Ireferensia sa Okumi ni Orummwa Ahu Ekaderno Enirumeeliwa Omuthukumanoni
© 2023 Watch Tower Bible and Tract Society of Pennsylvania
4-10 YA SETEMBRO
MIHAKHU SINIKHUMA MBIIBILIYANI | ESTEERI 1-2
“Mukhaleke Oowiiyeviha Ntoko Esteeri”
Owehaweha 17.01 epaax. 24 etti. 11
Munoowerya Wiiyeviha Hata Mweehereriwaka
11 Nave-tho, wiiyeviha wahu pooti weehereriwa okathi yoole atthu annittottopela aya aahiiso oninyoholela. Estheri aahittottopeliwa ni onyoholeliwa vanceene. Owo aari muthiyana ootepa oreera oPersia. Waahivira mwaakha Estheri oottaka makhura ooreeriha erutthu, vamosa ni athiyana akina yaaphavela-tho wiireeriha wiira yooniweke saana ni mwene. Estheri taathanliwe ni mwene wiira okhale pwiyamwene. Masi, nnaamwi aavahiwe eparakha ele owo khaixunnuwiha. Estheri khaaphavela mureerelo awe paahi. Owo aahivikaniha wiiyeviha, oreera murimani ottittimiha. — Esth. 2:9, 12, 15, 17.
Waamini Waya epaax. 130 etti. 15
Owo Aahiwaakiherya Atthu a Muluku
15 Nuumala ophiya okathi wa Estheri oroihiwa wa mwene, owo aahivahiwa eparakha ya othanla khula etthu aaphavela awe, wiira khino otepexe okhala ooreera. Mowiiyeviha, Estheri khaavekenle itthu sikina ovikana iye saavahiwe awe ni Hegayi. (Esth. 2:15) Woonasa wene owo aanisuwela wiira oreera owiitho paahi khiwaarowa onvara murima mwene; masi mutthu oowiiyeviha ni aankhili taarowa onvara murima. Niireke owo aahuupuwela saana?
Owehaweha 17.01 epaax. 24 etti. 12
Munoowerya Wiiyeviha Hata Mweehereriwaka
12 Akhala wiira naatthu oowiiyeviha, ninrowa owaraka ni wiitthokiha mwa enamuna enooniherya waattittimiha akina ntoko siniittittimiha ahu. Ohiya owara niphavelaka ohimmwa, nihaana ophavela okhalana “murima woomaala ni woowiiyeviha”. (Mmusome 1 Pedru 3:3, 4; Yer. 9:23, 24.) Moolumo ni miteko sahu sinimooniherya omutthu ahu. Mwa ntakiheryo, hiyo pooti owiiriha atthu onoonaka okhala ootepa otthuneya mwaha wa muteko onivara ahu, itthu sinisuwela ahu aahiiso atthu anaasuwela ahu. Nave hiyo pooti owiiriha atthu akina woona wiira muteko nivanre mekhihu nnaamwi atthu akina anikhalihenrye ene. Masi nkahaya mmuupuwele Yesu. Owo anwerya owooniherya atthu wiira aari oosuwelexa. Ohiya-vo, okathi wootheene aaniromola Nuulumo na Muluku. Khaaphavela wiira atthu anvuwiheke. Khula okathi Yesu aaphavela wiira atthu anvuwiheke Yehova. — Yoh. 8:28.
Itthu sa Efaita sa Mbiibiliyani
Owehaweha 22.11 epaax. 31 itti. 3-6
Nyuwo Mwaanisuwela?
Alipa anithipa mapuro yaakhaliwa khalai, aaphwanya nluku na oloko na oPersia naalempwale nsina na mulopwana mmosa iitthaniwa Marduka (Emakhuwa Mardokeyo). Owo aakhapelela muhakhu wa mwene muttetthe wa oSusa. Nuumala ophwanyiwa nluku na oloko naalempwale nsina na Mardokeyo, Arthur Ungnad yoowo aari musomi a okathi ole, aahihimya wira ele yaari ekwaha yoopacerya yaaphwanyiwa aya edokumento “yaalempwale nsina na Mardokeyo yaahiirela mpantta mbiibiliyani”.
Ohiya paahi etthu aaphwannye awe Ungnad, anamatokosa aataphulela imilyau sinceene sa itthu sikina saaphwanyiwe oPersia. Etthu ekina asomi ale yaataphulenle aya, yaari etthu yaaphwannye aya omilepeni epooma ya oPersepolis. Maluku awo yooniherya okathi woolamulela wa mwene Xerxe I. Maluku awo yaalempwale ni nttaava na Elamita, nave aakhalana masina manceene yaawo aniphwanyaneya mbiibiliyani eliivuru ya Estheri.
Maluku manceene yaaphwanyiwe epooma ya oPersepolis, anniphwanyaneya nsina na Marduka, yoowo aarumeela ntoko mulipa oolepa opalasio wa mwene Xerxe I. Nluku nimosa naamuhimya Marduka okhala namataphulela. Itthu iyo siphwanyiwe sinnivarihana ni ele Biibiliya onihimya awe sa Mardokeyo. Owo aahithanliwa wira aarumeeleke owannyawe mwene Asuwero (Xerxe I), okhala wira aanilavula mattaava manli. Khula okathi Mardokeyo aanikilathi vamukhora va mwene Asuwero, oSusa. (Estheri 2:19, 21; 3:3) Mukhora owo wa mwene waari wooreerexa nave makwaarta yeemela vaavo.
Wookhala ovarihana wuulupale, Marduka onihimmwa maluku manceene yaaphwanyiwe ni Mardokeyo oniromoliwa mbiibiliyani. Mwa ntakiheryo, okathi, opuro, muteko aavara awe Mardokeyo oniromoliwa mbiibiliyani sinnivarihana ni Marduka oniromoliwa ni maluku aphwanyiwe. Itthu iya sootheene sinnooniherya wiira Marduka ni Mardokeyo oniromoliwa eliivuru ya Estheri, mutthu mmosaru.
