Inamuna Sa Wuncererya Muteko Ahu

OKATHI Yesu aarumme awe awiixutti awe orowa olaleya Omwene, owo aahimmye so: “Solya khirere . . . masi alipa-òhatta ari vakhani”. Okhala wira khiwaareere muteko, Yesu aahincererya oriki: “Munvekeleke mwanene ematta, wira àrumihele anamuteko mmatta mwawe”. (Math. 9:37, 38) Yesu aahaaleela awiixutti awe moota woopaka muteko owo. Nto moolumo awe yaanooniherya wira aahimya etthu yaareerela ovariwa moowaakuveya oriki: “Khamunimaliha wettetta mittetthe sothene sa Isarayeli, Mwana a mutthu ahirwiye”.—Math. 10:23.

² Nave olelo-va, wookhala muteko munceene ninreerela ahu ovara wira naakhaliherye atthu. Tthiri ihapari sooreera sa Omwene sihaana olaleiwa wanikisa ohinatthi ophiya, nto okathi oniira omalaka! (Mar. 13:10) Nto okhala wira ematta olumwenku, hiyo nave ninnikumana muxankiho onlikana ni ole Yesu ni awiixutti awe yaarina aya, nave muxankiho ahu muulupale. Nri anamuteko vakhaani nailikanyiha ni ibilyau sa atthu olumwenku wotheene, masi hata vari siiso, nihaana okupali wira Yehova onoonikhaliherya. Tthiri ihapari sooreera sa Omwene sinoolaleiwa olumwenku wotheene, nave waphiya okathi wooreerela wa Yehova, wanikisa onoophiya. Nto niireke nnoohela Omwene nipuro noopacerya mweekumini mwahu wira nivare moomalela muteko ahu? Nave soolukama xeeni sa omunepani ninreerela ahu okhalana wira niwerye ovara muteko ola?

³ Yesu aahitthokiherya ele Yehova onaavekela awe arumeyi awe oowiivahererya oriki: “Mwaphenteke Apwiya Muluku anyu ni murim’anyu wothene n’iroho anyu yothene n’usuwela wanyu wothene n’ikuru sanyu sothene!” (Mar. 12:30) Nto nihaana onvarela muteko Muluku ni ikuru sahu sotheene. Vaavo nniimananiha ahu opaka sotheene ninwerya ahu muteko wa Yehova, ninnooniherya wira wiivahererya wahu wa yena ti wa murima wotheene. (2 Tim. 2:15) Otheene ahu nookhalana eparakha ya ovara muteko ola, moovarihana ni makhalelo ahu ni itthu khula mmosa onwerya awe opaka. Nwehe itthu iyo nrina ahu eparakha yoopaka ni nwehe soolukama soomunepani nyuwo mukhanle anyu oowiimananiha ophwanya vaavo munivara anyu muteko ola.

NAMALALEERYA A MMULOKONI

⁴ Atthu otheene aneemererya ekeekhai ahaana olaleya ihapari sooreera. Yesu taavanhe awiixutti awe muteko woolaleerya. (Math. 24:14; 28:19, 20) Okhala wene, mwiixutti a Yesu Kristu onnipacerya olaleya ihapari sooreera okhuma okathi oniiwa awe. Eyo ti etthu Andreya, Filipe ni Korneliyo yaapanke aya. (Yoh. 1:40, 41, 43-45; Mit. 10:1, 2, 24; 16:14, 15, 25-34) Niireke eyo enitaphulela wira mutthu pooti opacerya waalaleerya ihapari sooreera atthu akina ohinatthi opatisiwa? Aayo! Okhuma okathi mutthu oneemereriwa awe okhala namalaleerya oohipatisiwa mmulokoni, owo onnikhalana eparakha ya olaleerya ni muloko empa ni empa. Nave, moovarihana ni mikhalelo sawe, owo pooti wiirela mpantta inamuna sikina sa olaleerya.

⁵ Nuumala namalaleerya opatisiwa, moohaanyiherya owo onimwiimananihaka waakhaliherya atthu akina osuwela ihapari sooreera. Atthu otheene, alopwana ni athiyana aakhalana eparakha ya ovara muteko woolaleerya. Nookhalana eparakha hata ekhalaka vakhaani ya olaleya miteko sa Omwene wa Muluku. Akhala wira nnoottottela mureerelo khula enamuna ya ovara muteko wa Muluku, mutthenkeso onnivaha awe, nnoohakalalaka.

