“Miyo ni Sofiaa, naahiviriha iyaakha 39 nithelanne ene, nto Sofia aahikhwa mwaha wa oretta waakhumme khalai onwereya. Kaanikhaliheriwa vanceene ni apatthani ni kaaniluttuweliwa ovara miteko saka. Masi nuuvira mwaakha ntero, kaahitthikela oriipiwa murima vanceene. Okathi mukina, moonelo aka waaniturukeya, nto kaahoona wira nkaawerya okasoopa. Nnaamwi sivinre ene iyaakha tthaaru nuumala mwaaraka okhwa, okathi mukina kinniriipiwa murima vanceene ni ikwaha sinceene kinnixanka”.​—Kostas.

Niireke mookhweliwa mutthu mwamphenta anyu? Akhala wira ti siiso, woonasa wene mookhalana moonelo ntoko wa Kostas. Khiivo etthu yootepa owereya ovikana okhweliwa ole mwaathelanne anyu, mmusi aahiiso mpatthani mwamphenta anyu. Asomi yaawo anitokosa owereya onikhumelela mwaha wookhweliwa, anneemererya eyo. Mwaha mmosa waakumiheriwe ni eRevista Americana de Psiquiatria, waahimmye wira “okhweliwa etthu yootepa owereya ni opweteiwa wuulupale”. Okhweliwa onnikumiherya owereya wuulupale, nto ole okhweliwe pooti wiikoha so: ‘Mpakha silini kinrowa aka oriipiwa murima? Kiireke kinootthikela ophwanya ohakalala? Kinrowa ophwanya woowi nimaaliho?’

Erevista ela Nvenye!, ninrowa othokorerya waakhuliwa wa makoho awo. Mwaha onittharelana, ninrowa othokorerya ele mukhanle anyu oopaka vaavo onikhwa awe ole mwamphenta anyu. Myaha sikina, ninrowa oweha itthu sinrowa wookhaliheryani ovukula owereya onikhumelela mwaha wookhweliwa.

Ninnikupali wira myaha sinittharelana sinoomulipiha ni omukhaliherya khula mutthu oriipiwe murima mwaha wookhweliwa.

Nnaamwi asomi akina ahimyaka wira oriipiwa murima wookhalana inamuna soovirikana, khula mutthu okhalana enamuna awe ya oriipiwa murima. Niireke ovirikana wa oriipiwa murima onitaphulela wira atthu akina anriipiwa murima vakhaani aahiiso “anvittha” moonelo aya? Nnaari. Nnaamwi ohimya moonelo ahu ovukulaka oriipiwa murima, khekhanle “enamuna yooloka” ya oriipiwa murima. Maana eyo enivarihana ni soolema sa mutthu, sookumanana, omutthu awe ni moota mutthu owo okhwiiye awe.

ITTHU XEENI SOOTAKHALA SINIKHUMELELA?

Mutthu okhweliwe pooti ohisuwela ele enrowa omwiiraneela nuumala okhwa ole amphenta awe. Masi, sookhala itthu ni mixankiho sinimakela waakhumelela ale akhweliwe. Nrowe nithokorerye itthu sinittharelana:

Oxanka vanceene. Wunla, oxanka mwaha wa okhweliwa ni othanana aahiiso ovelavela pooti onikhumelela. Nave mutthu pooti oxanka vanceene, onuupuwela itthu sinceene ni omakela oloha. Wanipacerya, mutthu pooti ohoona yoopaka ni ohikupali ele yiiraneyale. Tiina onnuupuwela ele yaamwiiranenle nuumala iyawe iihaniwa Timo okhwa mootutuxerya. Owo onihimya so: “Wanipacerya, owanoni waahikuuma. Nto nkaawenrye wunla. Kaahixanka vanceene mpakha ohiwerya omumula. Nave nkaakupali ele yaakikhumelenle”.

