Mutteeliweke Murima Mwaha wa Mwaapwittipwitthi Onithela!
‘Nitteliweke murima ni otthapa wophiya okathi wa othela wa mwapwittipwitthi’.—WIS. 19:7.
IPONTO SUULUPALE SOREERELA WUUPUWELA
Mwa othela wa Mwaapwittipwitthi ti pani ori mulipa-ootheliwa, nto enamuna xeeni Kristu ailokihenrya awe wira othele?
Niira na othela wa mwaapwittipwitthi nilokiheriwe wira niireye silini?
Ninsuwela sai wira ‘ipwittipwitthi sikina’ sinrowa ohakalala-tho mwaha wa othela wa Mwaapwittipwitthi?
1, 2. (a) Ti pani othela wawe onrowa okumiherya ohakalala wiirimu? (b) Makoho xeeni anikhumelela?
ONNIVIRA okathi munceene wira nilokiheriwe niira na othela. Masi vano ninlavula sa othela wa vamekha aya, othela oniireya wa mwene. Nkahaya muupuwele! Soovira iyaakha 2.000 elokiheriwaka ekasamento eyo. Vano okathi aya onnaattamela mowaakuveya, vaavo mulipa-ootheliwa vanrowa awe okhalaka ni mulipa-oothela. Moohipisa, masipo ootthapa anrowa wiiweyaka opalasio wa Mwene, nto ihice sa wiirimu sinrowa wiipaka so: ‘Mmuttottopele Muluku, okhala wira Pwiya Muluku ahu òwerya sothene, òheliwa omwene! Nitteliweke murima n’utthapa, ninvuwihe Muluku, mana wophiya okathi wa nira n’othela wa mwapwittipwitthi; mulipa-òtheliwa ohìlokiherya’.—Wis. 19:6, 7.
2 Yesu Kristu tori ‘mwaapwittipwitthi’ owo onikumiherya ohakalala wiirimu mwaha wa othela wawe. (Yoh. 1:29) Nto owanre sai mulipa-oothela owo? Ti pani ori mulipa-ootheliwa? Waari sai wiilokiherya wawe wira otheliwe? Othela wene onrowa wiireya silini? Niira nlo noothela ninrowa okumiherya ohakalala wiirimu, nto niireke ale anilipelela okhala mahiku otheene valaponi onrowa-tho ohakalala? Ninnihakalala osuwela wira ninrowa othokorerya makoho awo okathi onivikaniha ahu ovarerya Esalimo 45.
SOOWARA SAWE TI SOWUNKHELA
3, 4. (a) Exeeni enihimmwa sa ikuwo sa Mulipa-oothela, nto exeeni enincererya ohakalala wawe? (b) Ti pani ari ‘ana a mamwene’ ni ‘pwiyamwene’ anihakalala ni Mulipa-oothela?
3 Musome Esalimo 45:9, 10. Mulipa-oothela, Yesu Kristu onniwara ikuwo sawe sa othela wa omwene. Tthiri ti vookhalela wira ikuwo sawe sikhaleke soowunkhela eperfume yoreerexa ya mirra ni kaasiya, seiyo siirela mpantta wa itthu saapakaniwa makhura owaarya yaattikittheliwa alipa-oothanliwa wIsarayeli.—Okhum. 30:23-25.
4 Isipo sa wiirimu siniiweya opalasio wa Mwene, sinnincererya ohakalala wa mulipa-oothela vaavo vanaattamela aya okathi woothela. Mukina onihakalala-tho ti Pwiyamwene, yoowo onithoonyerya mulokiheryo wa Muluku epantte ya wiirimu, owo onaahela mpuwa “ana a mamwene”, eyo piiyo, malaikha oowaarya. Tthiri vannihakalaliha wiiwa masu a wiirimu ariki: ‘Nitteliweke murima ni otthapa . . . mana wophiya okathi wa . . . othela wa mwapwittipwitthi’.
