Mmukokhoreleke Yehova, Mwene a Mahiku Otheene

“Mwené a mahiku òhimala . . . attittimihiwe ni avuwihiwe wa mahiku othene”.​—1 TIM. 1:17.

MWAAROWA WAAKHULA SAI?

Exeeni enniiriha osiveliwaka ni enamuna ya olamulela wa Yehova?

Moota xeeni Yehova okathi wotheene onooniherya awe ophavela wawe waathokorerya moophenta apinaatamu?

Exeeni eniwiirihani omukokhorela Mwene a mahiku otheene?

1, 2. (a) Ti pani ori ‘Mwené a mahiku òthene’, nto xeeni mwiihaneliwo owo oryaawe womphwanela? (Nwehe elatarato yoopacerya.) (b) Exeeni enniiriha omwaattamela Yehova?

MWENE oSuwazilandia, Sobhuza II, aahilamulela iyaakha 61. Waatta wa iyaakha silamulenle awe, eri etthu ehinimakela wiireya, wa alamuleli anceene mahiku ala. Nnaamwi olamulelo wa Mwene Sobhuza waari wootepexa olekela, ohaavo mwene yoowo olamulelo awe ohinimala, voovirikana ni apinaatamu. Tthiri Biibiliya onnimuhimya okhala “Mwené a mahiku òthene”. (1 Tim. 1:17) Namalepa Esalimo onnihimya nsina na Mwene owo, oriki: ‘Yehova ti Mwene a mahiku otheene, voohimala’.​—Esal. 10:16, Tradução do Novo Mundo.

² Okhala wira olamulelo wa Muluku khonimala, eyo enniiriha Omwene owo okhala woovirikana ni olamulelo wa mutthu. Hata vari siiso, etthu ennisivela enamuna ya olamulela wawe Yehova. Mwene yoowo aalamunlenle wIsarayeli khalai etthu yowiiraka iyaakha 40, aahinvuwiha Muluku ni masu ala: ‘Yehova t’òmoriwa ikharari ni t’òkhupanyerya, t’òpisa onanariwa, ni t’òroromeleya. Yehova òkilathi ehije awe wirimu, omwene awe onniruma mapuro othene’. (Esal. 103:8, 19) Khahiyo wira Yehova ti Mwene ahu paahi, owo-tho Tiithi ahu oophenta a wiirimu. Ela ennikumiherya makoho manli: Enamuna xeeni Yehova onikhala awe Tiithi? Nuumala omwareeliwa wEdeni Yehova onilamulela mwa enamuna xeeni? Waakhuliwa wa makoho awo, onooniiriha omwaattamela Yehova ni omukokhorela ni murima ahu wotheene.

MWENE A OKATHI WOTHEEENE, ONNIKUMIHERYA EMUSI YA OLUMWENKU WOTHEENE

3. Ti pani aari oopacerya okhumelela mwa emusi ya Yehova ya olumwenku wotheene, ni ti pani-tho yaapattuxiwe ntoko ‘àna’ a Muluku?

³ Tthiri yaari etthu yoomuhakalaliha Yehova okathi aamukumihenrya awe Mwanawe oopacerya oyariwa! Muluku khaamoona Mwanawe oopacerya oyariwa, okhala mutthu pure. Tthiri Muluku aanimphenta ntoko Mwaana oomuyarawe ni aahinvaha eparakha yoohakalaliha okathi aapattuxa awe arumeyi akina wira alamuleliweke ni Muluku. (aKol. 1:15-17) Soopattuxiwa iyo, saahela muhina ikonto sinceenexa sa malaikha. Malaikha awo annihimmwa okhala ‘arumeyi awe’, tivonto malaikha annimurumeela Muluku moohakalala, nto Muluku onnaattittimiha owiihanaka okhala ‘anawe’. Awo aniirela mpantta wa emusi ya olumwenku wotheene.​—Esal. 103:20-22; Yobi 38:7.

4. Apinaatamu yaaheliwe sai muhina mwa emusi yotheene ya Muluku?

⁴ Opattuxakaru erimu ni elapo ya vathi, Yehova aahincererya emusi awe ya olumwenku wotheene. Mwa enamuna xeeni? Nuumala oreeriha saana epantte emosa ya elapo ya vathi wira ekhaliweke, Yehova aahittittimiha soopattuxiwa sawe sa valaponi, ampattuxaka mulopwana oopacerya, Adamu, ailikanyihaka mmansawe. (Maph. 1:26-28) Ntoko mpattuxa, Yehova aahikhalana edireito ya wiiweleliwaka ni Adamu. Ntoko Tiithi, Yehova onnikumiherya malamulo awe, mwa enamuna yoophenta ni yooreerela murima. Khiivo etthu emosa ya malamulo a Yehova enimukhoottiherya mutthu okhala ootaphuwa.​—Musome Maphattuwelo 2:15-17.

