Epottha Yaamwiiwelenle Muluku

Yosefe aayariwe paapa awe uuluvanle ene. Nto ti maana aya owo aaphentiwa awe vanceene ni paapa awe waavikana anamwane akina. Munoonela sai, niireke eyo yanaasivela axuulupale awe? Nnaari, maana awo yaahipacerya omukhalela nrima Yosefe ni yaanimunyokha. Ohiyu omosa, Yosefe aahiloha etthu yootikiniha ni aahaaleela axuulupale awe. Nuumala waaleela, awo yahuupuwela wira yooloha ele yaataphulela wira muhoolo yaarowa okhala arumeyi awe Yosefe. Vano axuulupale awe ale yaahitepa omunyokha!

Nihiku nimosa axuulupale awe Yosefe, yaahirowa olyiha inama waattamela epooma ya oSikhemi. Yakobe aahimuruma Yosefe orowa waaxukurya. Okathi yamoonale aya arwaaka ottaiwene, yaahileelana wira: ‘Mmooneke, onnoorwa namaloha ole. Nrowe nimwiive!’ Awo yaahinvara ni yaahimurihela mulittini moowiixerya. Masi Yuda, muulupale awe Yosefe, aahaahimeerya axinnawe wira: ‘Nihimwiive! Nrowe nimutumihe wira akhale epottha’. Nto yahaatumiherya atthu a oMadiyani ni musurukhu 20 wa eparatha, nto awo yaahimurowana wEjiitu.

Nuumala-vo, axuulupale awe Yosefe yaahikuxa nlaya nawe, yaahixuweya mphomeni mwa epuri, yahaaroihela apapaya ni yaahaakoha wira: ‘Nlaya nla khahiyo na mwaninyu?’ Nto Yakobe aahuupuwela wira Yosefe aiviwe ni enama yowoopiha ya mutakhwani. Yakobe aahinla vanceene. Khuuvo aawerya ommaaliha!

Nuumala ophiya wEjiitu, Yosefe aahitumihiwa-tho khukhala epottha ya Potifari, yoowo aari murumeyi muulupale a mwene. Masi Yehova aanimukhaliherya Yosefe. Potifari aahoona wira Yosefe aanivara saana muteko ni vaanireerela omuroromela. Moohipisa, Yosefe aahithanliwa wira eettiheke mihakhu sotheene sa Potifari.

Amwaarawe Potifari yaahiweha wira Yosefe aari mmiravo oophwaneliwa. Khula nihiku yaamakela omwiirela wira orupe naawo. Nto exeeni Yosefe aapanke awe? Owo aahikhootta ohimyaka so: ‘Nnaari! Eyo khahiyo etthu yooloka. Pwiya aka onnikiroromela, nto nyuwo mwa amwaarawe. Karupa-vale ni nyuwo kinoomutthekela Muluku’.

Nihiku nimosa, mwaarawe Potifari, aahimukhanyererya Yosefe wira orupe ni yena. Nto aahivara nlaya na Yosefe, masi owo aahitthyawa. Vaavo Potifari aaphiyale awe owaani, amwaarawe yaahimuleela wira Yosefe aaphavela waatuphela. Awo yaamootha. Vano Potifari aahinanariwa vanceene ni aahaaruma atthu wira yamutthukwele Yosefe mukhatteya. Masi, Yehova khaamuliyanle Yosefe.