MULIPA-OOWAKAMELIWA OHIILOKIHERYA WIRA OTHELIWE
5. Ti pani ori mwaara awe “mwapwittipwitthi”?
5 Musome Esalimo 45:11, 12. Mpakha va hiyo noomusuwela ole okhanle mulipa-oowakamela, nto ti pani ori mulipa-oowakameliwa? Mulipa-oowakameliwa khahiyo mutthu mmosa, masi oniirela mpantta wa atthu a muloko anihooleliwa ni Yesu Kristu. (Mmusome aÉfeso 5:23, 24.) Awo anrowa wiirela mpantta Omwene wa Mesiya wa Kristu. (Luka 12:32) MaKristau oowoottihiwa ni munepa, oowiiraka 144.000, “annimutthara mwapwittipwitthi nipuro ti nipuro ninrowawe”. (Wis. 14:1-4) Awosa annikhala mwaara a ‘epwittipwitthi’ nto khiyakhala ni yena wiirimu onikhala awe.—Wis. 21:9; Yoh. 14:2, 3.
6. Xeeni maKristau oothanliwa ohimmwaka okhala aana a mwene, nto xeeni vanitumereriwa aya waaliyala atthu a nloko naya?
6 Ole onrowa otheliwa khoniitthaniwa okhala mwaana mwamuthiyana paahi, masi oniitthaniwa-tho okhala aana a mwene. (Esal. 45:14) Nto ‘mwene’ ola ti pani? Makristau oothanliwa annikhalihiwa aana a Yehova. (aRom. 8:15-17) Okhala wira awo anrowa okhala mulipa-ootheliwa wiirimu, makristau oothanliwa annitumereriwa waaliyala atthu a nloko naya ni enupa ya tiithi aya a weerutthuni. Awo ahaana ovikaniha wuupuwelelaka itthu sa wiirimu ohiya sa valaponi.—aKol. 3:1-4.
7. (a) Kristu omulokihenrye sai ole onrowaawe omuthela? (b) Mulipa-oowakameliwa onimoonela sai ole onrowa omuthela?
7 Mwa iseekulu sinceene, Kristu onnimulokiherya ole onrowa awe omuthela wiirimu. Murummwa Paulo otthokihenrye so: Kristu ‘ophenta muloko òvaha ekumi awe mwaha wa yowo, wira akhalihe owarya, arapihaka ni màsi òbatizo ni masu a ekekhai; Kristu òtthuna wira muloko okhumelele òvuwene oholo wawe, ohirina malepa ni ohirina mannyari, nnákhala itthu sikina sohittheka, nto okhale wowarya ni ohittheka’. (aÉf. 5:25-27) Khalai Paulo aahaaleela maKristau oowoottihiwa a oKorinto wira: ‘Kinniwunlelani ehaje nyuwo, ntoko siniwunlelaweni Muluku; tthiri nyuwo munlikana ni mwali, omwakamelihalyaka mulopwana mmosá, ori Kristu: vano kintthuna wovahereryani wa yowo ntoko mwali’ oohipaceriwa. (2 aKor. 11:2) Yesu Kristu yoowo ori Mwene Mulipa-oothela, onnisiveliwa ni ‘oreera’ womunepani wa ole omwaakamenle awe. Nto mulipa-ootheliwa onnisuwela wira Yesu ti ‘Pwiya’ ni ‘onnikhoroma’ oholo wawe omuttittimihaka ntoko mulopwana onrowa omuthela.
MULIPA-OOWAKAMELIWA ‘ONNIROIHIWA WA MWENE’
8. Xeeni oryaaya vooreerela mulipa-oowakameliwa ohimmwaka wira oophwaneliwa saana?
8 Musome Esalimo 45:14, 15a. Mulipa-oowakameliwa onnivahereriwa oryeene oophwaneliwa saana wira atheliwe wa mwene. Wisupulula 21:2, onnimulikanyiha mulipa-oowakameliwa ni muttetthe wa Yerusalemu Musya, yoowo ‘onwarenle iyawe’. Muttetthe ola wa wiirimu, ookhalana ‘ovuwa wa Muluku’ ni onnaarya ntoko maluku ootepexa waarya waya, maluku a jaspe waarya waya onlikana ni espelyo. (Wis. 21:10, 11) Ophwaneliwa wa Yerusalemu Musya onnitthokihiwa mwa enamuna yooratteleya ni eliivuru ya Wisupulula. (Wis. 21:18-21) Tivonto nasalimo vanilavula awe mwa nthoonyeryo, wira mulipa-ootheliwa ori oophwaneliwa saana! Eyo ennireerela maana niira na othela ninrowa wiiraneya wiirimu.