ORUMEELA MAPURO OOTHOWA ANAMALALEERYA

⁶ Pooti wira muttetthe muloko anyu onilaleerya awe khoreere olaleeriwa. Nto eyo pooti owiirihani wupuwela wuncererya muteko anyu woolaleerya muthaamelaka mapuro oothowa anamalaleerya. (Mit. 16:9) Akhala wira mwa mutokweene wala murumeyi oorumeela, woonasa wene wookhala muloko waarowa oxukhurela vanceene nikhaliheryo nanyu. Mutokweene anyu a esirkwiitu pooti wooleelani miloko mukhanle anyu ookhaliherya esirkwiitu anyu. Nave akhala wira muniphavela orumeela mpantta mukina wa elapo anyu, eBetheli pooti woovahani malakiheryo anrowa wookhaliheryani vanceene.

⁷ Niireke munniphavela orumeela elapo ekina? Akhala wira ti siiso, muhaana wuupuwela oratteene ele enihela muhina othaamela elapo ekina. Ti vooloka olavula mwaha owo ni axitokweene a muloko anyu. Maana othaama marukunuxo maalupale anoohelani muhina nyuwo ni ale munrowana anyu. (Luka 14:28) Akhala wira khamunrowa okhala okathi munceene elapo eyo, woonasa wene vaamuloka orumeela nipuro nikina elapo anyu.

⁸ Ilapo sikina, anna anivahiwa miritti suulupale mmutthenkesoni, yiixuntte niinaano ekeekhai. Nto anna oowiiyeviha a mapuro awo, anniweemererya axitokweene arina sookumanana sinceene athaamenle ilapo iyo ohoolela mmulokoni. Akhala wira mwa mutokweene ni munuupuwela othaamela elapo ekina ehirina axitokweene anceene, muhiliyale wira yoolakela anyu khahiyo orumeela nipuro na anna a elapo eyo. Ohiya-vo murumeeleke vamosa ni aana awo. Nave mwaatumereryeke wiimananiha okhalana iparakha ni weemererya miritti mmulokoni. (1 Tim. 3:1) Mwaapixeryeke murima akhala wira itthu sikina khanipaka ntoko sinipakiwa aya elapo anyu. Murumeeleke itthu munisuwela anyu ntoko mutokweene wira mwaakhaliherye anna. Mwiira siiso, akhala wira munootthikela elapo anyu, axitokweene a elapo eyo anoowerya okhapelela oratteene muloko.

⁹ Ehinatthi eBetheli woovahani nsina na muloko waarowa ottottela mureerelo nikhaliheryo nanyu, Ekomisau ya Muteko ya Muloko anyu ehaana opaka ekarta evekelaka eyo. Ti vooloka olempwa ekarta eyo otepexa wene akhala wira mwa mutokweene, murumeyi oorumeela, pioneero wala namalaleerya. Ekomisau ya muteko enooroiha ekarta eyo oBetheli ya elapo munrowa anyu orumeelaka.

OLALEERYA NI NTTAAVA NIKINA

¹⁰ Wira muncererye muteko anyu woolaleerya, woonasa wene nyuwo pooti wiixutta nttaava nikina ohela muhina nttaava ninlavuliwa ni matata. Akhala wira munniphavela olaleerya ni nttaava nikina, nyuwo pooti olavula ni axitokweene wala mutokweene a esirkwiitu. Awo animoolipihani ni woovahani malakiheryo anrowa wookhaliheryani vanceene. Sivahiwaka malakiheryo ni eBetheli, isirkwiitu sikina sinniwiixuttiha nttaava nikina anamalaleerya ni mapioneero wira aweryeke olaleerya oratteene ni nttaava nno.

MUTEKO WA OPIONEERO

¹¹ Anamalaleerya otheene ahaana osuwela oratteene malakiheryo wira mutthu okhale pioneero ookhaliherya, ookilaatheya, a vameekhaaya ni inamuna sikina sa muteko wa Muluku wa okathi wotheene. Pioneero ohaana okhala munna wala murokora oopatisiwa orina mweettelo wooloka ni orina mikhalelo sinrowa omukhaliherya owerya omaleliha iwoora onivekeliwa awe olaleeryaka ihapari sooreera. Ekomisau ya Muteko ya Muloko teneemererya ipetisau sa mapioneero ookhaliherya ni ookilaatheya, masi mapioneero a vameekhaaya anithanliwa ni eBetheli.

