Nilipeke Murima okathi Sinniphwanya Aya Mixankiho Sa Vano

‘Muluku ti ntthyawelo nahu nolipa: òlikanana onikhaliherya okathi w’oxanka’.​—ESAL. 46:2.

MUNNIWERYA WAAKHULA?

Ninrowa osyaka sai otepa oxanka mwaha wa ihasara sinikhumelela?

Nthowa xeeni ninwerya ahu okhala oolipa murima?

Itthu xeeni Yehova onivanhe awe sinnikhaliherya oxintta mixankiho?

1, 2. Mixankiho xeeni sitonko waakhumelela atthu anceene, masi arummwa a Muluku aniimananiha sai oxintta mixankiho iyo?

NINKHALA mahiku ooxankiha. Elapo yoosareya ihasara. Itetere, oxekexeya wa etthaya wala, ovya wa mihuru ni itthu, osareya wa maasi, othaleya wa etthaya, onnaaxankiha vanceene apinaatamu. Nave, mixankiho sa khula mutthu, sa emusi, sinnikumiherya wunlaseya wuulupale. Tthiri ‘oreriwa ni otakhaliwa khonimuthanla mutthu’.​—Mus. 9:11.

² Arumeyi otheene a Muluku, sinnaaphwanya mixankiho iya soothananiha. Nnaamwi vari siiso, ninniphavela wiitthokiha okathi sinniphwanya aya mixankiho vaavo olumwenku ola onaattamela awe wanikisa. Ninrowa oxintta sai mixankiho iyo wira nihitthikele ottuli? Exeeni enrowa onikhaliherya olelo va wira nilipe murima vaavo ninxankiheya ahu?

MWAATAKIHEKE YAALE AVILENLE MIXANKIHO SA OKUMI AYA

3. Ntoko sihimmwale aya mwa aRoma 15:4, nikhaleke sai okathi sinniphwanya aya mixankiho?

³ Nnaamwi mixankiho saaphwanyaka atthu anci, masi iyo khahiyo sinoopacerya. Nkahaya noone ele arumeyi a Muluku akina anniixuttiha aya yaawo yaaxinttale mixankiho moolipa murima.​—aRom. 15:4.

4. Mixankiho xeeni Davidi aarina awe, nto exeeni yaamukhalihenrye ovilela?

⁴ Nkahaya munwehe Davidi. Mixankiho sikina aarina awe tiiya: Olupatthiwa ni mwene, otupheliwa ni awanani, waakhiwa axaarawe ni anaawe, ni oripiwa murima mwaha wa sowiira sawe. (1 Sam. 18:8, 9; 30:1-5; 2 Sam. 17:1-3; 24:15, 17; Esal. 38:5-9) Biibiliya onnihimya wira Davidi aahithanana mwaha wa mixankiho saamukhumelenle. Masi owo khaatteetthen’ye omunepani wawe. Moowaamini aahilavula wira: ‘Apwiya t’anikakiha sowopiha sothene: exeni erinaka wova?’​—Esal. 27:1; musome Esalimo 27:5, 10.

5. Exeeni yaamukhalihenrye Abrahamu ni Sara ovilela mixankiho?

⁵ Abrahamu ni Sara, yaahiviriha okumi aya ekhalaka mmixaxani elapo ekina ntoko anamurwa. Nto makhalelo aya khiyaakhweya. Tthiri awo sahaaphwanya mixankiho ntoko etala ni maloko otakhala yaattamenle aya. (Maph. 12:10; 14:14-16) Exeeni yaawiirinhe opaka eyo? Biibiliya onninlela wira: Abrahamu ‘awehererya muttetthe otekiwe mmathipeloni, wuupuweliwe ni otekiwe ni Muluku’. (aHéb. 11:8-10) Abrahamu ni Sara, yaavarexexa itthu sa muhoolo, ohiya itthu sa olumwenku ole.

6. Ninrowa omutakiha sai Yobi?

⁶ Muxankiho muulupale wa weehereriwa wa Yobi. Nkahaya muupuwele moota oonela awe vaavo vaakhala aya wira khula etthu khiyaamukhumela saana. (Yobi 3:3, 11) Voothananihaxa, mwaha woowi owo khaasuwela nthowa naya saakhumelela aya itthu iye. Masi khaatthikenle ottuli. Aahivikaniha ohittheka ni omwaamini Muluku. (Mmusome Yobi 27:5.) Tthiri nla ntakiheryo nooloka otthara!