Owanana oxanka, onanariwa ni wiivaha nthowa pooti okhumelela. Ivan onihimya so: “Nuumala okhwa mwanihu aarina iyaakha 24, yoowo iihaniwa Eric, miyo ni mwaaraka Yolanda, naahinanariwa! Nto eyo yaahinitikiniha okhala wira khinaatonko otepa onanariwa. Naahiivaha nthowa vanceene, nnaikoha akhala wira nahaana opaka etthu wira mwanihu ohikhwe”. Alejandro yoowo okhweliwe mwaarawe mwaha wa oretta waavirinhe okathi munceene, aaniivaha nthowa. Owo onihimya wira: “Wanipacerya, kuupuwela wira Muluku aaphavela wira kihaaweke vanceene, nto kaaniixoona okhala mutthu ootakhala. Vano kaaniivaha nthowa ni kaanimukhupanya Muluku mwaha wa ele yaakikhumelenle”. Nave Kostas, yoowo nimulavunle ahu mwaha ovinre, onihimya so: “Mwa okathi vakhaani kaahinanariwa mwaha wookhwa Sofia. Nto, mwaha waivaavo kaaniivaha nthowa. Masi kaahoona wira Sofia khaarina nthowa”.

Oxanka mwaha woomuupuwela ole mwaathelanne anyu. Onnikhala okathi mutthu onikhalana awe muupuwelo woohiloka. Mwa ntakiheryo, mutthu okhweliwe pooti wuupuwelaka wira ole okhwiiye onnoona, onniiwa ni onnoona owereya. Nto eyo pooti omwiiriha ole okhweliwe onvila okhala oomaaleleya aahiiso wuupuwela itthu sikina. Tiina onihimya wira: “Okathi mukina, vaavo kaavaanela aka ni atthu akina, muupuwelo aka khiwaakhala vaavo! Nto kaamakela wuupuwela okhwa wa Timo. Tthiri ohiwerya omaaleleya, waanikixankiha vanceene”.

Ophavela wiivalaanya. Mutthu okhweliwe pooti ohimusivela okhala vamosa ni atthu akina. Kostas onihimya wira: “Okathi khaakhala aka ni anamathelana koona wira koorimeela. Nave okhala ni atthu oohithela koona wira kiri mekhaka”. Mwaarawe Ivan oniihaniwa Yolanda onnuupuwela oriki: “Waanikixankiha okhala ni atthu yanlaseya mwaha wa mixankiho saamukhaani, nalikanyiha ni sawihu! Nave yaahikhala atthu yaanileela itthu sooloka anaaya yaapaka aya. Kaanihakalala wiiwa eyo, masi okathi omosa-ru, waanikixankiha waawiriyana. Miyo ni iyaka naahisuwela wira mutthu pooti okhwa, masi khivaanikhweela weemererya eyo”.

Owereyasiwa. Ohiphavela olya, ohikhalana ikuru ni naawalaphile pooti okhumelela. Aaron onnuupuwela ele yaamukhumelenle nuumala eyaakha ntero paapa awe okhwiiye ene. Owo oni: “Miyo nkaawerya ophwanya ikhove. Kaamakela ovinya ohiyu kinuupuwela okhwa wa paapa aka”.

Alejandro onihimya wira aamakela owereyasiwa: “Ikwaha sinceene kaanipaka exame meediku, nto kaaleeliwa wira ka mukumi. Miyo kuupuwela wira oriipiwa waka murima waanikikhulumula”. Nuuvira okathi, okhulumuwa waka waahivira. Hata vaari siiso, yaari etthu ya miruku Alejandro orowa olavula ni meediku. Oriipiwa murima pooti otteittheiha erutthu ahu ehinawerya onaakiherya iretta.

Ohiwerya ovara miteko sootthuneya. Ivan onihimya wira: “Nuumala Eric okhwa naahaaleela ohiya paahi amusi ni apatthani, masi-tho atthu akina ntoko patarau awe ni mwaneene empa aalukari awe. Nave, naahaana olepa idukumento sinceene. Nuumala-vo, naahaana okhapelela iferemento sa Eric. Waatthuneya okathi wira nipake itthu iyo sotheene, nto naahikhulumuwa mmuupuweloni ni werutthuni”.

Masi mixankiho sa atthu akina pooti okhumelela nuuvira okathi, vaavo aneererya aya ovara miteko seiyo saavariwa ni mutthu yamphenta aya okhwiiye. Eyo ti etthu yaamwiiranenle Tiina. Owo onihimya so: “Okathi wotheene, Timo aanimukhapelela nakoso ahu ni itthu sikina. Nto vano, owo muritti aka, eyo ehincererya vanceene oxanka waka. Kiireke kinoowerya okhapelela itthu sotheene kihihononne”?

