Ireferensia sa Okumi ni Orummwa Ahu Ekaderno Enirumeeliwa Omuthukumanoni
2-8 YA SETEMBRO
MIHAKHU SINIKHUMA MBIIBILIYANI | AHÉBERI 7-8
“Namukuttho a Mahiku Othene, Enamuna Y’onamukuttho wa Melikhisedeki”
it-2 epax. 798 itti. 11, 12
Melikhisedeki
Mwene òSalemi wa khalai ni “namukuttho a Muluku Mulupalexa”, Yehova. (Map 14:18, 22) Owo namukuttho oopacerya oniromoliwa ni Soolempwa, yena aarina muritti owo ohinatthi ophiya mwaakha wa 1933 Ohinatthi Kristu Orwa. Okhala wira aari mwene òSalemi, nsina nenlo nintaphulela “Murettele”, Melikhisedeki onnihimmwa ni murummwa Paulo ntoko “Mwene a Murettele” nave-tho moovarihana ni nsina nawe, nenlo nintaphulela “Mwene a Exariya”. (aHé 7:1, 2) ÒSalemi wa khalai waanisuweliwa-tho okhala muttetthe wa oYerusalemu, nto nsina naya naahitakahiwa ni nsina na Yerusalemu, epooma yeeyo ikwaha sikina eniitthaniwa “òSalemi”.—Esa 76:3.
Nuumala Abramu (Abrahamu) omuxintta Kedori-Lawomeri ni mamwene makina aavaranne awe opatthani, aahirowa omuro Xave, opuro waitthaniwa “Ekhato ya Mwené”. Melikhisedeki aahiruuha “ephau n’ivinyu”, ni aahimureeliha Abrahamu, ohimyaka so: “Nyuwo Abramu, murerihiwe ni Muluku Mulupalexa opattunxe erimu n’ilapo ya vathí! Attottopeliwe Muluku Mulupalexa, yowo òvahaleni waxintta awanan’inyu”. Vano Abrahamu aahinvaha mwene ni namukuttho ‘epantte yanamuloko ya itthu sothene’, eyo piiyo, “itthu sothene” aawaakhale awe awanani awe okhottoni.—Map 14:17-20; aHé 7:4.
it-2 epax. 799 etti. 3
Melikhisedeki
Mwa enamuna xeeni Melikhisedeki aahaakhalanne awe nihiku aayariwe awe wala aakhwiiye awe?
Paulo aahittittimiherya etthu emosa yootthuneya omuhimya aka Melikhisedeki, vaavo aahimmye awe so: “Khasuweliwe tithi awe, hatá mai awe, nnákhala amuhatat’awe: khisuweliwe eyareliwo awe walá makhwelo awe. Vano, alikanyihiwaka ni Mwana a Muluku, onnikhala mulipa a mukuttho a mahiku othene”. (aHé 7:3) Moolikanasa ni apinaatamu akina, Melikhisedeki aahiyariwa ni aahookhwa. Hata vari siiso, khanihimmwa masina a papawe wala amamawe, nnakhala amuhavinre awe wala osuulu awe, nave Soolempwa khasinihimya nihiku aayariwe awe wala aakhwiiye awe. Ti maana aya Melikhisedeki oniphwanelela awe olikanyihiwa ni Kristu, yoowo ori namukuttho a mahiku otheene. Sintoko siisaale onamukuttho wa Melikhisedeki aahaahiyeriwe awe ni aaharantteliwe awe ni mutthu mukina, nave-tho Kristu khaaranttenle onamukuttho awe ni khuuvo omuranttenle awe, nave khuuvo namukuttho mukina onirowa omuranttela. Ohiya-vo, nnaamwi Yesu aayariwe nloko na Yuda ni emusi ya mamwene a osuulu wa Davidi, amuhavinre awe a werutthuni khayiirela mpantta onamukuttho awe, nave Yesu onamukuttho awe khaahiyeriwe ni pinaatamu mukina. Itthu iya sikhumelenle mwaha wa nivarihano Yehova opanke awe ni yena.
(aHé 7:17)
it-2 epax. 798 etti. 13
Melikhisedeki
Enamuna ya Onamukuttho wa Kristu. Muhina mwa eprofesia emosa ya oMesiya, Yehova aahimulaphela ‘Pwiya’ awe Davidi ohimyaka so: “Nyuwo mwá mulipa a mukuttho wa mahiku othene, enamuna y’onamukuttho wa Melikhisedeki”! (Esa 110:1, 4) Esalimo ela yowuupuxeriwa, yaanaavaha aHeeberi mathowa oomuthokorerya Mesiya aaleiheriwe sintoko ole aarowa okhalana muritti wa onamukuttho ni mwene. Murummwa Paulo, mpapheloni mwawe aalepenle awe aHeeberi, aahimalamaliha ohoverya wotheene voohimya sa Mesiya. Aahimuhimya Yesu okhala “namukuttho mulupale a mahiku othene, enamuna y’onamukuttho wa Melikhisedeki”.—aHé 6:20; 5:10; nwehe NIVARIHANO.
