Mweemye Wira Ovirikana wa Itthu Wookhaliheryeni

Nyuwo khamunikupali wira Yesu aari mulipa Oowiixuttiha muulupalexa valaponi? Waaniheryasa munneererya otakiha enamuna ya Yesu ya wiixuttiha wawe, ntoko orumeela wawe makoho ni malikanyiho. Niireke mootoko wuupuwela wira owo aanirumeela ovirikana wa itthu okathi aixuttiha awe?

Anamunceene okathi onilavula aya annirumeela moolumo anooniherya ovirikana wa itthu. Woonasa wene nyuwo munnirumeela moolumo awo hata muhisuwelaka. Mwa ntakiheryo nyuwo pooti olavula so: “Awo ahimmye wira ifruta sotheene soottokottha; masi, efruta emosa nlelo khettokontthe”. Wala pooti olavula so: “Mwaana ola khalai aari oomaala ni oowuuliwa muru, masi vano omusivela olavula ni opatthaneya”.

Myaha ntoko iya, wanipacerya nyuwo munilavula etthu wala muupuwelo; nuumala-vo munarumeela masu anivirikanyiha ntoko ala: masi, hata vari siiso, nnaamwi vari siiso, wala mwa enamuna ekina. Aahiiso nyuwo pooti ovirikanyiha itthu orweela mwa wuncererya masu wira muttittimiherye etthu enilavula anyu. Okathi onipaka anyu eyo, ele enilavula anyu enniiwanyeya saana ni enoowerya waakhaliherya akina wiiwexexa.

Hata atthu wala mattaava makina ahirumeelaka moolumo anooniherya ovirikana, nihaana omananiha osuwela efaita aya. Mwaha wa xeeni? Mwaha woowi anniphwanyaneya ikwaha sinceene muNuulumo na Muluku. Ikwaha sinci Yesu aanirumeela masu anooniherya ovirikana wa itthu. Nkuupuwelani masu ala: ‘Wapattihiwa muthuko, khunkhuneliwa ni mwapu onithomeiwa vowoneya’. ‘Muhaniherye wira kirwenle omaliha ikano sa Moise walá maprofeta. Hoye! Nkirwenlé omaliha, kirwenlé omaleliha’. ‘Muhìwa ele ehimmwe wira: ‘Muhiraruwé’. nto miyo kinolèlani wira: ole oninweha muthiyana anwereihaka murima, òraruwana muthiyana owo ni murima . . . ’ ‘Muhìwa ele ehimmwe wira: ‘Nitho nliviwe nnitho, nino nliviwe nnino’’. ‘Nto miyo kinolèlani wira: Muhiwunlelé ikuhu ale aniwirelani sotakhala. Akhalá onomanani nlaku nolopwana, mmutheterye-tho nlaku nikina’.​—Math. 5:15, 17, 27, 28, 38, 39.

Iliivuru sinci sa Biibiliya, sookhalana moolumo anooniherya ovirikana wa itthu. Moolumo awo anoonikhaliherya osuwela saana etthu eyo wala onooniherya moota mukina wooreerexa opaka etthu eyo. Akhala wira nyuwo mwa namuyari, nkahaya moone masu ala anooniherya ovirikana wa itthu: ‘Nyuwo, alipa-òyara, muhanyonyiheké aninyu, masi mutthukule miru saya, nwettihaka ni mwalakaka ni ikano sa [Yehova]’. (aÉf. 6:4) Paulo anwerya olepa paahi wira tiithi (wala maama) ohaana waalakiheryaka anamwane ni ikano sa Muluku, eyo teri etthu ya miruku ni yekeekhai. Masi mwaha owo onniiweya saana vaavo vanirumeeliwa aya masu anooniherya ovirikana wira: ‘muhanyonyiheké, masi mutthukuleke miru saya , nwettihaka ni mwalakaka ni ikano sa [Yehova]’.

Ekapiitulu emosaru, muhoolo mwaya Paulo aahilepa ariki: ‘Vekekhai, hiyo khanniwana nivirikanyaka . . . owerya wa malaikha otakhala a musulu’. (aÉf. 6:12) Ovirikana iwo wa itthu onninikhaliherya osuwela saana wira ekhotto erina ahu ti yuulupale. Khinniwana ni apinaatamu paahi; masi, ninwana ni malaikha ootakhala.

OSUWELA OVIRIKANA WA ITTHU ONNIKHALIHERYA

Eliivuru emosaru ya mBiibiliyani, yaalepeliwe aÉfeso, nyuwo munoophwanya soolepa sikina, Paulo onirumeela awe ovirikana wa itthu. Wuupuwelela myaha iyo, sinoonikhaliherya wiiwexexa mwaha owo ni onooniherya saana etthu enireerela ahu opaka.

Nyuwo pooti woona oreera orowa othokorerya ekaaxa erina soolepa sa ekapiitulu 4 ni 5 ya aÉfeso, yeeyo enooniherya ovirikana wa itthu iyo sinihimmwa. Okathi onisoma anyu soolepa iyo soovirikana, muupuweleleke moota woweettela. Mwiikoheke so: ‘Ohimya ekeekhai, mweettelo aka ori sai? Kinoonela sai mwaha ola, wala itthu sinilikana ni mwaha ola?’ Mwa itthu iya piili soovirikana, mweettelo xeeni akina anoona aya wira torina aka? Nto mwaweha wira ehaavo etthu enireerela anyu olokiherya moovarihana ni ele esomme anyu enooniherya ovirikana wa itthu mweererye olokiherya. Nto mweemye wira ovirikana wa itthu wookhaliheryeni.

