Ireferensia sa Okumi ni Orummwa Ahu Ekaderno Enirumeeliwa Omuthukumanoni
1-7 ya Março
MIHAKHU SINIKHUMA MBIIBILIYANI | MOTHAKONI 7-8
“Exeeni Nniixutta Ahu ni Maxaxa a AIsarayeli?”
it-1 epaax. 540 etti. 7
Muloko
Okathi aIsarayeli yaari aya moothakoni, yaahikhala “makhulupale a maloko, atthu òkupaleliwa n’atthu akina òttittimiheya”, waahela muhina alopwana 250 yaataanale ni Kore, Datani, Abirami ni Oni wira amurukunuwele Moise ni Aroni. (Mot 16:1-3) Orummwaka ni Muluku, Moise aahaathanla mahumu 70 a nloko na aIsarayeli, wira amukhaliheryeke “muritti wolemela w’owettiherya atthu”, yoowo ahaarowa awe owerya ovara mekhawe. (Mot 11:16, 17, 24, 25) Nave eliivuru ya Mothakoni 4:15 ennaahimya “mahumu a maloko”, ni vanikhala wira ahooleli a nloko na aIsarayeli yaahela muhina makhulupale, mahumu, aphuki ni aalupale a nloko na wIsarayeli.—Mot 1:4, 16; Yox 23:2; 24:1.
it-3 epaax. 467 etti. 4
Rubeni
Omaxaxani wa wIsarayeli, nloko na Rubeni, nenlo naarukureriwe ni osuulu wa Simeyoni ni Gadi, naakhala mpantta S wa etabernaakulu. Okathi yaakhuma aya maloko ale mararu yaakawanyiwe yaahooleliwa ni Rubeni, yaahitthara maloko makina mararu yaawo yaahela muhina Yuda, Isakari ni Zebuloni. (Mot 2:10-16; 10:14-20) Ela ti enamuna yaatthokihiwe aya maloko yaaroihale soovaha saya nihiku yaatthukuliwa aya etabernaakulu ya Apwiya.—Mot 7:1, 2, 10-47.
w04 1/8 epaax. 25 etti. 1
Iponto Suulupale sa Eliivuru ya Mothakoni
8:25, 26. Wira miteko sa aLevi seette saana, yaahipakiwa mareheryo wira alopwana oowunnuwela yaahaana ohiya muteko owo. Masi awo yanwerya wiivahererya wira yaakhaliheryeke aLevi akina. Nave olelo-va, nnaamwi anamalaleerya a Omwene ahireformariki muteko aninvarela aya Muluku, malakiheryo awo anniniixuttiha etthu ya faita. Okathi muKristau ohinweryawe-tho ovara miteko sa mmulokoni mwaha wa wuuluvala, owo pooti ovara miteko sikina sinwerya awe.
Itthu sa Efaita sa Mbiibiliyani
it-3 epaax. 328 etti. 1
Mwaana Oopacerya Oyariwa
Yehova aahihimya nloko notheene na wIsarayeli okhala ‘mwan’awe òmwixutta’, mwaha wa nivarihano aapanke awe ni Abrahamu. (Okh 4:22) Mwaha wowoopola okumi aya, Yehova aahihimya wira: ‘àna othene òpajerya oyariwa. Mwana mwamulopwana àtthu a Israyeli opajenrye oyariwa; enama yolopwana epajenrye ototholiwa’ saahaana ovahiwa Yena. (Okh 13:2) Nto, anamwane axilopwana yaapacerya oyariwa wIsarayeli yaanivahereriwa Yehova.
8-14 ya Março
MIHAKHU SINIKHUMA MBIIBILIYANI | MOTHAKONI 9-10
“Yehova Onnaahoolela Arumeyi Awe”
it-1 epaax. 39 etti. 6
Omaka
Nilavulaka sa mukwaha weettale aya aIsarayeli (awo yaahimaka mapuro oowiiraka 40, yaawo anihimmwa ni Moise eliivuru ya Mothakoni 33), nave eyo enooniherya wira yaari ootthokiheya. Nto okathi neeku neemela aya vasulu va etabernaakulu, awo yaahaana okhala opuro yoowo. Okathi neeku naakhuma aya, awo nave yaahaana okhuma. “Siso atthu a Isarayeli yanivenya erummwaka n’Apwiya: yanemela-tho erummwaka n’Apwiya”.—Mot 9:15-23
w11 15/4 epaax. 4 itti. 4-5
Niireke Munniweha Ohoolela wa Muluku?