¹² Mapioneero ookhaliherya, pooti othanliwa wira arumeeleke mweeri mmosa, myeeri sinceene moohihiyererya wala okathi wotheene moovarihana ni makhalelo aya. Anamalaleerya anceene a Omwene onnaasivela orumeela ntoko mapioneero ookhaliherya okathi wa vameekhaaya ntoko okathi wa Wuupuwela wala mweeri onixukurya awe mutokweene a esirkwiitu. Akina onaasivela orumeela okathi wa ifeeriya. Nave anamalaleerya oopatisiwa anisoma, pooti othanla okhala mapioneero ookhaliherya okathi anivahiwa aya ifeeriya. Myeeri sa Março ni Abril ni mweeri onixukurya awe mutokweene a esirkwiitu, anamalaleerya pooti okhala mapioneero ookhaliherya avahaka iwoora vakhaani. Moohicikha makhalelo anyu, akhala wira mookhalana mweettelo wooloka, munoona wira munoowerya omaleliha iwoora sinivekeliwa ni munoowerya orumeela mweeri mmosa wala ovikana, axitokweene anoosiveliwa othokorerya epetisau anyu wira mukhale pioneero ookhaliherya.

¹³ Wira mukhale pioneero ookilaatheya, muhaana wiilokiherya wira nwerye omaleliha iwoora sinivekeliwa vamwaakhani. Ntoko pioneero ookilaatheya, nyuwo muhaana ovara oratteene vamosa ni muloko. Mapioneero ooluttuweliwa annikhaliherya vanceene muloko, asiveliwaka muteko woolaleerya ni yaatumereryaka atthu akina okhala mapioneero. Masi muhinatthi okhala pioneero ookilaatheya, muhaana okhalana mweettelo wooloka ni oviriha myeeri 6 mpatisiwe ene.

¹⁴ Okhala wene, mapioneero a vameekhaaya anithanliwa eriyari ya mapioneero ookilaatheya, yaawo anikhumela saana muteko woolaleerya. Awo ahaana weemererya orowa orumeela khula opuro eBetheli enrowa aya waaroiha. Okhala wene, aniroihiwa mittetthe ahikhanle anamalaleerya, akhanle aya oowaaphwanya atthu aniphavela ihapari sooreera wira apake muloko. Nave okathi mukina, mapioneero a vameekhaaya annithanleliwa muloko anrowa aya okhaliherya olaleerya muttetthe wotheene wa muloko owo. Mapioneero makina a vameekhaaya ari axitokweene annithanleliwa miloko saamukhaani wira akhaliheryeke, hata vahireerelaka nikhaliheryo wira muttetthe owo omalelihiwe olaleeriwa. Nave mapioneero a vameekhaaya annivahiwa musurukhu vakhaani wira athumeke itthu sinaathowa. Mapioneero makina a vameekhaaya anithanliwa wira arumeeleke okathi vakhaani paahi.

MAMISIONAARIO

¹⁵ Ekomisau ya Muteko ya Nikhuuru Noolamulela, tenaathanla mamisionaario, yaawo anithanleliwa muttetthe woolaleerya ni Ekomisau ya Efiliyaali ya elapo anirumeela aya. Awo anithanleliwa mapuro oowaatta atthu. Mamisionaario annikhaliherya vanceene olipiha miloko ni okeleliha vahoolo muteko woolaleerya. Ikwaha sinceene, mamisionaario anniixuttihiwa Exikola ya Anamalaleerya a Omwene. Annaavyeriwa opuro wookhala ni annivahiwa musurukhu vakhaani wira athumeke itthu sinaathowa.

AXITOKWEENE A ESIRKWIITU

¹⁶ Axitokweene a esirkwiitu anithanliwa ni Nikhuuru Noolamulela. Anna awo anniixuttihiwa ni annikhalana sookumanana, maana wanipacerya anikhala axitokweene a esirkwiitu ooranttela. Awo annivaha efaita yinceene muteko woolaleerya ni annaaphenta vanceene anna ni arokora. Awo mapioneero ooluttuweliwa, annikhalela nthiti omusoma Biibiliya ni annisuwela olavula myaha ni awiixuttihi ooloka. Nave annooniherya yoowiima ya munepa wowaarya mookumini mwaya, aakhalanaka moonelo wooloka ni ankhili. Akhala wira mutokweene a esirkwiitu toothela, amwaarawe ahaana okhala pioneera ni aahaana okhalana mweettelo wooloka. Awo ahaana okhalana waataana wooloka ni atthu akina ni osuwela olaleerya oratteene. Nave mwaarawe mutokweene a esirkwiitu, muthiyana onttittimiha okhulupale wa Yehova ni wa iyawe. Owo khonilavula nipuro na iyawe ni khahiyo oolavulasa. Okhala wene mutokweene a esirkwiitu ni mwaarawe waatteliwa miteko, nto ale aniphavela okhala axitokweene a esirkwiitu ahaana okhalana ekumi yooloka. Mapioneero khanivekela eformulaario wira akhale axitokweene a esirkwiitu. Ekeekhai wira annimuleela mutokweene a esirkwiitu wira anniphavela okhala axitokweene a esirkwiitu, nto annivahiwa malakiheryo.

