Yoolya ya Ohiyu y’Apwiya, Yowuupuwelela Enimuttittimiha Muluku
MAKRISTAU annirummwa Wuupuwelela niira na okhwa wa Kristu. Niira nna nniihaniwa-tho “yolya y’Apwiya”. (1 aKorinto 11:20) Nthowa xeeni niira nna nry’aya nootthuneya vanceene? Nuupuweleliweke silini, ni moota xeeni?
Yesu Kristu aahipaceriha niira nna, ohiyu wa Paasikha aaYuda mwaakha a 33 E.C. Paasikha iiriwa ekwaha emosaa vamwaakhani, nihiku na 14 mweeri yoowo aYuda aniihana aya Nisani. Wira asuwele nihiku nno na wuupuwelela, owehasa wene aYuda yaalipelela eyiita. Ola okathi yoowo nihiku ninkhalana aya iwoora 12 sa othana ni iwoora 12 sa ohiyu. Vaavo vaapacerya aya wooneya mweeri musyaa wa Março ti vaapacerya aya mweeri wa Nisani. Paasikha iiriwa nuuvira mahiku 14, nuumala wooneya mweeri musyaa, nsuwa nikenle ene.
Yesu aahimwiira Paasikha ni arummwa awe, nuumala-vo aahimwiirela okhuma Yuda Isikaryoti, onapaceriha Yoolya ya Ohiyu y’Apwiya. Yoolya ela yaamuranttelinhe Paasikha aaYuda, ti mulattu aya vanitthuneya aya wuupuweleliwaka ekwaha emosaa paahi vamwaakhani.
Ehapari ya Matheyo enihimya wira: “Yesu ahikuxa ephau, ahimuxukhuru Muluku, ahikawanya ephau iyo, khwavaha awixutti awe, ìraka: Kuxakani, mukhureke: ela erutthu aka. Siso-tho, ahikuxa ekálisi y’evinyu, ahimuxukhuru Muluku, khwavaha awixutti awe ìraka: Nwuryeke othene anyu. Ela ephome aka: ephome yo watàna, emwarexeliwe atthu othene, wira sottheka sileveleliwe”.—Matheyo 26:26-28.
Atthu akina anikupali wira Yesu aatatunxe erutthu awe ekhala ephaawu nto ephomee awe ekhala eviinyu. Masi, vaavo Yesu aavanha awe ephaawu ela, erutthu awe nlelo yaari yoomalela. Niireke wira arummwa a Yesu yaakhunre tthiri erutthu awe ni owurya ephomee awe? Nnaari, mwaha woowi opaka eyo yaarowa okhala omukhuura mutthu ni otthekela nlamulo na Muluku. (Maphattuwelo 9:3, 4; Onamukuttho 17:10) Moovarihana ni Luka 22:20, Yesu aahimmye so: “Ekális’ila ti watàna wa nanano, opakiwe n’iphome aka, yela emwarexeliwe nyuwo”. Niireke wira yaari tthiri ekaalisi ene yeele yaapaken’ye “watàna wa nanano”? Nnaari, okhala wira wataana etthu enaamwaakhulelaniwa, ohiya etthu enooneya.
Tivonto, ephaawu ni eviinyu ithoonyeryo paahi. Ephaawu enithoonyerya erutthu yoohittheka ya Kristu. Yesu aavarihenle muteko ephaawu yaarumeeliwe mu yoolya ya Paasikha. Ephaawu eyo yaapakiwe voohiheliwa miropo. (Okhuma 12:8) Biibiliya onivarihela muteko miropo ntoko nthoonyeryo na ottheka aahiiso ohiloka. Ti mulattu aya ephaawu eyo enthoonyerya erutthu yoomalela ya Yesu evahiwe ntoko mukuttho. Erutthu ya Yesu khiyaatthenke.—Matheyo 16:11, 12; 1 aKorinto 5:6, 7; 1 Pedru 2:22; 1 Yohani 2:1, 2.
Eviinyu yooxeerya enithoonyerya ephomee ya Yesu. Ephomee eyo enniiriha wataana wa niinano ovara muteko. Yesu aahimmye wira ephomee awe yaahiyiihiwa wira ‘sileveleliwe itampi’. Apinaatamu pooti wooniwa okhala ooloka vameithoni va Muluku ni anoowerya okhalana wataana wa niinano ni Yehova. (aHéberi 9:14; 10:16, 17) Wataana nno, aahiiso ovarihana, onniiriha okhala vooweryaneya wira maKristau 144.000 oororomeleya arowee wirimu. Wirimu, awo anrowa okhala mamwene ni alipa-amukuttho wira yaareelihe apinaatamu otheene.—Maphattuwelo 22:18; Yeremiya 31:31-33; 1 Pedru 2:9; Wisupulula 5:9, 10; 14:1-3.
Okathi wa Wuupuwelela, tanii aniphwanelela okhuura ephaawu ni owurya eviinyu eyo? Moohaaniherya, atthu yaale paahi ari mu wataana wa niinano, eyo piiyo, ale arina nlipelelo na orowa wirimu. Yaawo taniphwanelela okhuura ephaawu ni eviinyu. Munepa wootteela wa Muluku onnaakupaliha atthu awo wira aathanliwa okhala ntoko mamwene wirimu. (aRoma 8:16) Atthu awo aakhalana-tho wataana wa Omwene ni Yesu.—Luka 22:29.
Vano, sai voohimya sa ale anlipelela okhalaka moohimala mParayiisu valaponi? Atthu awo anniiwelela yooruma ya Yesu ni annikhala va Yoolya ya Ohiyu y’Apwiya, masi anikhala ntoko alipa-ooweha a nttittimiho, ni khanlya ithoonyeryo iyo. Okela wa nsuwa wa khuta mwaakha nihiku na 14 na Nisani, Anamoona a Yehova annuupuwela Yoolya ya Ohiyu y’Apwiya. Nnaamwi elapo yotheene akhanle ene atthu ikonto vakhaani yaawo anlipelela orowa wirimu, wuupuwelela nno ti wootthuneya wa maKristau otheene. Ola okathi yoowo atthu otheene anitthuneya aya wuupuwelela ophenta wuulupale wa Yehova Muluku ni wa Yesu Kristu.—Yohani 3:16.