BIIBILIYA ONNIRUKUNUXA MIRIMA SA ATTHU
“Miyo Kaaphavela Okhala Paadri”
Yowiiraneya elavuliwe ni Roberto Pacheco
MWAAKHA OYARIWE AWE: 1957
ELAPO OYARIWA AWE: MÉXICO
KHALAI AARI: MULIPA ASOOMA OSEMINARIO; AARI MUTTHU OOWALI
MWEETTELO AKA WA KHALAI: Kiyariwe esidade yaamukhaani ya Texcoco. Okathi owo, iphiro sinceene saari soothipeya ni soosareya ntthupi. Yaari etthu yoolimaleleya owoona atthu yaakhala mittetthe sowaattamela, arwaaka ni abuuru aya akunxe ene itthu wira atumihe. Emusi ahu yaari yoohaawa vanci, naayariwe anamwane 9, nto miyo kaari a neethanu nenli. Apaapa yaattottha iguaraches (wala ixapattho) wira aweryeke okhaliherya etthoko. Masi awo yaakhwiiye kirine ene iyaakha 7. Nto okhuma okathi owo, amaama yaanimananiha ophavelasa eyoolya ya etthoko.
Ataata yaanimoopa viola ni yaari mulipa aahoolela egrupu ya orquestra ni yaari musuweli a masipo yiipiwa ni itiini. Kinoona wira atthu otheene a vatthokoni yaanoopa ikaruma sinirumiha masipo. Amaama yaaniipa masipo a coral okereja, ni murokora aya amaama aniipa masipo a oopera ni animoopa piano. Nto naari atthu ooluttuweliwa a etiini ya ekatoolika: miyo kaari mwammiravo aamukhaliherya paadri va altari, ni kaanuupuwela okhala misionaario a etiini ya katoolika. Masi-tho kaanisiveliwa ni ifilme sa karaate wala sa ikhotto. Nto vaavo kaatepa aka oweha ifilme iyo, miyo kaanitepa okhala oowali.
Kirye ene epooma ya Puebla, miyo kaahikela exikola ya etiini yaavara miteko saya ntoko eseminario. Nto yoolukama aka waari okhala paadri a ekereja katoolika. Masi kiryeene eyaakha yookiserya ya osoma waka, kaahinyoonyiheya vanceene ni Ekereja Katoolika. Mwali mmosa a etiini ele aaphavela wira miyo kirupe nuuwo. Miyo kaahikhootta yooweeha ele, masi yowiiraneya ele yaahikiiriha ophavela othela. Ohiya vo, miyo kaahoona wira mapaadri manceene yaarina mukhalelo woowoka paahi. Wanikisa waya miyo kaahihiya ophavelasa waka wira kikhale paadri.
Miyo kaahithanla osoma muusika National Conservatory of Music in Mexico City (Opuro Oniixuttiwa Wiipa Masipo Elapo ya oMéxico). Nuumala ommaliha kursu ole, miyo kaahithela, nto moohipisa miyo ni amwaaraka naahaayara anamwane axexe. Miyo khaniphwanya musurukhu wira kikhapelele etthoko aka vaavo kiipa aka okathi wa missa Ekereja Katoolika.
Okhuma wanipacerya wa ekasamento ahu, waari onyakulihana paahi. Miyo ni amwaaraka naanihaxana mootakhala, mwaha woowi hiyo naari atthu a ehace yootepa. Wanipacerya hiyo naamunyakulihana, nuumala vo owana. Nto, nuuvira iyaakha 13, hiyo naahivalaana ni muhoolo mwaya naahimwalana.
MOOTA BIIBILIYA ORUKUNUNXE AWE OKUMI AKA: Opacerya okumana waka ni Anamoona a Yehova waari kihinatthi ovalaana ni amwaaraka. Anamoona anli yaahimana mukhora ahu ni yaahiivahererya wira avaanele ni miyo voohimya sa Biibiliya. Miyo kuupuwela wira kaanisuwela vanci myaha sa etiini, tivonto kaaphavenle aka owooniherya wira awo khiyaasuwela etthu. Nto kaanipaka makoho oovila kuupuwelaka wira khiyaarowa owerya waakhula. Masi mootikinihiwa waka, awosa okathi wotheene yaanikaakhula saana emurumeelaka Biibiliya. Vano miyo kaahipacerya woona wira nkaasuwela itthu sinci. Masi, amwaaraka yaanaanyokha vanceene Anamoona, ni miyo kaari mutthu oowaatteliwa miteko, nto oxukurya waya omala-mala.
Nuuvira iyaakha 5, miyo kaahitthikela-tho okumana ni Anamoona a Yehova. Okathi owo kiira kikhalaka hoothe voohithelana ni muthiyana mukina iihaniwa Elvira. Elvira khaanyokha Anamoona ale, nto waari wookhweya wira kikhalane yoosoma ya Biibiliya moohihiyererya. Hata vari siiso, saahivira iyaakha sinci wira kihiye mweettelo aka wa khalai.
Miyo kaahisuwela wira akhala wira kaaphavela omukokhorela Yehova ni murima wotheene, kaahaana opaka mirukunuxo suulupale mookumini mwaka. Wanipacerya, kaahihiya muteko aka wa wiipa okathi wa missa Ekereja Katoolika; eyo yaataphulela waavya muteko mukina wira kiwerye okhapelela etthoko aka. (Wisupulula 18:4) Nave-tho, kaahaana olepiha ekasamento aka ni Elvira.
Muxankiho muulupale waari wootepa ovila mweekumini mwaka, waari ohiya owali. Iveersu piili sa Biibiliya saahikikhaliherya vanci, ntoko: Esalimo 11:5, enooniherya wira Yehova onninyokha owali, ni 1 Pedru 3:7, yaakiixuttinhe wira kaaphavelaka wira Yehova aiweke mavekelo aka, kihaana waaphentaka amwaaraka. Vaavo kuupuwelelaka iveersu iyo ni onvekela Yehova wira okikhaliherye, nto vakhaani-vakhaani kaanipacerya ovukula owali.
MOOTA OTTOTTENLE AKA MUREERELO: Vano okumi aka vatthokoni ti woohakalaliha. Nto kinnimananiha olokiherya wataana ni anaaka a ekasamento aka yoopacerya ni okhaliherya etthoko aka ya naanano okhala yoolipa mwekeekhaini.
Okathi kaaryaaka mwammiravo miyo kaaphavela okhala paadri ni waakhaliherya atthu. Vano kinoona wira ekumi aka yookhalana yoolukama yooloka. Miyo kinniwerya ophwanya sootthuneya sa etthoko aka orweela mwa wiixuttiha muusika. Kinnixukhurela vanci mwaha woowi Yehova aahikipixerya murima, okivahaka eparakha wira kirukunuxe okumi aka wira kikhale mutthu ooloka.
[Elatarato epaaxina 8]
[Eponto yuulupale ya epaaxina 8]
Kiryeene mwammiravo, miyo kaaphavela okhala misionaario a etiini ya katoolika, masi-tho kaanisiveliwa ni ifilme sa karaate ni kaari mutthu oowali
[Eponto yuulupale ya epaaxina 9]
Biibiliya ookiixuttiha wira kaaphavelaka wira Yehova aiweke mavekelo aka, kihaana waaphentaka amwaaraka
[Elatarato epaaxina 9]