IXIKOLA SA OMWENE

¹⁷ Exikola ya Anamalaleerya a Omwene: Anniphaveliwa anamalaleerya a Omwene anceene wira yavareke mittetthe silaleeriwe vakhaani ni okhaliherya miloko momunepani. Nto anna ni arokora oohitheliwa, vamosa ni anamathelana pooti olepa eformulaario avekelaka orowa osoma Exikola ya Anamalaleerya a Omwene. Nuumala osoma, anaxikola awo annithanleliwa okhala mapioneero ookilaatheya mapuro oothowa anamalaleerya elapo aya. Masi, ale aniphavela annithanleliwa ovara itthu sikina sa Omwene elapo aya wala elapo ekina. Akina pooti othanleliwa okhala mapioneero a vameekhaaya a okathi vakhaani wala okathi wotheene. Mapioneero aniphavela orowela exikola ela pooti osuwela itthu sinivekeliwa awehaka muthukumano onipakiwa okathi wa konkresu.

¹⁸ Exikola ya oGileadi: Anna ni arokora oohitheliwa, vamosa ni anamathelana annithanliwa orowela exikola ya oGileadi. Exikola ela enipakiwa ni nttaava na Enkelexi ni anna otheene anivara muteko wa Muluku wa okathi wotheene. Anna awo anoowerya okhaliherya vanceene muteko woolaleerya wala otthokiha miteko sa oBetheli. Awo annooniherya wira onnaasivela waarumeela anna ni waakhaliherya otthara malakiheryo a Biibiliya ni a mutthenkeso. Ekomisau ya Efiliyaali tenaavaha epetisau anna ni arokora aniphwanelela orowa exikola ya oGileadi. Ale anisoma exikola ela annithanleliwa orowa olaleerya wala orumeela oBetheli ya elapo aya wala elapo ekina.

ORUMEELA OBETHELI

¹⁹ Eparakha yuulupale orumeela oBetheli. Nsina noowi eBetheli nintaphulela “Empa ya Muluku”, nsina nlo ti nookhalela mwaha wa miteko sinivariwa opuro owo. Anna ni arokora anirumeela oBetheli annivara muteko wa faita ntoko, opaka iliivuru, otaphulela, ni okawa iliivuru iyo sinimutthokiherya Biibiliya. Nikhuuru Noolamulela ninnivaha efaita miteko iyo, maana eyo ennaakhaliherya owehaweha ni ovaha malakiheryo miloko sotheene olumwenku wotheene. Anna ni arokora anceene anirumeela oBetheli ari anamataphulela anikhala muttetthe wa efiliyaali eyo ninlavuliwa aya nttaava anitaphulela aya. Eyo ennaakhaliherya owiiwa atthu moota anilavula aya khula nihiku. Nave, eyo ennaakhaliherya anamataphulela osuwela akhala wira ele anitaphulela aya enniiwanyeya.

²⁰ Muteko munceene onivariwa oBetheli mutthu ohaana okhalana ikuru sinceene. Nto, anamunceene anilattuliwa orumeela oBetheli anna amiravo oopatisiwa arina ekumi yooloka ni arina ikuru sinceene. Akhala wira munniphavela orumeela oBetheli, mulavule ni axitokweene a muloko anyu, awo animooleelani itthu sinivekeliwa wira mutthu arumeeleke oBetheli.

OTEKA IPA SINIRUMEELIWA NI MUTTHENKESO

²¹ Oteka ipa sinirumeeliwa ni mutthenkeso, enamuna emosa yoovara miteko sa Muluku, ntoko siisaale okathi yaatekiwa aya etemplo ya Salomoni. (1 Mam. 8:13-18) Anna ni arokora anceene anniivahererya arumeelaka okathi ni ikuru saya wira akhaliherye oteka Ipa sa Omwene.

²² Niireke nyuwo munniphavela okhaliherya? Akhala wira mwa namalaleerya oopatisiwa ni munniphavela okhaliherya oteka ipa sinirumeeliwa ni mutthenkeso, anna anihoolela muteko wooteka muttetthe anyu anoosiveliwa vanceene nikhaliheryo nanyu ni anoowiixuttihani hata muhisuwelaka oteka. Nto xeeni muhinaaleela anyu axitokweene a muloko anyu wira munniphavela okhaliherya? Anamalaleerya akina oopatisiwa aniphwanelela anniivahererya wira yatekeke ipa sinirumeeliwa ni mutthenkeso elapo aya wala ilapo sikina.