Otokosa Itthu sa Efaita Soomunepani
w00 15/8 epax. 14 etti. 11
Mikuttho Sinimusivela Muluku
11 Murummwa Paulo aahimmye wira “khula namukuttho mulupale onthanliwa wira avahe sovaha ni mukuttho”. (aHéberi 8:3) Niwehe wira murummwa Paulo onnikawanya mwa inamuna piili soovaha saavahiwa ni muulupale aanamukuttho a wIsarayeli wa khalai, eyo piiyo, “sovaha” ni “mikuttho”, wala “mikuttho wira ettipihiweke etampi”. (aHéberi 5:1) Okhala-wene atthu annivaha etthu wira yooniherye oreera waya murima wala oxukhurela ohela muhina opaka opatthani, oxonttela, wala wira yeemereriwe ni atthu akina. (Maphattuwelo 32:20; Miruku 18:16) Moolikanasa, soovaha sinceene saavekeliwa ni Nlamulo, saanooniwa okhala ntoko “sovaha” wira mutthu eemereriwe ni Muluku wala okhalane waataana wooloka ni Yena. Otthekela Nlamulo, yaari etampi yaaweryaneya oleveleliwa, nto nlamulo naahimya wira mutthu owo aahaana ovaha ‘mukuttho wira ettipihiweke etampi awe’. Iliivuru soopacerya sa Biibiliya, vanceenexa eliivuru ya Okhuma, Onamukuttho, ni Mothakoni, sinnooniherya myaha sinceene sinilavula sa inamuna soovirikana sa mikuttho ni soovaha. Nnaamwi vaxankihaka ohela mmuruni ni wuupuwelela itthu sotheene saahela muhina, vannireerela othokorerya iponto sikina sootthuneya sinilavula sa inamuna wala mithinto sa mikuttho.
it-3 epax. 156 etti. 5
Nivarihano
Moota xeeni ‘nuuluvalihiwe aya’ Nlamulo na wataana?
Hiyo pooti ohimya wira Nlamulo na wataana ‘nuuluvalihiwe’ wala naahiiwale orumeeliwa, okathi Yehova omurumeelaka profeta Yeremiya, ahimmye awe wira ampaka nivarihano na naanaano. (Yer 31:31-34; aHé 8:13) Eyaakha ya 33 Nuumala Kristu Orwa, okhwa wa Kristu vamwirini va nihaaxeryo, waahimaliha Nlamulo na wataana (aKol 2:14), ni waahirantteliha ni nivarihano na naanaano.—aHé 7:12; 9:15; Mit 2:1-4.
Omusoma Biibiliya
9-15 ya Setembro
MIHAKHU SINIKHUMA MBIIBILIYANI | AHÉBERI 9-10
“Eruku ya Itthu Sooreera Saarowa Okhumelela”
it-3 epax. 242 etti. 10
Olevelela
Moovarihana ni Nlamulo Muluku aavanhe awe aIsarayeli, akhala wira mutthu ammutthekela mukhwaawe, ni onaphavela oleveleliwa itampi sawe, mutthu owo wanipacerya aahaana olokiherya etampi awe sintoko Nlamulo naahimya aya, nto ikwaha sinceene mutthu owo aahaana onvaha Yehova mukuttho wa ephome. (Ona 5:5–6:7) Nuumala-vo, yaaniiraneya ele aalavunle awe murummwa Paulo yeeyo enihimya so: “Vekekhai, ninniwerya ohimya wira, sitthariheliwaka ikano, itthu sothene sinnirerihiwa n’iphome. Vano, itampi khasinleveleliwa, sahimwarexeliwe ephome”. (aHé 9:22) Moohaanyiherya, mikuttho sa ephome ya inama khisaawerya okumiha itampi ni omukhaliherya mutthu okhalana yowuupuxerya ya murima yooloka. (aHé 10:1-4; 9:9, 13, 14) Moovirikana ni vo, nivarihano na naanaano nihiiriha oweryaneya oleveleliwa itampi mwekeekhai, moovarihana ni mukuttho wowoopola wa Yesu Kristu. (Yer 31:33, 34; Mat 26:28; 1 aKor 11:25; aÉf 1:7) Yesu, hata okathi aari awe valaponi, vaavo ampenunxe awe mutthu oorakala, aahooniherya wira ookhalana okhulupale woolevelela itampi.—Mat 9:2-7.
