BIIBILIYA ONNIRUKUNUXA MIRIMA SA ATTHU

Elavuliwe ni Ivars Vigulis

MWAAKHA OYARIWA AWE: 1974

ELAPO ONIKHUMA AWE: OLETÔNIA

MWAHA ENE: AAMWEETTIHA MOTORIZADA MOOXINTTANA

MWEETTELO AKA WA KHALAI: Miyo kiyariwe epooma ya oRiga, ekapitaali ya oLetônia. Miyo ni murokoraka ninnuwale ni amamihu. Nnaamwi Amaama yaari Katoolika, hiyo naarowa okerexa paahi waphiya okathi wa ifesta sa okerexa. Okhuma khalai, kaanikupali wira ohaavo mutthu ooweryexa. Masi okhala wira kaari mmiravo, kaahikhalana soophavela sikina.

Vaavo kannuwa aka, amaama yanoona wira kaanisiveliwa olokiherya itthu sa vatthokoni wira nirumeele-tho. Okhala wira saahikhala itthu sinci, amaama yaamakela oxankiheya ni khiyaaphavela okihiya mekhaka owaani. Tivonto yaahikivaha ekaaxa yaarina ikaruma sa eyuuma, yeeyo kaarumeelaka okathi woothweela wira kiixutte itthu. Osiveliwa waka ni ikaruma sa eyuuma waahikiiriha osiveliwa-tho ni omweettiha motorizada. Amaama yaahikiroiha exikola eniitthaniwa Zelta Mopēds, eyo piiyo, exikola enixuttiha omweettiha motorizada mooxinttana. Miyo kaahipacerya oweettiha amoota acikhaani, nto muhoolo mwaya amoota aalupale.

Miyo kaari oowaakuva wiixutta, ni moohipisa kaahipacerya okhumela saana wa jooku ola oowoopiha. Ikwaha tthaaru, miyo kaahixintta omweettiha motorizada nto kikhala mutthu oopacerya a elapo ya oLetônia. Vano ikwaha piili kaahixintta wEstados Bálticos (Estônia, Letônia ni Lituânia).

MOOTA BIIBILIYA ORUKUNUNXE AWE OKUMI AKA: Okathi kaari aka oovuwa, namorada aka Evija (yoowo muhoolo aakhanle mwaaraka) ahaasuwela Anamoona a Yehova. Yena aahiphwanya iliivuru saya, seiyo saarina epantte yooniherya moota woovekela yoosoma ya Biibiliya. Evija aahimaleliha olepa epantte eyo, ni aahivahererya. Moohipisa, Anamoona anli yaahimuxukurya Evija ni khupacerya omusoma Biibiliya. Eyo yaahikisivela, masi okathi owo miyo nkaacalela etiini.

Muhoolo mwaya, Anamoona yaahikivekela okilaathi vamosa ni Evija wira kiwiriyaneke yoosoma awe ya Biibiliya. Miyo kaaheemya, ni ele kaiwa aka yaanikisivela. Etthu yuulupale yaakivanre murima yaari yooleiherya ya Biibiliya voohimya sa eparayiisu ya valaponi. Mwa ntakiheryo, awo yaahikooniherya yoolepa ya Esalimo 37:10, 11, eni: “Atakhali anorimela nananoru: nyuwo munimwaphavela, muhaphwanyé. Vano atthu òmàla anoreriwa vathí-va: anokhala-mu ni murettele womalela”. Tthiri yooleiherya eyo yaahikisivela vanci.

Ophavela waka osuwela itthu sa omunepani waanincerereya. Nto, kaahipacerya osuwela wira itiini sinci saaxuttiha itthu sowootha. Masi, sowiixuttiha sa Biibiliya saanikivara murima okhala wira saari sookhalela ni sowiiweya saana.

Vaavo kaavikanihaka omusoma Biibiliya, kaahiixutta wira Yehova onnivaha efaita okumi vanceene. (Esalimo 36:10) Wuupuwelela yoolepa eyo waahikiiriha omuhiya omweettiha motorizada mooxinttana maana eyo yaari etthu yowoopiha. Masi, miyo kaaniphavela wira kinvuwiheke Yehova. Tivonto, kaahihiya osiveliwa ovuwa, ottottopeliwa, ni osiveliwa omweettiha motorizada mooxinttana.

Mwaakha wa 1996, kaahirowa okongresuni wa Anamoona a Yehova a ilapo sinceene aapakiwe oTallinn, wEstônia, vakhiviru ni estádio yeeyo kaamakela aka omweettiha motorizada. Okongresuni iwo kaahiwoona atthu ookhuma ilapo sinceene, athukumanne ene moowuurana ni mwa murettele. Mwa ntakiheryo, vaavo Namoona mmosa muthiyana waamurimenle awe murupa mwaamukhaani, kuupuwela wira yena khaaphwanya-tho. Moohipisa, Namoona mukina aahittotta murupa ole nto khumuttikiherya mwaneene itthu sotheene simalenle ene. Miyo kaahitikinihiwa vanci! Vano kaahikupali wira Anamoona anneettela malamulo a Biibiliya. Miyo ni Evija naanivikaniha omusoma Biibiliya moorowa vahoolo, nto eyaakha 1997 naahibatiziwa ntoko Anamoona a Yehova.

MOOTA OTTOTTENLE AKA MUREERELO: Apatthani aka akina ahookhwa mwaha wa mweettelo aya wootakhala voohimya sa omweettiha motorizada. Yoosoma aka ya Biibiliya yookikhaliherya osuwela wira miyo kihaana muritti ohoolo wa Mulipa Onivaha okumi, Yehova. Weettela malakiheryo awo, woonasa wene ohoopola okumi aka.

Mwa iyaakha 4, miyo ni Evija naahikhalana eparakha yoorumeela oseedi wa Anamoona a Yehova oRiga. Vano ninnihakalala vaavo nimmuhuwa ahu mwanihu mwaamuthiyana Alise, wira annuwe omphentaka Yehova. Nave, kihaana eparakha yoorumeela nihiku nimosa vasumanani opuro onitaphuleliwa nttaava epooma ya oRiga, kilokihaka ikaaro ni itthu sikina sinihononeya. Miyo kinnihakalala vanci mwaha woowi kinnirumeela saana itthu kiixuntte aka kiryeene mwaana! Veekeekhai nlelo kinnilokiha itthu soohononeya wira sirumeeliweke vasya-tho.

Kinnivaha efaita eparakha yoolaleya voohimya sa Muluku mmosaru eekeekhai ni emusi aka. Iyo itthu kiixuttale aka mBiibiliyani. Tthiri, yooleiherya ya eparayiisu valaponi yoorukunuxa okumi aka!

[Eponto yuulupale epaaxina 9]

Yoosoma aka ya Biibiliya yookikhaliherya osuwela wira miyo kihaana muritti ohoolo wa Mulipa Onivaha okumi