Mixankiho nilavunle ahu, sinnooniherya wira okhweliwa onnikumiherya mixankiho mmuupuweloni ni werutthuni. Ekeekhai wira owereya onikhumelela nuumala okhwa ole namphenta ahu pooti okhala wuulupale, masi osuwela eyo, onimwaakhaliherya ale akhweliwe niinaano woona moota woovilela. Nave, muupuweleke wira khahiyo wira atthu otheene aniriipiwa murima mwa enamuna emosa-ru. Ohiya-vo, ale ariipiwe murima anoophwanya nimaaliho osuwela wira khahiyo vootthekeya oriipiwa murima.

KIIREKE KINOOTTHIKELA OPHWANYA OHAKALALA?

Nlipeleleke exeeni: Oriipiwa murima khahiyo etthu ya mahiku otheene, maana pooti ovira. Masi eyo khentaphulela wira munoomuliyala mutthu ole mwamphenta anyu okhwiiye. Masi, vakhaani-vakhaani, owereya onikhumelela mwaha wookhweliwa onoovukuwa. Nto owereya iwo pooti okhumelela-tho okathi munimuupuwela anyu ole okhwiiye aahiiso mahiku oohakalaliha mwaakhanle anyu vamosa. Nuuvira okathi, atthu akina annikhala saana mmuupuweloni anatthikela ovara miteko saya sa khula nihiku. Eyo enniiraneya akhala wira mutthu ole okhweliwe onneemererya nikhaliheryo na amusi, apatthani ni onnimananiha oxintta oriipiwa wawe murima.

Mpakha silini kinrowa aka oriipiwa murima? Atthu akina pooti ovira myeeri sinceene ariipiwe ene murima. Akina pooti ovira mwaakha aahiiso myaakha miili wira atthikele okhala saana. Masi, aakhala atthu akina aniviriha iyaakha sinceene wira akhale saana.a Alejandro onnuupuwela oriki: “Saahivira iyaakha tthaaru kiriipiwe ene murima vanceene”.

Nto mwiipixeryeke murima. Muhixankeleke itthu sa muhoolo, mwiimananiheke okhala ntoko mwaakhala anyu khalai musuwelaka wira oriipiwa wanyu murima onoomala. Niireke sookhala itthu sinrowa wookhaliheryani ovilela oriipiwa wanyu murima aahiiso ohiriipiwa murima okathi munceene?

Vaavo mutthu onaavya awe miruku sa moota woovilela okhweliwa, woonasa wene onoophwanya miyoonelo sinceene, sikina sootepa otthuneya ovikana sikina. Eyo enniiraneya mwaha wa ele nihimmye ahu wanipacerya, wira khula mutthu okhalana enamuna awe ya oriipiwa murima. Etthu enimukhaliherya mutthu mmosa, pooti ohimukhaliherya mukina.

Hata vari siiso, aakhala malakiheryo anaakhaliherya atthu anceene. Awo animakela olavuliwa ni atthu anaavaha miruku ale akhweliwe, nave anirumeela eliivuru erina miruku soovareleya muteko, eyo piiyo, Biibiliya.

1: MWEEMERERYE NIKHALIHERYO NA AMUSI NI APATTHANI

• 

  Anamatokosa akina, anihimya wira eyo enamuna yuulupale ya ovilela oriipiwa murima. Ekeekhai wira okathi mukina munoophavelaka okhala mekhinyu. Nave pooti woonaka wira ale aniphavela wookhaliheryani annoonyoonyihani. Eyo khahiyo yootthekeya.

• Muhuupuweleke wira okathi wotheene munrowa okhalaka ni atthu akina, masi muhiivalaanyeke. Nuuvira okathi, munoophavelaka okhaliheriwa ni atthu awo. Mooreerela murima mwaaleeleke itthu muniphavela anyu ni muhiniphavela anyu.

• Moovarihana ni mukhalelo anyu, nwehe okathi muniphavela anyu okhala ni atthu akina aahiiso mekhinyu.

MALAKIHERYO: “Halali okhala atthu anli ovikana okhala mmosa pahi: . . . mmosá a yawo amorá, mukina onnimukhaliherya ovenya”.​—Musuweli 4:9, 10.

2: NVARERYE ITTHU MUNLYA ANYU NI MWIINEKE NIKURUTA

• Olya saana, onimookhaliheryani ovukula oriipiwa murima onikumiheriwa ni okhweliwa. Mweereryeke olya mihokorokho soovirikana, makukhu ni soolya sinikhaliherya erutthu.

