Mihokorokho Soottokottha Wira Sihemphweke
1. Muteko xeeni wootthuneya nlelo onivariwa olelo-va?
1 Nuumala omulaleerya muthiyana muSamariya, Yesu aahaaleela awiixutti awe wira: “Mutthukule maitho, nwehé imatta: mihokorokho sottokottha, sihemphweke”. (Yoh. 4:35, 36) Okathi ole ohepha womunepani wira weettaka, nto Yesu aahoona vahinatthi wira muteko woolaleerya wamuulaana molumwenkuni. Hata ori wiirimu, nlelo Yesu onnikhaliherya muteko ola. (Math. 28:19, 20) Itthu xeeni sinooniherya wira vaavo wanikisa vanaattamela aya muteko ola onootepaka wuncerereya?
2. Itthu xeeni sinooniherya wira muteko wa ohepha onootepa orowa vahoolo?
2 Muteko wa Ohepha Molumwenkuni: Mwaakha wa muteko wa 2009, mwaattelo wa anamalaleerya molumwenkuni waahincerereya khuphiya 3.2 pursento. Nto, muteko ola waahincerereya 14 pursento ilapo seiye sinikhoottiheriwa ahu olaleya. Soosoma sa Biibiliya siirihiwe khula mweeri, saahivikana 7.619.000, nto nummuru nna ninnivikana mwaattelo wa anamalaleerya molumwenkuni. Soosoma iyo sa Biibiliya siirihiwe, sinnaattamela eriyari ya emilyau emosa ovirikana iyaakha soovira. Vaavo mowaakuveya muteko woolaleerya oniphiya aya mittetthe sinceene, vannitthuneya wiinihiwa nikuruta mamissionaario manceene exikola ya oGileadi. Nave-tho, atthu anilavula mattaava a okhopela anniiwa ihapari sooreera ilapo sinceene. Nto, vanooneya wira Yehova onnaakuviha muteko ola wa ohepha okathi wookiserya. (Yes. 60:22) Niireke wira munnisiveliwa olaleya mmuttettheni mwanyu?
3. Exeeni khino akina anuupuwela aya sa muteko wa ohepha mmuttettheni mwaya?
3 Ohepha Mmuttettheni Mwanyu: Akina pooti ohimya so: “Muttetthe ahu khonikhumela etthu”. Ekeekhai wira mittetthe sikina vanikhala ntoko wira muteko woolaleerya khonikumiherya mireerelo sinceene ntoko mittetthe sikina aahiiso ntoko khalai. Nto, Anamoona akina pooti woonaka wira muteko wa ohepha woomala mmuttettheni mwaya, vano ohanle waaphavelasa atthu vakhaani paahi. Niireke wira ti siiso toko?
4. Nooneleke sai muteko ahu woolaleerya, ni nthowa xeeni?
4 Okhala wene okathi wa ohepha, miteko sinnincerereya. Nwehe masu a Yesu anooniherya otthuneya waya okhalana nthiti: “Solya khirere mmatta: masi alipa-òhatta ari vakhani. Munvekeleke mwanene ematta, wira àrumihele anamuteko mmatta mwawe”. (Math. 9:37, 38) Yehova, Mwaneene ohepha tonisuwela nipuro ni okathi ene vanrowa aya okhumela mireerelo. (Yoh. 6:44; 1 aKor. 3:6-8) Nto, muritti ahu tuuvi? Biibiliya onaakhula so: “Tivó mwàleke vasisu, mwàle-tho makaripi”, ni muhimumulele. (Mus. 11:4-6) Tthiri, vaavo muteko wa ohepha oniphiya aya wanikisa, khahiyo okathi woomumulela!
5. Xeeni vanitthuneya ahu ovikaniha olaleya ni nthiti mmittetthe seiye sinikhala ntoko khasinikhumela etthu?
5 Nvikaniheke Ohepha: Hata muttetthe ahu ohireere olaleeriwa ni vakhalaka ntoko wira atthu khaniphavela, aakhala mathowa anniiriha olaleyaka mwa nthiti ni mowaakuveya. (2 Tim. 4:2) Itthu sootakhala siniiraneya molumwenkuni pooti owiiriha atthu orukunuxa muupuwelo aya ni khiyaphavela osuwela ele enrowa wiiraneya muhoolo. Vaavo amiravo vaninnuwa aya, awo annoona otthuneya waya okhala saana ni ohoova etthu. Ovikaniha wahu olaleya pooti owiiriha akina ophavela osuwela ekeekhai. Nto ale yahaaphavela khalai pooti ophavelaka vano. Hata atthu yaale moolakelela anikhootta wiiwa, ahaana olopoliwa.—Ezek. 2:4, 5; 3:19.
6. Akhala wira muttetthe ahu tooxankiha, exeeni enrowa onikhaliherya ovikaniha olaleya ni nthiti?
6 Akhala wira muttetthe ahu tooxankiha, exeeni enrowa onikhaliherya ovikaniha olaleya ni nthiti? Pooti omananiha orumeela inamuna sikina sa olaleya, eyo piiyo, olaleya mapuro a nakoso wala omurumeela telefoni. Aahiiso pooti orumeela inamuna sikina sa moota woopaceriha olavula. Nave-tho, pooti orowaka olaleerya makaaripi wala okathi mukina onoona ahu wira atthu ari mmawannyeya. Khino pooti wiixutta nttaava nikina wira naalaleerye atthu anceene ihapari sooreera. Hiyo pooti wuncererya orummwa ahu nikhalaka pioneero ookilaatheya. Wala pooti orowa muttetthe oniphaveleya anamalaleerya anceene. Nakhalana moonelo wooloka mmuteko wa ohepha, hiyo nnoomananiha ovara mooluttuweliwa muteko ola wootthuneya.
7. Nto, muteko ola onimala silini?
7 Okhala wira alimi anikhalana okathi vakhaani wa ohepha, awo anniluttuweliwa muteko aya mpakha omaliha. Moolikanasa, muteko wa ohepha womunepani onivekela oluttuweliwa. Nto, muteko ola onimala silini? Mpakha wanikisa wa ‘olumwenk’ula’. (Math. 24:14; 28:20) Nimutakihaka Yehova, Mwaneene ohepha, hiyo nimphavela omaliha muteko ola ororomeliwa ahu. (Yoh. 4:34; 17:4) Tivonto, nivikaniheke olaleya ni nthiti, moohakalala, ni okhalana moonelo wooloka mpakha wanikisa. (Math. 24:13) Tthiri muteko ola wa ohepha khomanle!
[Eponto yuulupale ya epaaxina 2]
Okhala wene okathi wa ohepha, miteko sinnincerereya