5. Etthu xeeni Muluku yaapanke awe wira elapo esareye apinaatamu?

⁵ Moovirikana ni mamwene manceene a apinaatamu, Yehova vannimusivela waavaha miritti ale anaalamulela awe, ni onnaaroromela ntoko atthu a mweemusini mwawe. Mwa ntakiheryo, owo aahaavaha Adamu owerya wooruma soopattuxiwa sikina sikumi, mpakha onvaha muteko woohakalaliha ni wooxankiha; ovaha masina a inama. (Maph. 1:26; 2:19, 20) Wanipacerya Muluku khaapattunxe atthu anceene oomalela okathi omosaru wira akhaleke valaponi. Masi, owo aathanlale ompattuxa namakhaliherya mmosa paahi wa Adamu, eyo piiyo, muthiyana iitthaniwa Eva. (Maph. 2:21, 22) Nuumala-vo, aahaavaha anamathelana ale eparakha ya waayara anamwane ni osarya valaponi. Vaakhanle wira khiyaatthenke, apinaatamu yaarowa waatta, ni wunnuuherya mittetthe sa eparayiisu mpakha elapo yotheene okhala parayiisu. Yuraanaka ni malaikha ari wiirimu, apinaatamu yaarowa omukokhorelaka Yehova wa mahiku oohimala, ntoko epantta ya emusi ya Yehova, olumwenku wotheene. Tthiri eyo yaarowa okhala yoohakalaliha. Ni yaarowa wooniherya ophenta wuulupale wa Tiithi ahu, Yehova!

MWAANA OOHIIWELELA ONNIKHOOTTA OLAMULELO WA MULUKU

6. (a) Moota xeeni omwareya opacenrya aya eriyari ya aana a Muluku? (b) Xeeni omwareya iwo ohintaphulela aya wira Yehova ohoceela olamulela?

⁶ Voriipiha-vo murima, Adamu ni Eva khiyoona oreera olamuleliwa ni Yehova. Tivonto vaathanlale aya omwiiwelela Satana, nlaikha noomwareya. (Maph. 3:1-6) Masi, okumi wohimwiiwelela Muluku ohaakumiherya awo ni anaaya: masooso, ohaawa, ni okhwa. (Maph. 3:16-19; aRom. 5:12) Nuumala Adamu ni Eva ottheka, Muluku khaarina-tho atthu yaamwiiwelela valaponi. Nto niireke eyo enitaphulela wira ahooceela olamulela, ni wira khaawerya-tho waalamulela apinaatamu ni itthu sotheene valaponi? Nnaari, eyo kheniireya! Owo aahooniherya okhulupale awe, vaavo aawoomonle awe mujardim wa Edeni, Adamu ni Eva, aakhoottiherya otthikela, nto aapweha makerubim ephiro yaarowa ojardim. (Maph. 3:23, 24) Okathi omosaru owo, aahooniherya ophenta wawe ntoko Tiithi, vaavo aalipihenrya awe wiiraneya wa yoolakela awe ya okhalana emusi yowiiraana enimukokhorela, aana oomunepani ni apinaatamu. Muluku aahilaiherya osuulu waarowa ompwetexa Satana ni omala-maliha ohaawa onikhumela mwaha wa ottheka wa Adamu.​—Musome Maphattuwelo 3:15.

7, 8. (a) Moota xeeni okathi wa Nowe otakhala waamwarenle aya valaponi? (b) Marehereryo xeeni Yehova aapanke awe wira aapwetexe atthu ootakhala valaponi ni okhapelela emusi ya apinaatamu?

⁷ Nuuvira iyaakha sinceene, alopwana akina yaahithanla okhala atthu oororomeleya wa Yehova. Eriyari ya atthu awo, aahikhala Abeli ni Henokhi. Masi, apinaatamu anceene yaahimukhootta Yehova okhala Tiithi aya ni Mwene aya. Tivonto okathi wa Nowe elapo yaahisareya atthu ‘oowali’. (Maph. 6:11) Nto niireke eyo yaataphulela wira Yehova khaarina-tho owerya wa weettiherya itthu sa valaponi? Itthu siiranen’ye sinooniherya exeeni voohimya sa mwaha owo?