11-17 YA SETEMBRO
MIHAKHU SINIKHUMA MBIIBILIYANI | ESTEERI 3-5
“Mwaakhaliheryeke Akina Wiimananiha Opaka Ele Aniwerya Aya”
Perspicaz vol. 2 epaax. 412 etti. 5
Mardokeyo
Aahikhootta Wuurama Ohoolo wa Hamani. Mwene Asuwero aahimukhaliha Hamani mukhulupale a moomweneni mwawe mootheene, nave aahiruma wiira atthu ootheene yaakilaathi vamukhora va empa ya mwene, yaahaana wuurama ohoolo wa Hamani. Mardokeyo aahikhootta opaka eyo ohimyaka wiira aari muyuda. (Esth. 3:1-4) Etthu yaamwiiriha opaka etthu ele waari mwaha woowi yena aari muyuda aaivaherenrye wa Muluku awe, Yehova. Owo aanisuwela wiira wuurama ohoolo wa Hamani, khiwaataphulela okhoroma mpakha vathi paahi, masi mutthu aapaka ele ohoolo wa mutthu aamukupali awe okhala mukhulupale muulupale aalamulela. (2 Sam. 14:4; 18:28; 1 Mam. 1:16) Nto aahikhalana mathowa ooloka wiira ohuurame ohoolo wa Hamani. Woonasa wene Hamani aari a nloko na amaleeki, nave Yehova aahihimya wiira aaniwana ekhotto ni atthu a nloko nle “mpakha mahiku othene”. (Okhum. 17:15; nwehe HAMÃ.) Mardokeyo aahipaka eyo mwaha woomuroromela Muluku, ohiya mwaha wa epoliitika.
Perspicaz vol. 2 epaax. 412 etti. 7
Mardokeyo
Muluku aahimurumeela wiira owoopole aisarayeli. Okathi naakumiheriwe aya nlamulo na waapwetexa ayuda ootheene a omwene ole, Mardokeyo aahihimya etthu aakupali awe. Wiira Esteeri aahikhalihiwa pwiyamwene okathi ole wooreerela wiira owoopole ayuda. Aahimooniherya Esteeri muritti aarina awe ni aahimutthokiherya wiira aahaana ovekela omoreliwa ikharari ni okhaliheriwa ni mwene. Nnaamwi opaka eyo yaataphulela oleva okumi awe, masi Esteeri aaheemererya. — Esth. 4:7–5:2.
Waamini Waya epaax. 133 itti. 22-23
Owo Aahiwaakiherya Atthu a Muluku
22 Tthiri Estheri aahiriipiwa murima vanceene nuumala wiiwa ehaali ele. Nto eyo yaheehererya waamini wawe. Owo aanoova, ntoko sinooniherya aya enamuna yaamwaakhunle awe Mardokeyo. Owo aahimuupuxerya nlamulo na mwene. Nenno naahimya wira orowa wa mwene ohinatthi wiitthaniwa mutthu owo aahaana wiiviwa. Masi mutthu owo anwerya woopowa, akhala wira mwene aammuthoonya ni ekopo awe ya eweero. Nto niireke Estheri aaniwehererya omoreliwa ikharari ni mwene, yoole aamoomonle Vasthi, mwaha wa okhootta orowa wa mwene nuumala wiitthaniwa? Estheri aahimuleela Mardokeyo wira mwene aahiviriha mweeri ntero ohimwiitthanne! Mwaha wa ohiitthaniwa wawe ni mwene, waanimwiiriha Estheri woonaka wira khaaphaveliwa-tho ni mwene. — Esth. 4:9-11.
23 Mardokeyo aahaakhula moowiilipiha wira olipihe waamini wa Estheri. Owo aahimuroromeliha wira aahitthune opaka etthu wira owoopole aYuda, awo yaamoopoliwa mwa enamuna ekina. Masi Estheri aarowa woopoliwa sai okathi olupatthiwa iwe waarowa aya otepaka? Hiyo ninnoona waamini wa Mardokeyo wira Yehova, khaarowa weemererya omalama-lihiwa atthu awe ni wira yooleiherya awe ehiiraneye. (Yox. 23:14) Nuumala-vo Mardokeyo aahimuhimeerya Estheri wira: Woonasa wene “nyuwo mothanleliwa opwiyamwene okathi ula, wira nwopole atthu!” (Esth. 4:12-14) Tthiri ti vooloka otthara ntakiheryo na Mardokeyo! Owo aahimuroromela moomalela Yehova, Muluku awe. Ankhi hiyo? — Mir. 3:5, 6.
Itthu sa Efaita sa Mbiibiliyani
Omwene wa Muluku epaax. 160 etti. 14
Owanela Otaphuwa wa Omukokhorela Muluku
14 Moolikanasa ni Estheri ni Mardokeyo a khalai, atthu a Yehova olelo-va, anniwanela ehakhi ya omurumeela Yehova moovarihana ni malamulo awe. (Esth. 4:13-16) Niireke nyuwo munoowerya okhaliherya ekhotto eyo? Aayo. Nyuwo pooti waavekelela anna ni arokora yaawo anihasuliwa wala arina milattu otribunaali. Mavekelo awo pooti owerya waakhaliherya anna ni arokora arina mixankiho wala anilupatthiwa. (Mmusome Yakobo 5:16, NM.) Niireke Yehova onnaakhula mavekelo awo? Milattu sinikanyari ahu otribunaali sinnooniherya wira owo onnaakhula tthiri! — aHeeb. 13:18, 19.
18-24 YA SETEMBRO
MIHAKHU SINIKHUMA MBIIBILIYANI | ESTEERI 6-8
“Ovaanela Saana Onnikumiherya Mireerelo”
Waamini Waya epaax. 140 itti. 15-16
Owo Aahipaka Itthu Mwa Miruku, Moolipa Murima ni Wiileva
15 Mwaha wa Estheri opixa murima, waahimwiiriha Hamani wiikumiherya maxakha ekhaweru. Niireke Yehova Muluku taamwiirihale mwene ole ohiwerya orupa? (Mir. 21:1) Tthiri hiyo khannitikhina eyo, okhala wira Nuulumo na Muluku ninnitumererya okhalana murima ‘wowehererya’! (Mmusome Mikeya 7:7.) Okathi onimuroromela ahu ni onwehererya Muluku wira ophuke mixankiho sahu, ninnoona wira enamuna yoophuka ya Muluku teri yoolokexa ovikana etthu ti etthu yaakhanle ahu oopaka.
Owo Aahilavula Moolipa Murima
16 Vano khivaareerela opisa-tho omuleela mwene etthu Estheri yaaphavela awe; nto nihiku na yoolya ya nenli, aahaana omuleela sotheene. Masi moota xeeni? Waahikhumelela okathi wooreerela, okhala wira mwene aahinvekela Estheri wira ohimye etthu yamwiirihale omulattula mwene. (Esth. 7:2) Vano waahiphiya ‘okathi’ wira Estheri olavule.
