Yosefe khaapisa ovarihela muteko malakiheryo avahiwa awe ni Yehova, nto eyo yaahimukhaliherya okhala mulopwana oothela ooloka. Ninnihimya siiso okhala wiira ikwaha tthaaru Yosefe aahivahiwa malakiheryo ni Muluku voohimya sa etthoko awe. Nto ikwaha sootheene aavahiwa awe malakiheryo awo, owo aahiiwelela moowakuveya hata eyo yaahela muhina opaka marukunuxo maalupale. (Math. 1:20; 2:13-15, 19-21) Mwaha wowiiwelela malakiheryo a Muluku, eyo yaahimukhaliherya Yosefe omukhapelela saana ni omukhaliherya Maria. Nto itthu iye sootheene saahimukhaliherya Maria wuuncererya omphenta wawe ni omuttittimiha Yosefe. Nyuwo alopwana oothela, munimooniherya wiira munnimutakiha Yosefe akhala wiira khula okathi munoophavelasaka malakiheryo a mbiibiliyani wiira mukhaliherye emusi anyu. Nave hata mureerelaka opaka marukunuxo maalupale, vaavo munitthara anyu malakiheryo a mbiibiliyani nyuwo munimooniherya wiira munaaphenta amwaarinyu ni olipiha ekasamento anyu. Murokora mmosa onikhala elapo ya oVanuatu, ovirinhe iyaakha 20 otheliwe ene, onihimya so: “Okathi iyaka oniphavela sawe malakiheryo a Yehova oneettela, omuttittimiha waka onnincerereya. Kinnikhala oovareleleya ni kinnikupali soothanla sawe”. w23.05 21 etti. 5

Ayuda ale yaari oBabilonia yaarowa okhalihiwa ‘nloko nooreeriwa’ na Yehova. (Otum. 7:6) Nto wiira amusivelihe Yehova awo yaahana opaka marukunuxo. Ayuda anceene yaayariwe oBabilonia ni akina yaahilimalela makhalelo a oBabilonia. Woonasa wene nuuvira iyaakha 70, ayuda oopacerya atthikenle ene wIsarayeli, kuvernatoro Nehemiya aahiriipiwa murima nuumala osuwela wiira anamwane anceene yaayariwe wIsarayeli khiyaasuwela nttaava na ayuda. (Otum. 6:6, 7; Neh. 13:23, 24) Okhala wiira epantte yinceene ya Nuulumo na Muluku yaalempwe ni nttaava na eHeeberi, anamwane ale yaarowa owerya sai omphenta ni omurumeela Yehova ahilavulaka eHeeperi? (Eezi. 10:3, 44) Nto vannooneya wiira ayuda ale yaahaana opaka marukunuxo manceene mookumini mwaya. Masi vaamukhweya opaka marukunuxo awo vakhala wiira yaamutthikela wIsarayeli, weiwo yaarowa aya vakhaani-vakhaani omurumeelaka Yehova mwa enamuna aaphavela awe. — Neh. 8:8, 9. w23.05 15 itti. 6-7

Mooriipiha murima, hata nirina ene ikuru aahiiso niilokihenrye ene wiira niphwanye etthu nimphavela ahu, ikwaha sikina pooti oniphwanyaka mixankiho. Mwa ntakiheryo, okhala wiira ‘oreeriwa ni otakhaliwa khonimuthanla mutthu’, ikwaha sikina pooti ohiweryaka ophwanya ele naaphavela ahu. (Mus. 9:11) Aahiiso mixankiho pooti onikhulumula ni oniriipiha murima. (Mir. 24:10) Nave mwaha wookhala atthu oottheka, hiyo pooti opakaka etampi enrowa oniiriha ohiwerya ophwanya etthu nimphavela ahu. (aRom. 7:23) Aahiiso ikwaha sikina pooti hiyo ohikhalanaka ikuru. (Math. 26:43) Nto exeeni enrowa onikhaliherya oxintta mixankiho iyo? Muhihiye mixankiho sookhulumulakani. Biibiliya onnooniherya wiira hata siniphwanyaka mixankiho ikwaha sinceene, hiyo nnoowerya oxintta. Nto vaavo nihinhiya ahu omaleliha etthu nimphavela ahu hata siniphwanyaka mixankiho, ninnooniherya wiira nimphavela omuhakalaliha Yehova. Tthiri mukupaliki wiira Yehova onnihakalala vanceene, vaavo onoowehaaweni mwiimananihaka wiira mmalelihe ele muniphavela anyu! w23.05 30 itti. 14-15