YOWIIRANEYA YA MOOKUMINI

Omwiiwelela Yehova Wookivaha Mareeliho Manceene

ELAVULIWE NI ELISA PICCIOLI

Apaapa yaahilavula wira: “Nowe oonivaha ntakiheryo nooloka otthara! Nowe aahimwiiwelela Yehova ni aahiphenta emusi awe, nto emusi yotheene yahoopowa okathi wa Mutaaseke, okhala wira emusi ele yaahikela mukalawani”.

EYO, etthu emosa kinuupuwela aka voohimya sa apaapa, mulopwana oowiiyeviha ni oovara muteko. Awo yaahikhalana mukhalelo woolipexa wa exariya, nto okathi yaiwale aya mitthaka sa Biibiliya mwakha wa 1953 niinanoru sahasivela. Okhuma vaavo, apaapa yahiilipiha wira aniixuttihe hiyo anamwane ele yiixutta aya. Wanipacerya amaama yahikhootta ohiya soolema saya sa oKatoolika. Masi muhoolo mwaya, amaama yahipacerya weemererya sowiixuttiha sa mBiibiliyani.

Waari woovilavo axitiithi ahu oniixuttiha Biibiliya,—Amaama yaari mutthu oohisomaxa nave Apaapa yaanivara muteko woorikaxa omatta. Ikwaha sikina apaapa yaanikukhumuwa ahinawerya ovinya okathi wa yoosoma ahu. Masi wiilipiherya waya waahikhumela saana. Kaari mwaana oopaceriwa oyariwa, nto kahikhaliherya omusomiha muhima aka ni axirokoraka anli. Eyo enihela muhina etthu emosa apaapa yaamakela aya ohimya ariki: Nowe vaavo aamwiiwelela awe Muluku ooniherya ophenta emusi awe. Nto yoohimmwa ela ya mBiibiliyani ennikisivela! Moohipisa, emusi ahu yotheene naanirowela mithukumano Osalau wa Omwene oRoseto degli Abruzzi, esidade ya costa do Adriático, wItalia.

Kaarina iyaakha sowiiraka 11 mwakha wa 1955 vaavo miyo ni amaama nalapunwe ahu miyaako epantta ya onikela nsuwa wira nanwiriyane kongresu ahu oopacerya oRoma. Okhuma vaavo, kinnithokoreryaka mithukumano suulupale ntoko etthu emosa yoreeraxa sa mweekumini mwahu ya eKristau.

Iyaakha soottharelana, kahibatiziwa nto nuuvira okathi vakhaani kaahikela muteko wa opioneero. Okathi kaarina aka iyaakha 17 kaahikela opioneero wa vameekhaaya onikhuma kuusi wa oLatina oRoma, etthu yowiiraka ikiloomo 300 orakamela waya owaani. Esidade ele yaari esya, nto khuuvo mutthu amoovelela namwaattamanani awe. Miyo ni pioneero mukhwaaka, naahitteeliwa murima okawa iliivuru sinceene, masi miyo kaaninkheliwa owaani! Masi nlelo kaaphavela wiiwelela malakiheryo kaavahiwa aka owaani.

Eyaakha ya 1963, kaahithanleliwa orowa oMilan okhaliherya omutthokiha Asembeleya Internacional aarina muru oni: “Ihapari Sooreera Soohimala”. Okathi ole wa muthukumano, kaahivara muteko ntoko mutthu oowiivahererya ni anna anceene akina ohela muhina Paolo Piccioli, mmiravo aakhuma oFlorence. Nihiku na nenli, owo aahilavula mwaha waalavula sa atthu oohithela. Kinnitthokelela okathi kuupuwela aka wira: ‘Munna ola khanikhala-khala athelaka’. Nto naahipacerya olepelana ipaphelo, nto nnaweha wira naahikhalana soolakela simosaru, omphenta Yehova ni omwiiwelela. Nto Paolo ni miyo, naahithelana mwaakha wa 1965.

OKUMANA NI MUHOOLELI A ETIINI

Kaahirumeela ntoko pioneero oFlorence iyaakha muloko. Yaari etthu yotteeliha murima oweha miloko sirowaka vahoolo ni waaweha amiravo yinnuwelaka omunepani. Paolo ni miyo, naanisiveliwa oviriha okathi ni axinnihu nivaanelaka itthu somunepani ni otthekula; nto okathi owo Paolo vaanimusivela onvonya boola. Masi, kinnixukhurela okhala wira iyaka aaniviriha okathi ni miyo, nave kaanisuwela wira amiravo a mmulokoni yaanittottela mureerelo othokoreriwa ni iyaka.