Waamini Waya 140 epaax. 17
Owo Aahipaka Itthu Mwa Miruku, Moolipa Murima ni Wiileva
17 Hiyo pooti wuupuwela Estheri olompaka vohiiwanyeya, ohinatthi olavula moolumo ala: “Amwene yasiveliwa okivaha envekelaka, kaphwanya oreriwa va maithoni vanyu nyuwo amwene, kinnovekelani wira kòpoliwe, kihikhwé, ni wira atthu aka yòpoliwe. P’itthu emphavelaka pahi”. (Esth. 7:3) Moone wira Estheri aahooniherya wira aanittittimiha moonelo wa mwene voohimya sa ele yoona awe okhala yooloka. Tthiri Estheri aari oovirikana ni Vasthi yoowo aatheliwe ni mwene khalai, yoowo aalakenle ohimwiiwelela iyawe! (Esth. 1:10-12) Ohiya-vo, Estheri khanvaanyihale mwene mwaha womukupali Hamani. Owo anvekenle mwene wira oopole ekumi awe.
Waamini Waya 141 ipaax. 18-19
Owo Aahipaka Itthu Mwa Miruku, Moolipa Murima ni Wiileva
18 Tthiri yoovekela ele yaahimutikiniha ni omoopiha mwene. Nto ti pani aaphavela omwiiva muthiyana aaphentiwa ni mwene? Estheri aahivikaniha ohimya wira: ‘Tthiri miyo n’atthu aka notumihiwa wira nipwetexiwe. Vakhanle wira nitumihiwe okhala ipottha, miyo nkahimya etthu, nkonyonyihani mwaha w’ohawa nno. Nto hiyo ninrowa wivakasiwa n’umalihiwa’. (Esth. 7:4) Moone wira Estheri aahihimya saana muxankiho ole, nto khuncererya oriki: owo anwerya omaala vaakhanle wira aarowa okhala epottha paahi. Nto wiivakasiwa wa atthu ale waarowa okhala etthu yootakhala wa mwene ole.
19 Ntakiheryo na Estheri ninnooniheryamoota onireera aya othanla saana moolumo. Nto akhala wira muniphavela omuhimeerya muxankiho anyu mmusi wala mutthu orina okhulupale, muhaana oopixa murima, oottittimiha, ni oothanla saana moolumo ooreerela olavula. — Mir. 16:21, 23.
Itthu sa Efaita sa Mbiibiliyani
Owehaweha 06 1/3 epaax. 11 etti. 3
Iponto Suulupale sa Eliivuru ya Esteeri
7:4 — Mwa enamuna xeeni omala-malihiwa wa ayuda waarowa aya omukumiherya mixankiho mwene? Okathi aamuleela awe mwene wiira vaweryaneya ayuda atumihiwe ntoko ipottha, Esteeri aahimooniherya mwene wiira khaarowa ophura etthu vakhala wiira ayuda awo yaampwetexiwa. Okhala wiira italento 10.000 sa eparatha, Hamani aaleihenrye awe, khisaarowa wuncererya muhakhu wa mwene, ovikana muhakhu waarowa okhumelela ni muteko ayuda yaarowa aya ovaraka vakhala wiira yaarowa okhalihiwa ipottha. Nave opwetexiwa wa ayuda waamwiiriha pwiyamwene okhwa.
25 A SETEMBRO–1 A OUTUBRO
MIHAKHU SINIKHUMA MBIIBILIYANI | ESTEERI 9-10
“Aahirumeela Okhulupale Awe Wiira Aakhaliherye Atthu a Muluku”
Perspicaz vol. 2 epaax. 412 etti. 10
Mardokeyo
Vano Mardokeyo aahimuranttela mwene ntoko mukhulupale oopacerya ni aahivahiwa anela a mwene wiira aasinariki idukumento sa omwene. Esteeri aahimuhiyerya Mardokeyo empa ya Hamani, yeeyo aavahiwa awe ni mwene. Nto, Mardokeyo aanirumeela okhulupale aarina awe wiira okumiherye nlamulo, aavahaka ayuda ediretu yoowiixaakiha. Ayuda yaanoona eyo ntoko woopowa nave yaahihakalala. Atthu anceene a omwene wa oPersia yaahaataana ni ayuda, nto nihiku 13 na adar nihiku nenno malamulo ale yaapacenrye aya ovara muteko, ayuda yaari oolikana ene wiira yiixaakihe. Makhulupale yaahaakhaliherya ayuda mwaha woowi Mardokeyo aari mukhulupale waavikana ootheene aya. Vano muttetthe wa oSusa, ekhotto ele yaahiphiya nihiku nikina. Nave awanani ayuda yaavikana 75.000 a omwene wa Opersia yaahipwetexiwa, ohela muhina anamwane 10 a Hamani. (Esth. 8:1–9:18) Nuumala Esteeri weemererya, Mardokeyo aahiruma wiira khula eyaakha yaahaana opakiwa efesta mahiku 14 ni 15 a mweeri wa adar, “mahiku a Purimi”, wiira atteeliweke murima, alyeeke, awuryeke ni avahananeke itthu ohela muhina waavaha atthu oothoiwa. Ayuda yaaheemererya opaka efesta eyo ni yaanaaleela atthu a osulu aya ni atthu yaataanale ni awo. Okhala wiira aari mukhulupale a nenli a omwene, ayuda yaawo yaivaherenrye wa Muluku yaanimuttittimiha Mardokeyo, nave owo khaahiyale waakhaliherya. — Esth. 9:19-22, 27-32; 10:2, 3.
Perspicaz vol. 2 epaax. 760 etti. 6
Efesta ya Purimi
Yoolakela aya. Nnaamwi atthu akina ahimyaka wiira efesta ya purimi enipakiwa ni ayuda mahiku ala, khenipakiwa ntoko efesta ya etiini nave ikwaha sikina atthu annipaka itthu sikina soohiloka, khalai okathi yaapakiwa aya efesta eyo nnakhala iyaakha saattharelana itthu iyo soohiloka khasiiraneya. Mardokeyo ni Esteeri yaari arumeyi a Yehova Muluku, nave efesta ele yaapanke wiira anvuwihe yoowo. Pooti ohimya wiira Yehova Muluku ta wooponle ayuda okathi ole, mwaha woowi itthu sootheene siiraneyale mwaha wa ororomeleya wa Mardokeyo maana owo aanooniherya wiira aamukokhorela Yehova paahi. Woonasa wene Hamani aari a nloko na amaleeki, nloko nenlo Yehova aatakhalinhe awe ni aalakenle awe opwetexa. Mardokeyo aanittittimiha nlamulo na Muluku nave aanikhootta wuurama ohoolo wa Hamani. (Esth. 3:2, 5; Okhum. 17:14-16) Nave etthu Mardokeyo aamuleenle awe Esteeri aanooniherya wiira owo aaniroromela wiira ayuda yaamopoliwa ni owerya wuulupale. (Esth 4:14), Esteeri aahitthukwa ohinatthi orowa olavula ni mwene nave okathi aamulattunle awe mwene wiira anvahe eyoolya aanooniherya wiira aavekela okhaliheriwa ni Muluku. — Esth. 4:16.