⁸ Thokoreryani yowiiraneya ya Nowe. Yehova aahinvaha Nowe malakiheryo kamosa-kamosa, wira oteke ekalawa yuulupale yaarowa omoopola Nowe, ni atthu a emusi awe. Muluku aahooniherya-tho ophenta wuulupale wa emusi yotheene ya apinaatamu, vaavo aamurumme awe Nowe ‘olaleya exariya’. (2 Ped. 2:5) Mitthaka sa Nowe saahela muhina waxonttela atthu wira attharuwe otakhala waya ni waalopola mwaha wa opwetexiwa waarwa moohipisa; masi atthu ale khiyaaphavela wiiwa. Mwa iyaakha sinceene Nowe ni emusi awe, yaakhala eriyari ya atthu oowali ni yahuuleliwa muru opaka itthu soohiloka. Yehova ntoko Tiithi oophenta, aahaakhapelela ni waareeliha atthu ale oororomeleya athanu naararu. Mwaha woomuruuha Mutaaseke elapo yotheene, Yehova aahooniherya owerya wawe waapwetexa apinaatamu oomwareya vamosa ni malaikha ootakhala. Aayo, tthiri Yehova onniwerya tthiri weettiherya itthu sotheene.​—Maph. 7:17-24.

OLAMULELO WA YEHOVA NUUVIRA MUTAASEKE

9. Eparakha xeeni Yehova aavanhe awe apinaatamu nuumala mutaaseke?

⁹ Okathi Nowe ni emusi awe aakhumela awe ota wa ekalawa, onaweha elapo ereerihiweene nto anaphumurya epheyo yooreera, mirima saya tthiri saanimuxukhurela Yehova mwaha wa ophentiwa ni okhapeleliwa waya. Moohipisa Nowe aahimuteka altari, khuvaha mukuttho woomukokhorela Yehova. Muluku aahimureeliha Nowe ni emusi awe, nto khunvaha malakiheryo ala: ‘Mwayareke an’inyu, munjerereye, musareye mulaponi mothene’. (Maph. 8:20–9:1) Vano apinaatamu yaahikhalana-tho eparakha ya wiiraana amukokhorelaka Muluku ni osareya mulaponi.

10. (a) Nuumala Mutaaseke ti wuuwi, ni moota xeeni aatthikenle awe omwareeliwa Yehova? (b) Etthu xeeni Yehova aapanke awe wira otthuna wawe wiireye?

¹⁰ Masi mutaaseke khaamalamalinhe ohimalela wa apinaatamu, ohiya-vo, apinaatamu yaahaana owanana ikuru soohooneya sa Satana, ni malaikha oomwareya. Tivonto moohipisa, apinaatamu yaahitthikela-tho omwareela olamulelo woophenta wa Yehova. Mwa ntakiheryo, Nemurodi, musulwaawe Nowe aahipacerya ovaanyiha olamulelo wa Yehova mmukhalelo mukina musya. Nemurodi aanihimmwa okhala ‘muxayi mulupale anvanyiha Yehova’. Nemurodi aahiteka isidade suulupale, ntoko ele eniitthaniwa Babeli, ni aahiipaka okhala Mwene a ‘muttetthe wa oSineyari’. (Maph. 10:8-12) Vano, Mwene a mahiku otheene, aarowa opaka exeeni wa Nemurodi ole oohiiwelela yoowo aamananiha ovaanyiha olamulelo ni yoolakela ya Muluku wira ‘elapo esareye atthu’? Muluku aahaakanyerya mattaava ayasa, khuwiiriha ale yaalamuleliwa ni Nemurodi, ohiiwanana mpakha omwareela ‘mulaponi mothene’. Atthu awo yaamwareya, yaahikuxa soolema sa waakokhorela amuluku eethiru, ni inamuna soolamulela sa opinaatamu.​—Maph. 11:1-9.

11. Moota xeeni Yehova oonihenrye awe ororomeleya wa Abrahamu yoowo aari mpatthani awe?

¹¹ Nnaamwi atthu anceene yaakokhorela amuluku eethiru nuumala mutaaseke, yaahikhala atthu akina yaavikaniha omuttittimiha Yehova. Mmosa a yaawo, aari Abrahamu, yoowo mwaha wa wiiwelela wawe aahiyale itthu sooreera esidade yaakhala awe ya Uri, khurowa okhala muheemani iyaakha sinceene. (Maph. 11:31; aHéb. 11:8, 9) Okathi yoole Abrahamu aamakela awe othaama, mittetthe saamaka awe yaanikhala mamwene aapinaatamu, anamunceene a mamwene awo isidade saya saahikhalana ixiri soolipihiwa. Masi Yehova aahimukhapelela Abrahamu ni emusi awe. Voohimya sa okhapelela wa Yehova ntoko Tiithi, Nasalimo mmosa aahimyale so: ‘Muluku khamutthunihenrye mutthu wapuherya, mwaha wa yawo ahahukhumu mamwene’. (Esal. 105:13, 14) Mwaha wa ororomeleya wa mpatthani awe, Yehova aahimulaiherya Abrahamu wira: ‘Mwa nyuwo anokhumelela mamwene’.​—Maph. 17:6; Yak. 2:23.