“Nyuwo Mukitthareke”
4 Biibiliya khonitthokiherya etthu voohimya sa ophiya wa Yesu wiirimu, moota aakheliwe awe, ni okumana wawe wootteeliha murima ni Tiithi awe. Masi hata vari siiso, Biibiliya aahihimya vahinatthi ele yaarowa wiiraneya moohipisa nuumala Yesu otthikela wiirimu. Mwa iyaakha saavikana 1500, aYuda yaahikhalana yoolema ya opaka niira noottittimiheya. Nihiku nimosa khuta mwaakha, muulupale aanamukuttho aanikela Nipuro Nowaaryexa na empa ya Muluku, wira ayiiherye ohoolo wa ekaaxa ya nivarihano, ephome ya mwaamunama aavahiwa ntoko mukuttho Nihiku na Ottipiha Soottheka. Nihiku nlo, muulupale aanamukuttho aamuthoonyerya Mesiya. Nuumala otthikela wiirimu, Yesu ohaakhwaniherya yootaphulela ya eprofesia ya niira nna ekwaha emosa paahi. Yesu aahikela nipuro noovuwa na Yehova wiirimu, eyo piiyo, nipuro nowaaryexa na olumwenku wotheene, ni aahiroiha wa Tiithi awe esisapo ya mukuttho awe wowoopola. (aHéberi 9:11, 12, 24) Niireke wira Yehova aaheemererya?
it-3 epax. 245 etti. 7;-epax. 246 etti. 1
Omalela
Omalela wa Nlamulo na Moise. Nlamulo naavahiwe aya aIsarayeli orweela wa Moise, naahela muhina okumiheriwa onamukuttho ni soovaha sa mikuttho soovirikana sa inama. Nnaamwi naakhuma wa Muluku ni naari noomalela, onamukuttho aya ni mikuttho saavahiwa, khisaawerya owiiriha atthu yeettihiwa ni Nlamulo nlo okhala oomalela, sintoko oonihenrye awe murummwa Paulo. (aHé 7:11, 19; 10:1) Ohiya waataphula mwaha wa etampi ni okhwa, veekeekhai nlo naanaasuwanyeiha wira yaari anatampi. (aRo 3:20; 7:7-13) Soovaha iyo sotheene sa Muluku saanaakhwaniherya yoolukama Muluku aapakenle awe; Ikano saari ntoko ‘mulipa-òsuka’ wira saahoole atthu wa Kristu, “ntoko eruku pahi ya sorera sintthuna orwa”. (aGa 3:19-25; aHé 10:1) Nto vaavo Paulo aalavunle awe wira ikano sa Moise: “khasawerya onòpola, okhala wira makhalelo ahu òtakhala khiyèmiherya wira etthu” (aRo 8:3), vanikhala wira aaphavela ohimya wira namukuttho a nloko na aYuda (aathanliwe moovarihana ni nlamulo wira okhapeleleke mareheryo a mikuttho, ni aavolowa Nipuro Nowaaryexa Nihiku na Ottipiha Soottheka), khaawerya “owòpola wa mahiku othene” ale animwattamela Muluku, sintoko onitthokiherya awe aHéberi 7:11, 18-28. Nnaamwi mikuttho saavahiwa orumeeliwaka onamukuttho wa Aroni saakhaliherya atthu okhalana waataana wooloka ni Muluku, iyo khisaawerya owiiriha atthu okhalana yoowuupuxerya ya murima yoomalela oloka mwaha wa itampi. Murummwa Paulo onnitthokiherya eyo ohimyaka wira mikuttho saavahiwa khisaawerya “wareriha voomalela atthu animwattamela Muluku”, eyo piiyo, waavaha yowuupuxerya ya murima yoomalela. (aHé 10:1-4; mmulikanyiherye ni aHé 9:9.) Namukuttho khaawerya oliverya esisapo ya yowoopola yaatthuneya wira emalihiwe etampi. Paahi onamukuttho woohimala wa Kristu ni mukuttho woomalela ovanhe awe toniwerya oliverya esisapo ya etampi.—aHé 9:14; 10:12-22.
Otokosa Itthu sa Efaita Soomunepani
w92 1/3 epax. 31 itti. 4-6
Makoho Anikohiwa ni Ale Anisoma Irevista Sahu
Paulo onnitthokiherya wira aahaana okhwa mutthu wira nilipiheriwe nivarihano eriyari ya Muluku ni apinaatamu. Nlamulo na waataana naari ntakiheryo nimosa. Moise aari namitthaka, aapanke nivarihano eriyari ya Muluku ni nloko na aIsarayeli a werutthuni. Nto Moise aanithokoreriwa okhalana muteko wootepa otthuneya wa okhala namitthaka a nivarihano na Muluku nenlo naapakiwe eriyari ya aIsarayeli ni Muluku. Tivonto, Moise vanweryaneya ohimmwa okhala mulipa-oowaataaniha atthu mwaha wa Nlamulo na waataana nenlo naakumiheriwe ni Yehova. Masi niireke Moise ahaana omwarexa ephome awe wira Nlamulo na waataana nipacerye ovara muteko aya? Nnaari. Ohiya-vo, saavahiwa mikuttho sa inama seiyo ephome aya yaaranttela ephome ya Moise.—aHéberi 9:18-22.