Achegue-se ipaax. 101-102 itti. 12-13
“Mmutakiheke Muluku” Murumeelaka Owerya Wawe
12 Yehova ohaathanla axitokweene wiira ahooleleke muloko wa ekristau yeekeekhai. (aHeeb. 13:17) Alopwana awo oopwanelela ahaana orumeela okhulupale avahiwa aya ni Muluku wiira akhaliheryeke ni okhapelela ipwittipwitthi sa Muluku. Niireke axitokweene awo ahaana orumeela okhulupale owo wiira yaapuheryeke atthu a mmulokoni? Nnakhala vakhaani! Alopwana awo ahaana okhalana moonelo wooloka ni okhala oowiiyeviha okathi anivara aya muteko mmulokoni. (1 Ped. 5:2, 3) Biibiliya onnaaleela axitokweene wiira: “Mweettiheke muloko wa Muluku, yoowo othumme awe ni ephome ya Mwanawe”. (Mit. 20:28) Moolumo ala annooniherya wiira axitokweene ahaana omukhapelela khula mutthu mooreerela murima.
13 Wiira nilikanyihe, nkuupuwelani wiira mpatthani anyu ohoovekelani osuka etthu awe ya efaita yinceene. Nyuwo moosuwela wiira mpatthani anyu owo othumme etthu eyo ni musurukhu munceene. Niireke khimwaarowa okhapelela saana? Moolikanasa Muluku ohaavaha axitokweene muritti wa okhapelela etthu awe ya efaita yinceene, eyo piiyo, muloko, yoowo atthu aya anilikanyihiwa ntoko ipwittipwitthi. (Yoh. 21:16, 17) Owo onnivaha efaita yuulupale ipwittipwitthi sawe seiyo othumme awe ni ephome ya mwanawe mmosa ene, Yesu Kristu. Eyo eperesu yuulupalexa othumanne awe ipwittipwitthi iyo. Axitokweene oowiiyeviha khanliyala eyo, nave annikhapelela saana ipwittipwitthi iyo sa Yehova.
Itthu sa Efaita sa Mbiibiliyani
Owehaweha 06 1/3 epaax. 11 etti. 4
Iponto Suulupale sa Eliivuru ya Esteeri
9:10, 15, 16 — Nnaamwi nlamulo nle naaweemererya ayuda okuxa mireerelo sa awanani aya, xeeni ayuda yahaakunxe aya? Moohaanyiherya yoolakela aya yaari okhapelela ikumi saya, ohiya othaaciri.
2-8 YA OUTUBRO
MIHAKHU SINIKHUMA MBIIBILIYANI | YOOBI 1-3
“Muhihiye Wooniherya Omphenta Wanyu Yehova”
Owehaweha 18.02 epaax. 7 itti. 16-17
Mutakiheke Waamini ni Wiiwelela wa Nowe, Daniyeli ni Yobi
16 Mixankiho xeeni aarina awe Yobi? Yobi yaahimukhumelela marukunuxo maalupale mookumini mwawe. Woopaceryani, Yobi aari “mutokwene mulupalexa wavikana atthu othene a ilapo s’onikhuma nsuwa”. (Yob. 1:3) Owo aari thaaciri, oovuwa ni aanittittimihiwa vanceene. (Yob. 29:7-16) Masi, Yobi khuupuwela wira aari oolokaxa waavikana akina, nnakhala khuupuwela wira khaatthuneya omukupaliki Muluku. Ninnisuwela eyo, maana Yehova aahimuhimya okhala ‘murumeyi awe’, ni aahihimya so: “[Owo] mutthu òrera murima ni naxariya, òmuttittimiha Muluku ni òkhotta sotakhala”. — Yob. 1:8.
17 Masi mootutuxerya, okumi wa Yobi waahiturukeya vanceene. Owo aahiyeleela mihakhu sawe sotheene ni aahiriipiwa murima vanceene, khiyaphavela okhwa. Vano ninnisuwela wira Satana taakumiherya mixankiho sa Yobi. Satana aahootha ohimyaka wira Yobi aamurumeela Yehova mwaha wa mihakhu sawe. (Mmusome Yoobi 1:9, 10.) Yehova khiyaamusivenle etthu eyo. Nto aarowa opaka exeeni wira ooniherye wira Satana nawoothe muulupale? Aahinvaha eparakha Yobi wira ooniherye ororomeleya wawe wa Yehova ni wira onnimphenta ni murima awe wotheene.
Owehaweha 19.02 epaax. 5 etti. 10
Nvikanihe Ororomeleya!
10 Satana onnivikaniha ovaanyiha ororomeleya wa khula mmosa a hiyo. Muniheliwa sai muhina wa mwaha ole Satana aamoothenrye awe Yobi? Tthiri Satana onihimya wira khamunimphenta Yehova ni murima anyu wotheene ni sookhumelelani mixankiho munoohiya omurumeela Yehova wira moopole okumi anyu. Tivonto, owo onnivaanyiha ororomeleya wanyu! (Yob. 2:4, 5; Wiis. 12:10) Vano muupuwele ela: Yehova ohoororomelani vanceene ni onnoovahani eparakha. Nave onnimweemererya Satana weehererya ororomeleya wanyu. Maana onnikupali wira munoovikaniha ororomeleya ni wooniherya wira Satana nawoothe. Nave-tho, Yehova ooleiherya wookhaliheryani wira nvikanihe okhala oororomeleya. (aHeeb. 13:6) Tthiri eparakha yuulupale ororomeliwa ni Mukhulupale a olumwenku wotheene! Niireke munnoona ororomeleya okhala etthu yootthuneya? Ti vooloka okhootta ovaanyiha wa Satana ni okhaliherya otteeliha nsina ni olamulelo wa Tiithi ihu. Nipakeke exeeni wira nivikanihe okhala oororomeleya?
Itthu sa Efaita sa Mbiibiliyani
Owehaweha 21.04 epaax. 11 etti. 9
Moolumo Ookiserya a Yesu Anniixuttiha Exeeni?
