Yesu ni awiixutti awe yaahiviriha mahiku mararu oBethania, okhuma vaavale yaaphiyale aya oYerikho. Vano waari vaasiisu wa Segunda-feira, nihiku 10 na Nisani, nto aahirowa oYerusalemu. Yesu aahivoliwa etala. Nuumala Yesu oweha mwiri wa efiigu, aahirowa vamwirini vale. Niireke aahiphwanya mihokorokho?

Vano waari wanikisa wa mweeri wa Março. Ole khahiyo waari okathi wa ifiigu, maana saima mweeri wa Junyo. Masi mwiri ole waahikhalana makukhu, woonasa wene waakunve ophuwa. Nto eyo yaahimwiiriha Yesu woona wira saahikhala mihokorokho. Yesu aahoona wira khisaakhanle mihokorokho. Makukhu ale yiiriha mwiri ole okhalaka ntoko waahiima. Nto Yesu aahihimya wira: “Ahikhalé-tho onrowa olya mihokorokho sawo mpakha wanikelela”. (Marko 11:14) Vano mwiri ole waahipacerya wuuma, nto yootaphulela aya, Yesu aarowa otthokiherya vaasiisu, nihiku naattharelana.

Moohipisa, Yesu ni awiixutti awe yaahiphiya oYerusalemu. Nto aahirowa otemplo, weiwo aaphiyale awe makaaripi wa nihiku naavinre. Nihiku nne Yesu, khaavarenrye etemplo paahi. Masi aahipaka etthu emosaru aapanke awe iyaakha tthaaru saavinre, nihiku na Paasikha a 30 EC. (Yohani 2:14-16) Okathi ole Yesu aahiwoomola “ale yatumiha ni yathuma”. Nave Yesu aahipittula “mesa àlipa-òwakakhanya musurukhu ni minyukhu s’ale yatumiha ipomba”. (Marko 11:15) Yesu khaaweemerenrye atthu okuxa miritti saya arowaka mpantta mukina wa epooma. Nnakhala ovira vate va etemplo wira yaakuve ophiya.

Xeeni Yesu aawoomonle awe ale yaakakhanya musurukhu ni ale yaatumiha inama mutemplo? Yesu aahimmye so: “Khivalempwe wira: ‘Emp’aka yakhalele empa y’olompa atthu a maloko othene’? Nto nyuwo mokhaliha nikhuku n’anawiye”. (Marko 11:17) Etthu yaamwiirinhe Yesu waahimya atthu ale okhala anawiiye, okhala wira awo yaaniweliha ipereso, awiiyeryaka musurukhu munceene atthu ale yaaphavela othuma inama wira avahe mukuttho. Etthu yaapaka aya atthu ale, Yesu aahoona okhala wiiya aahiiso onatarawu.

Tthiri nuumala akhulupale a anamukuttho, alipa-oolepa ni makhulupale makina, wiiwa etthu Yesu aapanke awe, awo yaahiimananiha ophavela omwiiva. Masi awo yaahikhalana muxankiho. Maana khiyaasuwela enamuna ya onvara Yesu, okhala wira atthu yaahimurukurerya ananwiriyana.

Niira nne na Paasikha yaahikhala aYuda axiineene ni atthu ale yiikhalinhe aYuda, niire so, atthu yaale yaakenle etiini ya aYuda. Opuro ole yaahikhala aGriki yaarwenle niira na okokhorela. Atthu awo yaahimwaattamela Filipi, woonasa wene mwaha wookhalana nsina na eGriki, maana yaaphavela onweha Yesu. Pooti wira Filipi oona wira khivaareerela, nto aahirowa ovaanela ni Andreya. Oowanli aya yaahirowa omuleela Yesu woonasa wene aari mutemplo.

Yesu aahisuwela wira yaahanle mahiku vakhaani wira iiviwe, tivonto, aahisuwela wira ole khahiyo waari okathi woophavela waasiveliha atthu. Yesu aahirumeela nlikanyiho wira owaakhule arummwa ale anli, oriki: “Okathi w’ovuwihiwa Mwana a mutthu wophiya. Kinohimeryani ekhweli wira: epyó ya trigu yamorela vathí, khuhikhwá, enkhala emosaru yeyo pahi. Vano epyó eyo yakhwá, ennìma mihokorokho sinjene”.​—Yohani 12:23, 24.

