MWAHA WA VAKAAPANI

Niireke Nyuwo Munnaasuwela Anamoona a Yehova?

Muthiyana mmosa oniitthaniwa Becky, oCalifórnia EUA onihimya so: “Kimusuwenle khalai Mike yoowo ori Namoona a Yehova. Masi etiini awe nkaiwexexa. Kaaniikoha so: ‘Yehova ti pani? Xeeni Anamoona a Yehova ahiniirela aya mpantta iferiado?’ Kuupuwela wira owo eettela etiini yoomwareya”.

Zenon, a Ontario, Canadá, oni: “Okathi anamwaattamanani aka yaapacenrye aya omusoma Biibiliya ni Anamoona a Yehova, kaaniikoha so: ‘Nintaphulelani nsina noowi Anamoona a Yehova? Nlo nsina noothanyeya!’”

Kent, oWashington, EUA onihimya so: “Miyo ni amwaaraka nuupuwela wira Anamoona yanixukurya paahi aphavelaka onivaha nthowa mwaha woowi khinaarina etiini. Nto nuupuwela wira mwaha woowi itiini soosuweliwa vanceene khisaarina ele yaaphavela ahu, nave Anamoona a Yehova khiyaarina-tho”.

Cecilie, a wEsbjerg, Dinamarca, oni: “Ohimya ekeekhai, miyo nkaasuwela Anamoona ni ele yaakupali aya”.

Woonasa wene munnaaweha Anamoona a Yehova elaleeryaka khuta empa wala mapuro otheene ari atthu, akawaka iliivuru sinimutthokiherya Biibiliya, ni ovaha soosoma sa Biibiliya sihinliviwa etthu. Pooti wira awo ti yoovanheni erevista ela. Hata vari siiso, nyuwo munniphavela waasuwela saana. Waaniheryasa muupuwelo anyu onlikanasa ni wa atthu ale nimanle ahu waaromola.

Akhala wira mookhalana makoho, munrowa ophwanya woowi waakhuliwa? Munrowa osuwela sai ele Anamoona anikupali aya, moota aniphwanya aya musurukhu onikhaliherya muteko aya ni mapuro aya ookokhorela? Xeeni anilaleerya aya mmawaani ni mapuro otheene ari atthu?

Cecilie oromoliwe wanipacerya oni: “Koosoma myaha sinceene munterneti voohimya sa Anamoona. Kooweha itthu sikina sinooniherya nthalu. Eyo yookiiriha okhalana moonelo woohiloka voohimya sa awosa”. Nuuvira okathi, Cecilie aahilavula mmansawe ni Anamoona a Yehova wira ophwanye waakhuliwa wookhalela wa makoho awe.

Niireke munniphavela osuwela ekeekhai voohimya sa Anamoona a Yehova? Xontte, nnootumereryani wira nvaanele ni Anamoona a Yehova, yaawo anikumiherya erevista ela. (Miruku 14:15) Ninnilipelela wira myaha sinittharelana sinimookhaliheryani osuwela sookupali sahu vamosa ni muteko ahu, niire so, onisuwela saana.

MWAHA WA VAKAAPANI | NIIREKE NYUWO MUNNAASUWELA ANAMOONA A YEHOVA?

Anamoona a Yehova atthu a moota xeeni?

Anamoona a Yehova anniphwanyaneya olumwenku wotheene masi khanitakaahana ni itiini sikina. Eseedi ahu ya ilapo sotheene eri wEstados Unidos, masi Anamoona a Yehova anci ankhala ilapo sikina. Tthiri atthu oowiiraka imilyau 8 annimwiixuttiha Biibiliya ilapo sinivikana 230, moovarihana ni moolumo a Yesu ani: “Ehapar’ila yorera y’omwene wa wirimu enolaleiwa mulaponi mothene, wira maloko othene esuwele”.​—Matheyo 24:14.

Hata nikhalaka ilapo soovirikana, ninniiwelela malamulo a elapo eyo; masi khanniirela mpantta epoliitika. Hiyo nimmwiiwelela Yesu yoowo onnihimeerya wira nihiireleke mpantta olumwenku. Nto khanniirela mpantta myaha ni miteko sa epoliitika wala okhaliherya ikhotto. (Yohani 15:19; 17:16) Ti maana aya okathi wa Ekhotto ya Nenli ya Olumwenku, Anamoona yaahivariwa, ohaaxiwa, ni wiirihiwa sootakhala. Bispo a khalai a wAlemanha aalempe so: “[Anamoona a Yehova] aakhalana ehakhi yoohimya wira awo yaari egrupu emosa paahi yaakhoottale orowa etoropa mwaha wa yowuupuxerya ya murima aya okathi wa Reich Aneeraru”.

Hata vari siiso, hiyo khanniivalaanya. Yesu aavekenle so: “Nkinovekelani wira mwakumihe molumwenkuni”. (Yohani 17:15) Nto, ti maana aya munniweha anyu omutekoni, olooja, ni oxikola wa muttetthe ahu.