Ankhi nivarihano na naanaano Yehova opanke awe ni aIsarayeli oomunepani? Yesu Kristu aahikhalana muritti muulupale wa okhala namitthaka eriyari ya Yehova ni aIsarayeli oomunepani. Nnaamwi nivarihano nle naakhuma wa Yehova, nlo naamuttittimiherya Yesu Kristu. Ohiya paahi okhala Namitthaka, Yesu aahikhala vamosa naale yaarowa opacerya weemereriwa ni nivarihano nlo. (Luka 22:20, 28, 29) Ohiya-vo, owo aahiphwanelela ovaha mukuttho waatthuneya wira olipiherye nivarihano. Mukuttho owo khahiyo waari wa inama pure, masi waari wa pinaatamu oomalela. Ti maana aya, Paulo aamuhimmye awe Kristu okhala namitthaka oopinaatamu a nivarihano na naanaano. ‘Yesu aahivolowa wiirimu weiwo ori awe olelo-va ohoolo wa Muluku mwaha wa hiyo’ nto nivarihano na naanaano noopacerya orumeeliwa.—aHéberi 9:12-14, 24.
Vaavo Paulo aamulavula awe Moise ni Yesu sintoko alipa-oowaataaniha atthu, khahiyo aaphavela oohimya wira oowanli aya ti yaakumihenrye nivarihano nlo, maana nivarihano nlo naapakiwe ni Muluku. Ohiya-vo, alopwana awo anli yaari ntoko anamitthaka a mavarihano awo oomanli. Wa khula mpantta, waatthuneya okhwa, eyo piiyo wa inama wira simuranttelihe Moise, ni okhwa wa Yesu yoowo oovanhe ephome ya ekumi awe ntoko yowoopola opuro wa ale yeemereriwe ni nivarihano na naanaano.
it-1 epax. 315 etti. 6
Opatiso
Luka ohimmye wira Yesu aanilompa okathi aapatisiwa awe. (Luk 3:21) Mulipa-olempe epaphelo ya aHeeberi, ohimmye wira okathi Yesu Kristu aaruuye awe “molumwenkuni” (eyo piiyo, ohiya okathi aayariwe awe ni ahaawerya awe osoma ni olavula masu ala, masi okathi aisoonihenrye awe wira opatisiwe ni aapacenrye ovara muteko awe), aalavunle moovarihana ni Esalimo 40:7-9, yeeyo enihimya so: “Nyuwo khamutthunne mukuttho walá sovaha: nto mokipakela erutthu. . . . Muluku aka, miyo kiri va. Kirwenle wira kìreke otthuna wanyu, sisale silempwaya sa miyo mulivuruni mwa ikano”. (aHé 10:5-9) Yesu aayariwe nloko na aYuda a werutthuni, nloko nenlo naarina nivarihano nuulupale ni Muluku eyo piiyo nlamulo na waataana. (Okh 19:5-8; aGa 4:4) Nto okathi ole Yesu aaronwe awe opatisiwa ni Yohani iira opanke ene nivarihano ni Yehova Muluku. Okathi ole, Yesu aapaka etthu yuulupale ohiya paahi ele Nlamulo naavekela aya. Masi aahiivahererya wa Tiithi awe Yehova wira opakeke ‘yotthuna’ awe ovahaka erutthu awe yeeyo ‘yaapakeliwe’ awe ‘wira omalihe mikuttho sa inama saavahiwa moovarihana ni Nlamulo. Murummwa Paulo aahimmye so: “okhala wira Kristu ohìra otthuna wa Muluku, hiyo nokhalihiwa òwarya mwaha wa mukuttho w’erutthu ya Yesu Kristu, oìvaherenrye omosá pahi wa mahiku othene”. (aHé 10:10) Mwa moonelo wa Yesu, opaka yootthuna ya Tiithi awe yaahela muhina ovara miteko saavarihana ni Omwene, nto Yesu aari oolikaneene wira opake eyo. (Luk 4:43; 17:20, 21) Yehova aaheemererya ni aahaakhulela yoovaha ya mwaanawe, omuthanlaka ni munepa wootteela ni ohimyaka so: “Nyuwo mwá Mwan’aka onimphentexaka: miyo kosiveliwa ni nyuwo”.—Mar 1:9-11; Luk 3:21-23; Mat 3:13-17.
Omusoma Biibiliya
16-22 ya Setembro
MIHAKHU SINIKHUMA MBIIBILIYANI | AHÉBERI 11
“Xeeni Waamini Ori Aya Wootthuneya?”
Nwaaminiki Anatiri a Yehova
6 Eliivuru ya aHéberi 11:1, ennitthokiherya ele waamini ontaphulela aya. (Mmusome.) (1) Waamini “t’inamuna y’okhalana itthu sinlipelelahu”. Itthu sinlipelela ahu, sinaahela muhina anatiri a Muluku voohimya sa muhoolo. Mwa ntakiheryo, hiyo ninnikupali wira otakhala onoomala ni enimoorwa elapo esya. (2) Waamini ti enamuna “y’okhalana” itthu sinnikupaliha “sihinònahu”. Nnaamwi nihimoonaka, hiyo ninnisuwela wira ookhala Yehova Muluku, Yesu Kristu, malaikha ni Omwene wa wiirimu. (aHéb. 11:3) Vano, ninrowa wooniherya sai wira ninniwaamini tthiri anatiri a Muluku ni itthu sihinoona ahu? Moota nneettiha ahu okumi ahu, moolumo ahu ni sowiira sahu, sinimooniherya wira ninniwaamini anatiri a Muluku.