Ninrowa wooniherya sai wira ninnivaha efaita malakiheryo a Muluku? Murummwa Paulo ohimmye so: “Nwiiweleleke ale anoohoolelani ni mwiireke siiso muhinlaseyaka”. (aHeeb. 13:17) Ikwaha sikina khivankhweya opaka eyo. Masi muupuwele muri ene nipuro na aIsarayeli okathi wa Moise. Nto nyuwo nuumala weetta mukwaha okathi munceene, neeku ninneemela. Ninrowa weemela mpakha silini? Nihiku nimosa? Esumana emosa wala miyeeri vakhaani? Muniikoha so: ‘kiireke kihaana otaphula miritti saka sotheene?’ Wanipacerya, woonasa wene nyuwo mwaarowa okumiha itthu muniphavela anyu orumeela paahi. Masi nuumala mahiku vakhaani, nyuwo munnipacerya okumiha itthu sanyu sotheene. Nuumala nyuwo okumiha ni otthokiha nihuta nanyu, neeku ninnivenya, nto muhaana otthokiha-tho nihuta nanyu wira mweette mukwaha. Opaka eyo khiyaarowa okhala etthu yookhweya. Hata vari siiso, aIsarayeli “yanivenya” moowakuveya.—Moth. 9:17-22.
Nnoonela sai okathi ninvahiwa ahu malakiheryo? Niireke ninniimananiha otthara moohipisa? Wala ninnivikaniha opaka itthu ntoko nilimalenle ahu? Niireke ninnitthara malakiheryo akumiheriwe niinano voohimya sa moota woowiiriha soosoma sa biibiliya, waalaleerya atthu anikhuma ilapo sikina, anikhala muttetthe ahu, omulompa Muluku vatthokoni khula nihiku, waakhaliherya Anna anilavula ni ixipitaali ni okhalana mweettelo wooloka okathi wa aKongresu? Enamuna ekina nnooniherya ahu wira ninnivaha efaita malakiheryo a Muluku ori weemererya. Okathi nimphavela ahu opaka soothanla suulupale khaninroromela osuwela wahu paahi, masi ninnitthara malakiheryo anikhuma wa Yehova ni mutthenkeso awe. Ntoko mwaana onitthyawela awe waxipaapa awe okathi enikhumelela aya ehasara, nave hiyo ninniphavela okhapeleliwa ni mutthenkeso wa Yehova vaavo mixankiho sa olumwenku ola, sinnikhumelela aya.
Itthu sa Efaita sa Mbiibiliyani
it-1 epaax. 253 etti. 5
Othukumana
Efaita Erina Aya Othukumana. Mureerelo nimphwanya ahu vaavo ninthukumana ahu wira nilipihe waamini wahu, onoolikana ni niira na Paasikha naapakiwa khula mwaakha. Vakhala wira mutthu owo moolakelela khamwiira Paasikha aahaana wiiviwa. (Mot 9:9-14) Nnaamwi olelo-va, maKristau ahimwiiraka Paasikha, Paulo aahaatumererya wira yaahaana ohihiyererya othukumana wira amulompeke Muluku hoothe, owo aahimmye so: “Nuupuwelaneke mukina ni mukhwaawe, wira nitumereryaneke wooniherya ophenta ni miteko sooreera, nihihiyaka othukumana, ntoko akina alimalenle aya. Masi, nlipihaneke mukina ni mukhwaawe, vanceenexa vaavo nnoona ahu wira nihiku na Muluku ninnaattamela”.—aHe 10:24, 25; nwehe nuulumo noowi: CONGREGAÇAO.