9. Ti pani ori ‘mwene’ onivahereriwa mulipa-ootheliwa, nto muthiyana owo owanre sai?
9 Mulipa-oowakameliwa onnivahereriwa wa ole onrowa omuthela, eyo piiyo, Mwene a Mesiya. Owo omphwaneliha saana ‘amurapihaka ni màsi ari masu a ekekhai’. Muthiyana owo, towaarya ni oohittheka. (aÉf. 5:26, 27) Ole onitheliwa ohaana-tho wiiwariha saana voophwanela otheliwa. Tthiri owo ohiiwariha saana! Aayo ikuwo sawe sooheliwa-vo ewero, nto onniroihiwa wa mwene awanre ene ikuwo soorika ni sooreera. Nto wira mwaapwittipwitthi othele, ole onrowa otheliwa ‘owara ekuwo yottèttheya ni yowarya’ ya eliinyu yoreerexa, yeeyo “enithonyerya miteko sorera s’atthu òwarya”.—Wis. 19:8.
WOOPHIYA OKATHI WOOTHELA
10. Niira na othela wa mwapwittipwitthi nilokiheriwe wira niireye silini?
10 Musome Wisupulula 19:7. Niira na othela wa mwapwittipwitthi nilokiheriwe wira niireye silini? Nnaamwi ‘mwaara awe ailokihenrye ene wira atheliwe’ etthu enihimmwa moottharelana, khenihimya etthu sa niira nlo na othela. Masi, enihimya itthu siniiraneya epantte yookiserya ya maxakha maalupale. (Wis. 19:11-21) Niireke eyo enooniherya wira niira na othela ninrowa wiireya okathi yoole Mwene, Mulipa-oothela onimaleliha awe oxintta wawe? Nnaari. Itthu sinoonihiwa mwa eliivuru ya Wisupulula, khasinihimmwa sittharaka okathi oniireya aya. Masu a Ekapitulu 45 ya Esalimo anooniherya wira, okathi wa othela wa mwene oniireya nuumala Mwene Yesu Kristu owara ekatana ni orowa waaxintta awanani awe.—Esal. 45:4, 5.
11. Okathi Kristu onimaleliha awe oxintta, etthu xeeni enrowa opacerya nuumala-vo yiireyeke exeeni?
11 Tivonto vanireerela aya hiyo ohimyaka wira wiiraneya wa itthu iyo onrowa okhala so: Wanipacerya: Ohaana ophukeliwa ‘muthiyana namararuwa’, Babilonia Muulupale, ole onilamulela olumwenku wotheene wa itiini soowoka. (Wis. 17:1, 5, 16, 17; 19:1, 2) Nuumala-vo, Kristu orummwaka ni Muluku onrowa ophukela ni opwetexa olumwenku wa Satana valaponi okathi wa Harmagedoni, ‘ekhotto ya nihiku nulupale na Muluku òwerya sothene’. (Wis. 16:14-16; 19:19-21) Wuukiseryani waya, Mwene nakhotto, onrowa omaliherya oxintta omurihelaka Satana ni minepa sawe mulittini moowiixa-mo, ohinrowa awe oweryaka opaka etthu.—Wis. 20:1-3.
12, 13. (a) Othela wa mwaapwittipwitthi oniireya silini? (b) Wiirimu ti pani onrowa ohakalala mwaha wa othela wa mwaapwittipwitthi?
