Omwaattamela Muluku Wookikhaliherya Vanceene
OKATHI waarina aka iyaakha 9 kaahihiya wunnuwa. Eyo yaakhumelenle iyaakha 34 sivinre elapo ya oCosta do Marfim, hata olelo-va irakamelo saka siniphiya emeeturu emosa paahi. Okathi muxankiho aka waatepa awe wooneya, anamuyari aka yaahikitumererya wira kivareke muteko mowiilipiha wira kihuupuweleke muxankiho aka. Nto kaahiteka ebanka yaatumiha aka mihokorokho mphironi ohoolo wa empa ahu, ni kaanirattela opuro ole. Eyo yaaniwiiriha atthu anceene ophavela okithumaanana.
Ekeekhai wira, wiimananiha ovara muteko khiwaamalinhe muxankiho aka. Nlelo kaari ookhuveya vanceene, itthu sinceene saanikivila ovara, ntoko owerya othurumela itthu siri opalkawuni wa elooxa. Itthu sotheene saakhala wira sipakeliwe atthu oorakama paahi. Kaaniikhupanyerya khula okathi, masi eyo yaahimala okathi waarina aka iyaakha 14.
Nihiku nimosa, athiyana anli Anamoona a Yehova yaahithuma mihokorokho saatumiha aka, nuumala-vo yaahipacerya okisomiha Biibiliya. Voohipisa kaahoona wira omusuwela Yehova ni soolakela sawe ti yaari etthu yootthuneya ovikana makhalelo aka ale. Eyo yaahikiphwanyiha ohakalala. Okhuma vaavale yoolepa yookisivela ti Esalimo 73:28 NM. Mpantta woopacerya wa yoolepa eyo oni: ‘Omwaattamela Muluku wookiphwanyiha mireerelo’.
Mootutuxerya emusi ahu yaahithaamela oBurkina Fasso, nto ekumi aka yaahiturukeya moomalela. Owaani waakhala ahu oCosta do Marfim, miyo kaahilimalela makhaleliwo ni muteko aka wa otumiha mihokorokho vabankani vaka. Masi muttetthe ole waathaamenle ahu, khiivo yaasuwela aka, ni atthu a elapo ele khiyaatonko okoona. Atthu yaanikitheya. Nto miyo kaahipacerya wiipitha mpaani kivirihaka isumana sinceene kihikhumelaka vate. Nto kaahipacerya wuupuwelela mireerelo saaphwanya aka okathi waamusoma aka Biibiliya ni wiixutta etthu voohimya sa Yehova. Kaahilepa epaphelo kiroihaka ofiliyaali ya Anamoona a Yehova nto kaahixukuriwa ni mutthu ooreerela, eyo piiyo, Nani, misionaaria mmosa oorakala oneetta ni moota a maroota mararu.
Iphiro sa muttetthe ole waatta ntthuuru nto okathi wa epula sinnisareya nttophe. Nani aaniphara ni moota awe ikwaha sinceene omananihaka orwa okisomiha, masi owo khaacompa. Nto aahiivahererya okipakhira wira nirowe omuthukumanoni. Vano kuupuwela wira kaahaana wiilokiherya okhala wira kaarowa okhuma owaani wira kaveehiweke ni atthu akina. Ohiya-vo owela ottuli wa moota ole waari muxankiho muulupale ni waanincererya olemela okhala wira mutooro awe khaawerya saana. Hata vari siiso, miyo kaaheemererya, khuupuwelaka mpantta wa nenli wa yoolepa yeele yookisivela eni: ‘Apwiya, miyo kinnotthyawelelani nyuwo’.
Nani ni miyo okathi mukina naaniphara mmattopheni, masi vaanireerela wiimananiha wira niphiye omuthukumanoni. Tthiri vaanivirikana waaweha atthu ootteeliwa murima Empa ya Omwene ni ale yaakiveeha ota! Nuuvira myeeri 9 kaahibatiziwa.
Mpantta wa neeraru wa yoolepa ele onihimya so: ‘wira kilaleye miteko sanyu sothene’. Kaanisuwela wira olaleerya waarowa okhala etthu yooxankiha. Nlelo kinnuupuwela mukwaha woopacerya kaaronwe aka olaleerya empa ti empa. Anamwane ni atthu aalupale yaanikitheya, okitthara-tthara, hata yaanitakiha weetta waka. Eyo yaanikiwereya, masi kaanuupuwela wira kaphavela okela mParayiisu kaahaana ovikaniha ovara muteko ole.
Wira kaakuveke weetta, kaahimuthuma baaskoro oninyakeleliwa ni matata. Mutthu aarowana aka olaleerya ahaana okixova okathi waawelela ahu etturuuru nto oneri owo aaniwela nnakhuruwela hoothe. Muteko woolaleerya wanipacerya waanikixankiha, masi muhoolo mwaya waanikiphwanyiha ohakalala, tivonto mwaakha wa 1998 kaahikela muteko wa opioneero wookilaatheya.
Miyo kaaniiriha soosoma sa Biibiliya sinceene, nto atthu axexe yaasomiha aka yaahibatiziwa. Ohiya-vo, muhima aka mmosa aheemererya ekeekhai! Wiiwa moota atthu akina yaarowa aya vahoolo waanikiphwanyiha ikuru saatthuneya wira kivikanihe ovara muteko aka. Nihiku nimosa kiwereiwaka malaaria, kaahaakhela epaphelo yaakhuma oCosta do Marfim. Kaahipaceriha yoosoma ya Biibiliya eniiriwa moohipisa vamukhora ni naxikola mmosa aasoma wuniversidade oBurkina Fasso nto kinvahererya munna. Owo muhoolo mwaya aahithaamela oCosta do Marfim. Tthiri kaahitteeliwa murima mwaha woosuwela wira vano owo aari namalaleerya oohibatiziwa!
Masi kaaphwanya vaavi musurukhu woowiikhaliheryana? Mutthenkeso mmosa onaakhaliherya atthu oorakala waahiivahererya wira kiixuttihiwe ottottha ikuwo. Mutthu mmosa aasomiha nipuro nle ahoona moota waimananiha aka nto khuhimya so: “Hiyo nihaana owiixuttihani moota woopaka esaphau”. Nto kaahiixuttihiwa. Vano kinnisuwela opaka esaphau enirapiheliwa iparatho ni okattheliwa ikuwo. Atthu anceene ennaasivela esaphau enipaka aka. Kinnaaroihela atthu mmawaani, kimurumeelaka moota a maroota mararu.
Mooriipiha murima, mwaakha wa 2004, muthana aka waahipacerya okiwereya vanceene nto kaahaana ohiya muteko wa epioneero. Hata vari siiso, nlelo kinniirela mpantta muteko woolaleerya.
Atthu anihimya wira annisiveliwa okiweha kitheyaka moopatthaneya. Miyo kihaana mathowa maalupale a otteeliwa murima mwaha wa omurumeela waka Muluku.—Elavuliwe ni Sarah Maiga.