Kiireke Kihaana Okopha Musurukhu?
Muhapo mmosa wa eSwahili onihimya so: “Okopha onlikana ni othela; oliva onlikana ni okhweliwa”.
MOOLUMO ala annisuweliwa ni anamunceene epantte Enikela Nsuwa ya wAfrika. Tthiri, masu awo anooniherya muupuwelo wa atthu anceene. Niireke muhaana okopha musurukhu? Okathi mukina nyuwo pooti woona okhala vooloka opaka eyo, masi niireke ti vookhalela? Sowoopiha xeeni sikhanle sa okopha musurukhu?
Muhapo mukina wa eSwahili onnihimya muxankiho muulupale wa okopha musurukhu oriki: “Okopha musurukhu omaliha opatthani”. Tthiri, okopha pooti omaliha opatthani ni okumiherya ohiiwanana. Hata nirina ene ipalano wala soophavela sooloka, itthu pooti ohikhumela saana. Mwa ntakiheryo, wavira okathi munceene ohiliviwe, mwaneene musurukhu pooti onyoonyiheya. Nave, pooti okhumela okhupanyana eriyari ya ole onikopha ni ole onikophiha, ohela muhina imusi saya. Nto, okhala wira ti siiso, nihaana woonaka okopha ntoko etthu yookiserya, ohiya ntoko etthu yowaakuveya enimaliha muxankiho ahu.
Nave, okopha musurukhu pooti ohonona wataana wa mutthu ni Muluku. Moota xeeni? Biibiliya onihimya wira ti voohiloka okopha musurukhu masi khihinaliva. (Esalimo 37:21) Eyo enooniherya wira “mulipa-òkopha epotthá y’ole omukophenlyawe”. (Miruku 22:7, Biblia Solempwa sa Muluku.) Ole onikopha ohaana okupali wira onooliva moovarihana ni ele aavanenle awe ni mwaneene. Muhapo mukina wAfrika onihimya so: “Okopha oreera, masi oliva owereya”. Muhapo owo onooniherya wira ole okomphe ohaana wiimananiha wira olive ele ekomphe awe pooti vaxankihaka.
Nto, oliva musurukhu ohaana okhala yoolukama ya ole okomphe. Maana aahipake eyo, pooti okhumelaka mixankiho. Okopha vanceene pooti omwiiriha mutthu oriipiwa murima, ohiphwanya ikhove, ovara muteko vanceene, ohiiwanana wa atthu athelanne, waavalaanyiha amusi, okhalana mulattu otribunaali wala otthukweliwa. Moolumo ari va aRoma 13:8 ta miruku yaawo anihimya so: “Muhaxankiheké akhw’inyu: muteko anyu okhaleke ophentana”.
NIIREKE TI VOOREERELA?
Nto ti vooloka okhalana ephoole vaavo mutthu onikopha awe musurukhu. Vaanireerela wiikoha so: Kiireke kihaana okopha tthiri? Kiireke ori mwaha wa ophavela okhaliherya etthoko aka? Wala ori mwaha wa ophavela okhalana itthu sinci masi kihirina owerya? Ikwaha sinci, phataari ohakalala ni itthu vakhaani nirina ahu ohiya okopha.
Ekeekhai wira ikwaha sikina pooti otthuneya okopha musurukhu. Mwa ntakiheryo, pooti onikhumelela muxankiho mootutuxerya, nto khuhikhalana enamuna ekina. Akhala wira ti siiso, ole onikopha ohaana okhala oororomeleya. Moota xeeni?
Wanipacerya, musyake okopha musurukhu muupuwelaka wira mutthu onimukophela anyu toothaaciri vanceene. Owo khonikhanyereriwa wira onikhaliherye. Wala, nihuupuweleke wira mwaha woowi owo thaaciri, hiyo pooti ohimuliva. Nave muhaakhaleleke nrima ale anikhala ntoko aakhalana musurukhu munceene.—Miruku 28:22.
Nto, muhaana oliva ni murima wotheene ele mukomphe anyu. Akhala wira ole omukophenle anyu khohimyale nihiku noomuliva, nyuwo muhaana ohimya nihiku nene, ni okhala oororomeleya. Ti vootthuneya olepa epaphelo wira muhoolo ohikhumele ohiiwanana. (Yeremiya 32:9, 10) Vaaweryaneyaka, munvahererye mmensinyu ole omukophenle anyu wira mmuxukhurele. Oliva ele mukomphe anyu onookumiherya wiiwanana. Yesu aalavunle so: “Olavula wanyu okhaleke ‘Ayo!’, walá ‘Nnari!’ pahi”. (Matheyo 5:37) Ohiya-vo, ti vooloka wuupuwelela yooruma ya waathokorerya saana atthu akina, yeeyo eni: “Sothene sinosivelani wireliwa n’atthu akina, nyuwo-tho nwireleke seiyo akhw’inyu”.—Matheyo 7:12.
MALAKIHERYO A BIIBILIYA OOVARELEYA MUTEKO
Biibiliya onnaavaha malakiheryo ale aniphavela okopha musurukhu, oriki: “Vekekhai, omuttittimiha Muluku onnimphwanyiha muhakhu mulupale mutthu onsiveliwa n’itthu sirinawe”. (1 Timótheyo 6:6) Mwa masu makina, ohakalala ni ele erina ahu onnikhaliherya osyaka mixankiho sa okopha musurukhu. Ekeekhai wira khivanikhweya ohakalala olumwenku ola oniphavela opuha mowaakuveya. Nto ti vanitthuneya aya wooniherya “omuttittimiha Muluku”. Moota xeeni?
Moone ntakiheryo na anamathelana a wAsia. Okathi yaari aya amiravo, awo yanaakhalela ehace ale yaarina enupa. Nto yahuupuwela othuma enupa. Awo yaahikopha musurukhu oBanko ni mweemusini mwaya. Moohipisa yahoona wira yahaana oliva ijuuru sinceene. Yaaniviriha okathi munceene evaraka muteko khula nihiku, nto eyo yaaniwiiriha ohikhalana okathi wowaakhapelela anaya. Amulopwana onihimya so: “Oxankiheya, woova, ni ohiphwanya ikhove waalikana ni nluku noolemela naari vamuru vaka. Eyo yaanihaaxa emusi ahu”.
Nuuvira okathi, emusi ela yaahuupuwela yoolepa ya 1 Timótheyo 6:6 ni yahuupuwela otumiha enupa aya. Saahivira iyaakha piili elivaka musurukhu yaakomphe aya. Etthu xeeni anamathelana ala yiixuntte aya? Awo anihimya so: “Okhalana moonelo womunepani voohimya sa itthu sa werutthuni onnikhaliherya”.
Muhapo wa eSwahili oromoliwe wanipacerya ti woosuweliwa ni anamunceene. Ekeekhai wira muhapo owo khonwiiriha atthu ohiya okopha. Masi moovarihana ni malakiheryo a Biibiliya athokoreriwe mmwaha ola, vannireerela wuupuwela saana nikoho nni: Kiireke kihaana okopha musurukhu?
[Eponto yuulupale epaaxina 15]
“Okhalana moonelo womunepani voohimya sa itthu sa werutthuni onnikhaliherya”