9 Etthu xeeni Yesu aahimmye awe? Ohalaka vakhaani okhwa, Yesu aahilavula voorunya oriki: “Muluku aka, Muluku aka, xeeni muhalaka okinyanyala?” (Math. 27:46) Biibiliya, khonitthokiherya etthu yaamwiirinhe Yesu ohimya moolumo awo. Masi hata vari siiso, nrowe niwehe etthu anniixuttiha aya moolumo awo a Yesu. Mwa ntakiheryo, mwaha woolavula moolumo ale Yesu akhwaniherya eprofesia eri Esalimo 22:2. Nave moolumo ale annooniherya oratteene wira Yehova ‘khaamwaakihenrye sootakhala sotheene’ Mwanawe. (Yob. 1:10) Yehova, aahiweemererya awanani a Mwanawe omweehererya mpakha okhwa. Nave, khuuvo pinaatamu aatonko weehereriwa onvikana Yesu. Nave-tho, moolumo a Yesu annooniherya oratteene wira aanisuwela wira khaapanke etthu yootakhala ni khaaphwanela wiiviwa.
9-15 YA OUTUBRO
MIHAKHU SINIKHUMA MBIIBILIYANI | YOOBI 4-5
“Musyakeke Soohimmwa Soohiloka”
Perspicaz vol. 1 epaax. 793 etti. 2
ELIFAZI
2. Elifazi aari mmosa a apatthani araru a Yoobi. (Yob. 2:11) Okhala wiira aari a nloko na atemani, woonasa wene aari a osuulu wa Abrahamu ni aari mmusi a Yoobi. Owo ni nloko nawe yaanisuweliwa okhala atthu a miruku. (Yer. 49:7) Wa alopwana ale araru Elifazi taari a faitaxa ni oosuweliwa, eyo enooniherya wiira woonasa wene taari muulupale waavikana akina. Ipantte sootthaaru owo tompacerya olavula nave moolumo awe tatempe waatta.
Owehaweha 05 15/9 epaax. 26 etti. 2
Musyakeke Miyuupuwelo Soohiloka!
Uupuwelelaka etthu yaamukhumelenle ekwaha emosa, Elifazi aahimmye so: “Iphumu sovekulela owitho waka, khuthukumeliha mapururu èrutthu aka. Òkikhumelela mutthu ahamusuwelaka: ari ntoko munepa oholo waka. Omàla ttu. . . Numalá kihìwa nsu.” (Yob. 4:15, 16) Munepa xeeni waaturuka moota Elifazi uupuwela awe? Moolumo oowootherya alavunle awe muhoolo mwaya, annooniherya wiira munepa ole khahiyo waari nlaikha na Muluku. (Yob. 4:17, 18) Yaari yoopattuxiwa ya omunepani yootakhala. Vaakhanle wiira khahiyo siiso, xeeni Yehova ohalaka ompwapwela Elifazi ni apatthani awe ale anli mwaha woowootha? (Yob. 42:7) Moohaanyiherya, Elifazi eettihiwa ni malaikha ootakhala. Moolumo awe yaanooniherya miyuupuwelo sawe sootakhala.
Owehaweha 10 15/2 epaax. 19 itti. 5-6
Mukhootteke Soowootha sa Satana
Satana aahimurumeela Elifazi (yoowo aari mmosa wa apatthani araru a Yoobi) wiira ohimye wiira apinaatamu toolosowa. Aahimyaka wiira atthu “ankhala ipa sootekiwa ni etthaya”. Elifazi amuhimeerya Yoobi oriki “malitti aya ari mutthayani, anninyakattiwa ntomo oweexe! Anniyariwa vaasiisu nto makaaripi anninyaanyasiwa, enalakaseya khuhooniwa-tho khaavo onaathokorerya”. — Yoobi 4:19, 20, Piipiliya Emakhuwa.
Ipantta sikina sa mbiibiliyani ninnilikanyihiwa ni ‘mwaapu wa oloko’. (2 aKor. 4:7) Hiyo noolosowa mwaha wa etampi niravihiwa ahu. (aRom. 5:12) Nihikhaliheriwaka, hiyo pooti ohiwerya osyaka miraakho sa Satana. Masi ntoko makristau ninnikhaliheriwa khula okathi. Nnaamwi niri ene ootteettheya Muluku onninivaha efaita. (Yes. 43:4) Ohiya-vo, Yehova onnaavaha munepa awe woowaarya ale aninvekela. (Luka 11:13) Munepa awe woowaarya onninivaha “owerya onivikana wa mutthu”, onnikhaliherya ovilela khula muxankiho Satana onnikumiherya awe. (2 aKor. 4:7; aFil. 4:13) Namukhootta Diabo ni “waamini woolipa”, Muluku onoonivaha ikuru wiira nikhale oolipa ni oohittikinyeya. (1 Ped. 5:8-10) Nto, nihikhala-khale nimoovaka Satana, Diabo.
Outros Assuntos epaax. 32 itti. 13-17
Musyakeke Soohimmwa Soohiloka
● Nvareryeke Opuro Sinikhuma Aya ni Etthu Sinihimya Aya
Ele Biibiliya onihimya awe: “Nvareryeke itthu sotheene”. —1 aTesaloonika 5:21.
Muhinatthi okupali itthu sinihimmwa aahiiso waaroihela aatthu akina hata elaleiwale ene vanceene aahiiso ikwaha sinceene, nvareryeke yaari ekeekhai. Moota xeeni?
Nweheke akhala wiira opuro ehimmwale aya owo ti woororomeleya. Mitthenkeso sinilaleya ihapari aahiiso sikina pooti oturuka mwaha mmosa wiira okhaliheryeke moonelo aya voohimya sa nakoso aahiiso epoliitika. Mulikanyiheke itthu muniweha anyu mpantta mmosa ni sinihimmwa mpantta mukina. Ikwaha sikina, apatthani voohisuwela pooti olaleya itthu soowoothiwa arumeelaka mesaxem aahiiso redes sociais. Nto, muhiroromeleke soohimmwa muhinatthi osuwela opuro sinikhuma aya.
Nvareryeke akhala wiira soohimmwa iyo ti sa niinaano ni seekeekhai. Nweheke nihiku sikhumelenle aya, akhala wiira vanniweryaneya wiira siiso ni itthu sinooniherya wiira tthiri itthu iyo sihiiraneya. Mukhalaneke ephoole yuulupale vakhala wiira etthu eyo enihimmwa, mwaha muulupale masi onakhalihiwa ntoko ti wookhweya aahiiso akhala wiira mwaha owo oniirela waahakalaliha atthu paahi.
