Nnoowerya Okhala Mahiku Ootheene

1. Exeeni eniiraneya okathi nnuupuwelela ahu okumi woohimala Yehova onileihenrye awe?

YEHOVA onnaaleiherya “okumi woohimala” ale animwiiwelela. (aRom. 6:23) Okathi nnuupuwelela ahu etthu Yehova onivanha awe, omphenta wahu onnitepa olipa. Nkahaya muupuwele ela: Tiithi ahu a wiirimu onniniphenta vanceene mpakha onivaha okumi woohimala wiira nihikhala-khale nivalaanaka ni Yena.

2. Nlipelelo na okumi woohimala ninnikhaliherya sai?

² Nlipelelo Yehova onnivaha awe na okumi woohimala nnoonikhaliherya ovilela okathi sinniphwanya aya mixankiho. Hata awanani ahu anoopopihaka wiira anooniiva, hiyo khaninhiya omurumeela Yehova. Mwaha wa xeeni? Mwaha woowi noosuwela wiira nakhwa vale niri ene oororomeleya wa Yehova, owo onoorowa onihihimuxa ni nlipelelo na okhala mahiku ootheene. (Yoh. 5:28, 29; 1 aKor. 15:55-58; aHeeb. 2:15) Exeeni ennikupaliha wiira vanniweryaneya okhala mahiku ootheene? Nrowe nithokorerye itthu sinittharelana.

YEHOVA ONNIKHALA MAHIKU OOTHEENE

3. Exeeni ennikupaliha wiira Yehova onoowerya onivaha okumi wookhala mahiku ootheene? (Esalimo 102:13, 25, 28)

³ Ninnikupali wiira Yehova onoowerya onivaha okumi woohimala maana owo tori Mwaneene okumi ni onnikhala moohimala. (Esal. 36:10) Nrowe niwehe soolepa vakhaani sa mbiibiliyani, sinooniherya wiira Yehova onnikhala okhuma woopaceryani mpakha mahiku ootheene. Esalimo 90:2, enihimya wiira Yehova Muluku onikhala “okhuma wopajeryani mpakha mahiku othene”. Nave Esalimo 102, enihimya etthu emosa-ru. (Musome Esalimo 102:13, 25, 28.) Profeta Habakuki olavulaka sa Tiithi ahu a wiirimu, aahimmye so: “Nyuwo Apwiya! Nyuwo mwá Muluku okhuma wopajeryani. Nyuwo mwá Muluku aka, òrerexa murima ni òhimala”. — Hab. 1:12.

4. Xeeni nihinreerela ahu oxanka okathi nihiniiwexexa ahu moota Yehova opacenrye awe okhala? Mutthokiherye.

⁴ Niireke vannooxankihani okupali wira Yehova Muluku onikhala “mahiku othene”? (Yes. 40:28) Nave atthu anceene anoonela siiso. Elihu olavulaka sa Muluku aahimmye so: “Khaninwerya walikela watta wa iyakha sawe”. (Yobi 36:26) Masi mwaha woohisuwela itthu sootheene sa Muluku, eyo khentaphulela wiira itthu iyo khahiyo seekeekhai. Mwa ntakiheryo, nnaamwi nihisuwela moota energia enimpattiha aya luuxu, masi ninnikupali wiira eyo yookhala. Mwa enamuna emosa-ru, hiyo khaninwerya osuwela moota Yehova opacenrye awe ni etthu enimwiiriha okhalaka mahiku ootheene. Masi eyo khentaphulela wiira Muluku khonikhala mahiku ootheene. Ekeekhai voohimya sa Mpattuxa ahu khenlipa ni itthu ninwerya ahu wiiwexexa aahiiso nihinwerya ahu. (aRom. 11:33-36) Yehova aahikhala hata sihinatthi opattuxiwa itthu sootheene siri valaponi ohela muhina nsuwa ni itheneeri. Nave onihimya wiira: “Opattuxa elapo ni owerya wawe”, ni aanikhala ohinatthi ‘watala erimu’. (Yer. 51:15; Mit. 17:24) Etthu xeeni ekina ennikupaliha wiira vanniweryaneya okhala mahiku ootheene?

