NYUWO MWAANISUWELA?
Moovarihana ni Biibiliya, nuulumo noowi “eunuco” naataphulelani?
Ikwaha sikina, nuulumo nlo nintaphulela mulipa-oohuliwa. Okathi wa khalai, alopwana akina yaanihuliwa ntoko ehukhumu, mwaha woovariwa wala opakiwa ipottha. Alopwana oororomeleya yaanihuliwa wira yaakhapelele athiyana mpaani mwa mwene. Mwa ntakiheryo, alipa-oohuliwa Hegayi ni Xàxagazi yaanirumeela ntoko makwarda a athiyana ni axihawala awe mwene ooPersia, Asuwero yoowo onikupaliwa okhala Xerxes Oopacerya.—Estheri 2:3, 14.
Masi, khahiyo wira otheene yaale Biibiliya onaahimya awe okhala eunuco yaari atthu oohuliwa. Asomi akina anihimya wira nuulumo nlo naanirumeeliwa-tho ophavelaka oromoliwa mutthu aavara muteko vate va mwene. Waaniheryasa eyo ti yaamwiiranenle Ebedi-Meleki, mpatthani awe Yeremiya, ni murumeyi a wEthiyopia yoowo ohinisuweliwa nsina nawe, masi aalaleeriwe ni Filipe. Ebedi-Meleki waaniheryasa aari murumeyi muulupale a mwene, maana aaniwerya olavula ni mwene Zedekiya. (Yeremiya 38:7, 8) Nave murumeyi a wEthiyopia onniromoliwa ntoko mutthu aasuka mihakhu sa omwene, yoowo “aronwe oYerusalemu omukokhorela Muluku”.—Miteko 8:27.
Xeeni amakampusi a khalai yaavalaanya aya ipwittipwitthi ni ipuri?
Vaavo aalavula awe sa okathi woophukela onirwa, Yesu aahimmye so: “Nihiku Mwana a Mutthu ninrwawe n’uvuwa wawe vamosá ni malaikh’awe othene, onokilathi vehijeni vawe vovuwa. . . . Owo onimwavalanya atthu òrera murima n’ale òtakhala murima, ntoko makampusi sinvalanyawe ipwittipwitthi n’ipuri”. (Matheyo 25:31, 32) Nto xeeni saavalaanyiwa aya inama iya?
Okhala wene, ipwittipwitthi ni ipuri saakhala hoothe ni olya vamosa nihiku notheene. Masi ohiyu saaniwaleliwa munsisini mwaya wira sihitupheliwe ni axinama a mutakhwani oowali, anawiiye, ni oriirya. (Maphattuwelo 30:32, 33; 31:38-40) Nto mithinto iyo miili sa axinama saaniwaleliwa mapuro oovalaana wira sikhapeleliwe ipwittipwitthi soowiiwananeya, vanceenexa ipwittipwitthi soothiyana, ni saamukhaani wira sihihaaxiwe ni ipuri soowali. Eliivuru All Things in the Bible (Itthu Sotheene sa Okathi wa Khalai) enihimya so: “Amakampusi yaanivalaanya ipwittipwitthi ni ipuri vaavo saarupala aya, owaamwiha axaana aya, ni okathi saametthiwa aya”. Nto Yesu aavaha nlikanyiho na itthu seiyo atthu a Isarayeli a khalai yaasuwela aya saana, ntoko nlikanyiho nla na muteko wa amakampusi.