ITTHU SINIKUMIHERYA OHAKALALA VATTHOKONI

Akhala Wira Mwaninyu Toorakala

CARLO:a “Mwanihu, Angelo, ookhalana eretta enimwiiriha opisa wiixutta itthu ni ohiwerya ovara saana itthu. Oretta awe onniniiriha okhala ootepa okhulumuwa. Nkuupuwelani muteko onitthuneya wira mutthu amukhapelele mwaana ohiniwereiwa, vano muncererye miteko iyo ikwaha 100. Tivonto ekasamento ahu ennixankiheya”.

MIA: “Wira Angelo oxutte etthu emosa yookhweya, vanitthuneya ohinyoonyiwa ni oviriha okathi munceene omwiixutihaka. Katemwa, kinnaakuva onanariwa ni waanyemela aiyaka, Carlo. Ohaavo okathi ohiniiwanana ahu, nto khiyakelela ovaanyihana”.

Munnupuwela nihiku aayariwe awe mwaninyu? Tthiri vaanoosivelani omuteexa mwaana owo. Masi, anamuyari ntoko Carlo ni Mia, ohakalala waya onitakaahana ni oxankiheya okathi onihimeeriwa aya wira mwaana onniwereiwa wala oorakala.

Niireke mookhalana mwaana orakanle? Pooti wira munnixankiheya mwaha woohisuwela akhala wira munoowerya omuthokorerya. Nto muhikhumuwe akhala wira eyo enniwiiraneelani. Anamuyari akina ntoko nyuwo, aawerya ovikana muxankiho owo. Thokoreryani mixankiho miraru sinimakela okhumelela, woonasa wene sirina anyu, ni moone moota miruku sa Biibiliya siniwerya aya wookhaliheryani.

MUXANKIHO 1: VANNOOVILANI WEEMYA ORETTA OHIMMWALE.

Nuumala oleeliwa wira mwanaya okhalana oretta, anamuyari anceene vannaavila weemya ehaali eyo. Juliana, maama mmosa oMexico, oni: “Okathi madotore yaakilenle aya wira mwanihu, Santiago, ottoopare awe wookhalana oretta onrowa omurakaliha, nkaawenrye waamini. Koona wira olumwenku wookimorela”. Akina pooti ohimyaka ntoko Villana, maama mmosa a wItalia. Onihimya so: “Miyo kaarolakela okhalana mwaana, nnaamwi kaasuwela wira yaari etthu yowoopiha orupala idadi saka. Nto vano mwanaka vanihaawa awe mwaha wa oretta omwiirinhe orakala, Kinoona ntoko wira miyo kimphwanyihale oretta ola”.

Akhala wira khamunoona yowiira ni muniivaha nthowa, nto musuweleke wira wuupuwela siiso etthu yeephattu. Owereiwa khiwiirela mpantta wa yoolakela ya Muluku. (Maphattuwelo 1:27, 28) Maana Owo khaapattunxe anamuyari wira yaakuveke weemya itthu sahiirela mpantta wa soolakela sa Muluku. Tivonto, vannikhalela tthiri ikwaha sikina “oriipiwa murima”, mwaha wa ekumi ya mwaninyu ehikhanle saana. Vanitthuneya ovira okathi munci wira oriipiwa wanyu murima omala-male, ni weemya oretta okhumelenle.

Sai akhala wira munoona wira ehaavo epakalyanyu emurakalinhe mwaninyu? Muupuweleke wira khuuvo onisuwela saana moota ephome ya anamuyari, opuro onikhaliwa, vamosa ni itthu sikina, sinimwiiriha aya mwaana oyariwa saana wala orakala. Ikwaha sikina, nyuwo pooti woonaka wira aiyanyu wala mwaarinyu tomurakalinhe mwaana owo. Mukhootte muupuwelo owo. Itthu sinimweetta saana akhala wira nyuwosa munniraana wira mmuthokorerye mwaninyu owo.—Musuweli 4:9, 10.

MUUPUWELE ELA: Mmananihe osuwela saana mikhalelo sa mwaninyu. ‘Vanitthuneya ankhili okhalana etthoko yooloka’, nto Biibiliya onihimya so: ‘empa ennitekiwa n’usuwela, ennilipihiwa n’ankhili’.​—Miruku 24:3, Biibiliya Solempwa Sowarya.

Omukoha meediku wala osoma iliivuru soororomeleya pooti owiirihani osuwela moota woomuthokorerya mwaninyu. Wiixutta omuthokorerya mwaninyu onlikana ni wiixutta nttaava nsya. Wuupaceryani vannivila, masi munoowerya.