NIPATTUXIWE WIIRA NIKHALEKE MAHIKU OOTHEENE

5. Etthu xeeni Yehova aarowa awe waavaha Adamu ni Eva vakhanle wiira yaahimwiiwelela?

⁵ Mwa itthu sootheene sipattuxiwe valaponi, apinaatamu paahi tapattuxiwe wiira ekhaleke mahiku ootheene. Apinaatamu paahi tapattuxiwe wiira ekhaleke mahiku ootheene. Hata vari siiso, Yehova aahaalopola Adamu ohimyaka wiira: “Muhilyé pahi mihokorokho sa mwirí onsuweliha oreriwa n’utakhaliwa. Mwalyá vale mihokorokho iya, tthiri munimokhwa”. (Maph. 2:17) Vaakhanle wiira Adamu ni Eva yaahimwiiwelela Yehova, awo khiyaarowa ookhwa. Woonasa wene, muhoolo Yehova anweemererya Adamu ni Eva olya mihokorokho sa “mwirí w’ekumi”. Okathi yaarowa aya muhokorokho owo, awo yaamukhala “mukumi vohimala-tho!”b — Maph. 3:22.

6-7. (a) Itthu xeeni sinooniherya wiira apinaatamu khapattuxiwe wiira akhweeke? (b) Exeeni muniphavela anyu opaka mparayiisu? (Nwehe ilatarato.)

⁶ Olelo-va, apinaatamu anniwerya oviriha iyaakha 70 wala 80 ari ene akumi. Masientista ahoona wiira ottoopare wa apinaatamu onniwerya opweha myaha mwa iyaakha sinceene. Mwaakha wa 2010, exornaale emosa yaahimmye wiira owerya orina aya ottoopare wa apinaatamu, onlikanasa ni eviidiyu evirinhe iwoora soowiiraka imilyau tthaaru (3.000.000) ekaravariwaka. Nto wiira mutthu owehe eviidiyu eyo yootheene, sanvira iyaakha sinivikana 300. Masi ottoopare ahu onniwerya opweha myaha sinceene ovikana ele masientista ahimmye aya. Eyo enooniherya wiira, enamuna Yehova opattunxe awe ottoopare ahu aaphavela wiira nikhaleke mahiku ootheene ohiya iyaakha 70 wala 80 paahi. — Esal. 90:10.

⁷ Yehova ohaapattuxa apinaatamu ni yoophavela ya okhala mahiku ootheene. Tivonto Biibiliya onihimya awe so: “Owo ònivaha otthuna osuwela sivinre ni s’oholo”. (Mus. 3:11) Ti maana naya nnoona ahu okhwa ntoko nwanani. (1 aKor. 15:26) Mwa ntakiheryo, okathi ninwereiwa ahu vanceene, niireke khannipaka etthu, ninlipelela okhwa paahi? Nnaari. Ikwaha sinceene ninnirowa ospitaali wiira nalooliwe. Vanooneya wiira ootheene ahu okathi ninwereiwa ahu, ninnipaka khula etthu wiira nihikhwe. Okathi mmusi ahu onikhwa awe, hata wuuluvanle ene, ori ene mmiravo aahiiso mwaana, hiyo ninniriipiwa murima vanceene. (Yoh. 11:32, 33) Vaakhanle wiira Yehova onipattunxe wiira nikhaleke mahiku vakhaani paahi, khivaarowa onoopihaka okhwa. Masi, sookhala itthu sikina sinnikupaliha wiira nipattuxiwe para okhala mahiku ootheene. Nrowe niwehe itthu Yehova aapanke awe khalai ni onipaka awe vano, sinooniherya wiira owo khoturunke yoolakela awe.

YOOLAKELA YA YEHOVA NLELO KHETURUKEYALE

8. Yesaya 55:11, onniixuttiha-ni sa yoolakela ya Yehova?

⁸ Adamu ni Eva aattheka, ni mwaha wa yeeyo atthu ootheene annookhwa. Masi nnaamwi vari siiso, yoolakela ya Yehova kheturukeyale. (Mmusome Yesaya 55:11.) Nlelo Yehova onniphavela waavaha arumeyi awe okumi woohimala. Ninnisuwela eyo, mwaha wa itthu Yehova onihimya awe ni onipaka awe wiira omalelihe yoolakela awe.

