MWAHA WOOPACERYA | NIIREKE OHAAVO ONISUWELA ITTHU SA MUHOOLO?

Itthu Sikina Sinniireya, Masi Sinceene Nnaari

Niireke munniphavela osuwela ele enrowa owiiraneelani muhoolo? Anamunceene anniphavela. Atthu anceene annihimya itthu sa muhoolo; itthu sikina sinniireya, masi sinceene nnaari. Muthokorerye matakiheryo anittharelana:

MASIENTISTA annirumeela ikaruma soorowa vahoolo ni musurukhu munceene wira ahimye moota onanarihiwa wa elapo onrowa aya okumiherya mixankiho molumwenkuni, wala akhala wira meelo enoorupa epula aahiiso nnaari.

ASUWELI ANITOKOSA MYAHA annihimya itthu sinrowa wiireya sa anakoso ni ipoliitika. Thaaciri mmosa a molumwenkuni Warren Buffett, aahihimya itthu saarowa wiireya sa anakoso, nto khiireya tthiri. Mwaha wa yeeyo, owo aaniitthaniwa profeta. Namatokosa mukina Nate Silver, aahipaka etthu yaamukhalihenrye ohimya itthu sinci saarowa okhumelela ni epoliitika ya EUA vamosa ni ale yaarowa waakhela etthuvo ya efilme ya Hollywood.

ILIIVURU SA KHALAI sinnihimmwa okhala iprofesia. Atthu akina anikupali wira itthu siniiraneya vano silempwale eseekulu 16 ni mulopwana iihaniwa Michel de Notredame (Nostradamus). Akina yaahimya wira omala wa kalendaario Maia 21 a Dezembro 2012, waathoonyerya okhumelela ihasara suulupale sa ephattu.

AHOOLELI A ITIINI ikwaha sikina annilaleya okhumelela wa ihasara olumwenku wotheene wira yaalopole atthu ni okhalana atthareli. Profeta mmosa aalaleya omala wa olumwenku Harold Camping ni awiixutti awe, yaahihimya wira elapo yammala eyaakha ya 2011. Masi, eyo khiyiiranen’ye.

AKULUKHANA annihimya wira aakhalana owerya woohimya itthu sa muhoolo. Edgar Cayce ni muthiyana oniihaniwa Jeane Dixon yaahihimya itthu sikina siiranen’ye eseekulu 20. Masi, itthu sinceene khisiiranen’ye. Mwa ntakiheryo, Dixon aahihimya wira mwaakha wa 1958 yamukhumelela Ekhotto ya Neeraru ya Molumwenkuni; ni Cayce aahihimya wira epooma ya oNova Iorque yammireya ni maasi a mphareya iyaakha sa 1970.

Nto niireke ehaavo enamuna yoororomeleya wira nisuwele itthu sa muhoolo? Nla nikoho nootthuneya. Aakhanle wira munniwerya osuwela itthu sa muhoolo, waaniheryasa mwampaka soothanla sikina.