Itthu sa Efaita sa Mbiibiliyani
Owehaweha 03 5/15 epaax. 22 itti. 5-6
Muhikhulumuwe Mutthimakeke wiira mphwanye Ekumi
Wiirela mpantta mutthenkeso wa ekristau yeekeekhai wa olumwenku wootheene etthu ya efaita ni ennikhaliherya okhala oohikhulumuwa. Tthiri mareeliho maalupale okhala vamosa ni anna ni arokora oophenta a olumwenku wootheene! (1 Ped. 2:17) Nave okhala ni anna awo enninikhaliherya okhala ohikhulumuwa.
Muthokorerye miteko soolipiha sa naxariya Yoobi. Elifazi yoowo aari namavaha oohiloka aahihimya oriki: “Molumo anyu yaniwemexa alipa-òveveleya: yanilipiherya makutha òttèttheya”. (Yob. 4:4) Exeeni nikhanle ahu oopaka? Khula mmosa a hiyo ookhalana muritti woowaakhaliherya anna ni arokora wiira ahihiye ovara muteko wa Muluku. Okathi ninkhala ahu ni awo, nihaana waathokorerya nittharaka miruku iya siri mbiibiliyani: “Mulipihe matata attèttheiye, mulipihe makutha alosonwe”. (Yes. 35:3) Mukhaleke yoolukama ya omulipiha munna mmosa wala anli khula okathi munikumana anyu. (aHeeb. 10:24, 25) Mulavuleke moolumo oolipiha ni ooxukhurela mwaha wa wiimananiha wawe ohihiya omuhakalaliha Yehova. Mwiira siiso, munoomukhaliherya ohikhulumuwa ni ohihiya otthimaka wiira ophwanye okumi.
16-22 YA OUTUBRO
MIHAKHU SINIKHUMA MBIIBILIYANI | YOOBI 6-7
“Okathi Okumi Anyu Onisareya Aya Mixankiho Muhinawerya Ovilela”
Owehaweha 06 15/3 epaax. 14 etti. 10
Iponto Suulupale sa Eliivuru ya Yoobi
7:1; 14:14 — Antaphulela exeeni moolumo oowi “mukhalelo w’anakhotto”? Makhalelo a Yoobi yaari ooxankiha, nto owo aahilikanyiha ni makhalelo aanakhotto yaawo yaari oovila ni oowoma. (Yob. 10:17) Moolikanasa, vaavo mutthu akhwa oniviriha awe okathi ari ene mmahiye mpakha okathi onrowa awe ohihimuxiwa, owo aahilikanyiha okathi owo wootheene mutthu oniviriha awe ntoko mukhalelo wa nakhotto.
Owehaweha 20.12 epaax. 16 etti. 1
“Yehova Onniwoopola Atthu Akhulumunwe”
OKATHI mukina ninnoona wira okumi ahu onnaakuva omala ni ‘onnisareya ohawa’. (Yob. 14:1) Nto ninniweha etthu enniiriha okhulumuwa okathi mukina. Arumeyi anceene a Yehova a khalai yaahikhalana muxankiho owo. Akina yaaniphavela okhwa. (1 Mam. 19:2-4; Yob. 3:1-3, 11; 7:15, 16) Masi hata vaari siiso, Yehova, Muluku yoowo yaamuroromela aya aanaamaaliha ni waalipiha. Nto sowiiraneya saya soolempwa mBiibiliyani wira siniixuttiheke. — aRom. 15:4.
Nvenye! 12/1 epaax. 16-17
Niireke Mookhalana Muxankiho Munuupuwela Anyu Wiira Khonrowa Omala?
Woonasa wene munoona wiira khamunrowa owerya oxintta muxankiho anyu, masi muhiliyale wiira khamukhanle mekhinyu anna ni arokora a olumwenku wootheene sinaaphwanya mixankiho simosa-ru. Biibiliya onihimya so: “Soopattuxiwa sotheene sinnuupulela vamosa ni sinnihaawa vamosa”. (aRom. 8:22) Veekeekhai nyuwo pooti ohikupaliki wiira muxankiho murina anyu onoovira moowaakuveya, masi vaavo okathi onivira aya, muxankiho owo onnivira. Nilipelelaka okathi owo, exeeni enrowa onikhaliherya?
Mmuleeleke mpatthani anyu muulupale ni oororomeleya. Biibiliya onihimya so: “Mpatthani onnimphenta mpatthani awe okathi t’ukathi: onnisuwanyeya okhala munn’awe okathi w’oxanka”. (Mir.17:17) Yoobi, Mulopwana a xariya oniromoliwa mbiibiliyani, aahihimya itthu saamukhumelela okathi aaviriha awe mixankiho. Okathi oona awe wiira “ekumi yomphweela”, moovarihana ni moota aalavunle awe, owo aahimmye so: “Kinrowa olavula n’uripiwa waka murima”. (Yob. 10:1) Ovaanela ni atthu akina mwaaleelaka mixankiho sanyu, pooti ovukula oriipiwa wanyu murima ni wookhaliheryani oweha mixankiho sanyu mwa enamuna yooloka.
Mmutthukuleleke murima anyu Muluku munvekelaka. Atthu akina, anuupuwela wiira ovekela khonikumiherya mireerelo sinikhaliherya, masi ele onihimya awe Biibiliya ti yoovirikana ni ele atthu anuupuwela aya. Esalmo 65:3 ennimuhimya Yehova Muluku, okhala mulipa ‘oniiwa mavekelo’ nave 1 Pedru 5:7 onihimya so: “owo onnookhapelelani”. Biibiliya onnintumererya ikwaha sinceene oweha efaita erina aya omuroromela wahu Muluku. Mwa ntakiheryo:
“Mwaroromeleke Apwiya ni murim’anyu wothene: muhiroromelé osuwela wanyu pahi! Nwupuwele Apwiya mothene munettanyu: awo anolokiha iphiro sanyu”. — MIRUKU 3:5, 6.
“Apwiya [Yehova] annavaha simphavelaya ale anattittimiha: anniwiriyana okhuwela waya, khuwòpola”. — ESALIMO 145:19.
“Hiyo ninniroromela wira Muluku onooniwiriyana wa khula etthu eninvekela ahu, enivarihana ni ele oniphavela awe”. — 1 YOHANI 5:14.
“Apwiya anniwiriyana mavekelo a naxariya: annikhala ottaiwene n’atthu òtakhala”. — MIRUKU 15:29.
Akhala wiira munoomuleela Muluku mixankiho sanyu, owo onimookhaliheryani. Nto ti nthowa naya Biibiliya onnitumererya awe oriki: “Mwaroromele Apwiya mahiku othene” ni “mwahimerye ovelavela wanyu wothene”. — Esalimo 62:9.