Nlelo kinnihakalala wuupuwela soosoma sinceene sa Biibiliya naawerya ahu wiiriha. Yoosoma emosa, aari Adriana yoowo aalavunle ni imusi piili voohimya wa ele aixutta awe. Awosa yaahiphavela okathi wa okumana ni mukhulupale a ekerexa wira elavule sa yowiixuttiha ya Amuluku Araru ni ohikhwa wa okumi. Ahooleli a ekerexa araru yaahirowa muthukumano ole. Masu yaalavula aya yaakhala oovirikana, nto mulipa oomusoma Biibiliya ole aahiweha moohipisa wira sowiixuttiha saya khisaavarihana ni Biibiliya. Tthiri muthukumano ole waahituruka miyuupuwelo sa atthu ale. Nuuvira okathi, atthu 15 a emusi ele yaahikhala Anamoona a Yehova.

Mahiku ala, inamuna sa olaleerya soovirikana. Nuuvira okathi ole, Paolo aahilimalela ‘olavula saana’ ni ahooleli ale a itiini, nto anavaanela ikwaha sinceene. Kinnuupuwela ekwaha emosa kaaxankihiwe aka nuumala othukumana ni atthu yahaakhanle Anamoona. Nto kaahiweha wira anamalupattha yaahithanla okathi ole wira ekipakeke makoho oohiloka. Nto mwaha naalavula ahu waahiturukeya. Nto mutthu mmosa aahikoha akhala wira ti vooloka mutthu a mukerexa wiirela mpantta myaha sa ipoliitika ntoko siniireya aya okhuma khalai. Mwaha ola, wahooniherya wira ahooleli a itiini khiwaasivenle, nto muthukumano ole waahimala. Nuuvira iyaakha, nahoona wira mwaha ole khiwaalavuliwa ntoko ahooleli a itiini yaaphavela aya.

INAMUNA SIKINA SA MUTEKO

Nuumala miyo otheliwa ni Paolo khuvira iyaakha muloko, naahilattuliwa okela muteko wa oxukurya miloko. Paolo aahaana muteko munceene, nto khivaakhwen’ye weemya muteko ole. Masi nuumala ovekela vanceene naahiitthokiha wira nikele muteko owo musya. Naanihakalala oviriha okathi munceene ni itthoko naakheliwa ahu. Oxekuwa, ikwaha sinceene naanisomaka hoothe, nto Paolo anaakhaliherya anamwane ni miteko saya sa oxikola, vanceenexa akhala wira yaalokiherya yoosoma ya matemaatika. Ohiya-tho vo, Paolo aanisiveliwa vanceene osoma iliivuru ni waaleela akina ele yaasoma awe. Khula Nihiku noomorela miteko, naanirowaka olaleerya osidade, mapuro yahaakhanle Anamoona, nto nnaalattula atthu orwa wiiwa mwaha naarowa ahu okhalana oxekuwa.

Nuuvira iyaakha piili nirumeelaka osirkwiitu, naahilattuliwa orumeela oBetheli ya oRoma. Paolo aavara edepartamento legal nto miyo kaavara eDepartamento ya Irevista. Opaka marukunuxo khivaakhwen’ye, masi naahilakelela okhala owiiwelela. Yaari etthu yoohakalaliha oweha wunnuuheriwa wa efiliyaali ni otepa wataana wa anna wItalia. Okhuma okathi ole, Anamoona a Yehova wItalia, yaaheemereriwa ni nlamulo na elapo ele. Tthiri etthu ele yaahinitteeliha murima vanceene.

Okathi naarumeela ahu oBetheli, wahikhumelela mwaha wa ephome, waaphukiwe nikhaliheriwaka ni ilapo sikina ohiya wItalia. Wanipacerya wa iyaakha sa 1980, waahikhumelela mwaha wooxankiha voohimya sa malamulo. Namathelana mmosa aahootheriwa wira yaahimwiiva mwanaya muthiyana; masi owo aakhwiiye mwaha wa oretta wiiraneya mphomeni waaraviwe ni anamunceene epantte ya oMediterrâneo. Anna ni arokora a emusi ya oBetheli, yahaahoola madivogado yaawaakiherya anamuyari ale maKristau. Efolyetu emosa ni erevista Despertai!, yaahikhaliherya wira sisuweliwe saana ele Nuulumo na Muluku ninlavula aya voohimya sa ephome. Okhuma myeeri iye, Paolo ikwaha sinceene aanivara muteko iwoora 16 khula nihiku moohihiyererya. Miyo kaanipaka saawerya aka wira kikhaliherye muteko awe muulupale.

MARUKUNUXO MAKINA MOOKUMINI MWAHU

Niira nivirinhe ene iyaakha 20 nithelanne ene, vaavo yaanikhumelenle aya etthu nahaalipelela ahu yaarukununxe makhalelo. Okathi owo kaarina iyaakha 41 nave Paolo aarina 49, vaavo kaamulenle aka wira vanikhala wira koorupala. Eliivuru awe ya myaha sa khula nihiku, kaahiphwanya masu oopacerya a nihiku nlo ani: “Nivekelo: Akhala wira ekeekhai, munikhaliherye ovikaniha ovara muteko wa okathi wotheene, wira nihitthikele ottuli momunepani, munikhaliherye okhala anamuyari ooloka orweela wa ntakiheryo nahu. Vanceenexa, mukikhaliherye weettela pooti okhala eporcento emosa wa itthu seiye kiixuttiha aka opalkuni etthu yowiiraka iyaakha 30 sivinre”. Naweha itthu siiranen’ye, pooti ohimya wira Yehova ohaakhula mavekelo aiyaka ni awaka.