12 Okathi maKristau oowoottihiwa animaleliha aya okumi aya valaponi, okathi wa okhala-vo wa Kristu, awo annihihimuxiwa khiyarowa wiirimu. Ohaavo okathi, nuumala opwetexiwa Babilonia Muulupale, vaavo Yesu onrowa awe okumana ni otheene yaale aniirela mpantta wa ekrupu ya mulipa-ootheliwa. (1 aTes. 4:16, 17) Ehinatthi okhumelela ekhotto ya Harmagedoni, nto otheene ari ekrupu ya ‘mulipa-ootheliwa’ anrowa wiiraka aryeene wiirimu. Nuumala ekhotto eyo, nto toniireya aya niira na othela wa mwaapwittipwitthi. Tthiri owo onrowa okhala okathi woohakalaliha! Wisupulula 19:9 onihimya so: ‘Òreriwa t’ale yitthaneliwe yolya ya nìra n’othela wa mwapwittipwitthi’. Tthiri ekrupu ya mulipa-ootheliwa oowiira 144.000 enrowa ohakalala. Nave Mulipa-oothela onrowa otepa ohakalala nuumala woona wira mwa nthoonyeryo, ootheene anrowa olamulelaka ni yena ‘annoolya ni owurya vamesa momweneni mwawe’. (Luka 22:18, 28-30) Masi ohakalala mwaha wa niira na othela wa mwaapwittipwitthi, khunrowa okhala ole onithela ni ole onitheliwa paahi.
13 Ntoko soonale ahu wanipacerya, ihice sa wiirimu moowiiraana sinihimya so: ‘Nitteliweke murima n’utthapa, ninvuwihe Muluku; wophiya okathi wa nìra n’othela wa mwapwittipwitthi, mulipa-òtheliwa ohìlokiherya’. (Wis. 19:6, 7) Nto sai voohimya sa arumeyi a Yehova ari valaponi? Niireke naawo-tho anrowa ohakalala?
ANROWA ORUUHIWA AHAKALALAKA
14. Ntoko sihimmwale aya va Esalimo 45, ti pani ari ntoko imwali soohipaceriwa?
14 Musome Esalimo 45:13, 15b, 16. Profeta Zakariya aahihimya vahinatthi wira okathi wookiserya atthu a maloko otheene yaarowa okhalaka vamosa ni oohalela a Isarayeli omunepani. Owo aalempe so: ‘Mahiku awo, wa khula mutthu òYuda, amalapo mulokó a maloko othene anonvara metto emuhimeryaka wira: ‘Nimphavela wottharani, mana nokupali wira Muluku ori ni nyuwo’’. (Zak. 8:23) Elavulaka mwa nthoonyeryo, Esalimo 45:13, ennaahimya atthu awo ‘mulokó’ okhala ‘amalapo’ wala aana axithiyana oTiro, vamosa ni ‘athajiri a mulaponi’. Awosa annaaruuhela soovaha oowoottihiwa nlelo ari valaponi, aphavelaka wira akhaliheriwe omunepani. Okhuma 1935, atthu imilyau sinceene anneemya okhaliheriwa ni oowoottihiwa nlelo ari valaponi wira ‘akhalihiwe a xariya’. (Dan. 12:3) Atthu awo oororomeleya yaawo ari apatthani a maKristau oothanliwa, anikhala ntoko imwali soohipaceriwa. Atthu ala ari ntoko ‘imwali soohipaceriwa’ wa mulipa-oothela, aavahererya ikumi saya wa Yehova ni ahooniherya okhala atthu oororomeleya wa mulipa-oothela yoowo-tho ori Mwene.
15. Ale anilikana ni imwali soohipaceriwa anivara sai muteko vamosa ni maKristau oothanliwa nlelo ari valaponi?
15 Ekrupu ya oowoottihiwa nlelo ari valaponi, ennaaxukhurela vanceene ale ari ntoko ‘imwali soohipaceriwa’ mwaha wa nthiti naya na olaleerya ‘ihapari sorera sa Omwene’ ilapo sotheene sinikhaliwa. (Math. 24:14) Tivonto vahikhanle awe ‘munepa ni mulipa-oothela’ paahi onihimya wira “murwé!” masi ale aniiwa annihimya-tho wira “murwé!”. (Wis. 22:17) Aayo ipwittipwitthi sikina nuumala owiiwa maKristau oothanliwa ariki “murwé!”, awo-tho annincererya masu a mulipa-oothela khuyahimya wira “murwé!” wa atthu anikhala valaponi.—Yoh. 10:16.
