MAKOHO ANIKOHIWA NI ALE ANISOMA IREVISTA SAHU

Ti pani ori Gogi ni Magogi onihimmwa eliivuru ya Ezekiyeli?

▪ Mwa iyaakha sinceene, iliivuru sahu saahitthokiherya wira Gogi ni Magogi nsina nivahiwe awe Satana Diabo nuumala woomoliwa wiirimu. Otthokiheriwa nno mathipelo aya yaaphwanyiwe ni masu anihimmwa ni eliivuru ya Wisupulula yeeyo enihimya wira Satana Diabo tonaahoolela atthu otheene anaatuphela atthu a Muluku. (Wis. 12:1-17) Nto vuupuweliwa wira Gogi nsina nikina na Satana na eprofesia.

Masi otthokiheriwa iwo wookumiherya makoho ootthuneya vanceene. Moota xeeni? Muthokorerye ela: Voohimya sa okathi onirowa awe oxinttiwa Gogi, Yehova onihimya so: “Kinorihela mirutthu sanyu vathí, wira sikhuriweke n’anakhuku n’axinuni othene a misulu n’inama sowali sa mutakhwani”. (Ezek. 39:4) Nuumala-vo Yehova onnihimya so: “Nihiku nenlo, kinomuthanlela Gogi mahiye òvuwa, . . . mulaponi mwa Isarayeli . . . Weiwo onovithiwa Gogi ni muttitthi wothene w’atthu awe”. (Ezek. 39:11) Nto vaniweryaneya sai yoopattuxiwa ya omunepani okhuuriwa “n’anakhuku n’axinuni othene a misulu n’inama sowali sa mutakhwani”? Moota xeeni Satana waarowa awe ovahiwa “mahiye òvuwa” valaponi? Biibiliya onnooniherya wira Satana onrowa otthukweliwa mpakha iyaakha ekonto emosa, khonihimya wira onrowa okhuuriwa wala ovithiwa.​—Wis. 20:1, 2.

Ninnihimeeriwa wira wanikisa wa iyaakha ekonto emosa, Satana onrowa otaphuliwa, nto “onovenya arowaka owototha amalapo amwaramwareiye mulaponi mothene, eyo p’iyo, Gogi ni Magogi . . . onimwathukumanyerya owana ekhotto”. (Wis. 20:8) Vano vaniweryaneya sai Satana orowa omoototha Gogi yoowo-tho onihimmwa okhala Satana? Nto vanniiwanyeya wira iprofesia iya soopiili, Ezekiyeli ni Wisupulula saahimyaka wira “Gogi” khasinimuhimya Satana.

Vano, ti pani ori Gogi ni Magogi? Wira niphwanye waakhuliwa wa nikoho nla nintthuneya otokosa oratteene Soolepa wira nimusuwele ole onaatuphela atthu a Muluku. Biibiliya onnihimya otupheliwa wa atthu a Muluku ohiya paahi ni Gogi ni Magogi, masi onnilavula sa otuphela wa mwene a ‘onikela epheyo’ ni wa “mamwene a mulaponi”. (Ezek. 38:2, 10-13; Dan. 11:40, 44, 45; Wis. 17:14; 19:19) Niireke otupheliwa nno onrowa wiiraneya ikwaha soovirikana? Nnaari khahiyo siiso. Moohaaniherya Biibiliya nipuro nle onihimya etthu emosaru masi erina masina oovirikana. Ninwerya sai ohimya eyo? Mwaha woowi Biibiliya onnihimya wira maloko ootheene a valaponi anrowa wiirela mpantta otuphela wookiserya weiwo onrowa okumiherya ekhotto ya Harmagedoni.​—Wis. 16:14, 16.