Muluku “Onnatthuvela Ale Animphavela”
Nipakeke exeeni wira nimuhakalalihe Yehova? Paulo olempe so: “Khavo mutthu onwerya omusiveliha Muluku, ahaminiki”. Moone wira Paulo khohimmye wira ti voovila omuhakalaliha Muluku moohaamini. Masi ohimmye wira mutthu khonwerya omuhakalaliha Muluku ohaaminiki. Tivonto, waamini ti etthu yootthuneya wira mutthu amuhakalalihe Muluku.
Waamini xeeni onimuhakalaliha Yehova? Omwaamini wahu Muluku ohaana ohela muhina itthu piili: Yoopacerya, hiyo ‘nihana wamini wira Muluku okhala’. Moolumo ala, aBiibiliya akina anitaphulela so: “Okupali wira Muluku teekeekhai” ni “okupali wira owo ohaavo”. Vaniweryaneya sai omuhakalaliha Muluku nihoveryaka wira owo ookhala? Tthiri, waamini wekeekhai onihela muhina itthu sinceene, maana hata axetwani annikupali wira Yehova ookhala. (Yakobo 2:19) Waamini wahu wira Muluku ohaavo onniniiriha opaka etthu, eyo piiyo, wooniherya waamini wahu nikhalaka mwa enamuna enimuhakalaliha.—Yakobo 2:20, 26.
Ya nenli: ‘Nihana wamini wira Muluku onnitthuvela’. Mutthu orina waamini wekeekhai, onnikupali wira wiimananiha wawe okhala mwa enamuna enimuhakalaliha Muluku khahiyo wa mahala. (1 aKorinto 15:58) Vaniweryaneya sai omuhakalaliha Yehova nihoveryaka owerya wawe wala ophavela wawe onitthuvela? (Yakobo 1:17; 1 Pedru 5:7) Tthiri, ole onuupuwela wira Muluku khorina othunku, khonixukhuru, khonivaha, ni khonimusuwela Muluku ori mwaneene Biibiliya.
Yehova onaatthuvela atthu xeeni? Paulo onihimya so: Muluku “onnatthuvela ale animphavela”. Eliivuru ekina ya anamataphulela a Biibiliya, enihimya wira nuulumo na eGriki noowi ‘omphavela’, khanintaphulela “weererya omphwanya Muluku”, masi, nintaphulela wiimananiha wira “nimukokhorele Muluku”. Eliivuru ekina enitthokiherya wira nuulumo nna na eGriki nintaphulela wiimananiha ni oluttuweliwa. Tthiri, Yehova onnaatthuvela yaale waamini waya oniwiiriha omukokhorela mooluttuweliwa ni murima wotheene.—Matheyo 22:37.
w16.10 ipax. 17-18 itti. 10-11
Mulipihe Waamini Wanyu ni Itthu Sinlipelela Anyu
10 AHéberi ekapitulu 11, murummwa Paulo ohimmye so: “Athiyana akina yahiwakhela-tho òhihimuwene atthu aya yakhwiye. Atthu akina yahanyuliwa erutthu, ekhonttene wopoliwa vathí-va, wira ephwanye ohihimuwa wotepa orera”. (aHéb. 11:35) Arumeyi anceene yaahivilela mixankiho ni yaahivikaniha ororomeleya wa Muluku, okhala wira yaanimwaamini vanceene natiri a Muluku a waahihimuxa atthu. Awo yaanisuwela wira muhoolo, Yehova aarowa waattikiherya okumi wira akhaleke valaponi mahiku otheene. Nkahaya mmuupuwele Nabothi ni Zekariya. Otheene aya yaahivonyiwa maluku mpakha okhwa mwaha womwiiwelela Muluku. (1 Mam. 21:3, 15; 2 Wah. 24:20, 21) Daniyeli aahiriheliwa munlittini mwa akharamu, nave apatthani awe yaahiriheliwa nlitti na mooro. Awo yaahithanla okhwa ohiya ohimwiiwelela Yehova. Alopwana ala yaanaamini vanceene wira Yehova aarowa waavaha munepa awe wootteela ni waakhaliherya ovilela mixankiho iye.—aHé. 11:1, 36-38; 1 Mam. 18:13; 22:24-27; Yer. 20:1, 2; 28:10, 11; 32:2.
