Vanitthuneya Wiilokiherya Oratteene Wira Niixuttiheke Saana

Ikwaha sinceene Yesu aanikohiwa nikoho nimosaru voohimya sa ekumi yoohimala, masi khula okathi aakohiwa awe aaniimananiha waakhula moovarihana ni makhalelo a mutthu ole aamukoha. (Luka 10:25-28; 18:18-20) Tivonto, vanitthuneya ahu osuwela iliivuru sinirumeela ahu wira nimwiixuttihe Biibiliya, nto nihaana wiilokiherya vahinatthi nimuupuwelaka khula mutthu onirowa ahu omusomiha. Iponto xeeni sinrowa omuxankiha wiiwexexa wala weemererya? Yoolepa xeeni enireerela osoma hoothe? Ninrowa osoma ittima kavi? Vannitthuneya olokiherya nlikanyiho, enamuna yootthokiherya, wala makoho oreerela anrowa omukhaliherya ole onimusomiha ahu wiiwexexa ele eniixutta awe. Ohiya-vo, okhala wira Yehova toniiriha ekeekhai wunnuwa vamurimani va atthu, nihaana onvekela Yehova nikhaliheryo okathi oniilokiherya ahu wira namusomihe mutthu ni wiimananiha wahu wira owo innuwe omunepani.​—1 aKor. 3:6; Yak. 1:5.