Oyariwa wa Ilaria waahirukunuxa vanceene okumi ahu. Olavula ekeekhai, hiyo ikwaha sikina naanikhumuwa, nnaamwi Miruku 24:10 alavulaka wira mutthu ‘Òjeyá movelavelani ikuru sawe ti sivukunwe’. Masi naanikhaliheryana, nisuwelaka efaita erina aya olipihana.

Nto Ilaria onihimya wira onnihakalala mwaha wa oyariwa ni Anamoona anli yaaluttuweliwa ovara muteko wa Muluku okathi wotheene. Nto owo khatonko woona wira kaacaleliwa, okhala wira ohuuwale etthoko yaamukhapelela saana. Nto khula okathi kaanimukhapelela. Oxekuwa, okathi Paolo aakhuma awe omutekoni, ikwaha sinceene aanikhalana muteko woovara, masi, aiyaka yaaniviriha okathi ni mwanihu enamukhaliherya ni miteko sawe sa oxikola. Owo aanipaka eyo hata vatthuneyaka omaliha muteko awe voosiisu nihiku nikina. Nto Ilaria ikwaha sinceene aanihimya so: “Apaapa mpatthani aka oolokexa”.

Ntoko nyuwo munisuwela anyu, vanitthuneya ohihiyererya, nave ikwaha sikina olipa murima wira kimukhaliherye mwanaka Ilaria weettela ephiro ya eKristau. Kinnuupuwela okathi aathweela awe ni mpatthani awe, masi khulavula mwa enamuna yoohiloka nuule. Nto naahimooniherya ele Biibiliya enihimya awe, nave nimutthokiherya wira ele khahiyo enamuna yooloka. Nto naahimuhimeerya wira anvekele musammaha hiyo nimoonaka.

Ilaria onihimya wira owo onnixukhurela mwaha wa anamuyari awe osiveliwa ni muteko woolaleerya. Vano, Ilaria ootheliwa, nave onnisuwela oratteene efaita erina aya omwiiwelela Yehova ni weettela malakiheryo awe.

WIIWELELA POOTI OKATHI WA ORIIPIWA MURIMA

2008, Paolo, aahisuwela wira ookhalana oretta oniihaniwa kanser. Wanipacerya vaakhala wira Paolo aarowa openuwa oretta ole, nto aanikilipiha vanceene. Nave-tho, hiyo ni Ilaria, naaninvekela vanceene Yehova wira anikhaliherye ophwanya murette onireerela ni onikhapelela muhoolo. Masi nlelo kanaaweha aiyaka okhala mutthu oowiilipiha, aikuru, masi vakhaani-vakhaani yaanitteettheya. Okathi aakwiiye awe 2010, yaari ehasara yuulupale. Etthu enikilipiha ori wuupuwela miteko sooloka nivanre ahu hoothe iyaakha 45. Nonvaha Yehova sooloka saarina ahu. Koosuwela wira muteko ahu onookhalana mireerelo soohimala. Nto kinninkheliwa ohihimuxiwa wa Paolo ntoko onihimya awe Yohani 5:28, 29.

Ni murima aka wotheene, nlelo ka mwali mwaamukhaani onisiveliwa ni yowiiraneya ya Nowe. Yoolakela aka kheturuken’ye. Kiniphavela omwiiwelela Yehova hata sikhumelelaka khula etthu. Kinnisuwela wira khuuvo muxankiho, wala itthu niyelenle ahu sinilikana ni mareeliho Muluku onivaha awe. Miyo mmensaka yookiiraneela, nto kinnoolipiheryani wira omurumeela Muluku teri etthu ya efaita.

[Elatarato epaaxina 3]

[Elatarato epaaxina 4]

Nihiku na ekasamento ahu

[Elatarato epaaxina 4]

Naanisiveliwa oviriha okathi ni anaamiravo, nto ikwaha sinceene Paolo aaninvonya boola

[Elatarato epaaxina 5]

Paolo aanisiveliwa ni muteko awe oBetheli

[Elatarato epaaxina 5]

Ilaria ikwaha sinceene aahimya so, “Apaapa ti mpatthani aka oolokexa”

[Eponto yuulupale ya epaaxina 6]

“Ni murima aka wotheene, nlelo ka mwali mwaamukhaani onisiveliwa ni yowiiraneya ya Nowe. Yoolakela aka kheturuken’ye”

[Elatarato epaaxina 6]