• Nwuryeke maasi manceene ni asuumo anikhaliherya erutthu.

• Akhala wira khamuniphavela olya, mweererye olya vakhaani-vakhaani. Nave pooti onvekela meediku anyu enamuna ya soolya sinrowa wookhaliheryani.a

• Weetta vakhaani ni wiina nikuruta pooti ovukula oriipiwa murima. Nikuruta ninnikhaliherya wuupuwela etthu yookhumelenleni aahiiso ovukula wuupuwelexa.

MALAKIHERYO: “Khavo mutthu oniphweliwa n’erutthu awe: ohiya vo, khula mutthu onnilyiha erutthu awe, onniphwanyiha sorera”.​—aÉfeso 5:29.

3: MURUPEKE VANCEENE

• 

  Orupa etthu yootthuneya otepexa wene ale ariipiwe murima mwaha woowi oriipiwa murima onnikhulumula.

• Musyakeke owurya vanceene ekafe aahiiso eviinyu, maana itthu iyo pooti owiirihani ohirupa saana.

MALAKIHERYO: “Halali okhalana itthu vakhani mmatatani ni murettele, ovikana otepa ovara muteko mahala”.​—Musuweli 4:6.

4: MWIIXAKUVIHEKE

• 

  Musuweleke wira khula mutthu ookhalana enamuna awe ya oriipiwa murima. Nto, muhaana oweha enamuna enookhaliheryani.

• Atthu anceene onaakhaliherya waaleela atthu akina oriipiwa waya murima, masi akina nnaari. Asomi annihimya inamuna soovirikana sinaakhaliherya ale ariipiwe murima ovilela okhweliwa waya. Akhala wira munnoovelela omuleela mutthu mukina itthu sinooxankihani, muhaana opacerya omuleela mpatthani munimuroromela anyu.

• Atthu akina anoona wira wunla onnaakhaliherya ovukula oriipiwa murima, masi etthu enaakhaliherya atthu akina, wunla vakhaani.

MALAKIHERYO: “Murima onnisuwela sohawa saya”.​—Miruku 14:10.

5: MUSYAKEKE OLYA MIRETTE SOOHAPALA

• 

  Atthu akina akhweliwe, anoona wira owurya eviinyu aahiiso olya mirette soohapala onnaakhaliherya. Masi eyo pooti okumiherya “mixankiho”. Okhala wira nikhaliheryo nno ti na okathi vakhaani paahi ni ninnikumiherya maxakha. Nto mweereryeke inamuna sinrowa wookhaliheryani ovukula oxanka wanyu.

2MALAKIHERYO: “Nrapihe sonanara sothene s’erutthu ni s’eroho”.​—2 aKorinto 7:1.

6: MURUMEELEKE SAANA OKATHI ANYU

• Atthu anceene ahoona wira etthu enaakhaliherya ovukula oriipiwa murima (olavula itthu sinaaxankiha) ni okathi mukina (ovara miteko siniwiiriha ovukula oxanka waya).

• Nave nyuwo pooti ovukula oriipiwa wanyu murima, mulipihaka waataana wanyu ni atthu akina, wiixutta ovara miteko muhaasuwela anyu aahiiso otthekula.

• Vaavo okathi onivira aya, itthu pooti oturukeya. Nave pooti woonaka wira oriipiwa wanyu murima onniviriha okathi munceene, akhala wira ti siiso, muhixanke, onoovira.

MALAKIHERYO: “Itthu sothene molumwenkuni-mu sokhalana okathi aya: . . . wokhala okathi w’oripiwa murima, n’ukathi w’otteliwa murima, okathi wo wikhupanyerya n’ukathi wo wina”.​—Musuweli 3:1, 4.

7: NVIKANIHEKE OVARA MITEKO SANYU

• 

  Vaaweryaneyaka, mwaakuveleke otthikela ovara miteko sanyu.

• Akhala wira munootthikela orupa, ovara muteko anyu aahiiso itthu sikina, woonasa wene munootthikela okhala ntoko mwaari anyu khalai.

• Ovikaniha oluttuweliwa miteko sanyu sooloka, pooti wookhaliheryani ovukula oxanka wanyu.

MALAKIHERYO: “Siso mutthu khanvelavela vanjene mwaha w’okhala mahiku vakhani vathí-va, okhala wira Muluku onnimulawiha òtteliwa murima”.​—Musuweli 5:19.