Wala nyuwo pooti orumeela masu awo okathi munimulompa anyu Muluku vatthokoni. Wanipacerya, atthu otheene a emusi anyu pooti osoma masu otheene anooniherya ovirikana iwo. Nuumala-vo, mmosa ohimyeke ovirikana okhanle wa masu awo, nto akina a emusi anyu yeereryeke wuupuwelela eponto ya nenli ettittimiheriwe. Opaka eyo onrowa oniiriha okhalana yoosoma yoohakalaliha ni woona moota wovarela muteko epantte ya nenli ya mwaha owo. Nto, othokorerya saana moolumo anooniherya ovirikana wa itthu, onnaakhaliherya amiravo ni atthu aalupale wira ekhalaneke mweettelo weeKristau veemusini ni khula opuro.

Vaavo nyuwo munoona anyu efaita ya masu awo anooniherya ovirikana wa itthu, nyuwo munrowa osuwelaka saana yootaphulela ya masu awo a Biibiliya, ni munrowa oweha wira annikhaliherya saana okathi woolaleerya. Mwa ntakiheryo, nyuwo pooti olavula so okathi onimulaleerya anyu mwaneene etthoko: “Atthu anceene anihimya wira pinaatamu ookhalana erooho ehinikhwa, masi moone ele Nuulumo na Muluku enihimya aya”. Wala okathi oniiriha anyu yoosoma ya Biibiliya pooti omukoha so: “Anamunceene ari muttetthe ola, anikupali wira Muluku ni Yesu mutthu mmosa paahi; masi Biibiliya onihimya exeeni mmwaha owo? Nto nyuwo exeeni enikupali anyu”?

Tthiri, Biibiliya ookhalana masu manceene anooniherya ovirikana wa itthu sinrowa onikhaliherya weetta ephiro ya Muluku. Nave hiyo, pooti orumeela masu oovirikana wira naakhaliherye akina osuwela ikeekhai sa Biibiliya.

[Elatarato epaaxina 3]

[Etabela eri ipaaxina 4, 5]

Ovirikana wa Itthu Siromoliwe ni aÉfeso eKapiitulu 4 ni 5

Mweererye orumeela saana iponto iya okathi wa omulompa Muluku vatthokoni!

“Khaninrowa-tho okuxiwa n’alavilavi amphavela owototha atthu, enahapuxa ephiro aya”.—4:14.

‘Ohiya-vo, netteleke ekekhai ni ophenta, ninnuwaka inamuna sothene mpakha olikana ni Kristu, ori muru’.—4:15.

‘[Atthu a mulaponi] osuwela waya onivariwa ni epiphi, . . . mwaha wolipa murima aya’.—4:18, 19.

‘Nyuwo khamwixuttihiwe siso omusuwela Kristu, vekekhai muhiwa silaleiwaka sa yowo, moxuttihiwa orattene ekekhai enkhala mwa Yesu’.—4:20, 21.

‘Muhana . . . orula omutthu wa khalai ohiya otthara makhalelo anyu a khalai’.—4:22.

‘[Masi] . . . wikhaliha atthu a nanano mmirukuni mwanyu ni murohoni mwanyu, ni onwara mutthu musyá’.—4:23, 24.

‘Nawiye attharuwe wiya’.—4:28.

‘Ohiya-vo, ahaweleke ovara muteko ni matata awe ntoko vamphwanelelaya’.—4:28.

‘Mwano mwanyu muhikhume molumo òtakhala’.—4:29.

‘Nto okathi wophaveleya, mulavuleke molumo òrera, yawo anakhaliherya akhwinyu’.—4:29.

‘Murihele ottaiwene wa nyuwo makhalelo othene òwawa, ònanariwa, òwali, òviruwa ni òruwana, vamosa ni sotakhala sa khula enamuna’.—4:31.

‘[Masi], murerelaneke murima ni omorelana ikharari mukina ni mukhwawe. Mulevelelaneke’.—4:32.

‘Vano itthu sa oseje [ekhapa] ni sonanara sikina wala milili, sihiromoliweke eriyari anyu’.—5:3.

‘Nto mulavuleke molumo òmuxukhuru Muluku’.—5:4.

‘Khalai, nyuwo mwàri epiphi’.—5:8.

‘Nto vano mwá warya mwaha wokhala ni Apwiya’.—5:8.

‘Muhatàneke ni atthu anvara miteko sa mwepiphini, sihinkumiha etthu’.—5:11.

‘Nto mwattaruxeke’.—5:11.

‘Muthokorerye orattene mwettelo anyu, muhetteké ntoko alolo’.—5:15.

‘[Masi] mwetteke ntoko atthu a miruku mphwanyaka murerelo wa okathi orinanyu’.—5:15, 16.

‘Tivó, muhikhalé òhupuwela’.—5:17.

‘Nto mphaveleke osuwela sintthunawe Muluku’.—5:17.

‘Muhihapaliweké, mana evinyu ennopwetexani’.—5:18.

‘Nto mwisarihe [munepa wottela]’.—5:18.

‘Kristu [ohiiriha muloko awe] okhumelela ovuwene oholo wawe, ohinanarihiwe, nnákhala ni itthu sikina sohirera’.—5:27.

‘Nto okhaleke wowarya wohittheka’.—5:27.

‘Khavo mutthu oniphweliwa ni erutthu awe’.—5:29.

‘Ohiya-vo, khula mutthu onnilyiha erutthu awe, onniphwanyiha sorera, sisale Kristu sinìrelawe [muloko]’.—5:29.

[Elatarato]

[Elatarato]

[Elatarato eri epaaxina 6]

Munniwerya wuupuwelela epantta ya nenli enooniherya ovirikana?