Itthu sa Efaita sa Mbiibiliyani
Owehaweha 20.04 epaax. 16 etti. 10
Nwiriyane, Musuwele ni Mukhalaneke Othunku
10 Nnoowerya omutakiha Yehova vaavo nniimananiha ahu osuwela moonelo wa anna ni arokora. Nto mwiimananiheke waasuwela saana anna ni arokora awo. Nave nvaaneleke ni anna ni arokora sihinatthi ni nuumala mithukumano, mulaleeryeke vamosa ni vaaweryaneyaka mwaalattuleke owannyu wira mulye vamosa. Opaka eyo, munimoona wira munna yoole muupuwela anyu wira omusivela muhakhu, onnisuwela owaakhela aletto, wala mutthu yoole ommakela opisa ophiya omuthukumanoni onnilupatthiwa. (Yob. 6:29) Tthiri ekeekhai wira khinimphavela wiihela muhina myaha sihinniira mpantta. (1 Tim. 5:13) Masi vannireerela osuwela itthu sinaakhumelela anna ni arokora. Maana opaka eyo, enoonikhaliherya waasuwela oratteene.
23-29 YA OUTUBRO
MIHAKHU SINIKHUMA MBIIBILIYANI | YOOBI 8-10
“Ophenta Woororomeleya wa Yehova Onninikhaliherya Ohiwokiwa ni Satana”
Owehaweha 15 7/1 epaax. 12 etti. 3
Niireke Nnoowerya Omuhakalaliha Muluku?
Yobi saahimphwanya mixankiho sinceene seiyo oona awe ohikhala sa xariya. Owo aahipacerya woonaka wira Muluku khanimuthokorerya mutthu hata yoole onivikaniha omwaamini. (Yob. 9:20-22) Yobi aaniixoona okhala mutthu axariya, nto eyo yaaniwiiriha atthu akina wuupuwelaka wira owo aaniihimya okhala a xariya onvikana Muluku. — Yob. 32:1, 2; 35:1, 2.
Owehaweha 21.11 epaax. 6 etti. 14
Ophenta Wekeekhai wa Yehova Ontaphulela Exeeni?
14 Ophenta wekeekhai wa Muluku onninikhaliherya okhapelela waataana wahu ni yena. Onvekelaka Yehova, Davidi aahimmye so: “Nyuwo mwà ntthyawelo naka: munnikisuka okathi woxanka. Miyo kinnitthapa, kilaleyaka okòpola wanyu. . . .Vano ale animuroromela Muluku, anorerihiwa ni waphenta wawe”. (Esal. 32:7, 10) Khalai ixiri suulupale, saanirukurerya epooma ni saanaakhapela atthu yaakhala epooma eyo wira ahitupheliwe ni awanani aya. Mwa enamuna emosaru, ophenta wekeekhai wa Yehova ori ntoko ixiri sinnikhapelela wira ehikhale etthu yaarowa ohonona waataana wahu ni Yehova. Nave ophenta wekeekhai wa Yehova, onninikhaliherya omwaattamela. — Yer. 31:3.
Itthu sa Efaita sa Mbiibiliyani
Owehaweha 10 15/10 ipaax. 6-7 itti. 19-20
“Ti pani Osuwenle Muupuwelo wa Yehova?”
19 Exeeni nniixutta ahu ni “muupuwelo wa Yehova”? Nniixutta wiira nihaana weemererya wiira Nuulumo na Muluku nniixuttiheke voohimya sa muupuwelo wa Yehova. Nihikhala-khale nimphukelaka Yehova moovarihana ni moonelo ahu, malamulo ahu ni moota nnuupuwela ahu. Yoobi aahimmye so: “Muluku khahiyó mutthu ntoko miyo, wira kakhulane ni wira kimukumiherye mulattu”. (Yob. 9:32) Ntoko Yoobi, vaavo nimpacerya ahu wiiwexexa muupuwelo wa Yehova, nihihiye wuupuwela moolumo ala: “Sothene iya t’ipantte yamukhani ya miteko sawe: ti namalwe pahi a molumo awe. Vano t’ani onwerya osuwela ovuwa wothene w’owerya wawe?” — Yob. 26:14.
20 Okathi nimmusoma ahu Biibiliya, ni nnaphwanya yoolepa yoovila wiiwexexa, otepexa wene enivarihana ni muupuwelo wa Yehova, exeeni nikhanle ahu oopaka? Akhala wiira nnootokosa mwaha owo masi nihinaphwanya etthu eniphavela aya ohimya, hiyo pooti woonaka ntoko muxankiho oneehererya omuroromela wahu Yehova. Masi nihiliyale ela, ikwaha sikina myaha iyo pooti onivaha eparakha wiira nooniherye waamini wahu mikhalelo sa Yehova. Moowiiyeviha nihaana osuwela wiira khaninrowa owerya wiiwexexa itthu sootheene opanke awe. (Mus. 11:5) Niira siiso, eyo enoonikhaliherya okupali moolumo a murummwa Paulo aahimmye awe oriki: “Tthiri, mareeliho, ni ankhili, ni osuwela wa Muluku, ti sootepa waatta. Khuuvo oniwerya osuwelexa ophukela wawe, nave khuuvo oniwerya osuwela iphiro sawe! “Ti pani osuwenle muupuwelo wa Yehova, aahiiso ti pani oninvaha miruku?” Aahiiso, “niireke ookhala mutthu opacenrye onvaha etthu Muluku, wira Muluku owo omuttikiherye?” Nnaari, okhala wira owo oopaka itthu sotheene, ni onnikhaliha itthu sotheene, ni itthu sotheene sinimukhalela yoowo. Owo onnireerela ovuwihiwa mahiku otheene. Amen”. — aRom. 11:33-36.
30 A OUTUBRO–5 A NOVEMBRO
MIHAKHU SINIKHUMA MBIIBILIYANI | YOOBI 11-12
“Inamuna Tthaaru Sinrowa Onikhaliherya Okhalana Miruku ni Ottottela Mureerelo”
Owehaweha 09 15/4 epaax. 6 etti. 17
Yoobi Aahivuwiha Nsina na Yehova
17 Exeeni yaamukhalihenrye Yoobi ohihiya omuroromela Yehova? Moohaanyiherya, sihinatthi omphwanya mixankiho, owo aahikhalana opatthani wuulupale ni woolipa ni Yehova. Nnaamwi sihikhanle itthu sinooniherya wiira Yoobi aanisuwela wiira Satana taakumiherya mixankiho iye ophavelaka omweehererya Yehova, owo aahilakela ohihiya okhala oororomeleya. Yoobi aahimmye so: “Kinolaleya ohittheka waka mpakha okhwa”. (Yob. 27:5) Masi Yoobi aawenrye sai okhalana ompatthani wuulupale ni Yehova? Okhala wiira, owo aanikupali itthu aiwale awe sa moota Yehova aathokorenrye awe arumeyi awe ntoko Abrahamu, Isakhi ni Yakobo, yaawo yaari amusi awe. Nave, oweha soopattuxiwa, yaahimukhaliherya Yoobi osuwela mikhalelo sa Yehova. — Mmusome Yoobi 12:7-9, 13, 16.
