Murumeele eSaite Ahu Wira Muwiixuttihe Aniinyu
1. Yoolakela xeeni erina aya epantte ya eSaite ahu eni: “anamwane”?
1 Esaite ahu ya Internet jw.org, elokiheriwe wira yaasiveleke atthu a iyaakha sotheene. Epantte eni: “Crianças” (opuro oni: Ensinos Bíblicos > Crianças) ennaakhaliherya anamwane wataana saana ni anamuyari aya, vamosa ni Yehova. (Otum. 6:6, 7) Nirumeeleke sai epantte ela wira niwiixuttihe aniihu?
2. Munrowa othanla sai myaha sooreerela seiyo sinivarihana ni munnuwelo wa aniinyu?
2 Mukhaleke Oowiixaakuviha: Khula mwaana ookhalana mikhalelo sawe. (1 aKor. 13:11) Nto, munrowa othanla sai myaha sooreerela sinivarihana ni munnuwelo wa mwaninyu? Mwiikoheke so: ‘Exeeni ekhanle owaasivela anaaka? Mwaha ola, anoowerya wiiwexexa? Niireke aniwerya owiriyana mwa okathi munceene wala mwa okathi vakhaani?’ Wa anamwane arina iyaakha 3 wala ohiphiya, pooti orumeela epantte eni: “Minhas Primeiras Lições da Bíblia” (Soosoma Saka sa Biibiliya). Imusi sikina, sinnisiveliwa orumeela myaha sa Biibiliya sa epantte eni: “Ensine Seus Filhos” (Muwiixuttihe Aniinyu). Nkahaya muthokorerye ipantte sikina sinittharelana.
3. Anamuyari anirowa orumeela sai myaha siniphwanyaneya epantte eni: “Mareheryo a Omulompa Muluku Vatthokoni”?
3 Mareheryo a Omulompa Muluku Vatthokoni: Epantte eyo ennaakhaliherya ahooleli a itthoko owiixuttiha anaaya. Wira mphwanye myaha sooreerela osoma ni othokorerya, mukilikari ebotau eni: “baixar”, ni musome epantte eni: “Guia para os Pais” (Malakiheryo wa Anamuyari). Murumeele ilatarato siri vaavo wira muwiixuttihe aniinyu acikhaani. Nave-tho mwaakhaliherye aniinyu owunnuwela omaleliha olepa myaha soosoma wa epantte eni: “Atividade de Estudo”. Khula yoosoma ya epantte eyo enithokorerya mwaha mmosaru wala yowiixuttiha ya Biibiliya. Nto anamwane a iyaakha sotheene anoowerya wiirela mpantta mwaha mmosaru wa omulompa Muluku vatthokoni.
4. Exeeni eniphwanya ahu wa epantte eni: “Mukhale Mpatthani a Yehova”?
4 Mukhale Mpatthani a Yehova: Iviidiyu, masipo ni miteko siri epantte ela sinnaakhaliherya anamuyari owiixuttiha anaaya acikhaani Nuulumo na Muluku. (Otum. 31:12) Khula eviidiyu yaamukhaani yookhalana yowiixuttiha yootthuneya. Epantte eni “Atividades”, ennikhaliherya ottittimiherya efaita ya iviidiyu iyo. Okhala wira anamwane waasivela wiipa, nave isipo sinnaakhaliherya wuupuwelela ele yiixuttale aya, nto isipo sa Omwene ni masipo alepeliwe anamwane, anniheliwa munternetini.
5. Xeeni anamuyari anitthuneya aya onvekela Yehova wira aakhaliherye owiixuttiha anaaya?
5 Nyuwo anamuyari, Yehova oniphavela wira mukhale paapa, wala maama ooloka. Nto, munvekeleke Muluku wira ookhaliheryeni owiixuttiha aniinyu ekeekhai. (Makh. 13:8) Mukhaliheriwaka ni Yehova, munoowerya owiixuttiha aniinyu wira akhalane “ankhili, yawo amphwanyiha wòpowa mwaha w’omwamini Kristu Yesu”.—2 Tim. 3:15; Mir. 4:1-4.