[Eponto yuulupale epaaxina 4]

“Ehaavo etthu yuulupale eniwiiriha [Anamoona a Yehova] okhala oowiiwelela. Vaamureera vaakhanle wira atthu oophenta ntoko awo annivara miteko suulupale sa epoliitika, masi eyo khenrowa wiiraneya. . . . Awosa annaattittimiha makhulupale a mulaponi, masi anikupali paahi wira Omwene wa Muluku tonrowa omaliha mixankiho sahu”.​—Ejornale Nová Svoboda, Repuublika Tcheca

[Ekaaxa epaaxina 4]

ILAPO SIRINA ANAMOONA A YEHOVA ANCEENE

Estados Unidos 1.190.000

México 800.000

Brasil 770.000

Nigéria 330.000

Itália 250.000

Japão 220.000

[Ekaaxa epaaxina 4]

Eviidiyu eni: Congresso Especial em Israel, ennooniherya moota Anamoona a Yehova a wIsarayeli ni oPalestina axinttale aya nthalu ni ovirikana wa maloko. (Murowe va www.jw.org/pt, opuro oni: QUEM SOMOS > CONGRESSOS)

MWAHA WA VAKAAPANI | NIIREKE NYUWO MUNNAASUWELA ANAMOONA A YEHOVA?

Itthu xeeni Anamoona a Yehova anikupali aya?

Anamoona a Yehova anikupali wira “Solempwa sothene supuxeriwé ni Muluku”. (2 Timótheyo 3:16) Ninnimurumeela Biibiliya ntoko eliivuru yoovareleya muteko yeeyo enniixuttiha sa Mpattuxa ahu ni enniphwanyiha okumi woohakalala.

Biibiliya oni: “Esuwele wi nyuwo nsina nanyu ti Yahvéh, nyuwo mekhinyu mwà namusulú [Muulupalexa] velaponi vothene”. (Esalimo 83:19, Biblya Exirima) Ti maana aya nimmukokhorela ahu Yehova Muluku paahi, ni vanimananiha ahu olaleya nsina nawe ntoko Anamoona awe.​—Yesaya 43:10-12.

Ntoko maKristau, ninnikupali wira Yesu “Mwana a Muluku”a, aahirwa valaponi ntoko Mesiya. (Yohani 1:34, 41; 4:25, 26) Nuumala okhwa, oohihimuxiwa khurowa wiirimu. (1 aKorinto 15:3, 4) Owo muhoolo mwaya, khukhala Mwene a Omwene wa Muluku. (Wisupulula 11:15) Omwene owo ti Eguvernu yekeekhai yeeyo enirowa ottikiherya eparayiisu valaponi. (Daniyeli 2:44) Esalimo 37:11, 29, eni: “Atthu òmàla anoreriwa vathí-va: anokhala-mu ni murettele womalela”.

Anamoona anikupali wira malakiheryo a Biibiliya toovareleya muteko okathi wotheene. (Yesaya 48:17, 18) Nto ninneettela saana malakiheryo awo. Mwa ntakiheryo, Biibiliya onnintumererya osyaka itthu sinihonona muupuwelo ni erutthu ahu. Nto hiyo khannimpaha soona, wala olya mirette sootakhala. (2 aKorinto 7:1) Ninnisyaka-tho itthu sinikhoottihiwa mBiibiliyani ntoko: ohapaliwa, orupihana woohiloka, ni wiiya.​—1 aKorinto 6:9-11.

[Enoota]

[Eponto yuulupale epaaxina 5]

“Okathi animusoma aya Biibiliya, awo annikupali wira Muluku onilavula ni yena. Vaavo sinaaphwanya aya mixankiho mookumini mwaya, awo annirumeela Nuulumo na Muluku wira aphuke mixankiho iyo. . . . Mwa moonelo aya Nuulumo na Muluku nlelo ti nikumi”.​—Muhooleli a etiini Katoolika Benjamin Cherayath, Münsterländische Volkszeitung, ejornale, wAlemanha

[Ekaaxa epaaxina 5]

Wira musuwele sookupali sahu sikina, ohela muhina nthowa naya nihiniirela ahu mpantta iferiyado, wala oheleliwa ephome, murowe va www.jw.org/pt, opuro oni: QUEM SOMOS > PERGUNTAS FREQUENTES.

MWAHA WA VAKAAPANI | NIIREKE NYUWO MUNNAASUWELA ANAMOONA A YEHOVA?

Onikhuma vai musurukhu onikhaliherya miteko sahu?

Khuta mwaakha, ninnimpirimiri ni okawa imilyau sinceene sa aBiibiliya ni iliivuru sikina. Nooteka ifiliyaali ni nookhalana maakina animpirimiri iliivuru olumwenku wotheene. Miloko sinceene sa Anamoona sinnithukumana mapuro oohaattiheriwa itthu ni ooreera aniitthaniwa Empa ya Omwene. Nto musurukhu wa itthu sotheene iyo onikhuma vai?

