Xeeni Okumihiwa Mmulokoni Onooniherya Aya Ophenta wa Muluku?

JULIAN onihimya so: “Okathi waiwale aka wira mwanaka ookumihiwa mmulokoni, vaakhala ntoko omala wa olumwenku. Owo aari mwanaka ompacerya omuyara, miyo kaanimphenta vanceene ni naanivara miteko sinceene hoothe. Aari mwaana oowiiwananeya khula okathi, nto naananoru aahipacerya opaka itthu soohiloka. Amwaaraka yaamakela wunla paahi, nto miyo nkaasuwela moota woowaamaaliha. Hiyo naamakela wiikoha vakhala wira erookhala etthu yaahamulakihenrye ahu saana mwanihu ole”.

Xeeni vanihimmwa aya wira okumihiwa mmulokoni etthu enooniherya ophenta nnaamwi owereyaka? Mathowa xeeni ari mBiibiliyani aniruma opakiwa etthu siiso? Ni etthu xeeni eniiriha mutthu okumihiwa mmulokoni?

MATHOWA MANLI ANIIRIHA MUTTHU OKUMIHIWA MMULOKONI

Ahaana okhala mathowa oomanli wira Namoona a Yehova okumihiwe mmulokoni. Noopacerya, ohaana okhala Namoona a Yehova obatiziwa onipaka etampi yuulupale. Nanenli, vakhala wira owo khoniphavela ottharuwa etampi awe.

Nnaamwi Yehova ohiwehereryaka wira hiyo nikhaleke atthu oomalela, owo ookhalana malamulo ooreerela aniphavela awe wira atthu awe atthariheleke. Mwa ntakiheryo, Yehova onninitumererya wira nisyakeke itampi suulupale ntoko onamuttompe, waakokhorela amuluku a ethiru, wiiya, wootha, wiiva ni onamminepani.​—1 aKor. 6:9, 10; Wis. 21:8.

Nyuwo khamuneemererya wira malamulo oowaarya a Yehova tooreerela ni anninikhaliherya osyaka ihasara? Ti pani ohiniphavela okhala ni atthu a murettele, oowiiwananeya ni oororomeleya? Hiyo ninniphwanya makhalelo awo eriyari ya annihu ni axirokorihu oomunepani, mwaha woowi otheene ahu noomuleiherya Muluku wira okhuma vaavale niivaherenrye ahu ninrowa okhalaka moovarihana ni malakiheryo ari mBiibiliyani.

Ankhi vakhala wira Kristau oobatiziwa oonipaka etampi yuulupale mwaha wa otteettheya wa opinaatamu? Arumeyi a Yehova a khalai yaahipaka itampi siiso, masi Muluku khaahiiye waaphenta. Mwene Davidi tori ntakiheryo noosuwelexiwa na atthu siiso. Owo aahipaka etampi ya mararuwo ni wiiva; hata vari siiso, profeta Natani aamuhimeeryale so: “Apwiya àholevelelani yatthenkyanyu”.​—2 Sam. 12:13.

Muluku aahimulevelela Davidi mwaha wa ottharuwa wawe ni murima wotheene. (Esal. 32:1-5) Vamosaru, murumeyi a Yehova olelo-va khonikumihiwa mmulokoni vahikhanle wira onookhootta ottharuwa wala onoovikaniha opaka itthu sootakhala. (Mir. 3:19; 26:20) Vakhala wira axitokweene aniirela mpantta ekomisau eniphuka mwaha owo khanoona wira mutthu owo oottharuwa etampi awe ni murima wotheene, awo aahaana omukumiha mutthu owo mmulokoni.

Wanipacerya, hiyo pooti woonaka wira okumihiwa mutthu opanke etthu yoohiloka mmulokoni etthu ehinireerela ni ehinooniherya oreera murima, vanceenexa vakhala wira owo onikumihiwa mpatthani ahu. Masi, Nuulumo na Yehova ninninivaha mathowa anniiriha okupaliki wira yoothanla ya omukumiha mutthu mmuloko enooniherya omphenta wahu mutthu owo.