15-21 ya Março
MIHAKHU SINIKHUMA MBIIBILIYANI | MOTHAKONI 11-12
“Xeeni Vahinreerela Aya Wiixinliha?”
w01 15/6 epaax. 17 etti. 20
Nihikhaleke Atthu Owiiwa Paahi
Makristau manceene olelo-va annisyaka mweettelo wa orupihana woohiloka. Nto nihaana osyaka mweettelo woomakela wiixinliha, mweettelo yoowo waarowa oniiriha oheemereriwa ni Muluku. Murummwa Paulo onninlopola ohimyaka wira: “Nnakhala nihimweehererye Yehova, ntoko akina a yaawo yaamweeherenrye aya, yiirelaka olummwa ni inowa, khukhwa. Nnakhala nihaapeke, ntoko akina a yaawo yaapa aya, yiirelaka wiiviwa ni nlaikha na Muluku”. (1 aKorinto 10:9, 10) AIsarayeli yaanimwaapa Moise ni Aroni, ni yaanixinliha mwaha wa Muluku waavaha emana. (Mothakoni 16:41; 21:5) Niireke Yehova waahimunanara vanceene ovikana okathi yaapanke aya onamuttompe? Biibiliya onnooniherya wira atthu otheene yaixinlinhe yaahilummwa ni inowa khukhwa. (Mothakoni 21:6) Okathi mukina-tho, atthu anivikana imilyau 14.700 yaahikhwa mwaha woowiixinliha. (Mothakoni 16:49) Nto nihehereryeke oopixa murima wa Yehova nikhoottaka wiiwelela malakiheryo awe.
w06 15/7 epaax. 15 etti. 7
‘Musyakeke Wiixinliha’
Tthiri mweettelo wa aIsarayeli waahiturukeya! Woopaceryani awo yahooniherya oxukhurela nuumala woopoliwa wExiitu, Ephareya Yooxeerya, nto eyo yaahiwiiriha omwiipela masipo Yehova. (Okhuma 15:1-21) Masi mwaha wa woova etakhwa ni owoova aKaanani, omuxukhurela waya Yehova yaahirantteliha ni oohixukhuru wala wiixinliha. Ohiiya omuxukhurela Yehova mwaha wowoopola, awo yaaninvaha nthowa ahimyaka wira khiyaarina otaphuwa. Wiixinliha waya wooniherya ohixukhuru mareheryo otheene a Yehova aakumihenrye awe. Nto owo aahihimya so: “Mpakha lini kavileleke atthu ala òtakhala, ahinihiyererya okikhupanya?”.—Mothakoni 14:27; 21:5.
it-1 epaax. 100 etti. 3
Ovaanyihana
Wiixinliha. Wiixinliha wala waapa onnikhulumula. Nuumala aIsarayeli okhuma wExiitu, yaaniixinliha ni ovaanyiha enamuna Yehova aahoolela awe omurumeelaka Moise ni Aroni. (Okh 16:2, 7) Nto mwaha wa wiixinliha waya yaahimwiiriha Moise okhulumuwa onavekela okhwa. (Mot 11:13-15) Nnaamwi yiixinliha ni onvaanyiha Moise tthiri awo yaamwiirela Yehova. (Mot 14:26-30) Mwaha woopaka eyo, anamunceene yaahiyeleela okumi aya.
Itthu sa Efaita sa Mbiibiliyani
it-2 epaax. 748 etti. 6
Emana
Otthokiheriwa. Emana “yalikana n’ipyó sa mele, yari yottela” ni “yakhala ntoko manlela” osiva waya waalikana ntoko “iphau setheiwe ni makhura” wala eboolu yoosiva yooheliwa makhura. Nuumala ooxiliwa vanxiloni wala othitiwa muryaweni, emana eyo yaanapeiwa wala yaanipakiwa eboolu ni yaanooxiwa.—Okh 16:23, 31; Mot 11:7, 8.
