Nyuwo Alopwana Oothela Mwaakhapeleleke Amwaarinyu Moophenta

MULOPWANA onrowa waakhapelela sai amwaarawe moophenta? Atthu anceene, anuupuwela wira muteko muulupale wa mulopwana oothela, ti oruuha musurukhu vatthokoni. Masi, athiyana akina arina musurukhu munceene nlelo annoona wira khaniphentiwa. Mwa ntakiheryo, Rosa onikhala wEspanha, onnilavula sa iyawe oriki: “Vaavo aakhala awe ni atthu akina, owo aakhala ooreera murima, masi owaani aakhala mutthu mukina”. Joy a oNigéria onihimya so: “Okathi kaavaanyihaka aiyaka, awo yaahimya so: ‘Nyuwo muhaana okiiwelela, maana miyo kikhanle iyanyu’”.

Mulopwana oothela, onrowa ohoolela sai etthoko awe moophenta, wira ekhale ya “murettele” ni yoomaaleleya?​—Ruthi 1:9.

ELE BIIBILIYA ONIHIMYA AWE SA OKHULUPALE WA MULOPWANA OOTHELA

Nnaamwi mulopwana ni muthiyana aryeene oolikana, Biibiliya onihimya wira khula mutthu ookhalana muritti vatthokoni. ARoma 7:2 onihimya wira muthiyana ootheliwa “onnivareliwa n’ikano wira akhaleke n’iy’awe”. Milokiheryo sinci sa mulaponi sinnimuthanla muhooleli wira awehaweheke miteko. Moolikanasa, Muluku oomuthanla mulopwana wira okhaleke muru wa mwaarawe. (1 aKorinto 11:3) Alopwana ahaana ohoolelaka etthoko aya.

Mulopwana, eettiheke sai okhulupale ovahiwe awe ni Muluku? Biibiliya oniira so: ‘Mwaaphenteke amwar’inyu, sisale Kristu saphentalyawe muloko’. (aÉfeso 5:25) Nnaamwi Yesu Kristu ahaatonko othela, ntakiheryo nawe pooti wookhaliheryani okhala mulopwana ooloka. Moota xeeni?

YESU TI NTAKIHERYO NOOLOKA WA ALOPWANA OOTHELA

Yesu aanaalipiha ni waakhaliherya akina. Yesu aahaaleiherya atthu yaahaaxiwa wira aamwaakhaliherya oriki: “Mukirwele miyo: komumuliheni”. (Matheyo 11:28, 29) Ikwaha sinci, aanimaliha ohaawa waya wa werutthuni ni aaniphavela wira amwaattamele Muluku. Ti maana aya anamunceene yaamwaattamela aya Yesu, ekupaliki wira owo aamwaarula miritti saya.

Alopwana anrowa omutakiha sai Yesu? Mwaavyeke inamuna mukhanle anyu oowaakhaliherya amwaarinyu. Athiyana akina anuupuwela ntoko Rosa, yoowo aikhupanyenrye oriki: “Aiyaka anikoona ntoko namuteko a vatthokoni paahi”. Masi, mulopwana mukina oniihaniwa Kweku yoowo orina etthoko yooloka, onihimya so: “Ikwaha sinci kinnaakoha amwaaraka moota kikhanle aka oowaakhaliherya. Okhala wira kinnimphenta mwaaraka, ikwaha sinceene kinnimukhaliherya ovara miteko sa vatthokoni”.

Yesu aanaathokorerya akina ni owoonela othunku. Muthiyana mmosa oohaawa aahimaliha iyaakha 12 owereiwaka vanceene. Nuumala wiiwa miiriirya Yesu aapaka awe, “anihimya wira: ‘Miyo kakwannyaru nlaya nawe pahi, kinovona’”. Owo aahimya ekeekhai. Nto aahimwaattamela Yesu, khukwannya nlaya nawe, ni khuvona. Nnaamwi atthu akina yuupuwela wira muthiyana ole aahiixinnuuha, Yesu ahisuwela wira arooxankiheya.a Moophenta owo aahimmye so: “Mwan’aka, . . . Muroke ni murettele: mukhaleke mukumi!” Yesu aahisyaka omuyoonyiha wala ompwapwela, ni aahisuwela eretta awe. Tthiri owo ohooniherya okhala mulopwana ooreera murima, ni oomoriwa ikharari.​—Marko 5:25-34.

Alopwana anrowa omutakiha sai Yesu? Akhala wira mwaarinyu khokhanle saana, mumpixeryeke murima ni omuthokorerya. Mmananihe wuupuwelela ntoko owo, ni nvaheke efaita moonelo awe. Mwa ntakiheryo, Ricardo, onihimya so: “Vaavo kinoona aka wira mwaaraka khokhanle saana, kinniimananiha osyaka ohimya itthu saarowa otepa omunyoonyiha”.

Yesu aanivaanela ni awiixutti awe. Yesu aaniviriha okathi ovaaneelaka ni awiixutti awe. Owo aahimenrye so: “Kihosuwelihani sothene siwìwalyaka Atithi”. (Yohani 15:15) Ekeekhai wira okathi mukina Yesu aaniphavela okhala mekhawe wira uupuwelele ni olompa. Masi, ikwaha sinceene anaaleela awiixutti awe ele uupuwela awe. Ohiyu wookiserya Yesu aarowa awe wiiviwa ntoko mutakhali, aahaaleela awiixutti awe wira ‘murima awe waahimuriipa’. (Matheyo 26:38) Nnaamwi sowiira sa awiixutti awe ikwaha sikina saamunyoonyiha, Yesu khaahiya ovaanela naawo.​—Matheyo 26:40, 41.

Alopwana anrowa omutakiha sai Yesu? Nvaaneleke ni amwaarinyu, ni mwaaleeleke ele enuupuwela anyu. Muthiyana pooti woonaka wira okathi iyawe onikhala awe ni atthu akina, onnilavula saana, masi akhala owaani onoomaala paahi. Masi, Ana onnihakalala okathi iyawe onimuleela awe ele enuupuwela awe. Ana onihimya so: “Miyo kinnoona wira iyaka onnikiphenta, nto owo ti mpatthani aka”.

Musyake omaala paahi mphavelaka omuhukhumu mwaarinyu. Muthiyana mmosa onihimya so: “Okathi aiyaka yaanyoonyiheya aya mwaha wa miyo, awo yaaniviriha mahiku manceene ahikilavulihaka. Awo yaanikiiriha wiixoona okhalana nthowa ni ooramuseya”. Masi, Edwin onnimananiha omutakiha Yesu, oriki: “Vaavo kininyoonyiheya aka, nkinaakhula etthu okathi ene yoowo, masi kinnilipelela okathi wooreerela”.

Joy, oromoliwe wanipacerya ohoona wira vano okumi wa aiyawe wooturukeya nuumala opacerya omusoma Biibiliya ni Anamoona a Yehova. Onihimya so: “Iyaka onniimananiha vanci wira okhale mulopwana oophenta ni onimutakiha Yesu”. Itthoko sinci soottottela mureerelo malakiheryo a Biibiliya. Niireke ni nyuwo munniphavela malakiheryo awo? Munvekele Namoona a Yehova wira mmusome Biibiliya voohiliva etthu.

[Enoota]