Epyo ya etrigu etthu yaamukhaani. Vaavo enaaliwa aya, enakhala ntoko ‘eri mokhwa’ eyo ennimela nto enannuwa mpakha okumiherya makala manceene. Moolikanasa Yesu aari mutthu oomalela. Masi mwaha woororomeleya mpakha okhwa, owo oohula ephiro wira atthu otheene aniikhootta aphwanye okumi woohimala. Yesu aahimmye wira: “Ole omphenta ekumi awe, enomurimela: vano ole ohinthokorerya ekumi awe vathí-va, onosukerya ekumi yohimala”.​—Yohani 12:25.

Khahiyo wira Yesu iisuupuwela mmensawe paahi, maana aahimmye so: “Akhalá ontthuna okirumela, akitthareke: weiwo onrowaka okhala, nave-tho arumeyi aka onokhalaka weiwo. Akhalá mutthu onkirumela, Atithi aka anomuttittimiha”. (Yohani 12:26) Ale anttittimihiwa ni Tiithi anrowa olamulelaka ni Kristu Momweneni. Tthiri ela etthuvo yuulupale!

Osuwelaka wira aarowa ohaawa vanceene ni okhwa woowereya, Yesu aahimmye wira: “Vano murim’aka wokìna. Vano, kihimyé exeni? Kihimyé wira: ‘Tithi! Mukàkiherye okathi ula w’ohawa’?” Masi khahiyo wira Yesu aakhootta omaliherya yootthuna ya Muluku. Yesu aahincererya oriki: “Nto, ohawa wenno kirwenlyaka okathi ula”. (Yohani 12:27) Yesu aaneemererya itthu sotheene Muluku aaphavela awe, ohela muhina ovahererya okumi awe ntoko yowoopola.

Segunda-feira 10 a Nisani, Yesu aahilavula otemplo voohimya sa okhwa wawe. Nto uupuwelaka moota atthu yaarowa aya woonela nsina na Muluku, Yesu aahimmye wira: “Tithi, nvuwihe nsina nanyu!” Vano naahiiwanyeya nsu naakhuma wiirimu nriki: “Kovuwiha, nave kinovuwiha-tho”.​—Yohani 12:27, 28.

Atthu yaattamenle yaahitikinihiwa. Nto yuupuwela wira yiiwale etari. Akina yaahimmye so: “Nlaikha ti nimulavulinhe!” (Yohani 12:29) Masi, atthu ale yiiwale nsu na Yehova, maana taalavunle! Nave ele khahiyo yaari ekwaha yoopacerya apinaatamu wiiwa nsu na Muluku voohimya sa Yesu.

Okathi Yesu aabatiziwa awe iyaakha tthaaru nnimeya saavinre, Yohani Mbatiza aahimwiiwa Yehova ohimyaka wira: “Ola Mwan’aka onimphentexaka: miyo kosiveliwa ni yowo”. Muhoolo mwaya nuumala Paasikha a 32 EC, Yesu aahithatuwa ohoolo wa Yakobo, Yohani ni Pedru. Alopwana ale araru yaahiiwa nsu na Muluku nihimyaka wira: “Ola ti Mwan’aka onimphentexaka: yola t’osiveliwa waka. Mmwiweleleke yola!” (Matheyo 3:17; 17:5) Tthiri ole waari okathi wa neeraru, Yehova aalavunle awe mwa enamuna yaiwale aya atthu anceene!

Yesu aahimmye wira: “Nsu nla khinikhumelenle mwaha wa miyo: nikhumelenlé mwaha wa nyuwo”. (Yohani 12:30) Eyo yaahooniherya wira Yesu Mwaana a Muluku, Mesiya yoowo aaleiheriwe.