Miteko sahu sotheene sinikhaliheriwa ni soovaha soohikhanyereriwa. (2 aKorinto 9:7) Mwaakha wa 1879, nummuru na nenli na erevista ela yaahimmye so: “Ninnikupali wira YEHOVA tori namakhaliherya a ‘Torre de Vigia de Sião’ [ntoko saitthaniwa aya erevista ela khalai], nto akhala wira ti siiso, khonkhala-khala ovekavekaka musurukhu aahiiso ovekela nikhaliheryo na pinaatamu”. Nto hiyo nintthara yoolema yeeyo.

Sinnipakiwa soovaha erumeeliwaka efiliyaali ya elapo wala ikaaxa siniphwanyaneya Empa ya Omwene. Masi khaninviriha ephace nivekelaka musurukhu, wala otumiha iliivuru sahu aahiiso oliviwa mwaha woolaleerya, wiixuttiha mmulokoni, wala okhaliherya oteka inupa sookokhorela. Yesu aahimmye so: “Ntoko sivahiwanyu mahala, siso-tho nvaheke mahala”. (Matheyo 10:8) Arumeyi otheene anirumeela nfiliyaali mwahu ni oseedi ya olumwenku wotheene vamosa ni anna a Nikhuuru Noolamulela na Anamoona a Yehova, khanliviwa etthu.

Soovaha iyo sinnirumeeliwa-tho okathi wa ihasara sa ephattu. MaKristau oopacerya yaanisiveliwa waakhaliherya ale saaphwanya ihasara. (aRoma 15:26) Ninnaakhaliherya ale aniphwanyiwa ihasara vaavo ninteka ahu inupa saya ni mapuro ookokhorela, waavaha eyoolya, ikuwo, ni murette wa oxipitali.

[Eponto yuulupale epaaxina 6]

“Miteko sotheene sa Anamoona a Yehova, ohela muhina etiini aya, sinikhaliheriwa ni soovaha soohikhanyereriwa. Khuta mutthu ‘onivaha’ moovarihana ni ele erina awe ni eniwerya awe”.​—Corte Europeia dos Direitos Humanos, 2011

[Ekaaxa epaaxina 6]

Moone eviidiyu eni: Tufão nas Filipinas​—A fé supera dificuldades va www.jw.org/pt. (Opuro oni: QUEM SOMOS > ATIVIDADES)

MWAHA WA VAKAAPANI | NIIREKE NYUWO MUNNAASUWELA ANAMOONA A YEHOVA?

Exeeni enniiriha olaleerya?

Khiivo etthu ekina ennisuwanyeiha ohikhanle paahi muteko ahu woolaleerya mmawaani, mustaraatani ni mapuro makina aniphwanyaneya atthu. Nto exeeni enniiriha olaleerya?

Etthu eniwiiriha Anamoona a Yehova olaleerya, ori ophavela onvuwiha Muluku ni olaleya nsina nawe. (aHéberi 13:15) Tthiri hiyo nniiwelela yooruma ya Yesu eni: “Vano, murowé, mwawixuttiheke atthu a maloko othene, . . . Mwawixuttiheke wettela sothene sòrumalyakani”.​—Matheyo 28:19, 20.

Nave, ninnaaphenta anamwaattamanani ahu. (Matheyo 22:39) Ekeekhai wira anamunceene aakhalana etiini aya, ni akina khaniphavela wiiwa ele enilaleya ahu. Masi, ninnikupali wira sowiixuttiha sa Biibiliya sinnoopola ikumi. Ntoko maKristau a eseekulu yoopacerya, hiyo ninnivikaniha ‘owixuttiha atthu, nalaleryaka wira Yesu ti Mòpoli’.​—Miteko 5:41, 42.

Anamunceene anisoma iliivuru sahu khahiyo Anamoona a Yehova. Nave imilyau sinceene sa atthu animusoma Biibiliya ni hiyo atthu a itiini sikina. Masi awo annixukhuru mwaha wooxukuriwa ni Anamoona.

Waaniheryasa nyuwo mookhalana makoho makina voohimya sa Anamoona a Yehova. Xontte murumeele iponto sinittharelana wira mphwanye waakhuliwa wa makoho anyu:

• Mmukohe Namoona a Yehova.

• Mukele esaite ahu, www.jw.org.

• Aahiiso mwawehe mithukumano sahu sa atthu otheene ni sihinliviwa etthu.

[Eponto yuulupale epaaxina 7]

Sociólogo Antonio Cova Maduro aahilepa voohimya sa “wiimananiha ni muteko wa Anamoona a Yehova vaavo aniileva aya . . . , wira masu oowaarya asuweliwe elapo yotheene”.​—El Universal newspaper, Venezuela

[Ekaaxa epaaxina 7]

Wira musuwele itthu sikina voohimya sa Anamoona a Yehova, moone eviidiyu eni: Anamoona a Yehova Nikhuuru Nenlo Ninlaleya Ihapari Sooreera, va www.jw.org/vmw. (Murowe opuro oni: ILIIVURU > IVIIDIYU)