22-28 ya Março
MIHAKHU SINIKHUMA MBIIBILIYANI | MOTHAKONI 13-14
“Waamini Onninivaha Olipa Murima”
w06 1/10 ipaax. 16-17 itti. 5-6
Olipa Murima Mwaha Woowaamini ni Omoova Muluku
Masi anamahottela anli, Yoxuwa ni Kalebi, yaaniphavela okela elapo Yooleiheriwa. Awo yaahimmye so: “Hiyo nnimwawerya [aKanaani] vohinrikela Apwiya ari ni hiyo, amuluku yakhapelela àtthu awo ahanyanyala. Tivó muhiwoveké”. (Mothakoni 14:9) Niireke Yoxuwa ni Kalebi yaari alolo mwaha woohimya itthu iye sa ekeekhai? Nnakhala vakhaani. Awo vamosa ni nloko na wIsarayeli, yaahinweha Yehova oowuulihihaka muru anakhotto ooweryexa a wExiitu Ephareya Yooxeerya. (Esalimo 136:15) Tthiri vannooneya wira anamahottela ale muloko vamosa naale yaakhaliherya khiyaarina mathowa oowiixinliha. Yehova oripiwene murima vanceene aahimmye so: “Mpakha lini anrowaya okhotta okikupali miyo, kipanke sotikiniha sinjene eriyari aya?”—Mothakoni 14:11.
Yehova aahihimya mooluluwanya muxankiho yaarina aya aIsarayeli, eyo piiyo woova, eyo yaahooniherya wira awo khiyaarina waamini. Nto waamini ni olipa murima oneetta vamosa, eyo ennivarihana ni ele murummwa Yohani aahimmye awe olavulaka sa ekhotto ya omunepani maKristau aniwanana aya, oriki: “Ninnixintta olumwenku mwaha wa waamini wahu”. (1 Yohani 5:4) Ntoko waamini aarina awe Yoxuwa ni Kalebi, olelo-va onniiriha olaleiwa ihapari sooreera sa omwene olumwenku wotheene, anamoona a Yehova imilyau 6 a olumwenku wotheene, waahela muhina amiravo, atthu oowuunnuwela, atthu oolipa ni oohilipa. Khuuvo nwanani owenrye waamala-maliha anakhotto awo oowerya ni oolipa murima.—aRoma 8:31.
Itthu sa Efaita sa Mbiibiliyani
it-1 epaax. 644 etti. 1
Elapo Muluku Aavanhe Awe aIsarayeli
ELAPO Muluku aavanhe awe aIsarayeli yaari tthiri elapo yooreera. Okathi Moise aarumme awe anamahottela orowa ohottela wala oweha Elapo Yooleiheriwa ni oruuha mihokorokho sa elapo ele, awo yaahitthika akunxe ene eritta ya evidera ni niphara na wuuva nuulupale nenlo naatexiwe ni alopwana anli. Nnaamwi yoova mwaha woohaamini, awo yaahihimya wira: “Tthiri elapo eyo ti yowunttelana ni yoruweryaxa”.—Mot 13:23, 27.
29 A MARÇO–4 A ABRIL
MIHAKHU SINIKHUMA MBIIBILIYANI | MOTHAKONI 15-16
“Muhiixinnuheke ni Muhiroromeleke Mootepana”
w11 15/9 epaax. 27 etti. 12
Niireke Munnisuweliwa ni Yehova?
Vaavo aIsarayeli yeetta aya arowaka elapo yooleiheriwa, Kore uupuwela wira mareheryo Yehova aapanke awe khiyettihiwa saana. Nuumala-vo, atthu oowiiraka 250 oottittimiheya yaahitakaheryana ni yena aphavelaka opaka marukunuxo. Kore ni atthu akina yuupuwela wira waataana waya ni Yehova waari woovareleleya. Awo yaahirowa okumana ni Moise ni Aroni, khwahimeerya wira: “Nyuwo munnitepana eyulupale anyu. Nto vano vaphiyerya! Atthu othene a nloko nahu t’awaya Apwiya: nave Apwiya anikhala eriyari aya”. (Moth. 16:1-3) Tthiri atthu ale yaari oowiiroromela ni oowiixinnuwiha! Nto Moise aawaakhunle so: “Apwiya animwasuweliha ale ari awaya”. (Mmusome Mothakoni 16:5.) Nto wanikisa wa nihiku nikina naattharelana, Kore ni atthu akina yaamukhaliherya yaahikhwa.—Moth. 16:31-35.
w11 15/9 epaax. 27 etti. 11
Niireke Yehova Onnoosuwelani?
