Niireke Anamoona a Yehova Anoohonona Wala Animwiiraaniha Imusi?

Hiyo Anamoona a Yehova ninniimananiha okhaliherya imusi wira sikhaleke sowiiraana. Maana ninnimuttittimiha Muluku, yoowo Opattunxe imusi. (Maphattuwelo 2:21-24; aEefeso 3:14, 15) MBiibiliyani, owo onnivaha malakiheryo anikhaliherya olipiha ni ohakalala ikasamento sa olumwenku wotheene.

Anamoona a Yehova Annikhaliherya Olipiha Imusi

Hiyo ninniimananiha otthara malakiheryo a mBiibiliyani, maana anninikhaliherya okhala mulopwana oothela ooloka, muthiyana ootheliwa ooloka ni anamuyari ooloka. (Miruku 31:10-31; aEefeso 5:22–6:4; 1 Timootheyo 5:8) Nave malakiheryo ari mBiibiliyani anookhaliherya itthoko sinikhala atthu arina itiini soovirikana. (1 Pedru 3:1, 2) Nwehe etthu atthu akina ahimmye aya nuumala ole athelanne aya okhala Namoona a Yehova:

• “Iyaakha 6 soopacerya sa ekasamento ahu naamakela onyakulihana paahi. Nuumala Ivete okhala Namoona a Yehova, opixa wawe murima ni wiiwelela wawe wookikhaliherya vanceene. Nave wookhaliherya vanceene ekasamento ahu”.—Clauir, a oBrasil.

• “Miyo khiwaakisivenle nuumala iyaka Chansa opacerya omusoma Biibiliya ni Anamoona a Yehova. Maana kuupuwela wira eyo yammaliha ekasamento ahu. Masi vano kihoona wira Biibiliya ookhaliherya vanceene ekasamento ahu”.—Agness, a oZâmbia.

Vaavo ninlaleerya ahu, ninniwooniherya atthu moota weettela malakiheryo a mBiibiliyani anrowa aya waakhaliherya:

• Omuthanla mutthu ooloka wira athelane

• Ovilela mixankiho sinikhumelela mukasamentoni mwaakha woopacerya

• Moota wowaathokorerya anamuyari

• Moota woorumeela musurukhu

• Ohiya onyakulihana

• Wiixutta olevelela

• Owiixuttiha anamwane

Niireke oturuka etiini onnikumiherya mixankiho mukasamentoni?

Okathi mukina onnikumiherya mixankiho. Mwa ntakiheryo, mwaakha wa 1998 instituto de pesquisas Sofres, yaahitokosa ikasamento mutthu mmosa okhanle Namoona a Yehova. Yootokosa ele, yaahooniherya wira eriyari ya ikasamento 20, ekasamento emosa yaahikhalana mixankiho.

Yesu aahihimya vahinatthi wira ale yaarowa weettelaka sowiixuttiha sawe saamwaaphwanyaka mixankiho. (Matheyo 10:32-36) Mulipa-oolepa sowiiraneya, Will Durant ohimmye wira okathi wa Olamulelo wa oRoma “maKristau yaanootheriwa ohonona itthoko”.a Nave olelo-va, Anamoona a Yehova annootheriwa etthu emosaru. Niireke eyo enooniherya wira nuumala mutthu mmosa vatthokoni okhala Namoona a Yehova onnikumiherya mixankiho?

Okathi yootheriwa aya Anamoona a Yehova wira annikawanya imusi, eTribunaali ya wEuropa ya Ihakhi sa Apinaatamu ehimmye wira atthu akina vatthokoni ahikhanle Anamoona Yehova, ikwaha sinceene tanikumiherya mixankiho mwaha woowi annikhootta “weemererya ni ottittimiha yoothanla mootaphuwa mmusi aya orina awe ya okhalana etiini oniphavela awe”. Etribunaali ele yaahincererya eriki: “Eyo enniiraneya ni atthu otheene arina itiini sovirikana, waahela muhina Anamoona a Yehova”.b Hata arina ene mixankiho mwaha wa etiini, Anamoona a Yehova annitthara miruku sa mBiibiliyani sini: “Mutthu awiirelani etthu yootakhala, muhimuttikiheryeke ni etthu yootakhala. . . . Mpakeke sotheene muniwerya anyu, wira mukhaleke ni murettele ni atthu otheene”.—aRoma 12:17, 18.

Xeeni Anamoona a Yehova Anithelana ni Anamoona Akhwaaya

Anamoona a Yehova annitthara malakiheryo a mBiibiliyani anihimya wira muthelaneke “mwa Apwiya paahi”, eyo piiyo, othelana ni mutthu orina etiini emosaru. (1 aKorinto 7:39) Nnaamwi yooruma ela eri ene ya mBiibiliyani, eyo ti yooloka. Mwa ntakiheryo, mwaha mmosa waakumiheriwe mwaakha wa 2010 ni Journal of Marriage and Family waahimmye wira “mulopwana ni muthiyana athelanne ari etiini emosa ni anikupali itthu simosaru” annikhala saana.c

Nave Anamoona a Yehova khanimutumererya mutthu ovalaana ni ole othelanne awe ohinimurumeela Yehova. Biibiliya onihimya wira: “Akhala wira munna ookhalana mwaarawe ohiniwaamini Apwiya, nto mwaarawe owo onaphavela okhala ni yena, ohimuhiye. Akhala wira muthiyana ookhalana iyawe ohiniwaamini Apwiya, nto iyawe owo onaphavela okhala ni yena, muthiyana owo ohimuhiye iyawe”. (1 aKorinto 7:12, 13) Nto Anamoona a Yehova annitthara oratteene yooruma eyo.