16. Eparakha xeeni Yehova elakenle awe waavaha ale ari a ipwittipwitthi sikina?
16 MaKristau oowoottihiwa nlelo ari valaponi, annaaphenta ale ahinrowa wiirimu ni annihakalala osuwela wira Yehova, Tiithi a Mulipa-oothela, onrowa waavaha ale ari a ipwittipwitthi sikina eparakha ya otthapa mwaha wa othela wa Mwaapwittipwitthi wiirimu. Vahihimmwa vahinatthi wira Imwali iya soohipaceriwa saarowa oruuhiwa sihakalalaka ni otthapa. Aayo, ipwittipwitthi sikina, siniwehererya okhalaka valaponi okathi wotheene, sinrowa wuraanyiha olumwenku wotheene moolumo aya ootthapela, vaavo vaniiraneya aya niira na othela wa Mwaapwittipwitthi wiirimu. Mwa enamuna yookhalela eliivuru ya Wisupulula ennihimya mwa nthoonyeryo wira ‘muttitthi muulupalexa’ wa atthu ‘wemenle oholo w’ehije’ ni wa Mwaapwittipwitthi. Awosa aninvarela muteko woowaarya Yehova nivate na vathi na etemplo awe yoomunepani.—Wis. 7:9, 15.
ANIINYU ANROWA OKUXA OPURO WA AMUHAVINRE ANYU
17, 18. Othela wa Mwaapwittipwitthi onrowa okumiherya exeeni, nto ti pani Kristu onrowa awe okhala tiithi Momweneni mwawe, Iyaakha ekonto emosa?
17 Musome Esalimo 45:17. Imwali soohipaceriwa seiyo siri apatthani a muthiyana onitheliwa ni Kristu, sinrowa ohakalala-tho okathi onrowa aya woona wira ekasamento ennikumiherya mihokorokho, elapo esya. Mulipa-oothela yoowo ori-tho Mwene, onrowa ovaha ephoole elapo ya vathi, nto onrowa waahihimuxa amuhavinre a valaponi wira akhale anaawe a valaponi. (Yoh. 5:25-29; aHéb. 11:35) Mwa atthu awo, owo onrowa waathanla akina wira akhale mapewe wala makhulupale elapo yotheene. Kristu onrowa-tho waathanla atthu akina mwa ale ari axitokweene olelo va, wira aweettiheke atthu a Muluku elapo esya.—Yes. 32:1.
18 Okathi wa olamulelo awe wa Iyaakha Ekonto Emosa, Kristu onrowa okhala Tiithi wa akina-tho. Tthiri atthu otheene anikhala valaponi, anrowa waakhela okumi woohimala mwaha wa okupaleela waya mukuttho onoopola wa Yesu Kristu. (Yoh. 3:16) Aayo owo onrowa okhala Tiithi wa Mahiku Otheene.—Yes. 9:5, 6.
ONNIPHAVELA OSUWELIHA NSINA NAWE
19, 20. Moota xeeni itthu soohakalaliha sinihimmwa ni Esalimo 45 sinaahela aya muhina maKristau otheene ekeekhai olelo va?
19 Musome Esalimo 45:2, 18. Tthiri, itthu silempwale va Esalimo 45 sinnaahela muhina maKristau otheene. MaKristau oowoottihiwa ahanle valaponi, ari oohakalala mwaha woosuwela wira moohipisa anrowa okumana wiirimu ni anna aya vamosa ni Mulipa-oothela. Ipwittipwitthi sikina sinniphavela ovikaniha omwiiwelela Mwene aya oovuwa ni sinnivaha efaita eparakha erina aya ya ovara muteko vamosa ni anna oowoottihiwa ahanle valaponi. Nuumala othela Kristu vamosa ni Mamwene makhwa awe onrowa waavaha mareeliho manceene atthu a valaponi.—Wis. 7:17; 21:1-4.
20 Niireke murima ahu khunnitumererya ‘osuweliha nsina nawe’ okathi onilipelela ahu wiiraneya wa ‘itthu sooreera’ voohimya sa Omwene wa Mesiya? Nto nrowe otheene ahu, nikhale mwa atthu anrowa ‘omutthapela Mwene wa mahiku otheene’.