Okathi onivarerya ahu saana Soolepa iya sotheene sinilavula sa otupheliwa wookiserya wa atthu a Muluku, vannikhweya woona wira nsina noowi Gogi ni Magogi khannimuhimya Satana, masi ninhimya wiiraana wa maloko otheene a valaponi. Niireke maloko awo anrowa ohooleliwaka ni mwene a “onikela epheyo”? Hiyo khannisuwelexa. Masi muupuwelelo owo onikhala ntoko onnivarihana ni ele Yehova enimuhimeerya awe Gogi wira: “mukhumaka elapo anyu enikhala wokiseryani wa elapo, epantte enikela epheyo. Munovenya weiwo muholaka muttitthi mulupale ni wowerya w’anakhotto òtupa a maloko manjene, othene aya ewenlene ikhavalo saya”.​—Ezek. 38:6, 15.

Vamosaru, profeta Daniyeli, yoowo aakhala okathi omosaru ni Ezekiyeli omuhimyaka mwene a onikela epheyo onihimya so: “Masi, okathi owo, mwené onovelavelihiwa n’ihali sotakhala sinrowa okhuma ilapo s’onikhuma nsuwa ni s’onikela epheyo; owo onovenya n’uviruwa wulupale, atthokelelaka wira onrowa ohonona ilapo n’uwivakasa atthu. Onimwemexa ihema sawe s’omwene eriyari y’ephareya ni mwako wowarya wa Muluku. Nto owo onotthimakela okhwa wawe; khavo ontthuna omukhaliherya”. (Dan. 11:44, 45) Soolepa iya sinniiwanyeiha oratteene ele enihimmwa eliivuru ya Ezekiyeli voohimya sa miteko sa Gogi.​—Ezek. 38:8-12, 16.

Nto exeeni enrowa okhumelela nuumala otupheliwa nno wookiserya? Profeta Daniyeli onnihimeerya so: “Mahiku awo [okathi wa Harmagedoni], onokhumelela Mikhayeli [Yesu Kristu], mulupale a malaikha [okhuma 1914], mukhapeleli a nloko nanyu. Okathi uwo anokhumelela mahiku òvelavela wulupale [maxakha maalupale], ahinakhumelele okhuma wopajeryani w’elapo mpakha mahiku yawo. Vano, atthu a nloko nanyu animopowa, yawo anrowa ophwanyiwa elempwene mulivuruni mwa Muluku”. (Dan. 12:1) Miteko sa ole orummwale ni Muluku, Yesu sootthokiheriwa-tho yoolepa ya Wisupulula 19:11-21.

Masi ti pani onihimmwa okhala Gogi ni Magogi yoolepa ya Wisupulula 20:8? Okathi wa weehereriwa wookiserya, wuumalani wa iyaakha ekonto emosa, atthu yaale anrowa ommwareela Yehova anrowa okhalana muupuwelelo mmosaru woophavela wiiva orina awe ‘Gogi ni Magogi’, eyo piiyo, maloko yaale anaatuphela atthu a Muluku ohalaka okathi vakhaani wira opacerye Harmagedoni. Nto yookhumelela ya igrupu iyo soopiili enoolikana, eyo piiyo, wiiviwa woohimala! (Wis. 19:20, 21; 20:9) Nto vannireerela owiirela “Gogi ni Magogi”, atthu otheene yaale anrowa omwareela muluku wuukiseryani wa iyaakha ekonto emosa.

Hiyo ninsoma mwa nthiti Nuulumo na Muluku, ninniwehererya wira nimoone ni omusuwela ole onrwa okhalana muritti wa “mwene a onikela epheyo”. Hata nihimusuwelaka ole onrowa ohoolela maloko awo, masi sookhala itthu piili sinisuwelexa ahu wira: (1) Gogi ni Magogi ni anakhotto aya anrowa oxinttiwa ni opwetexiwa; ni (2) Mwene ahu yoowo onilamulela, Yesu Kristu, onrowa owoopola atthu a Muluku ni waaroiha elapo esya ya murettele ni mmaaleleyo.​—Wis. 7:14-17.