awe, yaahanle vakhaani ophwanya maxakha. (Maphattuwelo 20:1-3; 26:7-11) Yosefe aahiixutta saana malakiheryo awo nto aaniphavela wiiwelela.

Amwaarawe Potifari khiyaasiveliwa ni ele Yosefe aahimya awe. Mmuupuwele murumeyi owo amukhoottaka yena, ni ahimyaka wira yoophavela eyo yaari “etthu yotepexa otakhala”! Masi muthiyana ole aahithipelela. Woonasa wene wiixinnuuha ni oreera wa muthiyana ole waahimwiiriha yena ophavela oturuka muupuwelo wa Yosefe. Muthiyana owo aahooniherya mweettelo woolikana ni wa Satana, yoowo aamweeherenrye Yesu. Soweeha sa Satana khisaakhumenle saana; masi hata vari siiso, Satana aalipelela “okathi wophwanelela”. (Luka 4:13) Atthu oowaamini ahaana wiilipiha wira akhale oororomeleya. Ela yaari etthu aapanke awe Yosefe. Nnaamwi eyo yaamukhumelela “nihiku ti nihiku”, owo kheemyale. Ninsoma so: “Yosefe khatthunne”. (Maphattuwelo 39:10) Masi mwaara a Potifari, aaphavela omutthekiha.

Muthiyana owo aahilipelela okathi arumeyi otheene a vatthokoni yaakhumme aya. Owo aahisuwela wira Yosefe aamukela mpaani mme wira ovare miteko sawe. Nto okathi aakenle awe, owo aahimananiha onvara Yosefe. Aahivara ikuwo sawe khumwiirela so: “Nrowé mwakirupihe”! Moohipisa Yosefe aahimananiha okhuma opuro ole. Ophavelaka otthyawa, muthiyana ole aahikuxa nlaya na Yosefe. Masi owo aahitthyawa nto khimuhiyeryaka mmatatani nlaya nle.​—Maphattuwelo 39:11, 12.

Biibiliya onilopola so: “Mutthyaweke itthu s’ekhapa!” (1 aKorinto 6:18) Yosefe oovaha ntakiheryo nooloka wa maKristau eekeekhai! Makhalelo ahu pooti oniiriha owaattamela ale ahineettela malamulo a Muluku. Masi eyo khenitaphulela wira nihaana waatakiha. Hata vaxankihaka nihaana otthyawa.

Mweettelo wa Yosefe waahimukumiherya maxakha. Mwaara a Potifari aahiphavela wunla ikuhu. Moohipisa aahikhuwela owiitthanaka arumeyi akina. Aahihimya wira aaphavela otupheliwa ni Yosefe, masi khutthyawaka vaavo aakhuwenle awe. Nto aahivikaniha ovarela nlaya nle mpakha iyawe otthika. Okathi Potifari aaphiyale awe, muthiyana ole aahivikaniha wootha ohimyaka wira eyo yaakhumenle mwaha woowi aiyawe yaahimuruuha mutthu a elapo ekina. Potifari oonenle sai? Ninsoma so: “[Owo] ahinanariwa vanjene”. Nto aahiruma wira Yosefe otthukweliwe.​—Maphattuwelo 39:13-20.

‘AAHITTHUKIWA METTO SAWE NI EYUUMA’

Hiyo ninsuwela itthu vakhaani sa moota saari aya ikhatteya wEjiitu okathi ole. Alipa anthipa mapuro yaakhaliwa khalai, aaphwanya milepe sa ikhatteya iyo, seiyo sinlikana ni ixiri suulupale. Muhoolo mwaya, Yosefe aahirumeela nuulumo noowi ‘ekhatteya’ ohimyaka opuro wooriipela ni woohikhala nlipelelo. (Maphattuwelo 40:15) Mwa eliivuru ya Esalimo, ninniixutta sa ohaawa wamphwannye Yosefe. Eyo enihimya so: “Owo ahitthukiwa metto sawe: ahitthukiwa muxikoni mwawe n’unyolo [eyuuma]”. (Esalimo 105:17, 18) Ikwaha sikina, atthu a wEjiitu yanaatthukwa ni iyuuma ale yaattheka. Anamattheka awo miyoono saya saaniroihiwa ottuli waya, nuumala-vo sinatthukiwa ni iyuuma. Akina yaaniheliwa ekolaari ya yuuma muxikoni mwaya. Tthiri Yosefe aahihaawa mukhatteya mme nnaamwi ahaatthenke!

Biibiliya onihimya wira Yosefe aahivikaniha ‘okhala mukhatteya’ mme okathi munceene. Nto aahiviriha iyaakha sinci ohaawaka!a Owo khaasuwela wira aamukhuma opuro ole. Nto niireke aahitteettheya ni oyeleela nlipelelo vaavo mixankiho iyo saavikaniha aya mwa isumana sinci wala myeeri?

Biibiliya onihimya so: “Apwiya yanikhala ni Yosefe, khumureriha”. (Maphattuwelo 39:21) Khiivo exiri ya ekhatteya, eyuuma, wala opuro wooriipela okhanle oomwiiriha Yehova ohaaphenta arumeyi awe. (aRoma 8:38, 39) Hiyo pooti omuupuwelela Yosefe amuleelaka mixankiho sawe Tiithi awe oophenta a wiirimu, Yehova Muluku, yoowo ‘onihakalaliha okathi wothene’, ni ophwanyaka omaaleleya ni murettele. (2 aKorinto 1:3, 4; aFilipi 4:6, 7) Etthu xeeni ekina Yehova aapanke awe? Ninnisoma wira Owo aahivikaniha omukhaliherya Yosefe ni omwiiriha “mulupale a mukhatteya osiveliwa ni yowo”.

Anamutthukiwa yaanivahiwa muteko woovara, nto Yosefe aahivikaniha oreelihiwa ni Yehova. Owo aanivara miteko sotheene aavahiwa awe mooluttuweliwa, omuleelaka Yehova mixankiho sawe. Areelihiwaka ni Yehova, Yosefe aaniroromeliwa ni ottittimihiwa ntoko okathi aari awe wa Potifari. Biibiliya onihimya so: “Mulupale a mukhatteya aahimwirela wira àsukeke òtthukeliwa othene yari mukhatteya-mmo. Miteko sothene savariwa memmo, yowo t’ettiha. Mulupale owo khetetela miteko sanvaherenryawe Yosefe nnákhala vakhani, mana Apwiya yari ni yowo: tthiri Apwiya yanimukhaliherya wira miteko sawe sothene sokololoweke”. (Maphattuwelo 39:22, 23) Tthiri Yosefe aahiphwanya nimaaliho mwaha woosuwela wira aanikhaliheriwa ni Yehova!

Ikwaha sikina, pooti onikhumelela itthu sooloka wala soohiloka, ohela muhina wiireliwa itthu soohixariya. Masi nnoowerya wiixutta etthu sa waamini wa Yosefe. Navikaniha omwaattamela Yehova orweela wa nivekelo, wiiwelela sooruma sawe, ni wiimananiha opaka ele eri yooloka va maithoni vawe, Owo onoonireeliha. Yehova aahimureeliha vanceene Yosefe, ntoko ninrowa ahu woona myaha sikina sa muhoolo.

[Enoota]