8: MUSYAKEKE OPAKA SOOTHANLA SUULUPALE MOOWAAKUVEYA

• Atthu anceene anipaka soothanla suulupale moowaakuveya nuumala okhwa ole yamphenta aya annithanana muhoolo mwaya.

• Vaaweryaneyaka, mulipeleleke okathi wooreerela wira muthaame, oturuka muteko aahiiso ohonona mireerelo sawe.

MALAKIHERYO: “Ovara muteko n’utthokelela onnisarya nikuphi: ovara muteko vohiloka, ovelaveliha”.​—Miruku 21:5.

9: MMUUPUWELEKE OLE OKHWIIYE

• 

  Atthu anceene akhweliwe, ahoona wira ovara itthu sinaakhaliherya omuupuwela ole okhwiiye onnaakhaliherya vanceene.

• Nave pooti wookhaliheryani othukumanya ifootu aahiiso wuupuwela itthu mwaavara anyu vamosa wira sookhaliheryeni omuupuwela.

• Mpweheke itthu sinrowa wookhaliheryani omuupuwela, nto vaavo munikhala anyu saana nweheke itthu iyo.

MALAKIHERYO: “Mùpuweleke mahiku a khalai”.​—Otumererya 32:7.

10: MWEETTEKE MUKWAHA

• Nyuwo pooti okhuma ifeeriya omutekoni wanyu.

• Akhala wira okhuma ifeeriya mahiku manceene khonrowa wookhaliheryani, mweererye opaka etthu enoosivelani, ntoko okhuma ifeeriya mahiku manli, weetta vakhaani, oxukurya omuseu aahiiso opasiyari.

• Nave opaka itthu sikina muhaasuwela anyu pooti wookhaliheryani ovukula oriipiwa murima.

MALAKIHERYO: “Murwé wiphini, nipuro nihinviraviriwa: mwamumule vakhani”.​—Marko 6:31.

11: MWAAKHALIHERYEKE ATTHU AKINA

• 

  Musuweleke wira khula etthu munipaka anyu wira mwaakhaliherye atthu akina, pooti wookhaliheryani okhala saana.

• Nyuwo pooti waakhaliherya atthu yaawo akhweliwe mutthu yamphenta aya, ntoko apatthani aahiiso mmusi yoowo omphavela okhala ni mutthu okhweliwe.

• Waakhaliherya ni waamaaliha atthu akina onimoophwanyihani ohakalala ni nlipelelo.

MALAKIHERYO: “Mulipa òvaha onoreriwa onvikana mulipa-òvahiwa”.​—Miteko 20:35.

12: NVARERYEKE ITTHU MUNHELA ANYU OPURO WOOPACERYA

• Oriipiwa murima pooti wookhaliheryani osuwela itthu sootepa otthuneya.

• Murumeeleke saana okathi owo wira moone moota munirumeela anyu okumi anyu.

• Akhala wira vannireerela, muturukeke itthu munhela anyu nipuro noopacerya.

MALAKIHERYO: “Halali exekurya etthoko eripiwe murima ovikana orowa nipuro ninlyiwa efesta. Tthiri okhwa t’imalelo ya khula mutthu: vanarerela atthu otthokelela etthu ila mahiku othene”.​—Musuweli 7:2.

Ekeekhai wira, khiivo etthu enrowa omaliha moomalela owereya munoona anyu. Masi, atthu anceene akhweliwe ale yaaphenta aya, anniimananiha opaka itthu sooloka ntoko iye silavuliwe mwaha ola seiyo sinaakhaliherya ophwanya nimaaliho. Tthiri mwaha ola khonihimya itthu sotheene sinrowa okhaliherya ovukula oriipiwa murima. Masi akhala wira munimweererya malakiheryo ala, pooti wookhaliheryani ophwanya nimaaliho.

MAHIKU ALA, OWEREYA ONIKHUMELELA MWAHA WOOKHWELIWA ONNITOKOSIWA VANCEENE. Ntoko nonne ahu myaha sivinre, miruku suulupale sinniphwanyaneya eliivuru ya khalai, eyo piiyo, Biibiliya. Tthiri malakiheryo a mBiibiliyani annivareleya muteko okathi wotheene. Nave, khahiyo wira Biibiliya orina paahi miruku sinivareleya muteko. Maana Biibiliya ookhalana itthu sihiniphwanyaneya iliivuru sikina ni onnaavaha nimaaliho ale akhweliwe.