MIREERELO SINIKHUMELELA MUTTHU AKUMIHIWA MMULOKONI

Yesu aahihimya wira “vano ankhili annòneya okhala òloka mwaha wa miteko saya”. (Math. 11:19.) Yoothanla ya omukumiha mutthu opanke itthu soohiloka mmulokoni ennikumiherya miteko sooloka. Muthokorerye matakiheryo ala mararu:

Omukumiha mutthu onipaka etampi onnivuwiha nsina na Yehova. Okhala wira hiyo nniitthaneliwa nsina na Yehova, mweettelo ahu pooti ovuwiha wala onyohola nsina nlo. (Yes. 43:10) Ntoko siisaale mweettelo wa mwaana okhanle awe oovuwiha wala onyohola nsina na anamuyari awe, nto moonelo wa atthu voohimya sa Yehova onilipa ni itthu sooloka wala sootakhala sinipaka aya atthu aniitthaneliwa nsina nawe. Nsina nooloka na Muluku ninnivuwa vakhala wira atthu ale aniitthaneliwa nsina nlo annittharihela mweettelo wooloka onitumereriwa ahu ni Yehova. Eyo yaahiiraneya okathi wa Ezekiyeli, vaavo atthu a maloko yaattamanne aya yaavaranyiha aya nsina na Yehova ni aYuda.​—Ezek. 36:19-23.

Hiyo nnoowiiriha atthu onyohola nsina na Yehova vakhala wira ninnipaka itthu sinooniherya mweettelo woohiisuumaaliha. Murumma Pedru aahaalopola maKristau oriki: “Ntoko anamwane òwìwelela, muhetteleké-tho makhalelo anyu òtakhala, yettenlyanyu khalai, okathi wahamusuwelanyu Muluku. Ohiya vo, mukhaleke atthu òrera murima ni mwettelo anyu wothene, okhala wira Muluku òwìhanneni, t’òrera murima. Tthiri, Volempwa wira: ‘Mukhaleke atthu òwarya, okhala wira miyo k’òwarya’”. (1 Ped. 1:14-16) Tthiri mweettelo wooloka onnivuwiha nsina na Muluku.

Vakhala wira Namoona a Yehova mmosa onnipaka etthu yoohiloka, waakuva osuweliwa ni amusi ni apatthani awe. Okumihiwa wa mutthu owo onooniherya wira Yehova ookhalana muloko wa atthu ooloka yaawo anittharihela miruku silempwale mBiibiliyani wira ahipahule mweettelo wooloka. Muletto mmosa aarwiiye omuthukumanoni Empa ya Omwene oSuíça, aahihimya wira aaphavela okhala mutthu a mmulokoni mme. Murokorawe aarokumihiwa mwaha wa onamuttompe. Owo aahimyale wira aaphavela okela etiini emosa yeeyo “ehineemererya mweettelo wootakhala”.

Okumihiwa wa mutthu onnikhaliherya muloko wa eKristau okhala woowaarya. Murummwa Paulo aahaalopola anna a oKorinto voohimya sa woopiha waya okhalaka vamosa ni atthu anipaka itampi moolakelela. Owo aahaalikanyiha atthu awo ni miropo seiyo siniiriha otthu munceene wiipelana. Aahimmye so: “Miropo vakhani sinnìpiha otthú wothene”. Nto owo aamalihenrye so: “Mmòmole mutth’ule òtakhala munlokoni mwanyu!”.​—1 aKor. 5:6, 11-13.

Woonasa wene, “mutth’ule òtakhala” onimuhimya awe Paulo aari namuttompe ahaaphavela ottharuwa. Atthu akina yaahipacerya osiveliwa ni mweettelo awe woohiloka. (1 aKor. 5:1, 2) Vaakhanle wira mutthu ole khaamoliwe mmulokoni, maKristau makina yaarowa opacerya opakaka itthu attharihelaka mweettelo woohiisumaaliha wa atthu a muttetthe ole yaakhala aya. Ohicalela itampi mmulokoni onnaatumererya atthu akina ohittittimiha malamulo a Muluku. (Mus. 8:11) Ohiya-vo, atthu ahinitthuna ottharuwa itampi saya ‘annikhunela makhalelo aya ònanara’ wira apwetexeke waamini wa atthu akina mmulokoni.​—Yuda 4, 12.

Okumihiwa mmulokoni onoomukhaliherya mutthu owo ottharuwa itampi sawe. Okathi mmosa Yesu aahilavula sa mmiravo aakhumme vatthokoni va tiithi awe khurowa opwetexa mihakhu sawe weettelaka onamuttompe. Mwaana ole aamuhiiye tiithi awe aahoona wira okhala ottaiwene ni tiithi awe yaari etthu yoohiloka ni yooriipiha murima. Nto mwaana ole aahipacerya wuupuwela ele yaapanke awe, khittharuwa, onavenya otthikelaka owaani. (Luka 15:11-24) Masu a Yesu voohimya sa tiithi oophenta yoowo aatteeliwe murima mwaha wa mwanawe ole orukunuxa murima, anninikhaliherya osuwela moonelo wa Yehova. Owo onihimya so: “Miyo nkinsiveliwa n’ukhwa w’alipa-òttheka. Kinniphavelexa wira anatampi erukunuxe mukhalelo aya, ekhalane ekumi”.​—Ezek. 33:11.