²³ Sookhala inamuna soovirikana sa okhaliherya muteko wooteka. Anamalaleerya oopatisiwa arina mweettelo wooloka anisuwela miteko sooteka ni aniphavela okhaliherya miteko sooteka muttetthe aya, annithanliwa okhala anamakhaliherya a Edepartamento ya Oteka ya Mapuro Awo. Atthu akina anikhaliherya muteko wooteka mapuro oorakamela mwa okathi vakhaani wala munceene, nto annithanliwa ni eBetheli wira akhaliheryeke isumana piili wala myeeri miraru. Ale anithanliwa wira atekeke ipa sa mutthenkeso okathi wotheene aniitthaniwa arumeyi a miteko sooteka. Vano murumeyi a oteka onithanliwa wira avareke elapo ekina oniihaniwa murumeyi a oteka a elapo ekina. Khula empa enitekiwa ennikhala ekrupu ya oteka. Ekrupu eyo ennikhala arumeyi a oteka ni anamakhaliherya a muteko wooteka. Awo anikhaliheriwa ni Edepartamento ya Oteka ya Mapuro Awo ni anna owiivahererya a miloko sikina. Nto Ikrupu sa Oteka sinnithaamela mapuro makina nuumala omaliha empa yaateka aya elapo emosaru enihooleliwa ni efiliyaali eyo.

TI SIVI SIRI SOOLUKAMA SANYU SA OMUNEPANI?

²⁴ Akhala wira muhiivahererya wa Yehova, moohaanyiherya munniphavela omurumeela mahiku otheene. Nto niireke mookhalana soolukama sa omunepani? Okhalana soolukama sa omunepani sinimookhaliheryani orumeela mwa miruku ikuru ni itthu murina anyu. (1 aKor. 9:26) Nave okhalana soolukama sa omunepani onimookhaliheryani wunnuwa momunepani ni onimookhaliheryani owehexexa itthu sootepa otthuneya vaavo munrowa anyu wiimananihaka ophwanya soolukama iyo.—aFil. 1:10; 1 Tim. 4:15, 16.

²⁵ Murummwa Paulo ntakiheryo nuulupale ninreerela ahu otthara vaavo ninvara ahu muteko wa Muluku. (1 aKor. 11:1) Paulo aaniimananiha vanceene ovara muteko wa Yehova. Nave aanisuwela wira Yehova aaninvaha iparakha sinceene. Paulo aahaalepela anna a muloko wa oKorinto oriki: “Kovahiwa murerelo mulupale onkikhweiherya” ovara miteko sinceene. Niireke eyo khahiyo etthu eniiraneya ni hiyo? Tthiri ti yeeyo. Sookhala inamuna sinceene nikhanle ahu oomurumeela Yehova vamosa ni muloko, otepexa wene nilaleyaka ihapari sooreera sa Omwene. Masi, ntoko Paulo, ovira mukhora muulupale nihuleliwe ahu onihela muhina okhalana “awanani anjene”. (1 aKor. 16:9) Tthiri Paulo aaniihiiha vanceene. Nwehe ele aahimmye awe oriki: “Kinnihaxa erutthu aka, kinnikhaliha epotth’aka”. (1 aKor. 9:24-27) Niireke nrina moonelo mmosaru ntoko wa Paulo?

²⁶ Otheene ahu ninnitumereriwa okhalana soolukama sa omunepani moovarihana ni makhalelo ahu. Anna anceene olelo-va, anivara muteko wa Muluku wa okathi wotheene mwaha woowi yaahikhalana soolukama sa omunepani ayenve ene. Nlelo ari ene anamwane, yaahitumereriwa ni anamuyari aya okhalana soolukama sa omunepani. Nto awo annihakalala vanceene vaavo anivara aya muteko wa Yehova ni khanithanana mwaha woopaka eyo. (Mir. 10:22) Sookhala soolukama sikina sa faita ntoko okhaliherya muteko woolaleerya khula esumana, opaceriha ni wiiriha soosoma sa Biibiliya ni oviriha okathi munceene mulokiheryaka mithukumano. Etthu yooloka ohihiya ororomeleya ni wiimananiha ovara moomalela muteko woolaleerya. Akhala wira nnoopaka eyo, nnonvuwihaka Yehova ni nnoophwanya yoolukama ahu ya omurumeelaka mahiku otheene.—Luka 13:24; 1 Tim. 4:7b, 8.