MAKOHO ANIKOHIWA NI ALE ANISOMA IREVISTA SAHU

Exeeni enooniherya wira muttetthe wa khalai wa oYerikho waahixinttiwa ohirukureriwe mahiku manceeneni anakhotto?

▪ Moovarihana ni Yoxuwa 6:10-15, 20, aIsarayeli yaahirukurerya muttetthe wa oYerikho khula nihiku, arukureryaka emaara emosa, mpakha ophiyeriha mahiku mathanu namosa. Nihiku na neethanu nenli, yaahirukurerya muttetthe ole imaara thanu na piili, nto Muluku aahiiriha ixiri suulupale sa muttetthe ole, omora. Nto eyo yaahaakhweiherya aIsarayeli otuphela ni okuxa muttetthe ole wa oYerikho. Niireke alipa anithipa mathala annikupaleela wira ixiri sa oYerikho saahimora sihirukureriwe mahiku manceene, ntoko Biibiliya onihimya awe?

Khalai, vaari voolimaleleya alavilavi otuphela muttetthe woolipihiwa. Hata muttetthe owo orukureriwe ene okathi vakhaani paahi wala munceene, anamatuphela yaaniiya mihakhu sotheene, ohela muhina eyoolya yaasukiwe. Alipa oothipa mathala yaahiphwanya eyoolya yinceene milepe sa oYerikho. Nto mwaha wa yeeyo, eliivuru Biblical Archaeology Review enihimya wira: “Etthu yaatepenxe ophwanyiwa mmathalani, saari ipyo ohiya paahi mavali. . . . Orikarika ophwanyaneya [ipyo] muliivuruni mwa myaha sa alipa oothipa mathala a oPalestina. Waaniheryasa, pooti ophwanya murinki mmosa wala miili, masi orikarika ophwanya ipyo sinceene moota owo”.

Ntoko Soolempwa sinitthokiherya aya, aIsarayeli yaahikhalana mathowa ooloka a ohikuxa mihakhu sa oYerikho. Yehova aahaaleela ohikuxa etthu ya mmuttettheni mme. (Yox. 6:17, 18) AIsarayeli yaatuphenle muttetthe ole nuumala ohemphwa ipyo niinano, tivonto eyoolya khiyaareere. (Yox. 3:15-17; 5:10) Nto ophwanyiwa ipyo sinceene oYerikho, onooniherya wira orukureriwa muttetthe ole ni aIsarayeli, khiwaamalinhe okathi munceene, ntoko Biibiliya sinitthokiherya awe.