Carlo ni Mia, aromoliwe wanipacerya yaahiveka wira alakiheriwe ni dotor, ni mutthenkeso mmosa onisuwela saana othokorerya oretta wa mwanaya. Awo anihimya so: “Eyo yaahinikhaliherya osuwela muxankiho waarowa okhumelela, vamosa ni itthu mwaninyu saarowa awe oweryaka opaka. Nto nahoona wira mwanihu anweryaka opaka itthu sikina soreerela. Eyo enniniiriha okhala oolipa”.

MWEERERYE ELA: Muupuweleke paahi ele mwaninyu eniwerya awe opaka. Munvaheke miteko sa vate siniwerya awe. Okathi oniwerya awe “opaka etthu” enayevaru, mwaakuveleke omuttottopela ni omuhakalaliha.

MUXANKIHO 2: OKUKHUMUWA NI WOONAKA WIRA MURI EKHINYU.

Nyuwo pooti woonaka wira omukhapelela mwaninyu oniwereiwa onniwiirihani otemwa. Jenney, maama mmosa a oNova Zelandia onihimya so: “Nuuvira miyaakha vakhaani nuumala oleeliwa wira mwanaka ookhalana oretta onirakaliha muthana (espinha bífida); khuta okathi waavaraka etthu vapuwani, kaakhala ookhulumuwa nto khuyanla”.

Muxankiho mukina, nyuwo pooti woonaka wira muri ekhinyu. Ben ookhalana mwaana orina oretta onitteittheiha mutika ni oretta onimwiiriha mutthu ohiwerya olavula saana. Owo onihimya so: “Atthu anceene khanikhala-khala esuwelaka saana moota sinikhala ahu. Nyu munniphavela omuleela mutthu mukina. Masi anamunceene wa ale ari apatthani anyu, ekumi ya anaaya ti yooloka. Tivonto mutthu onnoovelela waaleela mixankiho sawe”.

MUUPUWELE ELA: Muhaana oveka nikhaliheryo ni weemya okhaliheriwa. Juliana oromoliwe ottuli onihimya so: “Ikwaha sinceene miyo ni aiyaka ninnuuleliwa muru ovekela nikhaliheryo”. Masi owo onnilavula-tho: “Nihiixutta wira mekhihu paahi khanniphiyerya opaka sootheene. Okathi akina annikhaliherya aya, ninniweha wira khahiyo niri mekhihu”. Akhala wira mpatthani anyu ekeekhai onniivahererya okilaathi ni mwaninyu opuro onitthekula anyu, wala oSalau ya Omwene, mwaakhulele mooniheryaka oxukhurela. Biibiliya onihimya so: ‘Mpatthani onnimphenta mpatthani awe okathi t’ukathi: onnisuwanyeya okhala munna’awe okathi woxanka.​—Miruku 17:17.

Mukhapeleleke ekumi anyu. Ntoko siisaale ekaaro ya ambulansia enitthuneya aya okhalana gasolina okathi wotheene, wira yateexe aretta yaarowanaka hospitali, nyuwo-tho muhaana olya saana wira mukhalane ikuru siniphiyerya, wiiniha nikuruta erutthu anyu, ni ophumuryaka saana wira nweryeke omukhapelela mwaninyu. Javier yoowo orina mwanawe ohiniwerya weetta, onihimya so: “Okhala wira mwanaka khaneetta, miyo kihaana olya saana. Okhala wira ti miyo kinimuteexa. Nto inawu saka, inawu sawe”!

Munrowa ophwanya sai okathi wa okhapelela ekumi anyu? Anamuyari akina anniviriha okathi munci yaakhapelelaka anaaya. Masi, vanniweryaneya namuyari ophumurya wala ovara miteko sawe sikina. Nyuwo muhaana ophavelaka okathi vaavo munihiya anyu miteko sihirina efaita yuulupale, masi eyo pooti okhala yooxankiha, tivonto mukhalane ephoole. Ntoko sinihimya awe Mayuri, maama a wIndia: “Nuuvira okathi nyuwo munnilimalela”.

