BIIBILIYA ONNIRUKUNUXA MIRIMA SA ATTHU
“Awosa Yaaphavela Wira Kiwehe Mmensaka Etthu Yaari Yekeekhai”
Yowiiraneya elavuliwe ni Luis Alifonso
OYARIWE MWAAKHA WA: 1982
ONIKHUMA ELAPO YA: REPÚBLICA DOMINICANA
MWAHA ENE: INNUWALE NTOKO MUTTHU A ETIINI YA MÓRMON
MWEETTELO AKA WA KHALAI: Kiyariwe oSanto Domingo, República Dominicana, miyo mwaana a neexexe, ookiseriwa. Anamuyari aka yaari atthu oosoma saana, nto yaaphavela wira anaaya yinnuwe eriyari ya atthu a makhalelo ooreera. Iyaakha xexe kihinatthi oyariwa, anamuyari aka yaahikumana ni mamisionaario a etiini Mórmon. Mwaha woosiveliwa ni iwarelo saya sooloka sa amiravo ale, moohipisa anamuyari aka yaahilakela wira emusi ahu yaarowa okhala yoopacerya mwa atthu yaakhala esisiro ele, okela Ekerexa ya Mórmon, wala Ekerexa ya Yesu Kristu ya Atthu Oowaarya a Mahiku Ookiserya.
Vaavo kainuwa aka, kaanivara miteko sikina ni atthu okerexa ni ottittimiha soolakela sa emusi aka ya okhalana mweettelo wooloka. Kaaniittottopa okhala mutthu a ekerexa Mórmon, nto kaaphavela okhala misionaario Mórmon.
Okathi kaarina aka iyaakha 18, emusi aka yaahithaamela Estados Unidos wira kiwerye osoma universidade. Etthimakelaka ovira eyaakha emosa, muhima aya amaama vamosa ni aiyawe, yaawo ari Anamoona a Yehova, yaahirwa onixekurya oFlorida. Yaahinilattula orowa okongresuni a myaha sa Biibiliya. Kaahitikiniheya vanci waaweha atthu yaari okongresuni amukhunulaka Biibiliya ni olepa myaha saiwa aya. Nto kaahivekela epaphelo ni elapiseera wira miyo-tho kilepeke itthu saiwa aka.
Nuuvira kongresu, muhima aya amaama ni aiyawe yaahimyale wira okhala wira kiniphavela okhala misionaario, awo yaamukikhaliherya omwiixutta Biibiliya. Kaahoona wira iye saari miruku sooloka okhala wira waahivira okathi munceene kisomaka paahi eliivuru ya Mórmon, ohiya Biibiliya.
MOOTA BIIBILIYA ORUKUNUNXE AWE OKUMI AKA: Khuta okathi waamusoma ahu Biibiliya nimurumeelaka telefooni, muhima aya amaama ni aiyawe, yaanikitumererya ovarerya mBiibiliyani wira koone akhala wira sookupali saya saanivarihana ni ele eniixuttiha Biibiliya. Awo yaaphavela wira koone mmensaka ele eri ekeekhai.
Saahikhala itthu sinceene kaakupali aka seiyo kaasomihiwe aka ni Mórmon, masi nkaasuwela akhala wira sinnivarihana ni Biibiliya. Muhima aya amaama, aahikiruuhela erevista Despertai! ya 8 a Novembro, 1995, enikumiheriwa ni Anamoona a Yehova, nto erevista eyo yaahikhalana myaha voohimya sa sookupali sa Mórmon. Kaahitikiniheya oweha wira nkaasuwela saana sowiixuttiha sinceene sa Mórmon. Masu ale yaahikiiriha otokosa Web site a Mórmon wira kiwehe ele yaalavuliwe ni Despertai! akhala wira yaari ekeekhai! Kiphwanya wira yaari tthiri ekeekhai, nave nuumala oxekurya museu wa Mórmon, Utah, kaahikupaleela wira sotheene saahimmwale saari itthu siiranen’ye.