11 Maprofeta manceene, ntoko Mikeya ni Yeremiya, yaahiveehiwa ni oriheliwa mukhatteya. Akina, ntoko Eliya, “yanivira mutakhwani ni mmiyakoni, ekhalaka mukhukuni ni mmittuphani. Atthu a vathí-va khiyàphwanela yawo”. Otheene aya yaahivilela mixankiho ni yaahivikaniha ororomeleya wa Muluku okhala wira awo ‘yahikhalana itthu salipelelaya’.—aHéb. 11:1, 36-38; 1 Mam. 18:13; 22:24-27; Yer. 20:1, 2; 28:10, 11; 32:2.
Otokosa Itthu sa Efaita Soomunepani
it-2 109 etti. 3
Waamini
Matakiheryo a Khalai a Waamini. Khula mmosa “anamona owatta ntoko meku” anihimmwa ni Paulo (aHé 12:1), yaahikhalana mathowa oolipa wira yaamini. Mwa ntakiheryo, Abeli aanisuwela yooleiherya ya Muluku voohimya sa: “osùlu” yoowo aarowa onyakela muru wa “enowa”. Nave owo aaniweha wiiraneya wa moolumo ophukela anamuyari awe yaaleeliwe aya ni Yehova wEedeni. Nuumala okhuma wEedeni, Adamu ni emusi aya yaaniphwanya eyoolya nuuwaaha vanceene wala orettheela mwaha woowi etthaya yaahitakhalihiwa, ni yaanimela miiwa ni ikhukwa. Woonasa wene Abeli aaninweha maama awe, Eva omunlelaka Adamu, nave Adamu oomurumaka vanceene. Nave amamawe Abeli yaanilavula voohimya sa owereya yoona aya okathi yaarupala aya. Nave-tho vamukhora va eJardim ya wEedeni yaahikhala malaikha manli maKerubi yaawo yaalipelela ejardim eyo, ni yaahikhala ekatana ya mooro. (Map 3:14-19, 24) Itthu sotheene iya saahimukhaliherya Abeli okupali, wira woopoliwa waarowa oweryaneya orweela wa osuulu aaleiheriwe. Tivo, mwaha wa waamini ‘Abeli aahimuhelela Muluku mukuttho’, wooreera ovikana wa Kayini.—aHé 11:1, 4.
‘Owo Ahimusiveliha Muluku’
Mwa enamuna xeeni Enookhi ‘akuxiwe’ awe wira ‘ohiiviwe’? Moohanyiherya, Yehova mooreerela murima, aahithamiherya mookhwaani okumi wa Enokhi, wira ohiiviwe mootakhala. Masi ohinatthi okhwa, Enookhi ahaakhela “onamona wira ahimusiveliha Muluku”. Moota xeeni? Woonasa wene oonihiwaka itthu. Moohaanyiherya Yehova aahimooniherya elapo eri ene eparayiisu. Orweela mwa yowooniherya eyo, Enookhi aahikupali wira Yehova aanisiveliwa ni yena, nuumala-vo aahikhwa. Paulo olavulaka sa Enookhi ni alopwana ni athiyana akina oowaamini aahimmye so: “Atthu ala othene akhwiye esareiyene wamini”. (aHéberi 11:13) Awanani a Enookhi woonasa wene yaahiphavelasa murutthu awe, masi ‘khuhiphwanya’. Moohanyiherya, Yehova aarottukuttherya, murutthu wa Enookhi wira ohiramusiwe aahiiso oohipakeliwe mukuttho wa etiini ya ethiru.
Omusoma Biibiliya
23-29 ya Setembro
MIHAKHU SINIKHUMA MBIIBILIYANI | AHÉBERI 12-13
“Ottaruxiwa—Onooniherya Ophenta wa Yehova”
(Ahéberi 12:5)
w12 15/3 epax. 29 etti. 18
Muhiweheke ‘Itthu sa Ottuli’
18 Miruku soowereya. Ankhi vakhala wira ninneehereriwa wuupuwela wunla ikuhu mwaha wa miruku nivahiwe ahu? Eyo pooti okhalaka etthu yoowereya ni yooriipiha murima ni ekhanle ooniiriha ‘okhulumuwa’. (aHé. 12:5) Akhala wira nnooramusa miruku ninvahiwa ahu aahiiso nnookhulumuwa mwaha woowi wanipacerya naaheemererya masi nihinaphavela weettela, yookhumelela aya enrowa okhala emosaru, nihimye so: khaninrowa weemya wira miruku iye siniphwanyihe mureerelo ni sinilokiherye. Tthiri ti vooloka otthara moolumo a Salomoni ani: “Muhihiyé mukhalelo worera walakiwanyu [mwaattaruxiwe anyu]: mwilipiherye wettela, okhala wira t’ikumi anyu”. (Mir. 4:13) Moolikanasa ni mulipa-oneettiha ekaaro yoowo oniiwelela ikanyeryo sa mustaraatani, nihaana weemererya miruku, weettela ni orowa vahoolo.—Mir. 4:26, 27; Mmusome aHéberi 12:12, 13.