• Onninikupaliha wira atthu ale naaphenta ahu akhwiiye khanihaawa

  Musuweli 9:5, Biibiliya onihimya wira “alipa-òkhwa khansuwela-tho etthu”. Nave “sowupuwela saya sothene” soomala. (Esalimo 146:4) Nave-tho, Biibiliya onnilikanyiha okhwa ni orupa.​—Yohani 11:11.

• Omwaamini Muluku onniphwanyiha nimaaliho

  Esalimo 34:16, Biibiliya onihimya wira: “Apwiya [Yehovaa] annakhapelela anaxariya: annakhulela okhuwelela waya”. Ovekela nimuleelaka Muluku moonelo ahu, murette muulupale onnikhaliherya owanana oriipiwa murima. Eyo enamuna ennikhaliherya olipiha waataana wahu ni Mpattuxa, maana owo ookhalana owerya woonimaaliha.

• Nlipelelo nooloka na muhoolo

  Nkahaya muupuwele okathi ale ari mmahiye anrowa aya ohihimuxiwa wira akhaleke valaponi vaava! Biibiliya onnilavula ikwaha sinceene okathi owo. Nave onnihimya makhalelo anrowa okhala valaponi, vaavo onihimya awe wira Muluku “onopuputtha maithori [ahu] othene: khunrowa okhala-tho okhwa, nnákhala oripiwa murima, walá ikuttho nnákhala ohawa”.​—Wisupulula 21:3, 4.

Atthu anceene animukupali Yehova mwaneene Biibiliya, anniphwanya ikuru sinaakhaliherya ovilela oriipiwa waya murima, maana ahiixutta ekeekhai ni annisuwela wira ale yaaphenta aya akhwiiye anookhala-tho akumi. Mwa ntakiheryo, Ann, yoowo okhweliwe iyawe aarina iyaakha 65, onihimya wira: “Biibiliya ookikupaliha wira ale kaaphenta aka akhwiiye khanihaawa ni Muluku onrowa waahihimuxa atthu otheene ari mmuupuweloni mwawe. Muupuwelo owo, onimakela okirweela vaavo kiniwuupuwela aka ale kaaphenta aka akhwiiye, nto eyo, ennikikhaliherya ovilela etthu ele yootepa otakhala ekikhumelenle”.

Tiina yoowo nimulavunle ahu erevista ela, onihimya wira: “Okhuma nihiku Timo okhwiiye awe, kinnoona wira Muluku onnikikhaliherya. Kinnoona ntata na Yehova nikikhaliheryaka okathi kinriipiwa aka murima. Nave, Biibiliya ookooniherya wira ohihimuxiwa etthu yeekeekhai. Nto kinniphwanya ikuru wira kivileleke mpakha nihiku kinrowa aka otthikela onweha Timo”.

Moonelo owo onnaakhaliherya atthu imilyau sinceene yaawo anikupali ele Biibiliya onihimya awe. Hata muupuwelaka wira ele Biibiliya onihimya awe khahiyo ekeekhai aahiiso muupuwelo paahi, muhaana otokosa oratteene itthu sinooniherya wira miruku ni anatiri a mBiibiliyani anrowa wiiraneya. Nto munimoona wira Biibiliya nikhaliheryo nuulupale wa ale akhweliwe.

MWIIXUTTE ITTHU SIKINA VOOHIMYA SA NLIPELELO NA ALE AKHWIIYE

Nwehe iviidiyu sinilavula sa okhwa va websaite ahu, jw.org

EXEENI ENIMWIIRANEELA MUTTHU NUUMALA OKHWA?

Exeeni enniiraneela nakhwa vale? Waakhula wa Biibiliya ti woolipiha ni woomaaliha

Nwehe mpantta oni > ILIIVURU (Epantte ya iviidiyu eni: Biibiliya)

NYUWO MUNNIPHAVELA IHAPARI SOOREERA?

Okhala wira ihapari soonanara sihuulaana, munrowa ophwanya woowi ihapari sooreera? Eviidiyu ela, ennipaceriha ebroxura Ihapari Sooreera Sinikhuma wa Muluku!

Nwehe mpantta oni: ILIIVURU > IVIIDIYU (Epantte ya iviidiyu eni: Mithukumano ni Muteko Ahu)