Khalai kuupuwela wira Eliivuru ya Mórmon ni Biibiliya sinnivarihana saana. Masi okathi kaapacenrye aka omutokosa saana Biibiliya, kaahiweha ovirikana okhanle ele Biibiliya oniixuttiha awe ni sowiixuttiha sa Mórmon. Mwa ntakiheryo, Biibiliya khoniixuttiha wira ehaavo etthu enivikaniha okhalana ekumi nuumala mutthu okhwa. Masi, Eliivuru ya Mórmon, Alma 42:9 enihimya so: ‘ehaavo etthu [eroho] ehinikhwa’, nuumala mutthu okhwa.
Wuncererya eyo, kaahixankiheya ni sowiixuttiha sa Mormon sa waakiherya elapo. Mwa ntakiheryo, maMormoni aniixuttihiwa wira exardim ya wEdeni yaari Elapo ya Jackson, oMissouri, E. U. A. Nto maprofeta a ekerexa mórmon, anihimya wira okathi ‘Omwene wa Muluku onipacerya aya olamulela, orumeelaka ebandeira ya Estados Unidos, nto okathi owo eyo enrowa ovavaka oratteene ntoko ethomeiwale vamwirini wa otaphuwa ni idireitu soopinaatamu’.
Kaanitikhina, nto khiyaphavela osuwela moota elapo eyariwa aka, wala elapo ekina, sikhanle aya oorumeeliwa ni Muluku mmoota owo. Nihiku nimosa ohiyu, kaahilavula mwaha ola ni mmiravo mmosa Mórmon aakiligarenle, yoowo aasomihiwa emisionaario. Kaahimukoha oratteene akhala wira amweemya orowa owana ekhotto ni amaKristau Mórmon akwaawe a elapo ekina. Kaahitikiniheya omwiiwa aakhulaka wira aayo! Kaahiphavela otokosa saana sowiixuttiha saakupali aka, ni kaahirowa-tho waakoha amahoolela a Ekerexa Mórmon oottitttimihiwa. Nto kaakhuliwe wira makoho aka, khuuvo pinaatamu oniwerya waakhula, muhoolo tanrowa aya wooniheriwa waakhuliwa waya, vaavo omwaleya onrowa aya okhumelela.
Okhala wira waakhula waya khiwaakihakalalinhe, nto kaahipacerya wiivarerya ni wuupuwela etthu yaakiiriha ophavela okhala misionaario a Mórmon. Nto koona wira etthu yaakiiriha waari ophavela waakhaliherya akina paahi. Nto okhala mutthu oottittimiheya mwaha wookhala misionaario Mórmon, waanikisivela-tho. Masi nkaasuwela saana voohimya sa Muluku, ni moota owo sinoonela awe muteko ole waaphavela aka. Nnaamwi kaamusoma Biibiliya ikwaha sinceene, nkaavaha efaita ele enihimya awe. Nkaasuwela hata vakhaani, yoolakela ya Muluku ni elapo ela ni wa apinaatamu.
MOOTA OTTOTTENLE AKA MUREERELO: Okathi waamusoma aka Biibiliya ni Anamoona a Yehova, kahiixutta itthu ntoko; nsina na Muluku, etthu eniiraneya wuukhwaani, ni muteko wa Yesu mwa waakhwaniherya yoolakela ya Muluku. Nto vano kinnisuwela saana itthu sa eliivuru ela yoohakalaliha, ni kinnaaleela akina. Nnaamwi kaasuwela wira Muluku ookhala nkaamwaattamela, masi vano kinnilavula ni yena ntoko Mpatthani aka muulupale. Nto 12 a Julyo 2004, ti nihiku naabatiziwa aka ntoko Namoona a Yehova, nuuvira myeeri 6 kaahipacerya ovara muteko weeKristau okathi wotheene.
Koovara muteko oseedi wa Anamoona a Yehova, oBrooklyin oNova York, etthu yowiiraka iyaakha thanu. Etthu yoohakalaliha okhaliherya muteko wa opakiwa aBiibiliya ni iliivuru sikina sinimutthokiherya Biibiliya, sinaakhaliherya atthu olumwenku wotheene, ni kinnivikaniha waakhaliherya akina omusuwela Muluku.
[Elatarato epaaxina 8]
[Elatarato epaaxina 9]