Moise ni Aroni, aavaha ntakiheryo nooloka nikhale ahu ootthara voohimya sa ottittimiha mareheryo ni soothanla sa Yehova. Mwaha wa moonelo aya, waahimwiiriha Yehova waathokorerya. Kore aari muLevi a nloko na oKowati nave aahikhalana iparakha sinceene. Eyo woonasa wene yaahela muhina woona woopoliwa wa aIsarayeli Ephareya Yooxeerya, okhaliherya ophukeliwa wa aIsarayeli oohiiwelela omwaako Sinayi, ni okhaliherya othaamihiwa wa nivuku na nivarihano. (Okhum. 32:26-29; Moth. 3:30, 31) Moohaanyiherya owo aahiroromeleya mwa iyaakha sinceene, woonasa wene ti etthu yaawiiriha aIsarayeli anceene omuttittimiha.
Itthu sa Efaita sa Mbiibiliyani
w98 1/9 epaax. 20 itti. 1-2
Mpweheke Opuro Woopacerya Itthu Sootepa Otthuneya
Yehova aanoona mwaha ole okhala wootepa otthuneya. Maana Biibiliya onihimya so: “Vano Apwiya yahimuhimerya Moise wira: ‘mutth’ule ìviwe’”. (Mothakoni 15:35) Nto exeeni yaamwiirinhe Yehova onviruwela mulopwana ole?
Atthu ale yaahikhalana mahiku 6 wira attotte ikhuni, aphwanye yoolya, ikuwo ni opuro wookhala. Nto yaahaana ohiya nihiku na neethanu nenli wira akhapeleleke itthu soomunepani. Nnaamwi vaahakhanle vootthekeya ottotta ikhuni, vaari vootthekeya opaka eyo nihiku naaneethanu nenli okhala wira naari nihiku noomukokhorela Yehova. Nnaamwi maKristau aheettelaka nlamulo na Moise, yoowiiraneya ela enniniixuttiha wira nihaana opweha nipuro noopacerya itthu sootthuneya.—aFilipi 1:10.
5-11 ya Abril
MIHAKHU SINIKHUMA MBIIBILIYANI | MOTHAKONI 17-19
“Muhakhu Anyu Woohiyeriwa . . . ti Miyo”
w11 15/9 epaax. 13 etti. 9
Niireke Munimpaka Yehova Okhala Yoohiyeriwa Anyu?
Nwuupuweleke aLevi yahaakhenle elapo yoohiyeriwa. Mwaha woopweha nipuro noopacerya okokhorela wekeekhai, awo yaahaana omuroromela Yehova wira aamwaakhapelela. Owo aaleenle so: “Muhakhu anyu wohiyeriwa eriyari y’atthu a Israyeli ti miyo”. (Moth. 18:20) Olelo-va, nnaamwi nihimurumeelaka mutemplo mowooneya, ntoko anamukuttho ni aLevi, nnoowerya otakiha wiivahererya waya, nikupaliki wira Yehova onoonikhapelela. Vaavo vanaattamela aya wanikisa wa olumwenku ola, omuroromela wahu Yehova wira onoonikhapelela ohaana wuncerereya.—Wiis. 13:17
w11 15/9 epaax. 7 etti. 4
Yehova Yoohiyeriwa Aka
Yehova ahaaleela aLevi wira aari yoohiyeriwa aya, nto ohiya wakhela elapo yoohiyeriwa, awo yaahireelihiwa avahiwaka eparakha ya vameekhaaya ya omurumeela Yehova. Yoohiyeriwa aya yaari orumeela ntoko ‘anamukuttho Apwiya [Yehova]’. (Yox. 18:7) Nto yoolepa ya Mothakoni 18:20 eyo ennooniherya wira muteko owo khiwaawiirinhe ohaawa. (Mmusome Mothakoni 18:19, 21, 24.)