7. Itthu xeeni saamwiiranenle Paulo okathi aamurumeela awe Muluku, masi exeeni yanvanhe olipa murima wira avikaniheke?

⁷ Muthokorerye-tho ntakiheryo na murummwa Paulo. Sahimphwanya mixankiho ntoko ‘mittetthe sowopiha, mothakoni ni mphareya’. Aahilavula sa ‘ovoliwa, ntthona, oriirya, ni othoiwa sowara’. Paulo oolavula-tho wira aaniviriha okathi munceene othana ni ohiyu athokoreryaka miloko. (2 aKor. 11:23-27) Nnaamwi saamukhumelenle itthu iyo, nkahaya moone masu awe okathi aahala awe vakhaani okhwa mwaha woomurumeela Muluku: ‘Kooxutta ohìroromela mmansaka, masi omuroromela Muluku, yowo onwerya wahihimuxa alipa-òkhwa, Muluku t’okàkihenrye wopiha nno wulupale n’ukhwa, ni onrowa-tho okàkiha.’ (2 aKor. 1:8-10) Khaattale atthu atonko ohaawa ntoko Paulo. Masi, anceene a hiyo pooti olikanyihaka miyuupuwelo sahu ntoko owo, wira sinilipiheke.

MUSYAKE WUUPUWELAKA ITTHU SIIRANEN’YE SAAROWA WOOTTIKIHERYANI OTTULI

8. Sinniphwanya sai mixankiho sa vano? Nvahe ntakiheryo.

⁸ Okhala wira ninkhala olumwenku ola osaren’ye ihasara, mixankiho ni sookhanyererya, nto anamunceene annixankiheya. Pooti amaKristau akina, annixankiheya nave. Mwa ntakiheryo, Lania, ni aiyawe yaari arumeyi a okathi wotheene wAustralia, onihimya wira vaavo aaleeliwe awe wira ookhalana kanser mmapeleni, aahixankiheya vanceene. Owo onihimya so: “Murette waavahiwa aka waahikiwereya vanceene, nave nkaasiveliwa-tho ni okumi aka”. Muxankiho-tho mukina muulupale waari ola: waakhapelela aiyawe yooperariwe muthana. Nto ninrowa opaka exeeni akhala wira vanihikuni enooniiranela siiso?

9, 10. (a) Exeeni enitthuneya ahu waakiheryaka wira Satana ahikumihe? (b) Ninrowa ovilelaka sai mixankiho ntoko ohimyale awe Miteko 14:22?

⁹ Nihaana wuupuwelaka wira Satana oniphavela wira nihiye waamini mwaha wa mixankiho. Nto, nihimuhiye avenxaka ohakalala wahu mmwaha ola. Miruku 24:10 oni: ‘Mojeyá’movelavelani, ikuru sanyu ti sivukunwe. Wuupuwelela matakiheryo a atthu yaale aromoliwe mBiibiliyani yoocen’ye pooti onikhaliherya ovilela ni oxintta mixankiho.

¹⁰ Ti vooloka-tho osuwela wira khanniwerya omalamaliha mixankiho sotheene. Mixankiho pooti oniphwanyaka. (2 Tim. 3:12) Miteko 14:22 oni: ‘Nihana ovira mohawani munjene, wira nikele momweneni mwa Muluku’. Okathi wa mixankiho nihooneke wira nrooliyaliwa, masi nihaana wooniheryaka olipa wahu murima, nroromelo, nikupaliki wira Muluku onoonikhaliherya.

11. Nisyakeke sai otepa oriipiwa murima mwaha wa mixankiho?

¹¹ Nihaana ovarexexaka itthu sooloka. Nuulumo na Muluku nnihimya so: ‘otteliwa murima onnireriwa owitho: oripiwa murima onnìva eroho’. (Mir. 15:13) Alipa anitokosa moota woloola iretta, ahoona wira okhalana moonelo wooloka onnikhaliherya. Atthu anceene yaawereiwa, awo yaahivona mwaha wa ovahiwa ikinino sihirina murette. Eyo-tho pooti wiiraneya mwa enamuna yoovirikana. Atthu akina yaawereiwa, yaahitepa owereiwa mwaha wa oleeliwa wira murette avahiwe aya pooti-tho waakumiherya maxakha. Akhala wira nnoovikaniha wuupuwela mixankiho iyo, khanniwerya omaaliheya wala oturuka mukhalelo ahu. Masi, moota Yehova onnikhapelela awe khahiyo ntoko muretta onivahiwa “ikinino sihinivoniha”. Nto pooti okathi wa ihasara, owo onninikhaliherya orweela mwa Nuulumo nawe, waataana orina ahu ni anna ni ikuru sa munepa wootteela. Wuupuwelela itthu iyo onrowa onilipiha. Ohiya wuupuwelaka itthu soohiloka siiranen’ye, nihaana oweha moota woovilela muxankiho ni ovarexexa itthu sooloka sa okumi ahu.​—Mir. 17:22.