Mmuleeleke mixankiho sahu mpatthani oororomeleya. Hata mpatthani ohirina mwaana orakanle, owo pooti owoonelakani othunku ni woowiriyanani. Muvekeleke-tho wa Yehova Muluku. Niireke nivekelo ninnikhaliherya tthiri? Yazmin, ookhalana anamwane anli arina oretta oniwooceeliha omumula saana, owo onihimya so: “Onnikhala okathi kinxanka aka mpakha kinakhala wira kiniphavela okhwa. Kinninvekela Yehova wira akimaalihe ni okivaha ikuru”. Nuumala-vo, kinniphwanya oolipa.”​—Esalimo 145:18.

MWEERERYE ELA: Mutokose moota onilya anyu, wiiniha wanyu nikuruta erutthu anyu, ni iwoora munimaliha anyu murupaka. Moone okathi onireerela anyu wiisukeryaka wira muhiye miteko sihirina efaita yuulupale wira mukhapelele ekumi anyu. Mulokiheryeke eprograma anyu okathi enitthuneya aya.

MUXANKIHO 3: OTEPAKA OMUTHOKORERYA MWAANA ONIWEREIWA WAAVIKANA ATTHU AKINA A EMUSI ANYU.

Oretta wa mwaana pooti oturuka ilyelyo sa emusi yotheene, moota woweetta mukwaha, ni okathi wovaanela ni khuta mwaana. Nto, anamwane akina pooti woonaka wira khanicaleliwa. Ohiya-vo, anamuyari pooti otepa oluttuweliwa omukhapelela mwanaya mpakha ekasamento aya ohireeraka. Tiithi mmosa a oLibéria oniihaniwa Lione onihimya so: “Ikwaha sikina amwaaraka anihimya wira awo annikukhumuwa vanceene, okhala wira miyo nkimmuthokorerya saana mwanihu. Nto kinninyoonyiwa, ikwaha sikina kinaakhula ni isara”.

MUUPUWELEKE ELA: Nwooniherye anamwane otheene wira munnaacalela, mpakeke eprograma ya ovara hoothe miteko sinaasivela. Jenney, yoole oromoliwe ottuli, onihimya wira: “Ikwaha sikina ninnimpakela mwanihu muulupale itthu sa vameekhaaya, hata orowa olya orestaurante onimusivela”.

Wira mukhapelele ekasamento, nvaaneleke ni ovekela ni ole othelanne anyu. Aseem, tiithi onikhala wIndia, yoowo mwanawe orina oretta woomora, onihimya so: “Ikwaha sikina miyo ni amwaaraka ninkhala ookhulumuwa nto khihiyasuwela etthu yoopaka, okathi owo ninnoona oreerela okilaathi ni ovekela niryeene hoothe. Khula voosisu mwanihu ahinatthi ovenya, ninniviriha okathi nivaanelaka myaha sa mBiibiliyani”. Anamuyari akina annivaanela ehinatthi orowa orupa. Ovaanela wanyu woopatthaneya, ni wekeekhai ni ovekela, onrowa olipiha ekasamento anyu okathi wa mixankiho. (Miruku 15:22) Anamathelana akina anihimya wira: “okathi woohakalalihexa waarina ahu waari okathi waakumana ahu etthu yaanivela-veliha”.

MWEERERYE ELA: Mwaattottopeleke aniinyu akina anookhaliheryani omuthokorerya mwaana oniwereiwa. Khuta okathi muhimyeke waaxukhurela wanyu aniinyu ni ole othelanne anyu.

MUHIHIYE OKHALANA MUUPUWELO WOOLOKA

Biibiliya onnilaiherya wira moohipisa Muluku onoomaliha iretta sotheene ni onimwaapenuxa alipa oorakala amiravo ni atthu oowuuluvala. (Wisupulula 21:3, 4) Okathi owo, ‘khuvo onkela ohimya wira: ‘kimuretta’’.b​—Yesaya 33:24.

Masi, vano nyuwo munoowerya okhumela saana omuthokorerya wanyu mwaana oorakala. Carlo ni Mia aromoliwe wanipacerya anihimya so: “Muhitthikele ottuli hata vakhalaka muupuwelaka wira khiivo enrowa oloka. Nvaraxaxeke itthu sooloka sa mwaninyu, okhala wira owo okhalana itthu sinceene sooloka”.

[Inoota]

MWIIKOHEKE SO . . .

▪ Exeeni ekhanle aka oopaka wira kikhapelele muupuwlelo aka, okumi aka, omunepani waka ni ikuru saka?

▪ Nihiku xeeni kitonko aka omuttottopela mwanaka mwaha wookikhaliherya?

[Elatarato epaaxina 10]

[Elatarato epaaxina 12]

Mwaacaleleke aniinyu otheene