9. Itthu xeeni Muluku onileiherya awe? (Daniyeli 12:2, 13)

⁹ Yehova ooleiherya waahihimuxa ale akhwiiye wiira yakhaleke mahiku ootheene. (Mit. 24:15; Tito 1:1, 2) Yobi yoowo aari murumeyi oororomeleya, aanikupali wiira Yehova onimwahihimuxa atthu akhwiiye. (Yobi 14:14, 15) Nave profeta Daniyeli aanisuwela wiira atthu akhwiiye anoohihimuxiwa wiira aphwanye okumi woohimala. (Esal. 37:29; mmusome Daniyeli 12:2, 13.) Nave-tho ayuda a okathi wa Yesu, yaanisuwela wiira Yehova aamwaavaha arumeyi awe oororomeleya “okumi woohimala”. (Luka 10:25; 18:18) Yesu aahilavula sa nlipelelo nlo ikwaha sinceene, nave Tiithi awe aahimuhihimuxa. — Math. 19:29; 22:31, 32; Luka 18:30; Yoh. 11:25.

10. Soowiiraneya sa ohihimuxiwa siiraneyale khalai, sinniixuttiha exeeni olelo-va? (Nwehe edesenyo.)

¹⁰ Yehova tori mwaneene okumi ni ookhalana owerya woowaahihimuxa atthu akhwiiye. Yehova aahinvaha owerya profeta Eliya wiira omuhihimuxe mwaana a naamukhweli a oSarefa. (1 Mam. 17:21-23) Muhoolo mwaya, okhaliheriwaka ni Muluku, profeta Eliseyo aahimuhihimuxa mwaana a muthiyana oXunemi. (2 Mam. 4:18-20, 34-37) Soowiiraneya iya ni sikina, sinnooniherya wiira Yehova ookhalana owerya woowaahihimuxa atthu akhwiiye wiira akhale-tho akumi. Okathi aari awe valaponi, Yesu aahooniherya wiira Tiithi awe aahinvaha owerya wa waahihimuxa atthu. (Yoh. 11:23-25, 43, 44) Vano Yesu ori awe wiirimu oovahiwa “okhulupale wotheene, wiirimu ni vathi-va”. Nto owo onoomaleliha yooleiherya eni: “Atthu otheene ari mmahiye”, anoohihimuxiwa wiira aphwanye okumi woohimala. — Math. 28:18; Yoh. 5:25-29.

11. Mwaha wa mukuttho wowoopola, vanweryaneya sai ophwanya okumi woohimala?

¹¹ Xeeni Yehova eemerenrya awe wiira Yesu iiviwe mwa enamuna yoowereya? Yesu aahimmye so: “Tthiri, Muluku oophentexa olumwenku, mpakha onvaha Mwanawe mmoseene, wira otheene ale anooniherya omwaamini yoowo, ahipwetexiwe, masi akhalane okumi woohimala”. (Yoh. 3:16) Mwaha wa mukuttho wowoopola wa Yesu, vaaweryaneya oleveleliwa itampi sahu, ni ophwanya okumi woohimala. (Math. 20:28) Murummwa Paulo, olavulaka sa efaita erina aya yoolakela ya Muluku, aahimmye so: “Okhala wira okhwa wookhumelela mwaha wa mulopwana mmosa, nave-tho, ohihimuxiwa wa alipa-ookhwa onrowa okhumelela mwaha wa mulopwana mmosa. Siisaale atthu otheene anikhwa aya mwaha wa Adamu, siiso-tho, atthu otheene anookhalihiwa akumi mwaha wa Kristu”. — 1 aKor. 15:21, 22.

12. Yehova onrowa orumeela sai Omwene awe wiira omalelihe yootthuna awe?

¹² Yesu aahiwiixuttiha atthareli awe ovekela wiira Omwene wa Muluku orwe ni itthu siniphavela awe siireye vathi-va. (Math. 6:9, 10) Nave etthu Muluku oniphavela awe ori waavaha okumi woohimala apinaatamu ootheene. Wiira owerye opaka eyo, Yehova oomuthanla Mwanawe wiira okhale Mwene a omwene wa oMesiya. Muluku onnaathanla atthu oowiiraka 144.000 valaponi, yaawo vamosa ni Yesu anrowa omaleliha yootthuna ya Muluku. — Wiis. 5:9, 10.