Owehaweha 21.06 ipaax. 10-11 itti. 10-12
Nyuwo Khamukhanle Mekhinyu, Yehova Ori ni Nyuwo
10 Mwaapakeke opatthani anna a mmulokoni yaawo anrowa owiixuttihani itthu sooloka ni woovahani ntakiheryo nooloka. Awo pooti okhala oowuuluvala ni a makhalelo oovirikana. Biibiliya onihimya wira: “Ankhili anetta n’atthu òwuluvala”. (Yob. 12:12) Nave, atthu oowuuluvala pooti wiixutta itthu sinceene ni amiravo a mmulokoni. Davidi aari mmiravo namulikanyiha ni Yonathani. Masi hata vaari siiso, eyo khiyaakhoottihenrye okhala apatthani ooloka. (1 Sam. 18:1) Musuweleke wira, Davidi ni Yonathani yaanikhaliheryana mukina ni mukhwaawe ohihiya omukokhorela Yehova hata yaarina mixankiho sinceene. (1 Sam. 23:16-18) Murokora oniihaniwa Irina yoowo ori Namoona a Yehova mekhawe mweemusini mwawe, onihimya so: “Anna ni arokora a mmulokoni pooti okhala anamuyari ahu ni axinnihu niyaraniwa ahu erukulu emosa. Yehova pooti owiiriha okhala emusi nimphavela ahu”.
11 Waapaka apatthani asya khivanikhweya otepexa wene akhala wira mwa mutthu oowuuliwa muru. Murokora oowuuliwa muru oniihaniwa Ratna yoowo iixuntte ekeekhai nnaamwi aalupatthiwa onihimya so: “Tthiri kaahoona wira kaahaana okhaliheriwa ni anna ni arokora a mmulokoni”. Pooti woovilani waaleela atthu akina moonelo anyu. Masi musuweleke wira ovaanela mootaphuwa onninikhaliherya okhalana apatthani eekeekhai. Apatthani anyu anniphavela wookhaliheryani ni woolipihani. Masi nyuwo muhaana owooniherya moota akhanle aya oopaka eyo.
12 Enamuna emosa yuulupale enrowa wookhaliheryani waapaka apatthani, ori wiirela mpantta muteko woolaleerya ni anna ni arokora akina. Carol nimulavunle ahu wanipacerya onihimya so: “Wiirela mpantta muteko woolaleerya ni miteko sikina sa omunepani wookikhaliherya waapaka apatthani eekeekhai. Mwa iyaakha sinceene, Yehova onnaaruma apatthani aka awo wira okikhaliherye”. Ti vooloka wiimananiha okhala apatthani a anna ni arokora oororomeleya. Tthiri Yehova onnaaruma apatthani ahu awo wira onikhaliherye owanana mixankiho sahu ntoko omeekha. — Mir.17:17.
Perspicaz vol. 2 epaax. 886 etti. 5
Ankhili
Ankhili anikhuma wa Yehova. Ankhili, eekeekhai moohaanyiherya anikhuma wa Yehova, maana ‘yoowo paahi tori musuweli’. (aRom. 16:27; Wiis 7:12) Osuwela oniirela mpantta itthu sinooneya, okhala wiira Yehova mpattuxa, owo onikhala “okhuma wopajeryani mpakha mahiku othene”. (Esal. 90:1, 2) Yehova onnisuwela itthu sootheene sinireerela osuweliwa voohimya sa olumwenku, itthu sirumenle awe ni sikhanle mulaponi, okhuma khalai mpakha olelo-va. Malamulo, itthu sinooneya ni malakiheryo apinaatamu anirumeela aya wiira atokose aahiiso wiira apake itthu, sootheene sipattuxiwe ni Yehova. Vaakhanle wiira khopattunxe itthu iyo, apinaatamu khiyaarowa owerya otokosa nnakhala opaka itthu aniwerya aya olelo-va. (Yob. 38:34-38; Esal 104:24; Mir. 3:19; Yer. 10:12, 13) Veekeekhai, mikhalelo sooreera sa Yehova sinnikhaliherya okhala oovareleleya, okhalana mukhalelo wooloka ni okumi wa apinaatamu okhala wooloka. (Otum. 32:4-6; moone wiira YEHOVA [miteko sawe ti sooloka].) Khiyaavo etthu ohinsuwela awe. (Yes. 40:13, 14) Nnaamwi owo eemereryaka wiira itthu soohiloka sinihonona malamulo awe sitepaka wuncerereya, itthu sa muhoolo owo onnisuwela ni sinimwiiraneya ntoko owo oniphavela awe. Nave itthu sootheene ohimmye awe ‘sinimwiiraneya’. — Yes. 55:8-11; 46:9-11.
Itthu sa Efaita sa Mbiibiliyani
Owehaweha 08 8/1 epaax. 11 etti. 5
Ovaanela ni Amiravo
▪ ‘Kiireke kinniiwexexa etthu aniphavela aya ohimya moolumo anilavuliwa?’ Yoobi 12:11 onihimya so: “Màru t’anìwa masu: eyano t’inilawiha yolya”. Okhuma nenna-va muhaana ‘ophavelasaka’ wiiwexexa etthu mwaninyu onilavula awe. Okhala wene amiravo anilavula ehuupuwenle saana. Mwa ntakiheryo, mwaninyu pooti ohimyaka so: “Nyuwo khula okathi munikithokorerya ntoko mwaana!”, aahiiso “nyuwo khamunikiwiriyana!”. Ohiya ompwapwela mwaninyu wala ohuupuwela saana sa moota orumenle awe moolumo oowi “khula okathi” ni “khamunikithokorerya”, Musuweleke wiira mwaninyu khahiyo onihimya okhala wene. Mwa ntakiheryo, “Nyuwo khula okathi munikithokorerya ntoko mwaana” pooti otaphulelaka wiira “kinoona wiira nyuwo khamunikiroromela”, nave molumo oowi “yuwo khamunikiwiriyana” woonasa wene pooti otaphulelaka wiira “miyo kiniphavela ohimya moonelo aka paahi”. Nto mmananiheke wiiwexexa etthu aniphavela aya ohimya moolumo anilavuliwa.