12. Moota xeeni Yehova oonihenrye awe okhulupale awe wEjiitu nto atthu awe oothanliwa yoonenle sai?

¹² Muluku aahilipiherya yoolaiherya awe wa Isaakhi mwaana a Abrahamu, ni wa Yakobe musulwaawe, wira aarowa wareeliha, nto eyo yaahela muhina mamwene yaarowa okhumelela wa osuulu ayasa. (Maph. 26:3-5; 35:11) Masi ahinatthi okhumelela mamwene awo, osuulu wa Yakobe waahipakiwa ipottha wEjiitu. Niireke ela yaataphulela wira Yehova khaarowa waakhwaniherya yoolaiherya awe, wala wira aahooceela wooniherya okhulupale awe valaponi? Nnaari! Okathi oona awe oreerela, Yehova ahooniherya owerya wawe ntoko Muluku, khumpwetexa Farawo mwene oohiiwelela. Nto aIsarayeeli yaale yaari ipottha, yaahimwaamini Yehova, yoowo awooponle mwa enamuna yuulupale mphareya yooxerya. Tthiri Yehova aahooniherya okhala Namalamulela a Olumwenku Wotheene, ntoko Tiithi oothokorerya saana aahirumeela owerya wawe wuulupale, wira aakhapelele atthu awe.​—Musome Okhuma 14:13, 14.

YEHOVA ONNIKHALA MWENE A ISARAYEELI

13, 14. (a) Okathi aIsarayeli yiipaaya nsipo, etthu xeeni yaahimyale aya sa olamulela wa Yehova? (b) Yoolaiherya xeeni voohimya sa Omwene, Muluku aapanke awe wa Davidi?

¹³ Moohipisa nuumala woopoliwa wEjiitu mwa mwiiriira, aIsarayeeli yaahiipa nsipo nooxintta, anvuwihaka Yehova. Nsipo nlo nilempwale eliivuru ya Okhuma ekapitulu 15 eversu 18, nto ninhela muhina masu ala: ‘Yehova ti Mwené a mahiku othene vohimala-tho’. Ekeekhai, Yehova aahikhala Mwene wa nloko nla nsya. (Otum. 33:5) Hata vari siiso, atthu ale khivaasivela Yehova okhala Namalamulela aya ohinooneya. Tivonto iyaakha 400 nuumala okhuma wEjiitu, awo yaahinvekela Muluku wira amuthanle Mwene eriyari ya apinaatamu, ntoko siira aya atthu akina yawaattamenle, yaawo yaakokhorela amuluku eethiru. (1 Sam. 8:5) Hata vari siiso Yehova nlelo taari Mwene aya, ekeekhai ela yaahooneya okathi wa emwene ya Davidi, yoowo aari mwene a nenli a wIsarayeeli.

¹⁴ Davidi aahiruuha oYerusalemu ekaaxa yowataana. Owo waari okathi woohakalaliha, maLevita yaahiipa nsipo noovuwiha nenlo nirina masu ala oowooneya saana alempwale va 1 Wahala 16:31: ‘Mwahimerye atthu othene wira vano Yehova okhala mwené’. Mutthu mukina pooti okohaka so: ‘Okhala wira Yehova ti Mwene wa mahiku otheene, moota xeeni aakhanle awe Mwene okathi ole’? Yehova aahikhala Mwene vaavo oonihenrye awe olamulela wawe, wala aatikithenrye awe marehereryo wira akina apakeke wala alokiherya etthu yiiraneya, yeettelaka otthuna wawe. Enamuna ela ya olamulela wa Yehova yaahooniherya itthu sikina sootthuneya. Davidi ahinatthi okhwa, Yehova aahimulaiherya wira omwene awe waarowa okhala wa mahiku otheene, oriki: ‘miyo kinrowa omukhaliha mwené mwan’inyu, yowo onrowanyu oyareliwa; miyo kinolipiha omwene awe’. (2 Sam. 7:12, 13) Nto wiiraneya waya wookiserya wa yoolaiherya eyo, mwaana, wala osuulu a Davidi, aakhumelenle muhoolo mwaya nuuvira iyaakha 1000. Nto aari ti pani, ni aarowa okhala liini mwene?