Itthu sa Efaita sa Mbiibiliyani
g02 8/6 epaax. 14 etti. 2
Maakha—Etthu Yootthuneya
Maakha yaari nthoonyeryo ya etthu yoolipa ni yoohintta. Ti nthowa naya Biibiliya, iitthana awe okhala nivarihano na ‘ovaha wolipihiwa ni makha”, nivarihano nenlo khula mpantta eyoolya yaalyiwa aya yaaheliwa maakha, yooniheryaka omaliheriwa wa nivarihano nlo. (Mothakoni 18:19) Nlamulo na Moise, naahimya wira mikuttho saavahiwa valtari saahaana oheliwa maakha, wira siwooniherye wira aataphuliwa wuntta wala opweteya.
12-18 ya Abril
MIHAKHU SINIKHUMA MBIIBILIYANI | MOTHAKONI 20-21
“Mwiiyeviheke Mwaakhanyereriwaka Opaka Itthu Soohiloka”
Mukhale Oomaala ni Mmusiveliheke Yehova
Nakhala atthu oowiiyeviha nnoosyaka opaka soovonya. Nkahaya mmuupuwele-tho Moise. Owo aahiviriha iyaakha sinceene ori ene mutthu oomaala ni omusivelihaka Yehova. Wanikisa wa iyaakha 40 yeettaka moothakoni, Moise aahihiya okhala mutthu oomaala aahiiso oowiiyeviha. Murokorawe, yoowo woonasa wene aakhalihenrye woopowa wawe wExiitu aahikhwa ovithiwa oKadexi. Vano aIsarayeli yaahitthikela wiixinliha ahimyaka wira khiyaakhapeleliwa saana. Mukwaha ola, atthu otheene “yahimurukunuwela Moise” mwaha woohikhalana maasi. Hata Yehova anvanhe Moise owerya woopaka miiriirya sinceene ni oonihenrye okhala muhooleli ooloka, atthu ale nlelo yaaniixinliha. Awo yaaniixinliha ohiya paahi mwaha woohikhala maasi, masi-tho yaaninvaha nthowa Moise yuupuwelaka wira taawiiriha ovoliwa ntthona.—Moth. 20:1-5, 9-11.
Mukhale Oomaala ni Mmusiveliheke Yehova
Nto Moise aahinanariwa vanceene khuhiya okhala oomaala. Ohiya olavuliha mwala ntoko Yehova aahimmye awe, owo aahaapwapwela vootakhala atthu ale ni aahiivuwiha mmensawe. Nto aahimana mwala ole ikwaha piili, khukhuma maasi manceene. Onanariwa ni wiixinnuwiha waahimwiiriha Moise opaka etampi yuulupale. (Esal. 106:32, 33) Mwaha woohiya mwa okathi vakhaani okhala oomaala, Moise kheemereriwe okela Elapo Yooleiheriwa.—Moth. 20:12.
Yowiiraneya ela, enniniixuttiha etthu yuulupale. Yoopacerya, okathi wotheene nihaana wiimananiha okhala oomaala aahiiso oowiiyeviha. Masi, vakhala wira nnoonyoonyeriwa wiimananiha iwo mwa okathi vakhaani, wiixinnuwiha pooti oniiriha ohimya wala opaka itthu soololo. Ya nenli, akhala wira nooxanka aahiiso noonyoonyiheya vanoonivila okhala oowiiyeviha. Nto nihaana wiimananiha okhala atthu oowiiyeviha hata nrina ene mixankiho.