13. Etthu xeeni Yehova onipaka awe wiira omalelihe yooleiherya awe, nto ninrowa okhaliherya sai?

¹³ Olelo-va, Yehova onnaathukumanya ni owiixuttiha atthu a “muttitthi muulupale” wiira aweryeke wiiwelela omwene awe. (Wiis. 7:9, 10; Yak. 2:8) Mwa ntakiheryo, atthu anceene olelo-va aakawanyeya, mwaha wa nthalu ni ikhotto. Masi ale aniirela mpantta muttitthi muulupale anniixutta waaphenta atthu a maloko ootheene, ilapo sootheene ni osyaka okhalana nthalu ni onyokhana. Awo annooniherya ni miteko saya wiira aakuxa iyuuma sa ekhotto ekhaliha ihipa. (Mik. 4:3) Ohiya wiirelaka mpantta ikhotto seiyo siniwiiva atthu anceene ni ohonona itthu, awo annaakhaliherya atthu anceene omusuwela Muluku a ekeekhai, soolakela sawe ni moota woophwanya “okumi weekeekhai”. (1 Tim. 6:19) Mwaha wookhaliheryaka Omwene wa Muluku, atthu awo a muttitthi muulupale, anninyokhiwa ni amusi aya aahiiso annithoiwa musurukhu. Masi Yehova khula okathi onnaavaha itthu sinaathowa. (Math. 6:25, 30-33; Luka 18:29, 30) Itthu iyo sootheene sinooniherya wiira Omwene wa Muluku ti weekeekhai ni khonihiya omaleliha yootthuna ya Yehova.

NLIPELELO NOOHAKALALIHA

14-15. Yehova onrowa omaleliha sai yooleiherya awe ya omaliha okhwa?

¹⁴ Vano Yesu onilamulela wiirimu nave moohipisa onrowa omaleliha itthu sootheene Yehova oleiherya awe. (2 aKor. 1:20) Okhuma mwaakha wa 1914, Yesu onnaaxintta awanani awe. (Esal. 110:1, 2) Moohipisa Yesu vamosa ni a 144.000, anrowa waapwetexa atakhali ootheene ari valaponi. — Wiis. 6:2.

¹⁵ Okathi wa Olamulelo wa Iyaakha Ekonto Emosa, Yesu onrowa waahihimuxa atthu akhwiiye ni waakhaliherya atthu ootheene animwiiwelela Yehova okhala oohittheka. Nuuvira yooweeha yookiserya, atthu ootheene Yehova onrowa awe waaweha okhala anaxariya “animwakhela elapo yohiyeriw’aya: anrowa okhala-mo mahiku othene”. (Esal. 37:10, 11, 29) Nuumala-vo “okhwa, ti nwanani ookiserya onrowa opwetexiwa”. — 1 aKor. 15:26.

16. Etthu xeeni yuulupale enniiriha omurumeela Yehova?

¹⁶ Ntoko niixuntte ahu mwaha ola, nlipelelo nahu na okumi woohimala ninlipa ni Nuulumo na Muluku. Nto nlipelelo nlo, nnoonikhaliherya ohihiya omuroromela Yehova mahiku ala ookiserya ni ooxankiha. Wiira nimuhakalalihe Yehova, nihaana omurumeela ohiya paahi mwaha woophavela ophwanya okumi woohimala. Etthu enrowa onikhaliherya okhala oororomeleya wa Yehova ni wa Yesu, ori waaphenta wahu vanceene. (2 aKor. 5:14, 15) Niphento nlo, nnoonikhaliherya omutakiha Yehova ni Yesu ni waaleela atthu akina nlipelelo nno. (aRom. 10:13-15) Okathi nnaathokorerya ahu atthu akina ni okhala oovaha, Yehova onookhalaka mpatthani ahu wa mahiku ootheene. — aHeeb. 13:16.

17. Yoothanla xeeni khula mmosa a hiyo okhanle awe oopaka? (Matheyo 7:13, 14)

¹⁷ Niireke nnookhala vamosa naale anrowa ophwanya okumi woohimala? Yehova onnaavaha atthu ootheene eparakha eyo. Masi hiyo nikhanle oothanla vakhala wiira ninrowa oottharaka ephiro ya okumi. (Mmusome Matheyo 7:13, 14.) Makhalelo anrowa okhala sai nuumala ophwanya okumi woohimala? Mwaha onittharelana, onoonikhaliherya waakhula nikoho nla.