YEHOVA ONNIMUTHANLA MWENE MUSYA

15, 16. Okathi xeeni Yesu aathanliwe awe ntoko Mwene a muhoolo, okathi aaryaawe valaponi, mareheryo xeeni Yesu aapanke awe voohimya sa Omwene owo?

¹⁵ Mwaakha wa 29 EC, Yohani Mbatiza aahipacerya olaleya ariki: ‘Omwene wa wirimu ori vakhiviru’. (Math. 3:2) Okathi Yesu aabatiziwe awe ni Yohani, Yehova aahimuthanla Yesu okhala Mesiya aalaiheriwe, ntoko Mwene a muhoolo, a Omwene wa Muluku. Yehova aahimooniherya Yesu ophenta wawe ntoko Tiithi, khuhimya so: ‘Ola mwan’aka onimphentexaka, miyo kosiveliwa ni yowo’.​—Math. 3:17.

¹⁶ Okathi aalaleerya awe, Yesu aaninvuwiha Tiithi awe. (Yoh. 17:4) Yesu aahipaka eyo, olaleeryaka Omwene wa Muluku. (Luka 4:43) Owo-tho aahiwiixuttiha atthareli awe ovekela wira Omwene orwe. (Math. 6:10) Ntoko Mwene Oothanliwa, Yesu aahikhalana owerya wowaaleela anyokhani awe wira: “Omwene wa Muluku ori varíyari vanyu”. (Luka 17:21) Muhoolo mwaya, ohiyu omosa ohinatthi okhwa, Yesu aahipaka nivarihano na Omwene wa atthareli awe. Nto eyo yaarowa waavaha eparakha awiixutti awe oororomeleya yoolipelela ya okumana ni yena ntoko mamwene Momweneni mwa Muluku.​—Mmusome Luka 22:28-30.

17. Moota xeeni Yesu aapacenrye awe olamulela mwaakha wa 33 EC, masi aahaana olipelela exeeni?

¹⁷ Yesu aarowa opacerya liini olamulela ntoko Mwene a Omwene wa Muluku? Owo khaarowa opaka eyo okathi ene yoole. Maana, mmeeloni mwaya nuuvira othana eriyari, Yesu aahiiviwa nto atthareli awe khumwareya. (Yoh. 16:32) Masi ntoko siireya aya khalai, Yehova aanivikaniha weettiherya itthu sotheene. Nihiku na neeraru, owo aahimuhihimuxa Mwanawe, nto nihiku na Pentekoositi na 33 EC, Yesu aahitikitherya Omwene wa omunepani eettihaka muloko wa eKristau wa annawe oowoottihiwa. (aKol. 1:13) Masi, nlelo Yesu aahaana owehererya wira ophwanye owerya woomalela olamulela elapo yotheene ntoko osuulu woolaiheriwa. Yehova aahimuleela Mwanawe wira: ‘Mukilathi mono aka wolopwana; kinimwakuxa awanan’inyu ekhalé ipottha sanyu’.​—Esal. 110:1.

MMUKOKHORELEKE MWENE A MAHIKU OTHEENE

18, 19. Mwaha ola onnitumererya opaka exeeni, nto exeeni enrowa ahu wiixutta mmwaha onittharelana?

¹⁸ Mwa iyaakha imilyau sinceene Omwene wa Yehova waaninyoholiwa wiirimu ni valaponi. Masi, Yehova khonahiye okhulupale awe; maana onnivikaniha weettiherya itthu sotheene. Ntoko Tiithi oophenta, owo aanaakhapelela ni waathokorerya atthu awe oororomeleya ntoko Nowe, Abrahamu, ni Davidi. Tthiri itthu iya sotheene siniiriheke omwiiwelela Mwene ahu ni omwaattamela.

¹⁹ Woonasa wene hiyo ninnikoha so: Yehova onikhala sai Mwene mahiku ala? Ninrowa wooniherya sai okhala atthu oororomeleya wa Yehova ni okhala anamwane oomalela mwa emusi yoowiiraana ya Muluku? Anitaphulela exeeni masu ahu a nivekelo oowi: ‘Omwene wa Muluku orwe’? Makoho ala anrowa waakhuliwa ni mwaha onittharela.