w09 1/9 epaax. 19 etti. 5
Mphuki Onisiveliwa Exariya
Wanipacerya, Yehova khaamurumme Moise wira alavule ni atthu ale, ni khaamurumme orowa waapwapwela mwaha woohiiwelela waya. Yanenli, Moise ni Aroni khiyanvuwihale Muluku. Tivo owo aahaaleela so: “nyuwo khanvuwihale owerya waka”. (Eveersu 12) Mwaha woohimya wira: “Hiyo nnowerya ophutula màsi”, Moise aalavunle ntoko yena ni Aroni ti yaakumihenrye maasi ale mwa mwiiriirya, ohiya Muluku. Yaneeraru, ahimphukela Moise ni Aroni mwa enamuna emosaru aaphukenle awe atthu akina yahaamwiiwelenle. Owo kheemyale wira nloko nle noohiiwelela nikele elapo yooleiheriwa ya oKanani, nto aahipaka etthu emosaru ni Moise ni Aroni. (Mothakoni 14:22, 23) Ya neexexe, Moise ni Aroni yaari ahooleli a wIsarayeli. Okhala wira mutthu onikhalana miritti sinceene, Muluku ononvekela itthu sinceene.—Luka 12:48.
Itthu sa Efaita sa Mbiibiliyani
Niireke Munnoona Otteettheya wa Apinaatamu Ntoko Yehova Sinoonela Awe?
Mwa sowiiraneya iya sotheene Yehova anwerya omuhukhumu Aroni naananoru. Masi owo ahoona wira Aroni khahiyo aari mutthu ootakhala wala aroolakela opaka itthu iye. Tthiri, vanooneya wira Aroni aaroowokiwa ni atthu akina mpakha ohiya ephiro yooloka. Okhala wira khula okathi aasuwela awe wira oopaka etthu yootakhala, owo moowakuveya aanittharuwa ni waakhulela malakiheryo a Yehova. (Okhum. 32:26; Moth. 12:11; 20:23-27) Yehova aathanla owehexexa nroromelo ni waakuva ottharuwa wa Aroni. Okhuma vaavale mpakha olelo-va Aroni ni amusi awe anisuweliwa okhala atthu yaamoova ni omurumeela Yehova moororomeleya.—Esal. 115:10-12; 135:19, 20.
19-25 ya Abril
MIHAKHU SINIKHUMA MBIIBILIYANI | MOTHAKONI 22-24
“Yehova Onniiriha Otakhalihiwa Okhala Oreelihiwa”
Filipe Onnilaleya ‘Ihapari Sooreera Voohimya sa Yesu’
Ntoko eseekulu yoopacerya, olupatthiwa wa arumeyi a Muluku olelo-va, khoniwerya omala-maliha olaleiwa ihapari sooreera. Ikwaha sinceene, okhanyereriwa wa maKristau othaamela mapuro makina wala otthukweliwa waya, onniiriha olaleeriwa ihapari sa Omwene atthu anikhala mapuro awo. Mwa ntakiheryo, okathi wa Ekhottho ya Nenli ya Olumwenku Wotheene, anamoona a Yehova yaahiwerya olaleerya mapuro yaavariwa muteko mookhanyereriwa. MuYuda mmosa aasuwenle Anamoona a Yehova mapuro awo, aahimmye so: “Olipa-murima wa Anamoona a Yehova yaatthukweliwe wookiiriha okupali wira nroromelo naya ti na mBiibiliyani, ni miyo kaahipacerya okhalana nroromelo nenlo”.
it-2 epaax. 717 etti. 9
Ololo
Etthu ya Elolo Omulupattha Yehova. Profeta Balaamu aaniphavela vanceene waatakhaliha atthu a wIsarayeli, mwaha woophavela waakhela musurukhu wa Mwene Balaki, ooMowabi, masi Yehova aahivirikanya ni aahiiriha wiimananiha wa Balaamu ohikhumela saana. Murummwa Pedru aahilepa voohimya sa Balaamu, ohimyaka wira: “puuru, yoowo ohinilavula, aahimulavuliha profeta owo, omukhoottiheryaka otthara ephiro awe yootakhala”. Ohimyaka otakhala wa Balaamu, murummwa Pedru orumeela nuulumo na eKriki noowi pa·ra·fro·ní·a, nenlo nintaphulela “ohikhala saana”.—2 Pe 2:15, 16; Mot 22:26-31.