Ohiya-vo, ororomeleya wa Yesu waahooniherya moota apinaatamu anitthuneya aya orumeela okumi aya wira yooniherye wira Satana Diabo, namalamulela a olumwenku ola, onniphwanela opwetexiwa. Yesu aahimmye wira: “Okathi ula, okathi w’ophukiwa olumwenk’ula. Okathi ula, ole onruma vathí-va, onimomoliwa”. Ohiya oxinttiwa, okhwa wa Yesu waarowa okhala oxintta wuulupale. Moota xeeni? Yesu aatthokihenrye so: “Vano miyo, kathomeiwa mulaponi, kinimwìruhela atthu othene”. (Yohani 12:31, 32) Mwaha wa wiiviwa vamwirini va nihaaxeryo, Yesu aarowa wiiruuhela atthu akina, otthukulaka ephiro wira aphwanye okumi woohimala.

Waakhulaka ele Yesu aahimmye awe wira aahaana “othomeiwa”, muttitthi ole waahimmye wira: “Hiyo nosuwela Nulumo nihimyalé wira Kristu onokhala mahiku othene. Vano muniwerya sai ohimya wira Mwana a mutthu ohana othomeiwa? Mwan’owo a mutthu t’ani?” (Yohani 12:34) Nnaamwi saakhanle sowooniherya ohela muhina wiiwa nsu na Muluku, atthu anceene khiyeemererya wira Yesu aari tthiri Mwaana a mutthu, niire so, Mesiya aaleiheriwe.

Ntoko aahimmye awe vahinatthi, Yesu aahilavula wira aari “warya”. (Yohani 8:12; 9:5) Vano Yesu aahitumererya muttitthi ole oriki: “Warya ori ni nyuwo nlelo okathi vakhani. Mwetteke munari ni warya, wira epiphi ehophwanyeni . . . Mukhalanaka warya, mwamini warya iwo, wira mukhalé anamwane a warya”. (Yohani 12:35, 36) Nuumala-vo, Yesu aahikhuma, okhala wira 10 a Nisani khahiyo naari nihiku aarowa awe wiiviwa. Yesu aarowa “othomeiwa” vamwirini va nihaaxeryo nihiku na Paasikha, 14 a Nisani.​—aGalasia 3:13.

Okathi nnuupuwelela ahu muteko woolaleerya wa Yesu, ninnoona wira eprofesia yaahiiraneya vaavo aYuda yahaamwaamini aya Yesu. Profeta Yesaya aahihimya vahinatthi wira atthu ale khiyaarowa woonaka, wiiwaka ni yaarowa olipiha mirima saya vahiweryaneyaka ovonihiwa. (Yesaya 6:10; Yohani 12:40) Tthiri aYuda anceene yaahilipiha mirima saya, ahaaminiki itthu sooniherya wira Yesu aari Moopoli aya, aahiiso ephiro wira aphwanye okumi.

Nikodemo, Yosefe a wArimathaya ni makhulupale makina a aYuda, “yahimwamini” Yesu. Niireke yaamooniherya waamini waya aahiiso yaamuhiya waamini iwo mwaha wa woova woomoliwa osinagoga aahiiso mwaha ‘wosiveliwa ovuwihiwa n’atthu’?​—Yohani 12:42, 43.

Yesu aahihimya ele enihela aya muhina omwaamini, oriki: “Ale anikamini, khanikamini miyo: animwamini ole okirumme”. Ikeekhai Yesu aalaleya awe saari sa Muluku. Ahaana owiixuttiha atthu okhala wira ti sootthuneya, tivonto aahimmye awe wira: “Ole onkikhotta, ahinìwelela molumo aka, òkhalana mphuki awe: molumo kilaleiyaka t’anrowa omulamula nihiku nokiserya”.​—Yohani 12:44, 45, 48.

Yesu aahimaliha oriki: “Vekekhai, miyo nkilavunle mmansaka: Atithi akirumme t’akilènle sarowaka ohimya ni olaleya. Nave miyo kosuwela wira soruma saya sinniphwanyiha ekumi yohimala”. (Yohani 12:49, 50) Yesu aanisuwela wira moohipisa ephome awe yaarowa oyiihiwa ntoko mukuttho wira owoopole apinaatamu animwaamini.​—aRoma 5:8, 9.