12, 13. (a) Exeeni enaakhaliherya arumeyi a Muluku ovilela okathi wa ihasara? Nvahe ntakiheryo. (b) Okathi wa ihasara vansuwanyeya sai wira etthu yootepexa otthuneya okumi ahu?

¹² Mahiku ala, ilapo sikina atthu annihaawa ihasara sinceene. Ti voottottopeleya oweha wira anna anci ari ilapo seiyo sitonko wiiraneya ihasara, awo yaahooniherya opixa murima. Eyo khentaphulela wira yaari etthu yookhweya. Wanipacerya wa 2010, etetere emosa ni tsunami iiranen’ye oChile yaahihonona ipa sa anna anceene ni mihaku saya. Nnaamwi saakhumelenle itthu iyo, anna yaahivikaniha ovara miteko somunepani. Samuel yoowo empa awe yaahononen’ye moomalela onihimya wira: “Hata saakhumelenle mixankiho iyo suulupale, miyo ni amwaaraka khinaahin’ye olaleerya ni orowa mmithukumanoni. Kinnikupali wira miteko somunepani saahinilipiha wira nihixanke mootepana. ” Nave anna anceene yaahihiya wuupuwelaxa mixankiho saya, nto khiyavara miteko sa Yehova.

¹³ Setembro a 2009, elapo ya oManila, oFilipinas etthu yowiiraka 80 ya elapo ele yaahihononiwa ni epula ya mutaaseke. Mulopwana mmosa oothaciri aalavunle so: “Mutaaseke aari ootepaxa ohonona; ohaakumiherya ohaawa ni mixankiho athaaciri ni amasikhini”. Ela ennuupuxerya masu oolopola a Yesu ani: ‘Mwìthukumanyerye mihakhu wirimu: weiwo nnákhala owexe walá mukwitha ohinlyaya, weiwo ohikhanle-wo anawiye ankuxa muhakh’uwo’. (Math. 6:20) Wuukelela okumi ahu mihakhu seiyo soowakuva omalamala onniruuhela oxankiheya Nto tivootthuneya ovarexexa wataana wahu ni Yehova weiwo onkela onlipiha, hata okathi wa khuta mixankiho!​—Mmusome aHéberi 13:5, 6.

NTHOWA NAYA VANITTHUNEYA AYA OLIPA MURIMA

14. Nthowa xeeni nintthuneya ahu wooniherya olipa murima?

¹⁴ Yesu aahisuwela wira saamukhumelela mixankiho okathi aarowa awe okhapelelaka muloko awe. Aahimmye so: ‘Muhituthuwé.’ (Luka 21:9) Hiyo ninniroromela okhaliheriwa ni mwene ahu ni Mpattuxi a olumwenku Yehova. Paulo aahimulipiha Timootheyo ariki: ‘Vekekhai, eroho Muluku enivahalyawe khennikhaliha òwòva: ohiya vo eroho yeyo ennivaha ikuru n’uphentana ni wilamula’.​—2 Tim. 1:7.

15. Muhimye matakiheryo anooniherya okupali wa arumeyi a Muluku, nto mutthokiherye moota wootakiha olipa waya murima.

¹⁵ Nwehe moota arummwa a Muluku alavunlya aya moohihoverya. Davidi oohimya so: ‘Apwiya [Yehova] t’ikuru saka ni ti ntthyawelo naka: murim’aka oharoromela. Awo àkikhaliherya: vano kinnimumula. Kinnatthapela Apwiya ni murim’aka wothene’. (Esal. 28:7) Paulo aahilavula moororomela wira: ‘Nto hiyo ninniweryexa itthu iya sothene n’ikuru sa Yesu oniphentale’. (aRom. 8:37) Moolikanasa, ntoko yowoopiha enikhuma aya mootutuxerya, Yesu ahaalela ale yanwiriyana wira ohataana vanceene ni Muluku ariki: ‘Nto miyo nkikhanle mekhaka: Atithi ari nimiyo’. (Yoh. 16:32) Exeeni enoona ahu mmasu ala? Masu ala anooniherya wira Yesu aanimuroromela vanceene Yehova. Wunnuuherya omuroromela Muluku onoolipiha murima ahu wira nixintteke mixankiho sa mahiku ala.​—Musome Esalimo 46:2-4.

MUTTOTTELE MUREERELO MALAKIHERYO ANILIPIHA MURIMA AHU

16. Nthowa xeeni vanitthuneya aya osoma Masu a Muluku?

¹⁶ Olipa murima wa MaKristau, khonlipa ni ikuru saya paahi. Masi onlipa ni ikuru sa Muluku. Nto nihaana wiisomelaka nuulumo na Muluku moohihiyererya. Murokora mmosa onihaawa ni oxankiheya oni: “Kinnitthikela osoma iveersu sinikilipiha”. Ninnivarihela muteko miruku wira nimulompeke Muluku vatthokoni? Opaka eyo enoonikhaliherya okhalana mweettelo wa nasalimo aalavunle wira: ‘Kinniphenta vanjene ikano sanyu: kinnitthokelela seiyo nihiku ti nihiku’.​—Esal. 119:97.