Itthu sa Efaita sa Mbiibiliyani
w04 1/8 epaax. 27 etti. 2
Iponto Suulupale sa Eliivuru ya Mothakoni
22:20-22—Xeeni Yehova anviruwenle awe Balaamu? Yehova aahimuleela Balaamu wira ohaatakhalihe atthu a wIsarayeli. (Mothakoni 22:12) Ohiya-vo, Balaamu aahirowa vamosa ni alopwana a Balaki othanlaka waatakhaliha atthu ale. Balaamu aaphavela waahakalaliha atthu ooMowabi ni waakhela mireerelo saya. (2 Pedru 2:15, 16; Yuda 11) Hata okathi Balaamu ahawenrye awe waatakhaliha aIsarayeli, ophavelaka omuhakalaliha mwene, owo aahirumeela enamuna ekina aatumereryaka athiyana yaamukokhorela Bayali wira yaahapuxe alopwana a wIsarayeli. (Mothakoni 31:15, 16) Nto etthu yaamwiirinhe Yehova onviruwela Balaamu, waari mwaha wa nrima naarina awe.
26 A ABRIL–2 A MAIO
MIHAKHU SINIKHUMA MBIIBILIYANI | MOTHAKONI 25-26
“Olipa Murima wa Mutthu Mmosa Onniwoopola Atthu Anceene”
“Mutthyaweke Orupihana Woohiloka”
MULIPA-OOMISERYA, onnimusivela orowa opuro onsuwela awe wira onoophwanya ihopa omphavela awe. Owo onnihela ehelelo va cooloni vawe, nuumala-vo onamurihela mmaasini. Moopixa murima, onnilipelela ehopa wira emmirye coolo awe. Vaavo eyo eniiraneya aya, mulipa-oomiserya onniwatthula ehopa eyo.
Okathi mukina eyo enniwiiraneela apinaatamu. Mwa ntakiheryo, ahalaka vakhaani aIsarayeli okela Elapo Yooleiheriwa, awo yaahimaka waattamela oMowabi. Nto mwene ooMowabi aahimuleiherya mulopwana mmosa iihaniwa Balaamu onvaha musurukhu munceene akhala wira aamwaatakhaliha aIsarayeli. Okhala wira khaawenrye opaka eyo, owo aahiphwanya enamuna ekina ya waatakhaliha aIsarayeli. Owo aahirumeela ehelelo yooloka, ehelelo ene yaari athiyana a oMowabi. Nto athiyana awo yaahirowa omaxaxani wira yaawoke ni orupana alopwana aIsarayeli.—Mothakoni 22:1-7; 31:15, 16; Wiisupulula 2:14.
“Mutthyaweke Orupihana Woohiloka”
Exeeni yaawiirinhe aIsarayeli opaka etampi ele? Mwaha woowi yaamakela wuupuwela wiihakalaliha wala soophavela saya paahi, nto eyo yaahiwiiriha oliyala itthu sotheene Yehova aapakenle awe. Musuweleke wira aIsarayeli ale yaahikhalana mathowa wira aroromeleyeke wa Muluku. Yehova aahaakumiha weepotthani wExiitu, nave okathi yaari aya moothakoni khiyaavoliwa etala, nto okathi owo yiira ahalaka vakhaani okela Elapo Yooleiheriwa. (aHeeberi 3:12) Hata vaari siiso, awo yaahimorela ntapha na orupihana woohiloka. Murummwa Paulo ohimmye wira: “Nihìreké s’ekhapa, ntoko sìralyaya akinaku a yale: tivó, yahikhwasa”.—1 aKorinto 10:8.
Itthu sa Efaita sa Mbiibiliyani
it-3 epaax. 694 etti. 8
Mukano
Vanikhala ntoko wira okaiwa wa elapo yooleiheriwa yaapakiwe sittharihiwaka inamuna piili: Orumeeliwa wa iparakha ni wunnuwa wa nloko. Enamuna ela yookaiwa mathala erumeeliwaka iparakha yaakhuma wa Yehova, nto eyo yaanikhaliherya ohikumiherya nrima wala onyakulihana wa maloko. (Mir 16:33) Mwa enamuna eyo, Muluku anwerya weettiherya itthu wira silikaneke ni eprofesia aahimmye awe Yakobe ohalaka okhwa, yeeyo elempwale Maphattuwelo 49:1-33.