MMWAATTAMELE MULUKU
“Muluku Onisiveliwa N’ule Onvaha Murima Omuttenlene”
Etthu xeeni yaarowa anyu ovahiwa yaakela owiirihani oxukhurela vanceene? Moohaaniherya, anamunceene a hiyo yaamuhakalala ovahiwa etthu ni mutthu onivaha moophenta ohiya onivaha ntoko orookhanyereriwa. Voohimya sa ovaha etthu, ti vootthuneya ovaha ni murima wotheene. Ohiya-vo, Muluku onnoonela-tho okhala etthu yootepa otthuneya. Nrowe niwehe masu a Muluku alempwale ni murummwa Paulo ari yoolepa ya 2 aKorinto 9:7.
Exeeni yaamwiirinhe Paulo olepa masu ala? Owo aaphavela waatumererya maKristau a oKorinto waakhaliherya axinna aya oothoiwa a oYudeya. Masi niireke murummwa Paulo aahaakhanyererya anna ale wira yaahaana ovaha? Nnaari. Owo aalempe so: “Khula mutthu avaheke attharihaka murim’awe, khahiyó ni murima omuripalene, nnákhala mwaha w’okhanyereriwa: tthiri Muluku onsiveliwa n’ule onvaha ni murima omuttenlene”. Nrowe nithokorerye yootumererya ela.
“Attharihaka murim’awe”. Ntoko Paulo sihimyale awe, muKristau eekeekhai onnivaha etthu mwaha woolakela opaka eyo ni “murim’awe” wotheene. Okathi omosaru, muKristau onnuupuwelela saana sootthuneya sa axinnawe a eKristau. Namatokosa mmosa onihimya wira nuulumo nitaphuleliwe okhala ‘otthariha murima’ [otthokelela, Biblia Solempwa sa Muluku] mwa nttaava noopacerya, nintaphulela “wuupuwelela woolakela”. Nto muKristau onnuupuwelela sootthuneya sa axinnawe, ni onniikoha voohimya sa ele ekhanle awe oopaka wira aakhaliherye.—1 Yohani 3:17.
“Khahiyó ni murima omuripalene, nnákhala mwaha w’okhanyereriwa”. Paulo onnihimya inamuna piili sa ovaha sihirina opuro eriyari ya maKristau a ekeekhai: ovaha mooriipiwa murima ni mookhanyereriwa. Eliivuru emosa enitthokiherya so: “Ole onivaha oriipiwe ene murima, wala mookhanyereriwa, khonivaha moohakalala ni onuupuwela wira onihonona musurukhu awe paahi”. Mutthu onivaha mookhanyereriwa tuule onivaha ohiphavelaka. Nto ti pani oniphavela ovahiwa etthu ni mutthu orookhanyereriwa?
“Muluku onsiveliwa n’ule onvaha ni murima omuttenlene”. Murummwa Paulo onihimya wira muKristau onilakela ovaha etthu, ohaana ovahaka moohakalala. Tthiri, mutthu onnihakalala vaavo onivaha awe ni murima wotheene. (Miteko 20:35) Ole onivaha moohakalala onnooniherya ohakalala wawe. Tthiri, nuulumo noowi “otteeliwa murima”, nnooniherya ohakalala wa vamurimani ni ovaha moosiveliwa. Ole onivaha ni murima wotheene, onnivara murima ahu. Biibiliya mukina oni: “Muluku onnaaphenta ale anihakalala yaavahaka”.—Contemporary English Version.
Moohaaniherya, masu oowuupuxeriwa a murummwa Paulo annaalakiherya maKristau voohimya sa ovaha. Akhala wira nimphavela ovaha okathi ahu, ikuru sahu, wala muhakhu ahu, nto nihaana ovahaka mootaphuwa, ni otteeliwa murima okathi nnaakhaliherya ahu akina, vanceenexa ale oothoiwa. Moohaaniherya, ovaha iwo onrowa onitteeliha murima ni omuhakalaliha Muluku, yoowo “onisiveliwa n’ule onvaha murima omuttenlene”.
Malakiheryo a omusoma Biibiliya Setembro
[Eponto yuulupale ya epaaxina 13]
“Muluku onnaaphenta ale anihakalala yaavahaka”