Niireke Nihaana Onvekelaka Yesu?

SOOTOKOSA sipakiwe niinano, aakohiwa amiravo 800 a itiini soovirikana, akhala wira awo yaanikupali wira Yesu onnaakhula mavekelo. Amiravo anivikana 60 pursento yaahihimya wira yaanikupali wira owo onnaakhula tthiri. Masi mwali mmosa aahittipiha nuulumo noowi Yesu nto khoranttelihaka ni “Muluku”.

Munoonela sai? Niireke nihaana onvekelaka Yesu wala Muluku?a Wira niphwanye waakhuliwa, noone ele Yesu aaxuttinhe awe voohimya sa ovekela.

YESU AAHIMYALE WIRA NINVEKELEKE PANI?

Yesu aahixuttiha ni wooniherya ole nikhanle ahu onvekelaka.

ELE AAXUTTINHA AWE: Okathi naxikola awe anvekenle awe wira: “Pwiya, munixuttihe olompa”, Yesu aakhunle so: “Mwalompaka, muhimyeke wira: ‘Tithi’”. (Luka 11:1, 2) Okathi Yesu aalavula awe Mwaha awe Vamwaako, aahaatumererya ale yanwiriyana wira yaahaana ovekela. Owo aahimyale so: “Mwalompeke Atith’inyu”. Nave, aahaalipiherya wira: “Atith’inyu annisuwela simphavelanyu, nyuwo muhinatthi wavekela”. (Mattheyo 6:6, 8) Ohiyu wookiserya ntoko pinaatamu valaponi, Yesu ahaahimeerya awiixutti awe oriki: “Etthu p’itthu enavekelanyu Atithi ni nsina naka, awo animovahani”. (Yohani 16:23) Veekeekhai Yesu ooniixuttiha onvekelaka mutthu mmosa paahi yoowo ori Tiithi awe ni Tiithi ahu, eyo piiyo, Yehova Muluku.​—Yohani 20:17.

NTAKIHERYO NAWE: Moovarihana ni ele Yesu aawiixuttinhe awe akina ovekelaka, owo mwaneene aavekenle so: “Miyo kinottottopelani nyuwo Tithi, Mwanene wirimu ni vathí”. (Luka 10:21) Nihiku nikina, Yesu ‘aahiweha wirimu, nto khwira: “Tithi, kinnoxukhuruni, mana mokìwelela”’. (Yohani 11:41) Nave, okathi aahala awe vakhaani okhwa, Yesu aalompale so: “Tithi! Mmatatani mwanyu kinovahereryani eroho aka [munepa]”. (Luka 23:46) Vaavo Yesu anvekenle awe Tiithi awe a wiirimu okhala “Tithi, Mwanene wirimu ni vathí”, oonivaha ntakiheryo nootthara. (Matheyo 11:25; 26:41, 42; 1 Yohani 2:6) Niireke awiixutti a Yesu yaanipaka eyo?

TI PANI MAKRISTAU OOPACERYA YANVEKELA AYA?

Isumana vakhaani nuumala Yesu otthikela wiirimu, awiixutti awe yaanilupatthiwa ni ohaaxiwa ni awanani aya. (Miteko 4:18) Nto awo yaahivekela okhaliheriwa. Masi ti pani yanvekela aya? “Othene aya ni murima mmosá, yahimulompa Muluku”, wira ovikanihe waakhaliherya “ni nsina na Yesu, murumeyi [awe] òwarya”. (Miteko 4:24, 30) Tivonto, awiixutti ale yaahitthara malakiheryo a Yesu. Awo yanvekela Muluku, ohiya Yesu.

Muhoolo, murummwa Paulo aahilavula sa moota owo ni akhwaawe yaavekela aya. Mwa ewarakha aalepenle awe maKristau akhwaawe, owo ahimmye so: “Okathi wothene ninnimuxukhuru Muluku, Tithi awe Pwiy’ahu Yesu Kristu, nolompelakani nyuwo”. (aKolosi 1:3) Nave-tho, Paulo aahaalepela annawe a eKristau wira “okathi wothene ni mwaha wa sothene, [amuxukhuruku] Muluku Tithi ni nsina na Yesu Kristu, Pwiy’ahu”. (aÉfeso 5:20) Nto ninnoona wira Paulo aahaatumererya akina onvekela “Muluku Tithi” mwa “etthu pitthu”, masi mwa nsina na Yesu.​—aKolosi 3:17.

Moolikanasa ni maKristau ale, ninnimphenta Yesu vaavo nniiwelela ahu malakiheryo awe voohimya sa ovekela. (Yohani 14:15) Akhala wira nnonvekela Tiithi ahu a wiirimu paahi, nto nnoowerya olavula ntoko nasalimo yoowo aahimyale so: ‘Miyo kinnimphenta Yehova maana onniiwa nsu naka. Kinonvekela mahiku othene kiri aka mukumi’b.​—Esalimo 116:1, 2

[Inoota]

[Ekaaxa ipaaxina 15]

Niireke Awo Yaaninvekela Yesu?

Biibiliya onnilavula sa imaara vakhaani seiyo apinaatamu oororomeleya yaalavula aya ni Yesu oryeene wiirimu, wala ni malaikha. (Miteko 9:4, 5, 10-16; 10:3, 4; Wisupulula 10:8, 9; 22:20) Niireke arumeyi awo yanvekela Yesu wala malaikha? Nnaari. Mwa imaara iyo sotheene, malaikha ti yaapacenrye olavula. Alopwana ni athiyana oororomeleya yanvekela Muluku paahi.​—aFilipi 4:6.