Vamosa-ru, alipa-ookumihiwa mmulokoni wa eKristau, anniyeleela emusi aya ya omunepani, nto eyo ennaakhaliherya woona wira aapweteiwa etthu yuulupale. Itthu sinaakhumelela mwaha wa etampi, ni wuupuwelela mahiku oohakalaliha yaarina aya amurumeelaka Yehova ni akhalaka ni atthu awe, onoowiiriha ophavela otthikela mmulokoni.

Niphento ni ovarexexa malamulo a Muluku annitthuneya wira sikhumelele mireerelo iyo. Nasaalimo Davidi aahimmye so: “Kintthunexa opwapweliwa n’uttaruxiwa n’anaxariya, ohikhanle ottittimihiwa n’atthu òtakhala”. (Esal. 141:5) Nlikanyihe so: Mmananihe omoona mutthu onilya yoolya nto khimutipaka. Nto owo khiyooceela omumula, onapacerya okhulumuwa. Owo khoniwerya olavula. Vakhala wira khonaakuveliwa okhaliheriwa onrowa okhwa. Nto onnoorwa mutthu mukina onammana ettuli vakhaani wira ele emutimpe ekhume. Ekeekhai wira omaniwa onniwereya, masi eyo enimoopola okumi awe. Vamosa-ru, Davidi aanisuwela wira vakhala wira naxariya aarowa onvaha miruku soovila weettela saamumphwanyiha mureerelo.

Mwa inamuna sinceene, okumihiwa onnivaha malakiheryo ni yoolaka enitthuneya. Nuumala iyaakha 10, mwanawe Julian, yoole oromoliwe wanipacerya, aahilokiherya ekumi awe, nto khutthikela mmulokoni, vano owo mutokweene. Owo onihimya so: “Okumihiwa mmulokoni waahikikhaliherya woona wira kaahiyeleela itthu sinceene mwaha wa mweettelo aka woohiloka. Tthiri kaanitthuneya olakiheriwa mwa enamuna ele”.​—aHéb. 12:7-11.

ENAMUNA YOOREERELA YA WAAKHAPELELA ATTHU OOKUMIHIWA MMULOKONI

Ekeekhai wira okumihiwa mmulokoni etthu yooriipiha murima, masi eyo khenitthuneya weemereriwa okhala ehasara yuulupale. Khula mmosa a hiyo ookhalana muritti wa omukhaliherya ole okumihiwe otthikela mmulokoni.

Axitokweene arina muritti wa omukumiha mmulokoni mutthu, ahaana wiimananiha ottharihela niphento na Yehova. Okathi onimuleela aya wira mutthu owo ookumihiwa, awo ahaana omutthokiherya mooreera murima mavalo anitthuneya awe otthara wira otthikele mmulokoni. Moophavela owuupuxerya ale akumihiwe wira awo pooti otthikela wa Yehova, axitokweene pooti waaxekurya yaale anooniherya wira annipaka mirukunuxo mweekumini mwaya.a

Amusi awe namakumihiwa ahaana wooniherya ophenta waya muloko ni ole okumihiwe yiiwelelaka malakiheryo voohimya sa atthu ookumihiwa. Julian onihimya so: “Ole nlelo aari mwanaka, masi mweettelo awe waahithikilela wataana wahu”.

Atthu otheene a mmulokoni ahaana wooniherya niphento na mBiibiliyani asyakaka wataana wala waalavuliha atthu ookumihiwa. (1 aKor. 5:11; 2 Yoh. 10, 11) Wira siiso onoolipiha malakiheryo a Yehova avahiwe awe ni axitokweene. Ohiya-vo, muloko pooti waaphenta ni waakhaliherya amusi awe ole okumihiwe, yaawo anihaawa vanceene ahooneke wira anoothanyiwa mmulokoni.​—aRom. 12:13, 15.

Julian onimaliha ohimyaka so: “Okumihiwa mutthu mmulokoni marehereryo anitthuneya wira naakhaliherye atthu otheene okhala moovarihana ni malamulo a Yehova. Vaavo vanivira aya okathi, hata vawereyaka onnikumiherya mireerelo. Vaakhanle wira nkacalenle mweettelo woohiloka wa mwanaka, owo khaatthikela-tho mmulokoni”.

[Enoota]