w12 1/7 epax. 21 etti. 3
“Mwalompa Aka, Muhimyeke Wira: ‘Tithi’”
Tiithi oophenta onnaattaruxa ni owiixuttiha anaawe okhala wira oniphavela wira muhoolo ekhale atthu ooreera murima. (aÉfeso 6:4) Waanyiheryasa ikwaha sikina pooti otthuneyaka olipa murima wira omuttaruxe mwanawe, owo khonipaka eyo mootakhala. Moolikanasa, ikwaha sikina Tiithi ahu a wiirimu pooti woonaka oreerela onittaruxa. Ottaruxa wa Yehova okhala-wene onipakiwa moophenta ohiya mootakhala. Moolikanasa ni Tiithi awe, Yesu khahiyo aari mutthu oohilimaleleya, hata okathi awiixutti awe yaapisa aya wiiwa vaavo aattaruxa awe.—Matheyo 20:20-28; Luka 22:24-30.
“Nwiriyaneke [Miruku] Wira Mwaphwanye Ankhili”
18 Tthiri ottaruxiwa pooti okhala voowereya, masi eyo eniiraneya mwaha woohiiwelela malakiheryo a Muluku. (aHéb. 12:11) Hiyo pooti wiixutta ni matakiheryo oohiloka a Kayini ni Mwene Zedekiya. Okathi Muluku aawenhe awe wira Kayini aanimunyokha muhima awe ni aaphavela omwiiva, Muluku aahimulopola Kayini ohimyaka so: “Exeni enanareliwanyu? Owitho wanyu orwelenle-ni mannyari? Mwiraru sorera, ekhove anyu enimokokolani. Mwahiré sorera, etampi enowipithelani, ephavelaka wovarani. Nto nyuwo munniwerya oxintta?” (Maph. 4:6, 7) Kayini aahikhootta ottaruxiwa ni Yehova, aahimwiiva munnawe, ni aahiphwanya maxakha okumi awe wotheene. (Maph. 4:11, 12) Vaakhanle wira Kayini aahimwiiwelela Muluku, khaarowa ophwanya maxakha.
Otokosa Itthu sa Efaita Soomunepani
w11 15/9 ipax. 17-18 etti. 11
Nitthimakeke Nivilelaka
11 “Anamona owatta ntoko meku” khahiyo yaari atthu pure wala alipa-ooweha paahi, eyo piiyo, yaarowela onweha mutthu yaamukhaliherya aya oxinttaka wala ekiipa aya exinttaka. Ohiya-vo, awo yaaniirela mpantta ntoko alipa-ootthimaka. Awo yaahimaliherya otthimaka waya moomalela. Nnaamwi ekhwiiye ene, awo pooti wuupuweliwaka ntoko atthu avanhe ntakiheryo nnaalipiha anamatthimaka a niinaano. Nkahaya muupuwele moota mulipa-ootthimaka a niinaano aarowa awe ohakalala nuumala osuwela wira okathi wootthimaka onirowa owehiwaka ni atthu yaatthimaka khalayi! Niireke khaarowa wiimananiha vanceene wira okhumele saana? Anamoona a khalai aanivaha ntakiheryo na otthimaka wa nthoonyeryo, wira hata vaxankihaka, vaweryaneyeke oxintta. Eseekulu yoopacerya vaavo maKristau aHeeberi yuupuwelela aya ntakiheryo na “Anamona owatta ntoko meku”, yaniwerya olipa murima ni ‘otthimaka’ moovilela, nave hiyo olelo-va nnoowerya.
w89 15/12 epax. 22 etti. 10
Nvaheke Mikuttho Sinimusivela Muluku
10 AHeeberi yaahaana wiikasoopa wira ekhootte “ohapuxiwa ni mwixuttiho sovirikana sa khula enamuna” sa atthu yaakiherya ni olaleya etiini ya eYuda. (aGalasia 5:1-6) Wira mutthu okhale oolipa mwekeekhayini, onlipihiwa n’eparakha ya Muluku’ yeeyo ennivaha olipa murima ohiya ni sowiixuttiha iyo. Vanikhala wira atthu akina yaaninyakulihana mwaha wa eyoolya ni mikuttho, masi Paulo aahimmye wira murima khonlipa mwaha wa ‘ikano sa yolya seiyo sahaphwanyiha etthu’. Mareeliho a omunepani anikhumelela mwaha wa omphenta Muluku ni oxukhurela yowoopola ohiya mwaha wa eyoolya aahiiso ottittimiha mahiku makina. (aRoma 14:5-9) Ohiya-vo, mukuttho wa Kristu woomala-maliha mikuttho sa aLevi.—aHéberi 9:9-14; 10:5-10.