17. (a) Malokiheryo xeeni annikhaliherya olipa murima? (b) Nvahe ntakiheryo moota mukhaliheriwe anyu ni iliivuru sahu.

¹⁷ Nikhaliheryo na nenli: Nookhalana iliivuru sinimutthokiherya Biibiliya seiyo sinilipiherya omuroromela wahu Yehova. Anna anceene aaphwanya mmarevistani mwahu sowiiraneya saalipinhe. Murokora mmosa a wAsia ohikhanle saana mmuruni mwawe, aahihakalala nuumala osoma yoowiiraneya ya misionario oosuweliwa yoowo aatonko owereiwa oreetta owo masi khiwerya oxintta. Murokora owo oni: “Mwaha ole wookikhaliherya osuwela saana muxankiho aka, nave masu ale aakivaha nlipelelo”.

18. Nthowa xeeni vaniloka aya ovekelaka?

¹⁸ Nikhaliheryo na neeraru: Ovekela. Ovekela onninikhaliherya mwa inamuna sotheene. Murummwa Paulo aahooniherya otthuneya waya sookhaliherya iya ariki: ‘Muhukhuwé mwaha w’etthu p’itthu. Vano, okathi wothene nweliherye mavekelo anyu wa Muluku mmulompaka, munvaraka metto, mmuxukhuruku-tho. Siso murettele wa Muluku, onvikana osuwela wa mutthu, onosuka mirima sanyu n’iroho sanyu mwa Yesu Kristu’. Niireke ninnittottela mureerelo nikhaliheryo nla nnivaha ikuru okathi wa mixankiho? Munna Alex eelapo ya oGrã-Bretanha, yoowo orina oretta wa oxankiheya, oni: “Onvekela Yehova ni onwiriyana orweela mwa osoma Nuulumo nawe, onnikikhaliherya”.

19. Nooneleke sai mithukumano sahu sa eKristau?

¹⁹ Nikhaliheryo na neexexe: Orowa omithukumanoni ni axinnahu. Nasalimo mmosa oni: ‘Eroho aka yottèttheya n’utthokelela, ephavelaka okhala mpani’ mwa Yehova. (Esal. 84:3) Hiyo nookhalana moonelo owo? Murokora Lani, olavuliwe wanipacerya, onnilavula voohimya sa mithukumano sa eKristau ariki: “Miyo nkaaphavela ocompela mithukumano. Maana kaanisuwela wira kihaana orowa wira Yehova akikhaliherye oxintta mixankiho saka”.

20. Olaleerya ihapari sa Omwene onnikhaliherya sai?

²⁰ Nikhaliheryo na neethanu: Ovikaniha olaleya Omwene. (1 Tim. 4:16) Murokora a wAustralia otonko ohaawa mixankiho sinceene, oni: “Orowa olaleerya yaakhala etthu yookiserya; masi mutokweene mmosa aahikilattula orowa nuuwo olaleerya. Nto kaahimutthara. Yehova aahikikhaliherya khula okathi kaalaleerya aka, nto kaahihakalala vanceene”. (Mir. 16:20) Anamunceene ahoona wira okhaliherya olipiha nroromelo na atthu akina, oniiriha nave olipiha waamini waya. Opaka eyo woowiiriha okumiha mmuupuweloni mixankiho saya wira evaraxaxeke itthu sirina efaita yuulupale.​—aFil. 1:10, 11.

21. Nikhaliheryo xeeni ninkupaleela ahu okathi wa mixankiho?

²¹ Yehova oonivaha inamuna sinceene sa moota wooxintta moolipa murima mixankiho sa vano. Akhala wira ninrowa ovarihelaka muteko soovaha iyo, orweela mwa wuupuwelela matakiheryo a arumeyi oolipiha murima a Muluku, eyo enoonikhaliherya oxintta mixankiho. Nnaamwi miyuupuwelelo soohiloka sikhumelelaka mwaha wa olumwenku ola onaattamela omalamala, hiyo pooti okhala ntoko Paulo aalavunle wira: ‘Ninnixanka, nto khanimpweteya Tivó vahinojeyahu’. (2 aKor. 4:9, 16) Nto, nikhaliheriwaka ni Yehova hiyo nnoowerya oxintta mixankiho moolipa murima!​—Mmusome 2 aKorinto 4:17, 18.

[Enoota]

[Ilatarato siri ipaaxina 14, 15]

Okathi wa mixankiho, muttotteleke mureerelo nikhaliheryo Yehova onivaha awe