ALE ANISOMA ILIIVURU SAHU ANNIKOHA . . .

Natali Opacenrye Sai?

Olumwenku wotheene, atthu annimwiira Natali ni mathowa oovirikana. Akina onnaasivela oviriha okathi woohakalaliha atthekulaka ni apatthani ni amusi. Akina, anniviriha okathi amuupuwelelaka Muluku wala waakhaliherya atthu oothoiwa. Moohaaniherya, eyo etthu yooreera. Masi, niira na Natali ninvarihana ni itthu soohiloka sa khalai.

Yoopacerya, anamunceene anuupuwela wira Natali onitthapeliwa oyariwa wa Yesu. Masi anamatokosa anceene anikupali wira nihiku aayariwe Yesu khanisuweliwe. The Christian Book of Why (Eliivuru ya eKristau ya Mathowa Xeeni) enihimya wira “maKristau a eseekulu yoopacerya yaanikhootta othanla nihiku aayariwe awe Yesu”, maana yaaphavela “ohiya soolema sotheene sa epagau”. Biibiliya khonihimya wira Yesu ootoko wuupuwelela nihiku nawe nooyariwa wala nihiku na mutthu mukina. Masi, owo aahaaruma awiixutti awe wira yuupuweleleke okhwa wawe.​—Luka 22:19.

Ya nenli, asomi anceene anikupali wira soolema sinceene sa Natali sinivarihana ni epagau. Iyo sinihela muhina yoolema ya Papai Noel, orumeela iritta sa mwiri oniitthaniwa visco, mwiri wa Natali, ovahanana itthu, opattiha iveela, orumeela ifilori, ni isipo sa Natali. Eliivuru The Externals of the Catholic Church (Soolema sa Ekerexa Katoolika) enihimya so: “Vaavo ninvaha ahu ni waakhela etthu okathi wa Natali, wala othomeya makukhu ooripelela owannyihu ni oKerexa, atthu akavi a hiyo anisuwela wira waaniheryasa nneettela soolema sa epagau?”

Nto nyuwo pooti wiikohaka so: Niireke ti vootthekeya otthara soolema iyo sinikhala ntoko sooloka? Muthokorerye eponto ya neeraru. Muluku khoneemya otakaaherya soolema sa epagau ni okokhorela wekeekhai. Omurumeelaka profeta Amosi, Yehova Muluku aahaaleela atthu awe oohiiwelela oriki: “Miyo kinniphweliwa n’ifesta sanyu . . . Nkintthuna-tho wiwa isipo sanyu”.​—Amosi 5:21, 23.

Exeeni yaamwiirinhe Muluku olavula masu ala aikuru? Muthokorerye ele yaapakiwa ni aIsarayeli epantte enikela epheyo. Mwene oopacerya, Yerobowamu, aahipaka inyompe piili sa eweero oDani ni oBetheli. Nto aahiwiiriha atthu okokhorelaka inyompe omuhiya Yehova Muluku, oYerusalemu. Nave, mwene owo aahipaka ifesta ni aahaathanla anamukuttho wira yaakhaliheryeke atthu wuupuwelela ifesta iyo.​—1 Mamwene 12:26-33.

Ele aIsarayeli yaapaka aya yaakhala ntoko etthu yooloka. Awo yaaphavela omukokhorela Muluku ni omuhakalaliha. Moolumo Muluku aamulenle awe Amosi ni maprofeta makina, annooniherya moota Muluku oonela awe soolema iyo. Orweela wa Profeta Malakhiya, Muluku aahimmye so: “Miyo k’Apwiya: nkinirukunuwa nnákhala ottharuwa”. (Malakhiya 3:6) Niireke khinnoona moota Muluku onimoonela awe Natali olelo-va?

Nuumala osuwela moota Natali sipacenrye awe, atthu anceene aahiya opaka efesta ela. Awo anniphwanya ohakalala vaavo aniviriha aya okathi ni amusi vamosa ni apatthani yaakhaliheryaka atthu oothoiwa okathi wotheene.

[Eponto yuulupale epaaxina 11]

“Vaavo ninvaha ahu ni waakhela etthu okathi wa Natali, wala othomeya makukhu ooripelela owannyihu ni oKerexa, atthu akavi a hiyo anisuwela wira waaniheryasa nneettela soolema sa epagau?”​—The Externals of the Catholic Church (Soolema sa Ekerexa Katoolika)