Omusoma Biibiliya
30 a Setembro–6 a Outubro
MIHAKHU SINIKHUMA MBIIBILIYANI | YAKOBO 1-2
“Itthu Siniphwanyiha Etampi ni Okhwa”
g17.4 14
Weehereriwa
Weehereriwa onitaphulela okhummwa murima aahiiso osiveliwa ni etthu, vanceenexa yoohiloka. Nilikanyiherye wira muri mulooxa, munniweha etthu muniphavela anyu vanceene. Nto, onnoorwelani muupuwelo woowi munoowerya wiiya etthu iyo moohisuweliwa. Masi yowuupuxerya ya murima anyu ennoolelani so: “nnaari”. Nto okathi ene yoowo munnihiya wuupuwelela etthu eyo ni munnitthikela weetta murowaka opuro mukina. Okathi owo, yooweeha eyo ennimala ni munniwerya oxintta.
ELE BIIBILIYA ENIHIMYA AWE
Akhala wira murima anyu onnoorumani opaka etthu yoohiloka, eyo khenitaphulela wira nyuwo mwa mutthu ootakhala vanceene. Biibiliya onnooniherya wira ikwaha sikina otheene ahu ninneehereriwa. (1 aKorinto 10:13) Etthu yootepa otthuneya tiile enipaka anyu vaavo muneehereriwa anyu. Atthu akina annuupuwelela itthu soohiloka ni wanikisa waya annipaka itthu iyo. Akina annimalamaliha moohipisa miyuupuwelo soohiloka.
“Khula mutthu onnehereriwa ni wunlela wawe sotakhala, weiwo onimototha, onamukuxa”.—Yakobo 1:14.
g17.4 14
Weehereriwa
Biibiliya onnooniherya mavalo mutthu onitthara awe mpakha opaka etthu yoohiloka. Yakobo 1:15 onihimya so: “Vano, wunlela iwo sotakhala wavahiwa ikuru, onnikumiherya etampi: etampi yeyo, yinnuwaka vomalela, enniphwanyiha okhwa”. Okathi muthiyana onirupala awe, onoomuyara mwanawe. Moolikanasa, vaavo ninvikaniha ahu wuupuwelela etthu yoohiloka, muhoolo nnoopaka etthu eyo hata vapisaka wala nnaari. Masi niheemererye opakeya epottha ya miyuupuwelo soohiloka. Hiyo nnoowerya oxintta.
Otokosa Itthu sa Efaita Soomunepani
it-2 epax. 726 etti. 5
Waarya
Yehova ‘Tithi, a mithuko’ sa musulu. (Yak 1:17) Owo khahiyo paahi Mpattuxa a ‘nsuwa wira nimwaleleke othana, ni mpattuxa a mweri n’itheneri wira simwaleleke ohiyu’ (Yer 31:35), masi-tho, Owo mathipelo a waarya wotheene wa omunepani. (2 aKor 4:6) Malamulo awe, ikano sawe sa xariya ni nuulumo nawe, sinlikana ni muthuko onaamwaleela ale aniphavela weettihiwa nuuwo. (Esa 43:3; 119:105; Mir 6:23; Yes 51:4) Nasalimo aahimmye so: “nimwaleliwaka ni nyuwo ninnona oreriwa”. (Esa 36:10; munwehe-tho Esa 27:1; 43:3.) Sintoko nsuwa nnincererya aya waarya waya okhuma okathi ninkhuma aya “mpakha othana eriyari”, ephiro ya anaxariya, ennimwaleliwa ni ankhili a Muluku, khula okathi ennivikaniha waarya. (Mir 4:18) Otthara iphiro sa Yehova ontaphulela weetta moowaaryani mwawe. (Yes 2:3-5) Mwa enamuna ekina, okathi mutthu onipaka awe itthu soohiloka wala onuupuwela awe itthu soohiloka, owo onnikhala mweepiphini. Sintoko Yesu aahimmye awe: “maitho anyu yakhalá ònanará, erutthu anyu yothene ennetta mwepiphini. Vano, muthuko anyu wakhalá ephini, epiph’iyo enotepa oripa!”—Mat 6:23; munwehe-tho Otu 15:9; 28:54-57; Mir 28:22; 2 Ped 2:14.
it-2 epax. 685 etti. 3
Nlamulo
Nlamulo na “òmwene”. Eriyari ya malamulo otheene aneetteliwa ni apinaatamu, malamulo oomwene tari a vasuluxa ni tootepexa otthuneya ni arina nttittimiho nimosaru mwene aakhanle awe ovahiwa ni apinaatamu. (Yak 2:8) Etthu yuulupale yaattittimiheriwa ni Nlamulo na wataana, naari niphento: nave moolumo owi: “mwaphenteke akhw’inyu ntoko sinì’phentanyu” (malamulo a omwene) yaari yooruma yanenli yeeyo yeetteliwa ni Nlamulo notheene ni maprofeta. (Mat 22:37-40) MaKristau, nnaamwi eheettelaka Nlamulo na wataana, anniiwelela Malamulo a Mwene Yehova ni Mwanawe, Mwene Yesu Kristu, mwaha wa nivarihano na niinaano.
Omusoma Biibiliya