“Namiruku T’ule Onsuwela Okhotta Oviruwa”

Prusoore onimwiixuttiha ommana boola, onnoomoliwa muteko mwaha wa oviruwa mootepana.

Maama onnimunyemela mwanawe mwaha woohilokiherya ekwaartu awe.

Mwaana onninyakhula vanceene mwaha woohivahiwa ele eniphavela awe.

OTHEENE ahu ninnaaweha atthu aviruwaka, nave moohaaniherya ni hiyo nootoko oviruwa. Hiyo ninnisuwela wira oviruwa khahiyo etthu yooloka. Masi ikwaha sikina, ninnuupuwela wira nookhalana mathowa anniiriha onanariwa, vanceenexa akhala wira mutthu mukina onikhala ntoko khonittittimiha malamulo ahu. Mwaha mmosa opakiwe ni Nikhuuru na wAmerica Ninsoma Muupuwelo wa Atthu, onihimya so: “Oviruwa khahiyo vootthekeya, onnikhaliherya ekumi, nave oniirela mpantta makhalelo a mutthu”.

Moonelo owo pooti okhala ntoko wookhalela, vaavo ninsoma ahu ele murummwa eKristau Paulo aalempe awe. Osuwelaka wira pooti okhala okathi atthu aniviruwa aya, owo aahimmye so: “Mwananariwa vale, mwipasopeke wira muhittheké. Onanariwa wanyu omaleke vahinatthi wila”. (aÉfeso 4:26) Nto nihaana wooniherya onanariwa wahu, wala nihaana wiimananiha osyaka?

NIIREKE TI VOOKHALELA MUTTHU OVIRUWA?

Okathi Paulo aalavunle awe sa oviruwa, woonasa wene uupuwelela moolumo a nasalimo yoowo aalempe so: “Munyonyiwe, nto muhittheke”. (Esalimo 4:5, BE) Nto yoolopola ya Paulo enitaphulela exeeni? Owo aahitthokiherya wira: “Murihele ottaiwene wa nyuwo makhalelo othene òwawa, ònanariwa, òwali, òviruwa ni òruwana, vamosá ni sotakhala sa khula enamuna”. (aÉfeso 4:31) Mwekeekhai, Paulo aatumererya maKristau osyaka onanariwa mootakhala. Mwaha ole wa Nikhuuru na wAmerica Ninsoma Muupuwelo wa Atthu, onnihimya-tho so: “Sootokosa sinooniherya wira ‘wooniherya’ oviruwa onnimwiiriha mutthu onanariwa mootepana ni okhala ootakhala, nave khonikhaliherya . . . ophuka muxankiho okhumenle”.

Nto, ninrowa osyaka sai oviruwa mootepana vamosa ni makhalelo otheene oohiloka? Mwene a miruku Salomoni a wIsarayeli wa khalai, aalempe so: “Namiruku t’ule onsuwela okhotta oviruwa: ovuwa wawe wavilela aninveha”. (Miruku 19:11) Nto ‘miruku’ sinrowa onikhaliherya sai osyaka oviruwa mootepana?

MIRUKU SINNIVUKULA OVIRUWA

Mutthu a miruku tuule oniimananiha osuwela ele emwiirinhe mutthu mukina okhala oonanariwa. Nto miruku sinrowa onikhaliherya sai okathi ninveehiwa ahu?

Vaavo nnoona ahu etthu yoohiloka, waaniheryasa ninnixankiheya. Masi, natthara muupuwelo ahu ni opaka etthu mwaha woonanariwa, hiyo pooti wiikumiherya maxakha ni waahaaxa akina. Ntoko mooro woohikhapeleliwa okhanle awe oopaha enupa, oviruwa mootepana pooti ohonona mweettelo ahu ni wataana wahu ni atthu, vamosa ni Muluku. Nto, okathi onoona ahu wira oviruwa wahu onnincerereya, ti vooloka weemela ni wuupuwelela saana mwaha owo. Tthiri, ovarerya saana mwaha owo onoonikhaliherya ohinanariwa mootepana.

Mwene Davidi, aahanle vakhaani okhalana nthowa na ephome mwaha wa mulopwana aihaniwa Nabali. Owo aahisyaka opaka yoottheka eyo mwaha wookhaliheriwa wuupuwelela saana ele yaakhumelenle. Davidi ni atthu awe yaahikhapelela ipwittipwitthi sa Nabali moothakoni mwa oYudeya. Vaavo waaphiyale aya okathi wooreeriha inama, Davidi aahinvekela yoolya Nabali. Nto Nabali aakhunle sai? “Miyo kikuxe ephau aka ni màsi aka n’inama saka ni mihuwo saka sihiteliwe nìra nla, kavahe atthu kintikhinaka onkhumaya?” Tthiri moolumo awo yaari oveeha! Okathi Davidi aiwale awe, owo ni alopwana oowiiraka 400, yaahivenya wira yamwiive Nabali ni emusi awe.​—1 Samuweli 25:4-13.

Mwaarawe Nabali, Abigayili, nuumala osuwela ele yaakhumelenle, aahirowa okumana ni Davidi. Okathi aakumanne awe ni Davidi ni atthu awe, aahikokhora nto khuhimya so: “Mukihiye kolavuliheni, mukìwe. Nwiriyane molumo a murumeyi any’ula”. Nuumala-vo Abigayili aahimuleela Davidi wira Nabali aari mutthu ootakhala, ni aahitthokiherya wira Davidi aamukhalana nthowa na ephome.​—1 Samuweli 25:24-31.

Abigayili aamukhalihenrye sai Davidi okhalana miruku ni ohipaka yoottheka? Wanipacerya, Davidi aahoona wira Nabali aari mutthu ootakhala okhuma khalai; yanenli ahoona wira aamukhalana nthowa na ephome akhala wira amphuka mwaha ole mmansawe. Moolikanasa ni Davidi, nyuwo pooti oviruwa mwaha wa etthu ehoosivenleni. Nto, muhaana opaka exeeni? Voohimya sa ovukula oviruwa, muru wa erevista Mayo Clinic oni: “Mwiitthe iphumu vakhaani, ni mukontari mpakha 10”. Muupuwelele ele ekumihenrye muxankiho owo ni ele yaarowa okhumela akhala mwanviruwa. Mweemye wira miruku sivukule oviruwa wala omaliha oviruwa.​—1 Samuweli 25:32-35.

Olelo-va anamunceene annikhaliheriwa osyaka oviruwa ntoko Davidi. Sebastian yoowo aatthukweliwe orina ene iyaakha 23 oPolonia, onihimya wira ohiixutta osyaka onanariwa mwaha woomusoma Biibiliya. Owo onihimya so: “Wanipacerya kinnuupuwelela mwaha owo, nuumala-vo, kinamananiha weettela miruku sa Biibiliya. Tthiri Biibiliya eliivuru ya miruku yoovareleya muteko”.

Setsuo aahipaka etthu emosaru. Owo onihimya so: “Kaanaanyemela atthu akina vaavo kaananariwa aka omutekoni. Masi, omusoma Biibiliya wookikhaliherya. Nto kihinatthi oviruwa, kinniikoha so: ‘Ti pani orina nthowa? Kiireke khahiyo miyo?’” Wuupuwelela makoho awo woomukhaliherya osyaka oviruwa.

Muupuwelo wa ophavela oviruwa pooti okhala aikuru, masi miruku sa Biibiliya ti sootepa owerya. Weettela malakiheryo a Biibiliya ni onvekela Muluku onimookhaliheryani weemya wira miruku sivukuleke oviruwa wanyu.